ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⵄⵉⵔⴰⵇ : ⵉⵜⴻⴷⴷⵓ ⵢⵉⴳⴻⵏ ⴷⴻⴳ ⵢⵉⵡⴻⵜ ⵏ ⵜⴻⵎⴷⵉⵏⵜ ⵜⴰⴳⴻⵊⴷⴰⵏⵜ ⵏ ⵓⴳⴰⴼⴰ ⵉ ⵢⴻⵟⵟⴻⴼ ⴷⴰⵄⵄⴻⵛ (ⴰⴼⴻⵙⵢⴰⵏ)

ⴽⵉⵔⴽⵓⴽ (ⵍⵄⵉⵔⴰⵇ), (ⵜⴰⵏⴻⴳⴳⴰ) – ⵉⵖⴰⵍⵍⴻⵏ ⵏ ⵓⵏⴰⴱⴰⴹ ⴰⵄⵉⵔⴰⵇⵉ ⵜⵜⴰⵔⵔⴰⵏ-ⴷ ⴰⴽⴰⵍ ⵉ ⴰⵙⴻⵏ-ⵉⵔⵓⵃⴻⵏ ⵎⴳⴰⵍ ⴰⴳⴳⴰⵢ ⵉⵙⴻⵎⵎⴰⵏ ⵉⵎⴰⵏ-ⵉⵙ ‘’ⴰⵡⴰⵏⴻⴽ ⵉⵙⵍⴰⵎⴰⵏ’’ (ⴷⴰⵄⵄⴻⵛ) ⴷⴻⴳ ⵜⴻⵎⴷⵉⵏⵜ ⵏ ⴱⴰⵢⵊⵉ (ⴰⴳⴰⴼⴰ). ⵜⵜⴰⵄⵔⴰⴹⴻⵏ ⴰⴷ ⵔⵔⴻⵏ ⵜⴰⵎⴷⵉⵏⵜ-ⴰ ⵉ ⵜⵉⴽⴽⴻⵍⵜ ⵜⵉⵙ ⵙⵏⴰⵜ, ⵉ ⴷ-ⵏⵏⴰⵏ ⵉⴼⴻⵙⵢⴰⵏⴻⵏ.

ⵉⵖⴰⵍⵍⴻⵏ ⵉⵄⵉⵔⴰⵇⵉⵢⴻⵏ ⵟⵟⴼⴻⵏ, ⴰⵙⴻⴳⴳⴰⵙ ⵢⴻⵣⵔⵉⵏ, ⵜⴰⵎⴷⵉⵏⵜ ⵏ ⴱⴰⵢⵊⵉ –ⵢⴻⵍⵍⴰⵏ ⵖⴻⴼ ⵓⴱⵔⵉⴷ ⵢⴻⵜⵜⴰⵡⵉⵏ ⵖⴻⵔ ⵜⴻⵎⴷⵉⵏⵜ ⵜⴰⵎⴻⵇⵔⴰⵏⵜ ⵏ ⵎⵓⵙⵓⵍ ⵢⴻⵟⵟⴻⴼ ⵜⵓⵔⴰ ⴷⴰⵄⵄⴻⵛ ⴷ ⵍⵍⵓⵣⵉⵏ ⵜⴰⵎⴻⵇⵔⴰⵏ ⵏ ⵜⵎⵓⵔⵜ ⵢⴻⵜⵜⵎⴰⵀⴰⵍⴻⵏ ⴰⵒⵉⵟⵔⵓⵍ- ⵎⴰⵛⴰ ⵙⴻⴳ ⵡⴰⵙⵙ-ⵏⵏⵉ ⵙ ⴰⵙⵙ-ⴰ, ⵉ ⵜⵉⴽⴽⴻⵍⵜ ⵏⵏⵉⴹⴻⵏ ⵜⴻⵜⵜⵡⴰⴽⴽⴻⵙ-ⴰⵙ.

ⵉⵖⴰⵍⵍⴻⵏ-ⵏⵏⴻⵖ ⵏ ⵜⵖⴻⵍⵍⵉⵙⵜ ⵡⵡⴹⴻⵏ ⵖⴻⵔ ⵜⵍⴻⵎⵎⴰⵙⵜ ⵏ ⵜⴻⵎⴷⵉⵏⵜ ⵏ ⴱⴰⵢⵊⵉ ⵖⴻⴼ 10ⵀ30 ⵏ ⵚⵚⴱⴻⵃ (07ⵀ00 ⴳⵎⵜ), ⵙⵙⵓⵍⵉⵏ ⵜⴰⴽⴱⴰⴱⵜ ⵜⴰⵄⵉⵔⴰⵇⵉⵜ’’, ⵉ ⴷ-ⵢⴻⵏⵏⴰ ⵓⵊⵉⵏⵉⵔⴰⵍ ⵏ ⵢⵉⴳⴻⵏ ⴰⵄⵉⵔⴰⵇⵉ, ⵜⴻⴱⴷⴻⵔ-ⵉⵜ-ⵉⴷ ⵜⵏⴻⴳⴳⴰ ⵏ ⴰⴼⵒ.

ⵖⴻⴼ ⵡⴰⴽⴽⴻⵏ ⵉ ⴷ-ⵢⴻⵏⵏⴰ ⵓⴼⴻⵙⵢⴰⵏ, ⵉⵖⴰⵍⵍⴻⵏ ⵉⵄⵉⵔⴰⵇⵉⵢⴻⵏ ⵡⵡⵜⴻⵏ ⵙ ⵍⴱⵓⵎⴱⴰⵜ ⵉⵎⴻⴹⵇⴰⵏ ⵏ ‘’ⵢⵉⵔⴻⴱⵔⴰⴱⴻⵏ’’ ⵢⴻⵍⵍⴰⵏ ⴷⴻⴳ ⵜⴻⵎⴷⵉⵏⵜ.

ⵢⵉⵡⴻⵏ ⵏ ⵓⴽⵓⵍⵓⵏⴰⵍ ⵏ ⵜⴻⵎⵙⵓⵍⵜⴰ, ⵜⴻⴱⴷⴻⵔ-ⵉⵜ-ⵉⴷ ⵜⵏⴻⴳⴳⴰ-ⵏⵏⵉ, ⵢⴻⵔⵏⴰ-ⴷ ⴷⴻⴳ ⵡⴰⵡⴰⵍ ⴱⴻⵍⵍⵉ ⵉⵖⴰⵍⵍⴻⵏ ⵏ ⵓⵏⴰⴱⴰⴹ ⵙⵉⵎⵎⴰⵍ ⵜⵜⴰⵥⴻⵏ ⵖⴻⵔ ⵙⴷⴰⵜ, ⵢⴻⵙⵙⴻⴳⵣⴰ-ⴷ ⴱⴻⵍⵍⵉ ⵟⵟⴼⴻⵏ ⵎⴻⵕⵕⴰ ⵜⴰⵍⴻⵎⵎⴰⵙⵜ ⵏ ⵜⴻⵎⴷⵉⵏⵜ, ‘’ⵀⴰ-ⵜⴻⵏ-ⵉⵏ ⵜⴻⴷⴷⵓⵏ ⵖⴻⵔ ⵢⴻⴳⵎⴰⵎⴻⵏ ⵏ ⵓⴳⴰⴼⴰ ⵏ ⵜⴻⵎⴷⵉⵏⵜ’’.

ⵢⴻⵜⵜⴰⵄⵔⴰⴹ ⴷⴰⵖⴻⵏ ⵢⵉⴳⴻⵏ, ⴰⴷ ⵢⴻⵙⵙⵓⴼⴻⵖ ⴰⵡⴰⵏⴻⴽ ⵉⵙⵍⴰⵎⴰⵏ (ⴻⵉ) ⵙⴻⴳ ⵍⵍⵓⵣⵉⵏ ⵏ ⵓⵒⵉⵟⵔⵓⵍ ⵢⴻⵍⵍⴰⵏ ⴷⴻⴳ ⴱⴰⵢⵊⵉ, ⴷ ⵢⵉⵡⴻⵜ ⵏ ⵍⵍⵓⵣⵉⵏ ⵜⴰⵎⴻⵇⵔⴰⵏⵜ ⵉ ⴷ-ⵢⴻⵣⴳⴰⵏ ⵜⴰⵎⴰ ⵏ ⵜⴻⵎⴷⵉⵏⵜ, ⵜⴻⵍⵍⴰⵏ ⵜⴻⵜⵜⴼⴰⵔⴻⵙ-ⴷ ⴷⴻⴳ ⵟⵟⵔⴰⴷ-ⴰ ⴰⵣⴰⵍ ⵏ 300.000 ⵉⴱⴻⵔⵎⵉⵍⴻⵏ ⵉ ⵡⴰⵙⵙ ⵏ ⵓⴼⴰⵔⵉⵙ ⵢⵓⴼⴰⴼⴻⵏ, ⴰⵢⴰ ⴷ ⴰⵣⴳⴻⵏ ⵏ ⵡⴰⵢⴻⵏ ⵜⵜⴻⵃⵡⵉⴵⵉⵏ ⴷⴻⴳ ⵜⵎⵓⵔⵜ.

ⵢⴻⵟⵟⴻⴼ ⴷⴰⵄⵄⴻⵛ ⴷⴷⴻⵇⵙ ⵏ ⵢⵉⵎⴻⴹⵇⴰⵏ ⵉ ⵍⵎⴻⵏⴷ ⵏ ⵥⵥⴻⴷⵎⴰ-ⵏⵏⵉ ⵉ ⴷ-ⵢⴻⴹⵔⴰⵏ ⴰⵎ ⵍⴻⴱⵔⴰⵇ ⴷⴻⴳ ⵡⴰⴳⴳⵓⵔ ⵏ ⵢⵓⵏⵢⵓ ⵢⴻⵣⵔⵉⵏ, ⵢⴻⵔⵏⴰ ⴷⴰⵖⴻⵏ ⵢⴻⵡⵡⵉ ⴷⴻⴳ ⵓⴱⵔⵉⴷ-ⵉⵙⵎⵓⵙⵓⵍ, ⵜⴰⵎⴷⵉⵏⵜ ⵜⵉⵙ ⵙⵏⴰⵜ ⵏ ⵜⵎⵓⵔⵜ, 24 ⵏ ⵜⵙⴰⵄⵜⵉⵏ.

ⴰⴳⴳⴰⵢ-ⴰ ⴰⵎⴻⵟⵟⴰⵔⴼⵓ, ⵏⴼⴰⵏ-ⵜ-ⵉⴷ ⵙⴻⴳ ⴽⵔⴰ ⵉⵎⴻⴹⵇⴰⵏ ⵏ ⵓⴳⴰⴼⴰ ⵏ ⴱⴻⵄⴷⴰⴷ, ⵎⴰⵛⴰ ⵎⴰⵣⴰⵍ ⵢⴻⵣⴳⴰ ⵢⴻⵟⵟⴻⴼ ⴰⵃⵔⵉⵛ ⴰⵎⴻⵇⵔⴰⵏ ⵙⴻⴳ ⵓⵜⴰⵔⴰⵎ ⵏ ⵍⵄⵉⵔⴰⵇ. (ⵜⴰⵏⴻⴳⴳⴰ)