ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⵣⴻⵏ ⵏ ⵓⵙⴻⵍⵡⴰⵢ ⴱⵧⵓⵜⴻⴼⵍⵉⴽⴰ ⵉ ⵍⵎⴻⵏⴷ ⵏ ⵓⵎⵓⵍⵍⵉ ⵡⵉⵙ 59 ⵏ ⵡⴰⵙⵙ ⵏ 19 ⵎⴰⵢⵓ 1956 (ⴰⴹⵔⵉⵙ ⵓⵎⵎⵉⴷ)

ⵎⴷⵉⵢⴰ (ⵜⴰⵏⴻⴳⴳⴰ) – ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ ⵢⵓⵣⴻⵏ, ⴰⵙⵙ ⵏ ⵜⵜⵍⴰⵜⴰ, ⵉⵣⴻⵏ ⵉ ⵍⵎⴻⵏⴷ ⵏ ⵓⵎⵓⵍⵍⵉ ⵡⵉⵙ 59 ⵏ ⵡⴰⵙⵙ ⵏ ⵓⵏⴻⵍⵎⴰⴷ, ⵢⴻⵖⵔⴰ-ⵜ-ⵉⴷ ⵙ ⵢⵉⵙⴻⵎ-ⵉⵙ ⵎⴰⵙⵙ ⵎⵧⵀⴰⵎⴻⴷ ⴱⴻⵏⴰⵎⴰⵔ ⵣⴻⵔⵀⵧⵓⵏⵉ, ⴰⵎⵡⴻⵚⵚⵉ ⵏ ⵜⵙⴻⵍⵡⵉⵜ ⵏ ⵜⴻⴳⴷⵓⴷⴰ. ⵀⴰ-ⵜⵜ-ⴰⵏ ⵜⵙⵓⵖⵉⵍⵜ ⵏ ⵜⵏⴻⴳⴳⴰ.

ⵜⵉⵏⴻⵍⵎⴰⴷⵉⵏ ⵖⵍⴰⵢⴻⵏ, ⵉⵏⴻⵍⵎⴰⴷⴻⵏ ⵖⵍⴰⵢⴻⵏ,

ⴰⴷ ⵏⴻⴱⴷⴻⵔ ⴰⵙⵙ ⵢⴻⴽⵍⴰⵍⴻⵏ ⴰⴷ ⵏⴻⵛⴼⵓ ⴼⴻⵍⵍ-ⴰⵙ, ⴷ ⵛⴼⴰⵢⴰ ⵏ ⵜⵏⴻⴽⵔⴰ ⵏ ⵛⵛⵓⵇ ⵏ ⵢⵉⵏⴻⵍⵎⴰⴷⴻⵏ ⵉ ⵢⴻⴵⴵⴰⵏ ⴰⵙⵙ ⵏ 19 ⵎⴻⵖⵔⴻⵙ 1956, ⵉⴽⵓⵔⵙⵉⵢⴻⵏ ⵏ ⵜⴻⵙⴷⴰⵡⵉⵜ ⴷ ⵜⴻⵙⵏⴰⵡⵉⵢⵉⵏ ⴰⴽⴽⴻⵏ ⴰⴷ ⴽⴻⵛⵎⴻⵏ ⴰⵎⴻⵏⵏⵓⵖ ⵏ ⵓⵙⵍⴻⵍⵍⵉ.

ⵎⴰ ⵢⴻⵍⵍⴰ ⵏⴻⵙⴼⵓⴳⴻⵍ ⴰⵙⵙ-ⴰ ⵜⵉⴳⴰⵡⵜ-ⴰ ⵎⴻⵛⵀⵓⵔⴻⵏ, ⴰⴽⴽⴻⵏ ⴰⴷ ⵏⴻⵎⵎⴻⴽⵜⵉ ⴷⴻⴳ ⵢⵉⵡⴻⵜ ⵏ ⵜⵎⵓⵖⵍⵉ ⵏ ⵓⵙⵜⴻⵄⵔⴻⴼ ⴷ ⵓⴽⴻⵎⵎⴻⵍ ⵏ ⵜⵉⴽⵍⵉ ⴷⴻⴳ ⵓⴱⵔⵉⴷ-ⵉⵙ, ⵎⴰⵛⴰ ⴷⴰⵖⴻⵏ ⴷ ⴰⵅⴻⵎⵎⴻⵎ ⴷ ⵓⵍⵎⴰⴷ, ⵏ ⵢⵉⵎⴻⵛⵛⴰⵇⴻⵏ ⵉⴳⴻⵊⴷⴰⵏⴻⵏ ⵏ ⵓⵎⴻⵣⵔⵓⵢ ⵉ ⴷ ⵏⴻⵣⴳⴻⵔ ⵏ ⵜⴻⴳⵔⴰⵡⵍⴰ-ⵏⵏⴻⵖ ⵎⴻⵛⵀⵓⵔⴻⵏ ⵉ ⵢⴻⵙ-ⵙ ⵏⴻⵜⵜⵣⵓⵅⵅⵓ.

ⴰⵣⴻⵎⵣ-ⴰ ⵉ ⵏⴻⵙⴼⵓⴳⵓⵍ ⵜⴻⵜⵜⴰⵔⵔⴰ-ⴰⵖ, ⵙ ⵜⵉⴷⴻⵜ, ⵖⴻⵔ ⵜⴰⵍⵍⵉⵜ ⵏ ⵜⴻⵎⵥⵉ-ⵏⵏⵉ ⵏ ⵜⵏⴻⴽⵔⴰ ⵉ ⴷ-ⵢⴻⵔⵔⴰⵏ ⴰⵡⴰⵍ ⵉ ⵜⴻⵖⵔⵉ ⵏ ⵍⵡⴰⴵⴻⴱ ⵏ ⵓⵙⵍⴻⵍⵍⵉ ⵏ ⵜⵎⵓⵔⵜ, ⵙ ⴱⴻⵇⵇⵓ ⵓⵔ ⵏⴽⴻⵏⵏⵓ ⴷ ⵍⴻⵃⵎⴰⵍⴰ ⵜⴰⵎⴻⵇⵔⴰⵏⵜ ⵏ ⵜⵎⵓⵔⵜ.

ⵉⵍⵎⴻⵥⵢⴻⵏ ⵏ ⵍⴻⵣⵣⴰⵢⴻⵔ ⵏ ⵜⴰⵍⵍⵉⵜ-ⵏⵏⵉ ⵢⴻⵍⵍⴰⵏ ⵙⵄⴰⵏ ⵍⵉⵎⴰⵏ ⴰⵍⵇⴰⵢⴰⵏ ⴱⴻⵍⵍⵉ ⵓⵔ ⵣⵎⵉⵔⴻⵏ, ⵉⴳⴻⵔⴷⴰⵙⴻⵏ ⵉⵙⴷⴰⵡⴰⵏⴻⵏ, ⴰⴷ ⵜⴻⵏ-ⵙⵙⵉⵡⴹⴻⵏ ⵙ ⴰⵙⵡⵉⵔ ⵉⵎⵇⴻⴷⴷⴻⵙ ⵏ ⵓⵎⴻⵖⵔⴰⵙ ⵢⴻⵖⵍⵉⵏ ⵖⴻⴼ ⵜⵎⵓⵔⵜ. ⴷⴷⴰⵏ ⵉⵀⵉ ⴷ ⵜⴻⴳⵔⴰⵡⵍⴰ ⴰⴽⴽⴻⵏ ⴰⴷ ⵙⵍⴻⵍⵍⵉⵏ ⴰⵖⵔⴻⴼ-ⵏⵙⴻⵏ, ⴰⴷ ⵜ-ⵉⴷ-ⵙⵙⵓⴼⵖⴻⵏ ⵙⴻⴳ ⵜⴻⴱⵔⴻⴽ ⵏ ⵢⵉⴹ ⵜⴰⵎⵀⴻⵔⵙⴰⵏⵜ, ⵖⴻⵣⵣⵉⴼⴻⵏ, ⵢⴻⵇⵇⵉⵎⴻⵏ 132 ⵉⵙⴻⴳⴳⴰⵙⴻⵏ.

ⵉⵎⴻⵏⵣⴰ-ⵏⵡⴻⵏ ⴼⴻⵀⵎⴻⵏ ⴱⴻⵍⵍⵉ ⵓⵔ ⵙⵄⵉⵏ ⴰⵔⴰ ⵍⵅⴻⵜⵢⴰⵔ ⴰⵍⴰ ⴰⵏⴻⴽⵛⵓⵎ ⵙ ⴰⵏⵔⴰⵔ ⵏ ⵢⵉⵎⴻⵏⵖⵉ, ⴷⴻⴳ ⵓⵎⴰⴷⴰⵖ, ⴷⴻⴳ ⵜⴻⵎⴷⵉⵏⵉⵏ ⴷ ⵜⵓⴷⵔⵉⵏ, ⴷⴻⴳ ⵓⵏⴻⵥⵔⵓⴼ ⴷ ⵢⵉⵏⵉⴳ ⴰⴽⴽⴻⵏ ⵙⴻⴳ ⵜⴰⵎⴰ, ⴰⴷ ⵄⴰⵡⴻⵏ ⵉⵎⴵⵓⵀⴰⴷ, ⵙⴻⴳ ⵜⴰⵎⴰ ⵏⵏⵉⴹⴻⵏ ⴰⴷ ⴰⵙ-ⵔⵏⵓⵏ ⵜⴰⵣⵎⴻⵔⵜ ⵉ ⵜⴻⴳⵔⴰⵡⵍⴰ ⵙ ⵜⵓⵙⵙⵏⴰ ⴷ ⵜⵎⵓⵙⵏⵉ ⵉ ⴷ-ⵍⴻⵎⴷⴻⵏ ⵎⴰⵞⵞⵉ ⵙ ⵙⵀⴰⵍⴰ. ⵉⵣⴷⴻⵖ-ⵉⵜⴻⵏ ⵍⵉⵎⴰⵏ ⵉⴵⴻⵀⴷⴻⵏ ⵏ ⵢⵉⵖⴻⵍⵏⴰⵥⵔⵉⵢⴻⵏ, ⵜⵄⴻⵡⵍⴻⵏ ⴰⴷ ⴱⴻⴷⴷⴻⵏ ⵙ ⵍⵇⴻⴷ ⵉ ⵢⴻⵎⵏⴻⴽⵛⴰⵎⴻⵏ ⴰⵏⴷⴰ ⵎⴰ ⵍⵍⴰⵏ, ⴷⵉⵏⴷⵉⵏ ⵜⵓⵖⴰⵍ ⵜⵉⴽⴽⵉⵏ-ⵏⵙⴻⵏ ⴷ ⴰⵄⵉⵡⴻⵏ ⴰⵎⴻⵇⵔⴰⵏ ⵉ ⵓⵎⴻⵏⵏⵓⵖ ⴰⵖⴻⵍⵏⴰⵡ ⵙⴻⴳ ⴰⴽⴽ ⵜⵉⵖⴻⵎⵎⴰⵔ-ⵉⵙ.

ⵜⵉⵏⴻⵍⵎⴰⴷⵉⵏ ⵖⵍⴰⵢⴻⵏ, ⵉⵏⴻⵍⵎⴰⴷⴻⵏ ⵖⵍⴰⵢⴻⵏ,

ⵢⴻⵙⵙⴻⴼⴽ ⴰⴷ ⴷ-ⵏⴻⵙⵎⴻⴽⵜⵉ, ⴰⵙⵙ-ⴰ, ⴷⴰⴽⴽⴻⵏ ⵢⴻⵙⵙⴻⴼⴽ ⵖⴻⴼ ⵢⵉⵏⴻⵍⵎⴰⴷⴻⵏ ⴷ ⵜⵏⴻⵍⵎⴰⴷⵉⵏ-ⵏⵏⴻⵖ ⴰⴷ ⵃⴻⵔⵣⴻⵏ ⴰⵙⴰⴼⵓ ⵏ ⵓⵃⴻⵎⵎⴻⵍ ⵏ ⵜⵎⵓⵔⵜ ⴰⵢ ⴰⵖ-ⴷ-ⵡⵡⵉⵏ ⵛⵛⵓⵀⴰⴷⴰ-ⵏⵏⴻⵖ ⵖⵍⴰⵢⴻⵏ ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⵇⴰⴷⵔⴻⵏ ⴰⵣⴰⵍⴻⵏ ⵉⵖⴻⵍⵏⴰⵡⴻⵏ, ⴰⵎ ⵡⴰⴽⴽⴻⵏ ⴰⵔⴰ ⵢⴻⵇⵇⵉⵎ ⵖⴻⵔ-ⵙⴻⵏ ⵕⵕⵓⵃ ⵏ ⵓⵅⴻⴷⴷⵉⵎ ⵙⴻⴳ ⵡⵓⵍ ⴷ ⵓⴷⴻⵇⵇⴻⵇ ⴰⴽⴽⴻⵏ ⴰⴷ ⵔⴻⴱⵃⴻⵏ ⵢⴻⵔⵏⴰ ⴰⴷ ⴷⴷⵓⵏ ⵖⴻⵔ ⵙⴷⴰⵜ ⴷⴻⴳ ⵡⴰⴽⴽ ⵉⵏⵓⵔⴰⵔ.

ⴰⵙⵎⴻⴽⵜⵉ ⵏ ⵓⵎⴻⵣⵔⵓⵢ-ⵏⵏⴻⵖ ⴷ ⴰⵢⴻⵏ ⵢⴻⵙⵄⴰⵏ ⴰⵣⴰⵍ, ⴱⵉⵜⵜ ⴰⵢⴰ ⴷ ⵍⵡⴰⵊⴻⴱ ⴰⵖⴻⵍⵏⴰⵡ ⴰⵢ ⴰⵖ-ⵜⵜⴰⵍⴰⵙⴻⵏ ⵢⵉⵏⴻⵍⵎⴰⴷⴻⵏ-ⵏⵏⴻⵖ ⴰⵢ ⵢⴻⵎⵎⵓⵜⴻⵏ ⴷ ⵛⵛⵓⵀⴰⴷⴰ ⵢⴻⵔⵏⴰ ⵓⴽⵍⴰⵍⴻⵏ ⴰⴷ ⴰⵙⴻⵏ-ⵏⴻⵔⵔ ⵜⴰⵊⵎⵉⵍⵜ ⵖⴻⴼ ⵡⴰⵢⴻⵏ ⴰⵢ ⴼⴽⴰⵏ ⴷ ⴰⵙⴼⴻⵍ.

ⵢⵉⵡⴻⵏ ⵙⴻⴳ ⵢⵉⵙⴰⵏ ⵉⵎⴻⵇⵔⴰⵏⴻⵏ ⴰⴽⴽ ⴷⴻⴳ ⵓⵙⵎⴻⴽⵜⵉ-ⴰ, ⵎⴻⴱⵍⴰ ⵛⵛⴻⴽ, ⵏⴻⵜⵜⴰ ⴷ ⵜⵉⴳⵉⵏ ⵏ ⵢⵉⴼⴰⴷⴷⴻⵏ ⵉ ⵢⵉⵏⴻⵍⵎⴰⴷⴻⵏ-ⵏⵏⴻⵖ ⵉⵍⴻⵎⵥⵉⵢⴻⵏ ⴰⴽⴽⴻⵏ ⴰⴷ ⵃⴻⵔⵣⴻⵏ, ⵙ ⵓⴹⴼⴰⵔ ⵏ ⵓⴱⵔⵉⴷ ⵏ ⵍⴻⵊⴷⵓⴷ-ⵏⵙⴻⵏ ⴰⵢ ⵢⴻⵙⵙⴻⴼⴽⴻⵏ ⴰⴷ ⵉⵍⵉⵏ ⴷ ⵜⴰⵍⴰ ⴰⵢⵙⴻⴳ ⴰⵔⴰ ⴷ-ⵜⵜⴰⴳⵎⴻⵏ ⴷⵉⵎⴰ ⵕⵕⵓⵃ ⵏ ⵓⵅⴻⴷⴷⵉⵎ ⴷ ⵜⵓⴽⵛⵉ ⵎⴻⴱⵍⴰ ⴹⴹⵎⴻⵄ ⴰⴽⴽⴻⵏ ⴰⴷ ⵣⴻⵎⵔⴻⵏ ⴰⴷ ⵇⴰⴱⵍⴻⵏ ⵓⴳⵓⵔⴻⵏ ⴰⵢ ⴷ-ⵏⴻⵜⵜⵎⴰⴳⴰⵔ ⴰⴽⴽ.

ⴷ ⴰⵢⴻⵏ ⵉⴱⴰⵏⴻⵏ ⴷⴰⴽⴽⴻⵏ ⵉⵙⵡⵉ ⴰⵎ ⵡⴰ ⵓⵔ ⵜ-ⵏⴻⵜⵜⴰⵡⴻⴹ ⴰⵔⴰ ⵎⴻⴱⵍⴰ ⵎⴰ ⵏⴳⴰ ⵍⵡⴰⵊⴻⴱ-ⵏⵏⴻⵖ ⴰⴽⴽⴻⵏ ⵢⴻⴽⵎⴻⵍ ⵙ ⵕⵕⵓⵃ ⵏ ⵜⴻⵣⴷⴻⴳ ⴰⵢⴷⴻⴳ ⴰⵅⴻⴷⴷⵉⵎ ⴰⴷ ⵢⵉⵍⵉ ⵢⴻⵎⵄⴻⵏ ⵢⴻⵔⵏⴰ ⴰⴷ ⵢⴻⵜⵜⵡⴰⵅⴷⴻⵎ ⵙ ⵜⵓⴽⵛⵉ ⵏ ⵜⵓⵣⵡⵉⵔⵜ ⵉ ⵏⵏⴼⴻⵄ ⵏ ⵜⵎⵓⵔⵜ ⵓⵇⴱⴻⵍ ⵏⵏⴼⴻⵄ ⵓⴷⵎⴰⵡⴰⵏ. ⴷⴻⴳ ⵜⵉⴷⴻⵜ, ⵢⴻⵙⵙⴻⴼⴽ ⵖⴻⴼ ⵓⵎⴷⴰⵏ ⴰⴷ ⵢⴻⴽⵛⴻⵎ ⴷⴻⴳ ⵓⴱⵔⵉⴷ ⵏ ⵓⵏⵏⴻⵔⵏⵉ ⴰⵎⴰⵜⵓ, ⵢⴻⵔⵏⴰ ⴰⴷ ⴷ-ⵢⴻⵎⵢⴻⵣⴳ ⴷ ⵡⴰⵢⴻⵏ ⴰⵢ ⴷ-ⵢⴻⵜⵜⴱⴰⵏⴻⵏ ⴰⵙⵙ-ⴰ ⵢⴻⵔⵏⴰ ⵉⵃⴻⵜⵜⴻⵎ-ⴷ ⴰⴱⴻⴷⴷⴻⵍ ⴰⴽⴽⴰ ⴰⵢ ⵍⴰ ⴷ-ⵢⴻⵜⵜⵉⵍⵉ ⵉⵎⵉⵔ-ⴰ. ⴷⵖⴰ ⵓⵔ ⵏⴻⵃⵡⴰⵊ ⴰⵔⴰ ⴰⴷ ⴷ-ⵏⵉⵏⵉ ⴷⴰⴽⴽⴻⵏ ⵉⵙⵡⵉ-ⵏⵏⴻⵖ ⴰⵏⴻⴳⴳⴰⵔⵓ ⵏⴻⵜⵜⴰ ⴷ ⴰⵔⴼⴰⴷ ⵏ ⵜⵎⵓⵔⵜ-ⵏⵏⴻⵖ ⵖⴻⵔ ⵢⵉⵙⵡⵉⵔⴻⵏ ⵉⵄⵍⴰⵢⴰⵏⴻⵏ ⵏ ⵓⵜⵇⴻⴷⴷⴻⵎ ⵖⴻⵔ ⵙⴷⴰⵜ.

ⵢⴰⵍ ⵜⵉⴽⴽⴻⵍⵜ ⴰⵢⴷⴻⴳ ⴰⵔⴰ ⴷ-ⵏⴻⵙⴼⵓⴳⴻⵍ ⵜⴰⴷⵢⴰⵏⵜ-ⴰ ⴰⵢ ⵢⴻⵜⵜⴼⴻⵊⵊⵉⵊⴻⵏ ⴷⴻⴳ ⵓⵎⴻⵣⵔⵓⵢ-ⵏⵏⴻⵖ, ⵏⴻⵜⵜⵎⴻⵢⵢⵉⵣ ⵖⴻⴼ ⵡⴰⵢⴰ ⴷⴻⴳ ⵜⴻⵙⴷⴰⵡⵉⵢⵉⵏ-ⵏⵏⴻⵖ ⴰⵢ ⴷ-ⵢⴻⵍⵍⴰⵏ ⴷ ⴰⵣⴰⵎⵓⵍ ⵏ ⵏⵏⵉⴼ-ⵏⵏⵉ ⴰⵢ ⴷ-ⵏⴻⵔⵔⴰ, ⴰⵛⴽⵓ ⵜⴰⵙⴷⴰⵡⵉⵜ ⵜⴻⵜⵜⵖⵉⵎⵉ-ⴷ ⴷ ⴹⴹⵎⴰⵏⴰ ⵜⵉⵎⵅⴻⵢⵢⴻⵔⵜ ⴰⴽⴽ ⵏ ⵛⵛⴼⴰⵡⴰ ⵜⵓⵛⵔⵉⴽⵜ ⴷ ⵜⴻⴷⵢⴰⵏⵉⵏ ⵜⵉⵎⴻⵇⵔⴰⵏⵉⵏ ⵏ ⵜⵎⵓⵔⵜ-ⵏⵏⴻⵖ.

ⴰⵎⵎⴻⴽⵜⵉ-ⴰ, ⵙ ⵜⴻⵎⵖⴻⵔ ⴷ ⵓⵣⴰⵎⵓⵍ-ⵏⵏⴻⵙ, ⵢⴻⴼⴽⴰ-ⴰⵖ-ⴷ ⵜⴰⴳⵏⵉⵜ ⴰⴽⴽⴻⵏ ⴰⴷ ⴷ-ⵏⴻⵙⵙⴽⴻⵏ, ⵓⴳⴰⵔ ⵏ ⵣⵉⴽ, ⴰⵣⴰⵍ ⴰⵢ ⵢⴻⵙⵄⴰ ⵓⵍⵎⴰⴷ ⴰⴽⴽⴻⵏ ⴰⴷ ⴷⴷⵓⵏ ⵎⴻⴷⴷⴻⵏ ⵖⴻⵔ ⵙⴷⴰⵜ ⵢⴻⵔⵏⴰ ⴰⴷ ⴷ-ⵢⵉⵍⵉ ⵓⵏⵏⴻⵔⵏⵉ ⴷⴻⴳ ⵜⴷⴰⵎⵙⴰ, ⴷ ⴰⵏⵏⴻⵔⵏⵉ ⴰⵔⴰ ⵉⵏⴻⴼⵄⴻⵏ ⵉⵎⴷⴰⵏⴻⵏ ⴰⴽⴽⴻⵏ ⵎⴰ ⵍⵍⴰⵏ.

ⴷⵖⴰ ⴷⴻⴳ ⵜⴻⵎⵙⴰⵍⵜ-ⴰ, ⵉⵡⴰⵜⴰ ⵎⴰ ⵏⴻⵏⵏⴰ-ⴷ ⴷⴰⴽⴽⴻⵏ ⵜⴼⵓⴽ ⵜⴰⵍⵍⵉⵜ-ⵏⵏⵉ ⴰⵢⴷⴻⴳ ⵜⵉⴷⴷⵉⵏ ⵖⴻⵔ ⵙⴷⴰⵜ ⵜⴻⵇⵇⴻⵏ ⵖⴻⵔ ⵍⵅⵉⵔ ⵢⴻⵍⵍⴰⵏ ⴷⴻⴳ ⵡⴰⴽⴰⵍ. ⵙ ⵡⴰⵢⴰ, ⵢⴻⵙⵙⴻⴼⴽ ⴰⴷ ⵢⴻⵜⵜⵓⵏⴻⴼⴽ ⵡⴰⵣⴰⵍ ⴰⵎⴻⵇⵔⴰⵏ ⵉ ⵜⵣⴻⵎⵎⴰⵔ ⴰⵢ ⵢⴻⵣⵎⴻⵔ ⴰⴷ ⵜⴻⵏⵜ-ⵉⴷ-ⵢⴻⴼⴽ ⵓⵎⴷⴰⵏ ⵢⴻⵔⵏⴰ ⴰⵢⴰ ⵓⵍⴰⵛ ⵜⴰⵔⴻⵡⵍⴰ ⴼⴻⵍⵍ-ⴰⵙ ⴷⴻⴳ ⵢⴰⵍ ⵜⵉⴽⵍⵉ ⵏ ⵓⵏⵏⴻⵔⵏⵉ.

ⴷ ⴰⵢⴻⵏ ⵉⴱⴰⵏⴻⵏ ⴷⴰⴽⴽⴻⵏ ⵜⵉⴷⴷⵉⵏ ⵖⴻⵔ ⵙⴷⴰⵜ ⵏ ⵍⴻⵊⵏⴰⵙ ⵜⴻⵇⵇⴻⵏ ⵖⴻⵔ ⵜⵎⵓⵙⵙⵏⵉⵡⵉⵏ ⴰⵢ ⴷ-ⵙⵙⵓⴼⴼⵓⵖⴻⵏ, ⵣⴻⵔⵔⵄⴻⵏ-ⵜⴻⵏ ⵢⴻⵔⵏⴰ ⵙⵙⴻⵇⴷⴰⵛⴻⵏ-ⵜⴻⵏ.

ⵜⴰⵙⴷⴰⵡⵉⵜ ⴷ ⵓⵍ ⵏ ⵢⴰⵍ ⵛⵛⵖⴻⵍ ⵏ ⵍⴻⴱⵏⵉ ⵏ ⵜⵎⴻⵜⵜⵉ ⵏ ⵜⵎⵓⵙⵙⵏⵉ, ⵢⴻⵔⵏⴰ ⴷⴷⵓⵍⴰ ⵜⴰⴷⵣⴰⵢⵔⵉⵜ ⵜⴻⴼⴽⴰ-ⴰⵙⴻⵏ ⵉ ⵜⵜⴻⵕⴱⴻⵢⵢⴰ ⴷ ⵓⵍⵎⵓⴷ ⵏ ⵜⴻⵙⴷⴰⵡⵉⵜ, ⵙⴻⴳ ⵡⴰⵙⵎⵉ ⴰⵢ ⵜⴻⵡⵡⵉ ⵜⵎⵓⵔⵜ ⵍⵉⵙⵜⵉⵇⵍⴰⵍ-ⵏⵏⴻⵙ, ⴰⵣⴰⵍ ⴷ ⴰⵎⴻⵇⵔⴰⵏ ⵍⴰⴷⵖⴰ ⴷⴻⴳ ⵓⵏⵏⴰⵔ ⵏ ⵜⵓⵙⵙⵏⵉⵡⵉⵏ ⵜⵉⵎⴷⴻⵇⵇⴻⵇⵉⵏ, ⵢⴻⵔⵏⴰ ⴷⴷⴰⵍⵉⵏ ⵏ ⵡⴰⵢⴰ ⵏⴻⵜⵜⴰ ⴷ ⵍⴽⴻⵜⵕⴰ ⵏ ⵢⵉⵏⴻⵍⵎⴰⴷⴻⵏ, ⵏ ⵢⵉⵙⴻⵍⵎⴰⴷⴻⵏ ⴷ ⵢⵉⵎⵏⴰⴷⵉⵢⴻⵏ ⵉⵙⴷⴰⵡⴰⵏⴻⵏ ⴷ ⵓⵙⵙⴻⴽⵜⴻⵕ ⵏ ⵜⴻⵙⴷⴰⵡⵉⵢⵉⵏ ⴷ ⵢⵉⵅⵅⴰⵎⴻⵏ ⵏ ⵓⵏⴰⴷⵉ ⴷⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵏ ⵜⵎⵓⵔⵜ.

ⵛⵛⴻⵄⴱ ⴰⴷⵣⴰⵢⵔⵉ ⵢⴻⵣⵎⴻⵔ ⴰⴷ ⵉⵣⵓⵅⵅ ⵉⵎⵉ ⵜⵉⵙ ⵕⴻⴱⵄⴰ ⵙⴻⴳ ⵍⵖⴰⵛⵉ-ⵏⵏⴻⵙ ⴰⵜⵏⵉ ⴷⴻⴳ ⵍⵍⴰⴽⵓⵍⴰⵜ, ⵍⵍⵉⵙⵉⵢⴰⵜ ⴷ ⵜⴻⵙⴷⴰⵡⵉⵢⵉⵏ ⴷ ⵢⵉⵅⵅⴰⵎⴻⵏ ⵏⵉⴹⴻⵏ ⵏ ⵓⵙⵙⴻⵍⵎⴻⴷ. ⴷⴷⵓⵍⴰ ⵜⴰⴷⵣⴰⵢⵔⵉⵜ ⵜⴻⵣⵎⴻⵔ ⴷⴰⵖ ⴰⴷ ⵜⵣⵓⵅⵅ ⵙ ⵜⵓⴽⵛⵉ ⵏ 25% ⵙⴻⴳ ⵓⵎⴻⵚⵔⵓⴼ-ⵏⵏⴻⵙ ⵏ ⴷⴷⵓⵍⴰ ⵉ ⵓⵙⵙⴻⵍⵎⴻⴷ ⴷⴻⴳ ⵍⵍⴰⴽⵓⵍⴰⵜ ⴷ ⵚⵚⴻⵏⵄⴰⵜ.

ⵍⴷⵣⴰⵢⴻⵔ ⵍⴰ ⵜⴻⵙⴼⵓⴳⵓⵍ ⴰⵙⵙ-ⴰ ⴰⵙⵙ ⵏ ⵢⵉⵏⴻⵍⵎⴰⴷⴻⵏ ⴰⵢ ⵢⴻⵥⵥⵄⴻⵏ ⵍⵉⵙⵜⵉⵄⵎⴰⵕ ⵓⴱⵖⵉⴹ ⵙ ⵜⵎⴻⴷⴷⵓⵔⵜ-ⵏⵙⴻⵏ ⴰⵢ ⴼⴽⴰⵏ ⴷ ⴰⵙⴼⴻⵍ ⵢⴻⵔⵏⴰ ⵙⵄⴰⵏ ⵍⵃⴻⵇⵇ ⴰⴷ ⵣⵓⵅⵅⴻⵏ ⵙ ⵓⵙⵓⵔⵉⴼ ⴰⵎⴻⵇⵔⴰⵏ ⴰⵢ ⴷ-ⵢⴻⵍⵍⴰⵏ ⵖⴻⵔ ⵙⴷⴰⵜ ⴷⴻⴳ ⵜⵖⴰⵔⴰ ⴷ ⵍⴻⵀⵀⵓ ⴰⵢ ⴷ-ⵢⴻⵍⵍⴰⵏ ⴷ ⵓⵍⵎⵓⴷ ⵉⵎⵉⵏⴻⴳ ⴰⵢⴷⴻⴳ ⵍⵍⴰⵏ ⴰⵙⵙ-ⴰ 1,5 ⴷ ⴰⵎⴻⵍⵢⵓⵏ ⵏ ⵢⵉⵏⴻⵍⵎⴰⴷⴻⵏ ⴷ ⵜⵏⴻⵍⵎⴰⴷⵉⵏ, ⵢⵉⵍⵉ ⴰⵙⵎⵉ ⴰⵢ ⵜⴻⵡⵡⵉ ⵜⵎⵓⵔⵜ ⴰⵣⴰⵔⵓⴳ (ⵍⵉⵙⵜⵉⵇⵍⴰⵍ), ⵜⴻⵍⵍⴰ ⵜⴻⵙⵄⴰ ⵛⵡⵉⵟ ⴽⴰⵏ ⵏ ⵜⵎⴻⵢⵢⴰⵜⵉⵏ ⵏ ⵢⵉⵏⴻⵍⵎⴰⴷⴻⵏ.

ⴷⴻⴳ ⵜⵉⴷⴷⵉⵏ-ⴰ ⵖⴻⵔ ⵙⴷⴰⵜ, ⵉⵍⴻⵎⵥⵉ ⴰⴷⵣⴰⵢⵔⵉ ⵉⴳⴰ-ⴷ ⵉⵙⵓⵔⵉⴼⴻⵏ ⵉⵎⴻⵇⵔⴰⵏⴻⵏ ⵢⴻⵔⵏⴰ ⵢⴻⵔⴱⴻⵃ-ⴷ ⴰⵟⴰⵙ ⵏ ⵜⵖⴰⵡⵙⵉⵡⵉⵏ ⴰⵢⵢⴻⵙ ⵜⴻⵜⵜⵣⵓⵅⵅⵓ ⵜⵎⵓⵔⵜ.

ⵉⵏⴻⵍⵎⴰⴷⴻⵏ ⵍⴰ ⵔⴻⵏⵏⵓⵏ ⴷⴻⴳ ⵜⴻⵙⴷⴰⵡⵉⵢⵉⵏ ⵜⵉⴷⵣⴰⵢⵔⵉⵢⵉⵏ ⵢⴻⵔⵏⴰ ⵜⵉⵎⴻⵔⵏⵉⵡⵜ-ⵏⵙⴻⵏ ⵜⵄⴻⴷⴷⴰ ⵉ 60% ⴷⴻⴳ ⵢⵉⵙⴻⴳⴳⴰⵙⴻⵏ-ⴰ ⵉⵏⴻⴳⴳⵓⵔⴰ, ⴷⵖⴰ ⴰⵢⴰ ⴷ ⴷⴷⴰⵍⵉⵍ ⵓⵔ ⵢⴻⵜⵜⵡⴰⵏⴽⴰⵕⴻⵏ ⴷⴻⴳ ⵜⵉⴷⴷⵉⵏ-ⴰ ⵖⴻⵔ ⵙⴷⴰⵜ. ⵓⵍⴰⵛ ⵛⵛⴻⴽ ⴷⴰⴽⴽⴻⵏ ⴰⵊⴻⵍⵍⴻⴱ-ⴰ ⵖⴻⵔ ⵙⴷⴰⵜ ⴷⴻⴳ ⵓⵃⵔⵉⵛ-ⴰ ⴰⵢ ⵢⴻⵙⵄⴰⵏ ⴰⵣⴰⵍ ⴷⴻⴳ ⵜⵎⴻⵜⵜⵉ ⴷ ⵓⵏⵏⴻⵔⵏⵉ-ⵏⵏⴻⵙ ⵢⴻⵜⵜⴽⴻⵎⵎⵉⵍⴻⵏ ⵙ ⵓⵍⵎⴰⴷ, ⴰⵙⵙⴻⵍⵎⴻⴷ, ⴰⵏⴰⴷⵉ ⴷ ⵓⵙⵙⵉⵍⴻⵖ ⵓⵙⵙⵏⴰⵏ ⴷ ⵡⵉⵏ ⵏ ⵚⵚⴻⵏⵄⴰⵜ ⴰⴷ ⵢⴻⵊⵊ ⴰⵃⵔⵉⵛ-ⴰ ⴰⴷ ⵢⴻⵜⵜⴻⴽⴽⴰⵢ ⵎⵍⵉⵃ ⵢⴻⵔⵏⴰ ⵙ ⵍⴼⴻⵄ ⴷⴻⴳ ⵡⴰⴽⴽ ⵉⵏⵓⵔⴰⵔ ⵏ ⵜⵓⴷⴻⵔⵜ ⵏ ⵜⵎⴻⵜⵜⵉ.

ⵜⵉⵎⴻⵔⵏⵉⵡⵜ ⵏ ⵢⵉⵏⴻⵍⵎⴰⴷⴻⵏ ⴷ ⴰⵢⴻⵏ ⴰⵔⴰ ⴷ-ⵢⴻⴳⵍⵓⵏ ⴷⴰⵖ ⵙ ⵡⵓⴳⵓⵔⴻⵏ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵇⴰⴱⴻⵍ-ⵏⵙⴻⵏ ⴷⴻⴳ ⵜⴻⵙⴷⴰⵡⵉⵢⵉⵏ ⴷ ⵜⵜⴰⵡⵉⵍⴰⵜ ⴰⵢ ⵢⴻⵙⵙⴻⴼⴽⴻⵏ ⵉ ⵓⵙⵙⴻⵍⵎⴻⴷ-ⵏⵙⴻⵏ ⴷ ⵓⵙⵙⵉⵍⴻⵖ ⵏ ⵢⵉⵙⴻⵍⵎⴰⴷⴻⵏ. ⵎⴰⵛⴰ ⵢⵉⵡⴻⵏ ⵓⵔ ⵉⵣⴻⵎⵎⴻⵔ ⴰⴷ ⵢⴻⵏⴽⴻⵕ ⵉⵙⵙⴻⴼⵜⵉⵢⴻⵏ ⵉⵎⴻⵇⵔⴰⵏⴻⵏ ⴰⵢ ⵜⴳⴰ ⴷⴷⵓⵍⴰ ⵉ ⵓⵎⴰⴳⴻⵔ ⵏ ⵓⴳⴷⵓⴷ ⵏ ⵢⵉⵏⴻⵍⵎⴰⴷⴻⵏ ⴷ ⵜⵏⴻⵍⵎⴰⴷⵉⵏ ⴷⴻⴳ ⵡⴰⴽⴽ ⵜⵉⵙⴷⴰⵡⵉⵢⵉⵏ ⵜⵉⴷⵣⴰⵢⵔⵉⵢⵉⵏ.

ⵙ ⵡⴰⵢⴰ, ⴷ ⴰⵢⴻⵏ ⵢⴻⵙⵄⴰⵏ ⴰⵣⴰⵍ ⴰⴷ ⴷ-ⵏⴳⴻⵔ ⵜⴰⵎⴰⵡⵜ ⴷⴰⴽⴽⴻⵏ ⵜⵉⵙⵉⵏ ⵙ ⵍⴽⴻⵜⵕⴰ ⵏ ⵢⵉⵏⴻⵍⵎⴰⴷⴻⵏ ⵖⴻⵔ ⵜⴻⵙⴷⴰⵡⵉⵢⵉⵏ ⴷ ⵜⴰⵖⴰⵡⵙⴰ ⵢⴻⵙⵄⴰⵏ ⴰⵣⴰⵍ ⵢⴻⵔⵏⴰ ⴷ ⴰⵢⴻⵏ ⴰⵔⴰ ⵢⴻⵊⵊⴻⵏ ⵜⴰⵎⵓⵔⵜ-ⵏⵏⴻⵖ ⴰⴷ ⵜⴻⴱⵏⵓ ⵜⴰⴷⴰⵎⵙⴰ-ⵏⵏⴻⵙ ⵖⴻⴼ ⵜⵎⵓⵙⵙⵏⵉ ⵢⴻⵔⵏⴰ ⴰⴷ ⴷ-ⵜⴰⴼ ⵉⵎⴷⴰⵏⴻⵏ ⵓⵥⵡⵉⵔⴻⵏ ⴰⵢⵢⴻⵙ ⴰⵔⴰ ⵜⵇⴰⴱⴻⵍ ⴰⵢⴻⵏ ⴰⵢ ⵜⴻⵃⵡⴰⵊ ⴷⴻⴳ ⵓⵏⵏⴻⵔⵏⵉ ⴰⵎⴰⵜⵓ, ⴰⵎ ⵡⴰⴽⴽⴻⵏ ⴰⵢ ⵢⴻⵙⵙⴻⴼⴽ ⴰⴷ ⵜⴻⵙⵙⴻⵃⴱⵉⴱⴻⵔ ⵖⴻⴼ ⵡⴰⵣⴰⵍⴻⵏ ⵉⴷⴻⵍⵙⴰⵏⴻⵏ ⵓⵏⵏⵉⴳⴻⵏ ⵏ ⵓⵎⵙⵓⵔⴻⴼ ⴷ ⵓⵇⴰⴷⴻⵔ ⵏ ⵡⵉⵢⴰⴹ.

ⵢⴻⵙⵙⴻⴼⴽ ⴰⴷ ⵏⴻⵙⵜⴻⵄⵕⴻⴼ ⴷⴰⴽⴽⴻⵏ ⵉⵙⴷⴰⵡⴰⵏⴻⵏ ⵉⴷⵣⴰⵢⵔⵉⵢⴻⵏ ⵣⴻⵎⵔⴻⵏⵜ ⴰⴷ ⵣⴻⵔⵄⴻⵏⵜ ⵉⴷⵍⴻⵙ ⵏ ⵓⵎⵙⵓⵔⴻⴼ ⴷ ⵓⵇⴰⴷⴻⵔ ⵏ ⵡⵉⵢⴰⴹ ⴷⴻⴳ ⵢⵉⵙⵡⵉⵔⴻⵏ ⵓⵏⵏⵉⴳⴻⵏ, ⴰⵎ ⵡⴰⴽⴽⴻⵏ ⴰⵢ ⵣⴻⵎⵔⴻⵏ ⴷⴰⵖ ⴰⴷ ⴷ-ⴰⵡⵉⵏ ⴰⴱⵔⵉⴷ ⵏ ⵓⴷⵉⵡⴻⵏⵏⵉ ⴷ ⵓⵎⵙⴻⴼⵀⴰⵎ ⵢⴻⵔⵏⴰ ⴰⴷ ⵜⴻⵏ-ⵣⴻⵔⵄⴻⵏ ⴳⴰⵔ ⵢⵉⵏⴻⵍⵎⴰⴷⴻⵏ ⴷ ⵜⵎⴻⵜⵜⵉ ⵜⴰⴷⵣⴰⵢⵔⵉⵜ.

ⵙ ⵡⴰⵢⴰ, ⴰⵖⵔⴻⴼ ⴰⴷⵣⴰⵢⵔⵉ ⵢⵓⴽⵍⴰⵍ ⴰⴷ ⵉⵥⴻⵔ ⴰⵔⵔⴰⵡ-ⵏⵏⴻⵙ ⴷⴻⴳ ⵜⴻⵙⴷⴰⵡⵉⵢⵉⵏ ⵍⴰ ⵜⵜⴻⴽⴽⴰⵢⴻⵏ ⴷⴻⴳ ⵡⴰⵢⴻⵏ ⵉⵣⴻⵎⵔⴻⵏ ⴰⴷ ⵢⴻⵙⵏⴻⵔⵏⵉ ⴰⵎⴰⴹⴰⵍ ⵏ ⵡⴰⵙⵙ-ⴰ ⵢⴻⵔⵏⴰ ⴰⴷ ⵉⵇⴰⴱⴻⵍ ⵓⴳⵓⵔⴻⵏ ⵉⵙⴻⵔⵜⵉⵢⴻⵏ, ⵡⵉⴷ ⵏ ⵍⴰⵎⴰⵏ ⴷ ⵡⵉⴷ ⵏ ⵜⴷⴰⵎⵙⴰ ⴰⵢ ⵉⵃⵓⵣⴰⵏ ⵜⴰⵎⵓⵔⵜ-ⵏⵏⴻⵖ.

ⵎⴰ ⵢⴻⵍⵍⴰ, ⴷⴻⴳ ⵡⴰⵢⴻⵏ ⴰⴽⴽⴰ ⵉⵄⴻⴷⴷⴰⵏ, ⵉⵏⴻⵍⵎⴰⴷⴻⵏ ⵏ ⵜⴻⵙⵏⴰⵡⵉⵜ ⴷ ⵜⴻⵙⴷⴰⵡⵉⵜ ⵍⵍⴰⵏ, ⵙ ⵜⵎⵓⵙⵙⵏⵉ-ⵏⵙⴻⵏ, ⴷ ⵢⵉⵡⴻⵏ ⵙⴻⴳ ⵢⵉⵖⴰⵍⵍⴻⵏ ⴰⵢ ⵉⴱⴻⴷⴷⴻⵏ ⵖⴻⵔ ⵢⵉⴷⵉⵙ ⵏ ⵢⵉⵎⴻⵏⵖⵉ ⵉⵎⵙⴻⵍⵍⴻⵃ ⵉ ⵍⵎⴻⵏⴷ ⵏ ⵜⵍⴻⵍⵍⵉ ⴷ ⵓⵣⴰⵔⵓⴳ, ⵢⴻⵙⵙⴻⴼⴽ ⵉⵏⴻⵍⵎⴰⴷⴻⵏ-ⵏⵏⴻⵖ ⴰⵙⵙ-ⴰ ⴷ ⵢⵉⵍⴻⵎⵥⵉⵢⴻⵏ ⵏⵉⴹⴻⵏ ⵏ ⵜⵙⵓⵜⴰ-ⵏⵙⴻⵏ, ⴰⵎⴰ ⴷⴻⴳ ⵜⴻⵎⴷⵉⵏⵉⵏ ⵏⴻⵖ ⴷⴻⴳ ⵜⵎⵓⵔⵜ, ⴰⴷ ⵣⵡⵉⵔⴻⵏ ⵉ ⵚⵚⴻⴼ ⵏ ⵜⵎⴻⵜⵜⵉ-ⵏⵏⴻⵖ ⵢⴻⵔⵏⴰ ⴰⴷ ⵙⵙⴻⵡⵍⵉⵡⵍⴻⵏ ⵜⵉⵣⴻⵎⵎⴰⵔ-ⵏⵙⴻⵏ ⵉ ⵍⵎⴻⵏⴷ ⵏ ⵜⵎⵓⵔⵜ ⴷ ⵜⵉⴷⴷⵉⵏ-ⵏⵏⴻⵙ ⵖⴻⵔ ⵙⴷⴰⵜ, ⵢⴻⵔⵏⴰ ⴰⴷ ⴱⴻⵄⴷⴻⵏ ⵖⴻⴼ ⵡⴰⴽⴽ ⵉⵖⵉⵙⴰⵏ ⵏ ⵜⴻⵙⵏⴰⴽⵜⴰ ⴷ ⵜⵙⴻⵔⵜⵉⵜ ⵏⴻⵖ ⵉⵖⵉⵙⴰⵏ ⵏ ⵚⵚⴻⵏⴼ ⵏⵉⴹⴻⵏ.

ⴰⵟⴰⵙ ⵏ ⵡⴰⴽⵓⴷ ⴷ ⵍⵎⴻⵊⵀⵓⴷ ⴰⵢ ⵢⴻⵜⵜⵓⵏⴻⴼⴽⴻⵏ ⵉ ⵓⴱⴻⴷⴷⴻⵍ ⵏ ⵓⵍⵎⵓⴷ ⵉⵎⵉⵏⴻⴳ ⴷ ⵓⵙⵏⴻⵔⵏⵉ-ⵏⵏⴻⵙ, ⵢⴻⵔⵏⴰ ⵉⵙⵡⵉ ⵏ ⵡⴰⵢⴰ ⵏⴻⵜⵜⴰ ⴷ ⴰⵔⴼⴰⴷ ⵏ ⵓⵙⵡⵉⵔ ⴷ ⵓⴹⵎⴰⵏ ⵏ ⵜⵖⴰⵔⴰ ⵏ ⵓⵙⵙⴻⵍⵎⴻⴷ, ⴷ ⴰⵄⴰⵡⴻⴷ ⵏ ⵓⵇⴻⵢⵢⴻⵎ ⵏ ⵢⵉⴳⴻⵔⴷⴰⵙⴻⵏ ⵉⵙⴷⴰⵡⴰⵏⴻⵏ ⵉⵖⴻⵍⵏⴰⵡⴻⵏ ⴰⴽⴽⴻⵏ ⴰⴷ ⵜⴻⵣⵎⴻⵔ ⵜⴻⵙⴷⴰⵡⵉⵜ ⵜⴰⴷⵣⴰⵢⵔⵉⵜ ⴰⴷ ⵜⴻⵙⵄⵓ ⴰⵙⵡⵉⵔ ⴰⵢ ⵙⵄⴰⵏⵜ ⵜⴻⵎⵜⵉⵍⵉⵏ-ⵏⵏⴻⵙ ⴷⴻⴳ ⵓⵎⴰⴹⴰⵍ.

ⵢⴻⵙⵙⴻⴼⴽ ⴷⴰⵖ ⴰⴷ ⴷ-ⵏⴳⴻⵔ ⵜⴰⵎⴰⵡⵜ ⴷⴰⴽⴽⴻⵏ ⴰⵙⵙⴻⵅⴷⴻⵎ ⵏ ⵢⵉⴷⵣⴰⵢⵔⵉⵢⴻⵏ ⴰⵢ ⵉⴼⵓⴽⴻⵏ ⵜⵉⵣⵔⴰⵡⵉⵏ-ⵏⵙⴻⵏ ⴷ ⵢⵉⵡⴻⵏ ⵙⴻⴳ ⵍⵍⵙⵉⵙⴰⵏ ⵉⵎⴻⵇⵔⴰⵏⴻⵏ ⵏ ⵜⵉⴽⵍⵉ-ⴰ. ⴰⵏⴻⵡⵡⴻⵄ ⵏ ⵢⵉⵙⵓⵎⴰⵔ ⴷ ⵓⵙⵙⵉⵍⴻⵖ, ⴰⴱⴻⴷⴷⴻⵍ ⴷ ⵓⵙⵏⴻⵔⵏⵉ ⵏ ⵡⴰⵢⴻⵏ ⵢⴻⵍⵍⴰⵏ ⴷⴻⴳ ⵡⴰⵀⵉⵍⴻⵏ, ⴰⵙⵙⴻⴽⵛⴻⵎ ⵏ ⵢⵉⴼⵓⵔⴽⴰ ⵓⵙⵙⵏⴰⵏⴻⵏ ⵉⵎⴰⵢⵏⵓⵜⴻⵏ, ⵜⵉⵛⵛⵓⵔⴽⴰ ⴷ ⵢⵉⵃⵔⵉⵛⴻⵏ ⵢⴻⵎⴳⴻⵔⵔⴰⴷⴻⵏ ⵏ ⵜⴷⴰⵎⵙⴰ ⴷ ⵜⵎⴻⵜⵜⵉ, ⴰⵙⵙⴻⴽⵛⴻⵎ ⵏ ⵢⵉⴷⵍⴻⵙ ⵏ ⵓⵙⵙⴻⴱⴷⴻⴷ ⵏ ⵜⴽⴻⴱⴱⴰⵏⵉⵢⵉⵏ ⴷ ⵜⵉⵖⴰⵡⵙⵉⵡⵉⵏ ⴰⴽⴽ ⴰⵔⴰ ⵢⴻⵙⵊⴻⵀⴷⴻⵏ ⴰⴱⴻⴷⴷⴻⵍ-ⴰ ⵉ ⵍⵎⴻⵏⴷ ⵏ ⵓⵙⵏⴻⵔⵏⵉ.

ⵢⴻⵙⵙⴻⴼⴽ ⴰⴷ ⵏⴻⵙⵜⴻⵄⵕⴻⴼ ⴷⴰⴽⴽⴻⵏ ⴰⴱⴻⴷⴷⴻⵍ-ⴰ ⵏ ⵓⵙⵏⴻⵔⵏⵉ ⵢⴻⵣⴳⴰ ⵍⴰ ⵢⴻⵜⵜⴽⴻⵎⵎⵉⵍ ⵙⴻⴳ ⵓⵙⴻⴳⴳⴰⵙ ⵖⴻⵔ ⵓⵙⴻⴳⴳⴰⵙ, ⵓⵍⴰ ⵎⴰ ⵜⴻⵜⵜⵅⴰⵚⵚⴰ ⵜⵉⴽⴽⴰⵍ ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⵏⵔⴻⵇⵇⴻⵄ ⵍⴻⵅⵚⴰⵚ-ⴰ.

ⵜⴰⵙⴷⴰⵡⵉⵜ ⴰⵎ ⵓⵎⴻⵅⵍⵓⵇ ⴰⵎⵓⴷⴷⵉⵔ ⵢⴻⵔⵏⴰ ⵢⴻⵣⴳⴰ ⵉⵅⴻⴷⴷⴻⵎ, ⵙ ⵡⴰⵢⴰ, ⵜⴻⵃⵡⴰⵊ ⴰⴷ ⵜⴻⵙⵄⵓ ⵕⵕⵓⵃ ⵏ ⵜⵉⴷⴻⵜ, ⴰⴷ ⴷ-ⵜⴻⵙⵙⴻⵣⴳ ⵉⵎⴰⵏ-ⵏⵏⴻⵙ ⵢⴻⵔⵏⴰ ⴰⴷ ⵜⴻⵏⵏⴻⵔⵏⵉ ⵖⴻⴼ ⵍⴻⵃⵙⴰⴱ ⵏ ⵡⴰⵢⴻⵏ ⴰⵔⴰ ⵏⴻⵃⵡⵉⵊ ⴰⵣⴻⴽⴽⴰ ⴷ ⵢⵉⵙⵡⴰⵏ ⵡⵓⵖⵓⵔ ⵜⴻⴽⴽⴰⵜ ⴰⴷ ⵜⴰⵡⴻⴹ. ⵜⵉⵎⴻⵜⵜⵉ, ⴰⴽⴽⴻⵏ ⵜⴻⵥⵔⴰⵎ, ⵡⴰⵔ ⵛⵛⴻⴽ, ⵍⴰ ⵜⴻⵜⵜⴹⴰⴼⴰⵔ ⵙ ⵍⵇⴻⵔⴱ ⵜⵉⴽⵍⵉ ⵏ ⵜⴻⵙⴷⴰⵡⵉⵜ, ⴷⵖⴰ ⵖⴻⴼ ⵡⴰⵢⴰ ⴰⵢ ⵢⴻⵙⵙⴻⴼⴽ ⵜⴰⵙⴷⴰⵡⵉⵜ ⵜⴰⴷⵣⴰⵢⵔⵉⵜ ⴰⴷ ⵜⴻⴼⴽ ⴰⵣⴰⵍ, ⵓⴳⴰⵔ ⵏ ⵣⵉⴽ, ⵉ ⵜⵖⴰⵔⴰ ⵏ ⵓⵙⵙⴻⵍⵎⴻⴷ ⴰⵢ ⴷ-ⵢⴻⵍⵍⴰⵏ ⴷ ⵜⵜⴰⵡⵉⵍ ⴰⵔⴰ ⵜⵜ-ⵢⴻⵊⵊⴻⵏ ⴰⴷ ⵜⴻⵙⵙⴻⵔⴱⴻⵃ ⴰⴱⴻⴷⴷⴻⵍ-ⴰ ⵏ ⵓⵏⵏⴻⵔⵏⵉ.

ⴰ ⵜⵉⵏⴻⵍⵎⴰⴷⵉⵏ ⴷ ⵢⵉⵏⴻⵍⵎⴰⴷⴻⵏ ⵄⵣⵉⵣⴻⵏ,

ⵍⴷⵣⴰⵢⴻⵔ, ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⵔⵔⴰ ⴰⵔⴽⴰⴷ ⴷ ⵜⵖⴻⵍⵍⵉⵙⵜ ⵖⴻⵔ ⵜⵎⵓⵔⵜ, ⵍⴰ ⵜⴻⴽⴽⴰⵜ ⴰⴽⴽⴻⵏ ⴰⴷ ⵜⴰⵡⴻⴹ ⵖⴻⵔ ⵓⵏⵏⴻⵔⵏⵉ ⴰⵔⴰ ⴷ-ⵢⴻⵇⵇⵉⵎⴻⵏ ⴷ ⵍⴻⵎⵜⴻⵍ ⵢⴻⵔⵏⴰ ⴰⴷ ⵜⵇⴰⴱⴻⵍ ⵢⴻⵙ-ⵙ ⴰⵢⴻⵏ ⵢⴻⵃⵡⴰⵊ ⵓⴷⵣⴰⵢⵔⵉ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵅⴻⴷⴷⵉⵎ, ⴰⴷⴰⵡⵉ, ⴰⵍⵎⴰⴷ ⴷ ⵜⴻⵖⴷⴻⵎⵜ, ⵏ ⵓⵃⵔⴰⵣ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ, ⵏ ⵜⵍⴻⵍⵍⵉⵢⵉⵏ ⴰⵎⴰ ⴷ ⵜⵉⴷ ⵏ ⵓⵎⴷⴰⵏ ⵉ ⵢⵉⵎⴰⵏ-ⵏⵏⴻⵙ ⴰⵎⴰ ⴷ ⵜⵓⵛⵔⵉⴽⵉⵏ, ⵢⴻⵔⵏⴰ ⴰⴷ ⴷ-ⵢⵉⵍⵉ ⴰⴽⴽ ⵡⴰⵢⴰ ⵙ ⵓⴹⵎⴰⵏ ⵏ ⵜⵜⴰⵡⵉⵍⴰⵜ ⴰⵔⴰ ⴷ-ⵢⴻⵜⵜⵡⴰⴳⵎⴻⵏ ⵙⴻⴳ ⵜⵍⴻⵍⵍⵉ ⵏ ⵕⵕⴰⵢ ⴷ ⵡⴰⵡⴰⵍ ⴷ ⵣⵣⵓⵅ ⵏ ⵓⵎⴷⴰⵏ ⵙ ⵜⵉⵖⵖⴻⵔⵎⵉ-ⵏⵏⴻⵙ.

ⵉⵙⵡⵉ, ⴰⵙⵙ-ⴰ, ⵏⴻⵜⵜⴰ ⴷ ⴰⵙⵙⴻⵊⵀⴻⴷ ⵏ ⵜⴷⴰⵎⵙⴰ ⵙ ⵓⴱⵔⵉⴷ ⴰⵣⴻⴷⴳⴰⵏ ⵏ ⵜⵓⵙⵙⵏⴰ ⴰⵔⴰ ⵢⴻⴱⵏⵓⵏ ⵖⴻⴼ ⵢⵉⵡⴻⵜ ⵏ ⵜⵎⵓⵖⵍⵉ ⵜⵓⴼⵕⵉⵣⵜ ⴰⵔⴰ ⴰⵙ-ⵉⴹⴻⵎⵏⴻⵏ ⴰⵔⴽⴰⴷ ⴷ ⵓⴷⵓⵎⵓ.

ⴷⴷⵓⵕ ⵏ ⵜⴻⵙⴷⴰⵡⵉⵜ ⴷ ⵢⵉⵙⴷⴰⵡⴰ ⵏⴻⵏ ⴰⵜⴰⵏ ⴷⴻⴳ ⵡⵓⵍ ⵏ ⵢⵉⵙⵡⵉ-ⴰ, ⵉⵎⵉ ⴰⵢ ⵜⴻⵍⵍⴰ ⵖⴻⵔ-ⵙⴻⵏ ⵜⵎⵓⵙⵙⵏⵉ ⴷ ⵜⴻⵣⵎⴻⵔⵜ ⴰⵔⴰ ⵢⴻⵊⵊⴻⵏ ⵜⵉⵎⴻⵜⵜⵉ ⴷ ⵜⴷⴰⵎⵙⴰ-ⵏⵏⴻⵙ ⴰⴷ ⴷ-ⴱⴷⵓⵏ ⵜⵉⴽⵍⵉ ⵜⴰⵎⴰⵢⵏⵓⵜ ⵏ ⵓⵏⵏⴻⵔⵏⵉ ⴷ ⵜⵉⴷⴷⵉⵏ ⵖⴻⵔ ⵙⴷⴰⵜ.

ⴷⵖⴰ ⴰⴷ ⴼⴰⵕⵙⴻⵖ ⵜⴰⴳⵏⵉⵜ-ⴰ ⴰⴽⴽⴻⵏ ⴰⴷ ⵔⵔⴻⵖ ⵜⴰⵊⵎⵉⵍⵜ ⵉ ⵜⴻⵙⴷⴰⵡⵉⵜ ⴷ ⵢⵉⵙⴻⵍⵎⴰⴷⴻⵏ-ⵏⵏⴻⵙ ⵏ ⵜⵎⵓⵙⵙⵏⵉ ⴷ ⵡⴰⴽⴽ ⵉⵅⴻⴷⴷⴰⵎⴻⵏ ⴷ ⵜⵅⴻⴷⴷⴰⵎⵉⵏ ⵖⴻⴼ ⵍⵎⴻⵊⵀⵓⴷ-ⵏⵙⴻⵏ ⴷ ⵓⵅⴻⴷⴷⵉⵎ-ⵏⵙⴻⵏ ⵙⴻⴳ ⵡⵓⵍ ⵉ ⵍⵎⴻⵏⴷ ⵏ ⵍⴷⵣⴰⵢⴻⵔ.

ⴰ ⵉⵏⴻⵍⵎⴰⴷⴻⵏ ⴷ ⵜⵏⴻⵍⵎⴰⴷⵉⵏ ⵄⵣⵉⵣⴻⵏ,

ⴰⵙⴼⵓⴳⴻⵍ ⵏ ⵜⴻⴷⵢⴰⵏⵜ-ⴰ ⵙⴻⴳ ⵍⴻⵎⴷⴻⵢⵢⴰ, ⵙⴻⴳ ⵜⵡⵉⵍⴰⵢⵜ-ⴰ ⵜⴰⵎⵊⴰⵀⴻⴷⵜ ⴰⵢ ⵢⴻⴼⴽⴰⵏ ⴰⵛⵃⴰⵍ ⴷ ⵜⴰⵎⴻⴷⴷⵓⵔⵜ ⴷ ⴰⵙⴼⴻⵍ, ⵍⴰⴷⵖⴰ ⴷⴻⴳ ⵓⵙⴻⴳⴳⴰⵙ-ⴰ ⴰⵢ ⵏⴻⴼⴽⴰ ⵙ ⵍⴻⴽⵎⴰⵍ-ⵏⵏⴻⵙ ⵉ ⵓⵙⴼⵓⴳⴻⵍ ⵏ ⵜⴻⴳⵔⴰⵡⵍⴰ-ⵏⵏⴻⵖ ⵜⵓⵔⴱⵉⵃⵜ ⵏ ⵡⴰⵎⴱⴻⵕ, ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⴷ ⴹⴹⵎⴰⵏⴰ ⵏ ⵓⵇⴰⴷⴻⵔ-ⵏⵏⴻⵖ ⵉ ⵜⵎⵓⵔⵜ. ⴷⵖⴰ ⵏⴻⵙⵙⴰⵔⴰⵎ ⴰⵅⴻⴷⴷⵉⵎ-ⵏⵡⴻⵏ ⵉⴼⴰⵣⴻⵏ ⴷⴻⴳ ⵜⵙⵓⵜⴰ-ⵏⵡⴻⵏ ⴰⴷ ⵢⴻⴽⵛⴻⵎ ⴷⴻⴳ ⵓⵣⵎⴰⵎ ⵏ ⵜⵖⴰⵡⵙⵉⵡⵉⵏ ⵢⴻⵙⵙⵓⵍⵉⵏ ⵛⵛⴰⵏ ⵉ ⵜⵎⵓⵔⵜ ⴰⵎ ⵡⵉⴷ ⵏ ⵜⵙⵓⵜⴰ ⵏ 19 ⵎⴰⵢⵓ 1956, ⵜⵉⵏ ⵏ ⵛⵛⵓⵀⴰⴷⴰ-ⵏⵏⴻⵖ ⵢⵓⴽⵍⴰⵍⴻⵏ ⵜⴰⵊⵎⵉⵍⵜ.