ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴻⴱⴷⴰ ⴷⴻⴳ ⵏ’ⴷⵊⴰⵎⴻⵏⴰ ⵜⴻⵎⵍⵉⵍⵉⵜ ⵜⵉⵙ 6 ⵏ ⵜⵎⵓⵔⴰ ⵜⵉⵊⵉⵔⴰⵜⵉⵏ ⵏ ⵍⵉⴱⵢⴰ (ⴰⵎⴰⵣⵓⵏ ⵓⵣⵣⵉⴳ)

ⵏ'ⴷⵊⴰⵎⴻⵏⴰ – ⵜⴻⴱⴷⴰ ⴰⵙⵙ ⵏ ⵍⵊⴻⵎⵄⴰ ⵜⴻⵎⵍⵉⵍⵉⵜ ⵏ ⵜⵎⵓⵔⴰ ⵜⵉⵏⴰⵔⴰⴳⵉⵏ (ⵜⵉⵊⵉⵔⴰⵜⵉⵏ) ⵏ ⵍⵉⴱⵢⴰ ⴷⴻⴳ ⵜⵎⴰⵏⴻⵖⵜ ⵜⴰⵜⵛⴰⴷⵉⵜ, ⵏ’ⴷⵊⴰⵎⴻⵏⴰ, ⵢⴻⵔⵏⴰ ⵍⴷⵣⴰⵢⴻⵔ ⵢⴻⵃⴷⴻⵕ ⵙ ⵢⵉⵙⴻⵎ-ⵏⵏⴻⵙ ⵓⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵍⵎⴻⵖⵔⴻⴱ, ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⴷ ⵜⴻⵎⵖⵓⵏⵜ ⵜⴰⵄⵕⴰⴱⵜ, ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ.

ⵜⵉⵎⵍⵉⵍⵉⵜ-ⴰ ⵜⴻⵍⵍⴰ-ⴷ ⵢⵉⵡⴻⵏ ⵡⴰⵙⵙ ⴷⴻⴼⴼⵉⵔ ⵜⴻⵎⵍⵉⵍⵉⵜ ⵏ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ⴰⵢⴷⴻⴳ ⵎⵍⴰⵍⴻⵏ ⵢⵉⵎⴹⴻⴱⴱⵔⴻⵏ ⵉⵙⴻⵔⵜⵉⵢⴻⵏ ⵉⵍⵉⴱⵉⵢⴻⵏ ⴷ ⴽⵔⴰ ⵏ ⵡⵓⵙⵙⴰⵏ ⴽⴰⵏ ⵓⵇⴱⴻⵍ ⵓⵎⵛⵉⵡⴻⵕ ⴰⵔⴰ ⴷ-ⵢⵉⵍⵉⵏ ⴳⴰⵔ ⵍⴷⵣⴰⵢⴻⵔ, ⵎⴰⵚⴻⵔ ⴷ ⵟⵟⴰⵍⵢⴰⵏ ⴰⵙⵙ ⵏ ⵍⵃⴻⴷⴷ ⴷⴻⴳ ⵍⵇⴰⵀⵉⵔⴰ.

ⴰⵜⵜⴻⴽⴽⵉ ⵏ ⵍⴷⵣⴰⵢⴻⵔ ⴷⴻⴳ ⵜⴻⵎⵍⵉⵍⵉⵜ-ⴰ ⵜⵉⵙ 6 ⵜⵓⴷⴻⴼ ⴷⴻⴳ ⵓⴽⴰⵜⴰⵔ ⵏ ⵍⵎⴻⵊⵀⵓⴷ-ⵏⵏⴻⵙ ⴰⴽⴽⴻⵏ ⴰⴷ ⵜⵄⴰⵡⴻⵏ ⵉⴷⵉⵙⴰⵏ ⵉⵍⵉⴱⵉⵢⴻⵏ ⴰⴽⴽⴻⵏ ⴰⴷ ⵙⵙⵉⵡⴹⴻⵏ ⵖⴻⵔ ⵜⵉⴼⵔⴰⵜ ⵜⴰⵙⴻⵔⵜⵉⵜ ⵙ ⵓⵎⵛⵉⵡⴻⵕ ⴰⵢⴷⴻⴳ ⴰⵔⴰ ⵜⵜⴻⴽⴽⵉⵏ ⴰⴽⴽ ⵡⵉⴷ ⵜⴻⵔⵣⴰ ⵜⴻⵎⵙⴰⵍⵜ, ⵎⴻⵏⵖⵉⵔ ⵢⴻⵜⵜⵡⴰⵃⴻⵙⴱⴻⵏ ⴷ ⵜⵉⵔⴻⴱⵔⴰⴱⵉⵏ ⵖⴻⵔ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ. ⵉⵙⵡⵉ ⵏ ⵍⵎⴻⵊⵀⵓⴷ-ⴰ ⵏⴻⵜⵜⴰ ⴷ ⴰⵙⵙⵉⵡⴻⴹ ⵖⴻⵔ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ, ⵢⴻⵔⵏⴰ ⴷ ⴰⵢⴰ ⴽⴰⵏ ⴰⵢ ⴷ ⵜⵉⴼⵔⴰⵜ ⵜⴰⵡⵃⵉⴷⵜ ⴰⵔⴰ ⵉⵃⴻⵔⵣⴻⵏ ⵜⵓⵎⵎⴷⴰ ⵏ ⵡⴰⴽⴰⵍ ⴰⵍⵉⴱⵉ, ⵜⴰⴷⵓⴽⵍⵉ ⵏ ⵜⵎⵓⵔⵜ-ⴰ ⴷ ⵓⵎⵙⴻⴼⵀⴰⵎ ⵏ ⵓⵖⵔⴻⴼ-ⵏⵏⴻⵙ.

ⵜⵉⵎⵍⵉⵍⵉⵜ-ⴰ ⵜⵉⵙ 6 ⴷ ⴰⵃⵔⵉⵛ ⵙⴻⴳ ⵢⵉⵡⴻⵜ ⵏ ⵜⵉⴽⵍⵉ ⵢⴻⵍⵀⴰⵏ ⴰⵢⴷⴻⴳ ⵜⵉⵎⵓⵔⴰ ⴰⵢ ⴷ-ⵢⴻⵣⵣⵉⵏ ⵖⴻⴼ ⵍⵉⴱⵢⴰ ⵍⴰ ⵙⵙⵓⴳⴳⵓⵜⴻⵏⵜ ⴰⵅⴻⴷⴷⵉⵎ ⵖⴻⵔ ⵢⵉⴷⵉⵙ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⴽⴽⴻⵏ ⴰⴷ ⴷ-ⵙⵄⴻⵊⵍⴻⵏⵜ ⴼⴻⵔⵔⵓ ⵏ ⵜⴰⵍⵓⴼⵜ ⵏ ⵍⵉⴱⵢⴰ ⵙ ⵜⵙⴻⵔⵜⵉⵜ ⵢⴻⵔⵏⴰ ⴰⴷ ⵄⴰⵡⵏⴻⵏⵜ ⵜⴰⵎⵓⵔⵜ-ⴰ ⴰⴷ ⴷ-ⵜⴻⵙⵙⴻⴱⴷⴻⴷ ⴰⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴰⵢⴷⴻⴳ ⴰⵔⴰ ⵎⵙⴻⴼⵀⴰⵎⴻⵏ ⵢⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ, ⵉⵎⵉ ⴷ ⴰⵢⴰ ⴰⵔⴰ ⵉⴹⴻⵎⵏⴻⵏ ⴰⵇⴰⴷⴻⵔ ⵏ ⵜⵏⴰⵢⴰ ⵏ ⵍⵉⴱⵢⴰ, ⵜⴰⴷⵓⴽⵍⵉ-ⵏⵏⴻⵙ, ⵜⵓⵎⵎⴷⴰ ⵏ ⵡⴰⴽⴰⵍ-ⵏⵏⴻⵙ ⴷ ⵓⵙⴻⴼⵀⴰⵎ ⴳⴰⵔ ⵡⴰⵔⵔⴰⵡ ⵏ ⵓⵖⵔⴻⴼ ⴰⵍⵉⴱⵉ ⴰⴳⵎⴰⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⴱⴻⵕⵕⴰ.

ⵉ ⵍⵎⴻⵏⴷ ⵏ ⵡⴰⵢⴰ, ⵎⴰⵙⵙ ⵎⴻⵙⵙⴰⵀⴻⵍ ⵉⵄⴰⵡⴻⴷ-ⴷ, ⴷⴻⴳ ⵜⵓⵣⵣⵢⴰ ⵜⵉⵙ 3 ⵏ ⵓⵎⵛⵉⵡⴻⵕ ⴳⴰⵔ ⵢⵉⵍⵉⴱⵉⵢⴻⵏ, ⴷⴰⴽⴽⴻⵏ ⴰⴷⴷⵓⴷ ⵏ ⵍⴷⵣⴰⵢⴻⵔ « ⵓⵔ ⵢⴻⵜⵜⴱⴻⴷⴷⵉⵍ ⴰⵔⴰ » ⵢⴻⵔⵏⴰ ⵉⵙⵡⵉ-ⵏⵏⴻⵙ ⵏⴻⵜⵜⴰ « ⴷ ⴰⵄⴰⵡⴻⵏ ⵏ ⵡⴰⵢⵜⵎⴰⵜⴻⵏ ⵉⵍⵉⴱⵉⵢⴻⵏ, ⵉⴷⵉⵙ ⵢⴻⴱⵖⵓⵏ ⵉⵍⵉⵏ ⵙⴻⴳ-ⵙ, ⴰⴽⴽⴻⵏ ⴰⴷ ⴷ-ⴱⴷⵓⵏ ⴰⵎⵛⵉⵡⴻⵕ ⴰⵔⴰ ⵜⴻⵏ-ⵉⴷ-ⵢⴻⵣⴷⵉⵏ, ⴰⵢⴷⴻⴳ ⴰⵔⴰ ⵜⵜⴻⴽⴽⵉⵏ ⴰⴽⴽ ⵢⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴰⵍⵓⴼⵜ, ⴰⵍⴰ ⵜⵉⴳⵔⴰⵡⵉⵏ ⴰⵢ ⵢⴻⵜⵜⵡⴰⵃⴻⵙⴱⴻⵏ ⴷ ⵜⵉⵔⴻⴱⵔⴰⴱⵉⵏ ⵖⴻⵔ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ».

ⵎⴰⵙⵙ ⵎⴻⵙⵙⴰⵀⴻⵍ ⵉⵄⴰⵡⴻⴷ ⵉⵡⴻⴽⴽⴻⴷ-ⴷ, ⴷⴻⴳ ⵜⴻⴳⵏⵉⵜ-ⴰ, ⴷⴰⴽⴽⴻⵏ ⵉⵖⴻⵍⵍⴰⵜⴻⵏ ⵏ ⵢⵉⴽⴰⴱⴰⵔⴻⵏ ⵉⵙⴻⵔⵜⵉⵢⴻⵏ ⴷ ⵢⵉⵎⴻⵖⵏⴰⵙⴻⵏ ⵉⵍⵉⴱⵉⵢⴻⵏ ⴰⵢ ⵢⴻⵜⵜⴻⴽⴰⵏ ⴷⴻⴳ ⵜⴻⵎⵍⵉⵍⵉⵜ-ⴰ ⵙⵄⴰⵏ « ⵍⴻⴱⵖⵉ ⵉⵊⴻⵀⴷⴻⵏ » ⴰⴽⴽⴻⵏ ⴰⴷ ⴼⵔⵓⵏ ⵜⴰⵍⵓⴼⵜ ⵏ ⵜⵎⵓⵔⵜ-ⴰ ⵙ ⵜⵖⴰⵡⵍⴰ.

ⴰⵏⴻⵖⵍⴰⴼ ⵢⴻⵛⴽⴻⵕ-ⴷ ⴷⴰⵖ « ⵡⵉⴷ ⵢⴻⵜⵜⴻⴽⴽⴰⵏ ⵖⴻⴼ ⵜⴰⴽⴰⵢⵜ-ⵏⵙⴻⵏ, ⵉⵎⵉ ⴰⵢ ⵙⵙⴻⵔⵙⴻⵏ ⵏⵏⴼⴻⵄ ⵏ ⵍⵉⴱⵢⴰ ⵏⵏⵉⴳ ⴰⴽⴽ ⵜⵉⵖⴰⵡⵙⵉⵡⵉⵏ ⵏⵉⴹⴻⵏ », ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ « ⴰⵡⵊⴰⴷ-ⵏⵙⴻⵏ ⴰⴽⴽⴻⵏ ⴰⴷ ⵙⴻⵎⵎⵃⴻⵏ ⵙⴻⴳ ⵓⵎⵓⵔ-ⵏⵙⴻⵏ ⵉ ⵍⵎⴻⵏⴷ ⵏ ⵜⵓⵇⵇⵍⴰ ⵏ ⵜⴰⵍⵡⵉⵜ ⴷ ⵓⵔⴽⴰⴷ ⵙ ⵜⵖⴰⵡⵍⴰ ⵖⴻⵔ ⵜⵎⵓⵔⵜ ⴷ ⴰⵢⴻⵏ ⴰⵔⴰ ⴰⵙⴻⵏ-ⵢⴻⴼⴽⴻⵏ ⵉⵙⴻⵖ ⵉ ⵢⵉⵎⴷⴰⵏⴻⵏ-ⴰ ».

ⵎⴰⵙⵙ ⵎⴻⵙⵙⴰⵀⴻⵍ ⵉⵃⴻⵜⵜⴻⵜ-ⴷ ⴷⴰⴽⴽⴻⵏ ⴰⵎⵛⵉⵡⴻⵕ-ⴰ « ⵢⴻⵍⵍⴰ-ⴷ ⵙ ⵍⴻⴱⵖⵉ ⵏ ⵢⵉⵍⵉⴱⵉⵢⴻⵏ ⵉ ⵢⵉⵎⴰⵏ-ⵏⵙⴻⵏ ⴽⴰⵏ. ⵓⵍⴰⵛ ⴰⴽⴽ ⵜⴰⵎⵓⵔⵜ ⵜⴰⴱⴻⵕⵕⴰⵏⵉⵜ ⴰⵢ ⴷ-ⵢⴻⴳⵔⴻⵏ ⵉⵎⴰⵏ-ⵏⵏⴻⵙ ⴷⴻⴳ ⵡⴰⵢⴰ, ⵢⴻⵔⵏⴰ ⴰⵎⵛⵉⵡⴻⵕ-ⴰ ⴷ ⵏⴻⵜⵜⴰ ⴰⵔⴰ ⵢⴻⵙⵙⵉⵡⴹⴻⵏ ⵖⴻⵔ ⵍⴻⴱⵏⵉ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴰⵔⴰ ⴷ-ⵢⴻⵍⵀⵓⵏ ⴷ ⵓⵙⵙⴻⴷⴷⵓ ⵏ ⵜⵖⴰⵡⵙⵉⵡⵉⵏ ⵜⵉⵏⴰⴳⴷⵓⴷⵉⵏ, ⴰⵎ ⵡⴰⴽⴽⴻⵏ ⴰⵔⴰ ⵢⴻⵅⴷⴻⵎ ⵖⴻⴼ ⵢⵉⵔⵉⵔⵉ ⵏ ⵓⵔⴽⴰⴷ ⴷⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵏ ⵍⵉⴱⵢⴰ, ⵢⴻⵔⵏⴰ ⴰⴷ ⵢⴻⵃⵔⴻⵣ ⵜⴰⵎⵓⵔⵜ ⵙⴻⴳ ⴱⴻⴹⴹⵓ ».