ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵏⴻⵖⵍⴰⴼ ⴰⵎⴻⵏⵣⵓ ⵢⴻⵔⵣⴰ ⵖⴻⴼ ⵜⴽⴻⴱⴱⴰⵏⵉⵜ ⵜⴰⴷⵣⴰⵢⵔⵉⵜ-ⵜⴰⵙⵒⴻⵏⵢⵓⵍⵉⵜ ⵏ ⴷⵓⵍⵛⴻⵙⵧⵍ ⴷⴻⴳ ⵙⵉⴳ (ⵎⵄⴻⵙⴽⴻⵕ)

ⵎⵄⴻⵙⴽⴻⵕ - ⴰⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⵢⴻⵔⵣⴰ ⴰⵙⵙ ⵏ ⵍⴰⵕⴻⴱⵄⴰ ⵖⴻⴼ ⵜⴽⴻⴱⴱⴰⵏⵉⵜ ⵜⴰⴷⵣⴰⵢⵔⵉⵜ-ⵜⴰⵙⵒⴻⵏⵢⵓⵍⵉⵜ « ⴷⵓⵍⵛⴻⵙⵧⵍ » ⵢⴻⵎⵎⵓⵣⵣⴳⴻⵏ (ⵢⴻⵜⵅⴻⵚⵚⴻⵚⴻⵏ) ⴷⴻⴳ ⵓⵙⵙⴻⵡⵊⴻⴷ ⵏ ⵜⴻⵎⵥⵉⴷⵉⵏ (ⵍⵃⴻⵍⵡⴰ) ⴷⴻⴳ ⵜⴻⵎⵏⴰⴹⵜ ⵜⴰⵎⴳⵓⵔⴰⵏⵜ ⵏ ⵙⵉⴳ.

ⵎⴰⵙⵙ ⵙⴻⵍⵍⴰⵍ ⵢⴻⵙⵙⴻⴼⵇⴻⴷ ⵍⵍⵓⵣⵉⵏ-ⵏⵏⵉ ⵏ ⵜⴽⴻⴱⴱⴰⵏⵉⵜ-ⴰ ⴰⵢ ⵢⴻⴹⴹⴼⴻⵏ ⵜⴰⵊⵓⵎⵎⴰ ⵏ 47.000 ⵏ ⵢⵉⵎⵉⵜⵔⴻⵏ ⵉⵎⴽⵓⵥⴻⵏ (ⵎ2) ⵢⴻⵔⵏⴰ ⵜⴻⴱⴷⴰ ⴰⵎⴰⵀⵉⵍ ⴷⴻⴳ 2014.

ⵍⵍⵓⵣⵉⵏ-ⴰ ⵜⵅⴻⴷⴷⴻⵎ-ⴷ 4.000 ⵏ ⵢⵉⵟⵓⵏⴻⵏ ⵙⴻⴳ 12 ⵏ ⵍⴻⵚⵏⴰⴼ ⵏ ⵜⴻⵎⵥⵉⴷⵉⵏ. ⵓⵇⴱⴻⵍ ⵎⴰ ⵜⴻⵔⵥⴻⵎ ⵍⵍⵓⵣⵉⵏ-ⴰ, ⵜⵉⵎⵥⵉⴷⵉⵏ-ⴰ ⵍⵍⴰⵏ ⵜⵜⴰⵡⵉⵏ-ⵜⴻⵏⵜ-ⵉⴷ ⵙⴻⴳ ⵜⴽⴻⴱⴱⴰⵏⵉⵜ ⵜⴰⵢⴻⵎⵎⴰⵜ ⵢⴻⵍⵍⴰⵏ ⴷⴻⴳ ⵙⵒⴻⵏⵢⵓⵍ. ⵍⵍⵓⵣⵉⵏ-ⴰ ⴰⵢ ⴷ-ⵉⵍⵓⵍⴻⵏ ⵙ ⵜⵉⵛⵛⵓⵔⴽⴰ ⴳⴰⵔ ⵜⴽⴻⴱⴱⴰⵏⵉⵜ ⵜⴰⴷⵣⴰⵢⵔⵉⵜ ⴷ ⵜⴽⴻⴱⴱⴰⵏⵉⵜ ⵜⴰⵙⵒⴻⵏⵢⵓⵍⵉⵜ ⵜⴻⵙⵙⴻⵅⴷⴰⵎ 100 ⵏ ⵢⵉⵅⴻⴷⴷⴰⵎⴻⵏ.

ⴷⵖⴰ ⵉ ⵍⵎⴻⵏⴷ ⵏ ⵜⴻⵔⵣⵉ-ⴰ, ⵙⴻⵍⵍⴰⵍ ⵉⴳⴻⵔ-ⴷ ⵜⵉⵖⵔⵉ ⵉ ⵢⵉⵎⴹⴻⴱⴱⵔⴻⵏ ⵏ ⵜⴽⴻⴱⴱⴰⵏⵉⵜ-ⴰ ⴰⴽⴽⴻⵏ ⴰⴷ ⴷ-ⵔⵔⴻⵏ ⵍⵡⴻⵍⵀⴰ-ⵏⵙⴻⵏ ⵖⴻⵔ ⵓⵙⵙⵉⴵⴻⵡ ⵏ ⵙⵙⴻⵍⵄⴰ-ⵏⵙⴻⵏ ⵖⴻⵔ ⵜⵎⵓⵔⴰ ⵜⵉⴱⴻⵕⵕⴰⵏⵉⵢⵉⵏ.

ⵎⵉ ⵢⴻⵍⵍⴰ ⴷⵉⵏ, ⴰⵏⴻⵖⵍⴰⴼ ⴰⵎⴻⵏⵣⵓ ⵙⴼⴻⵀⵎⴻⵏ-ⴰⵙ-ⴷ ⴷ ⴰⴽⴽⴻⵏ ⴰⵣⴰⴷⴰⵖ (ⵍⴱⴰⵟⵉⵎⴰ) ⴰⵎⴻⵣⵡⴰⵔⵓ ⵏ ⵍⵍⵓⵣⵉⵏ-ⴰ ⵔⴻⵥⵎⴻⵏ-ⵜ ⴷⴻⴳ ⴷⵓⵊⴻⵎⴱⴻⵕ ⵏ 2014, ⵢⴻⵔⵏⴰ ⵜⴰⴽⴻⴱⴱⴰⵏⵉⵜ-ⴰ ⵍⴰ ⵜⴻⵙⵙⴻⴼⵔⴰⵢ ⴰⴷ ⵜⴻⵔⵏⵓ ⴰⴷ ⵜⴻⵔⵥⴻⵎ 4 ⵏ ⵢⵉⵣⴰⴷⴰⵖⴻⵏ ⵏⵉⴹⴻⵏ ⵙⴻⴳ-ⴰ ⵖⴻⵔ 2020, ⴰⵎ ⵡⴰⴽⴽⴻⵏ ⴰⵢ ⵜⴻⵙⵙⴻⴼⵔⴰⵢ ⴰⴷ ⵜⴻⵙⵙⴰⴵⴰⵡ ⴽⵔⴰ ⵙⴻⴳ ⵙⵙⴻⵍⵄⴰ-ⵏⵏⴻⵙ ⵖⴻⵔ ⵜⵎⵓⵔⴰ ⵏ ⵓⵣⵖⴰⵔ.

ⴰⵣⴰⴷⴰⵖ ⵏ ⵍⵍⵓⵣⵉⵏ-ⴰ ⴷⴻⴳ ⵍⴰ ⴷ-ⵜⵜⵡⴰⵅⴷⴰⵎⴻⵏⵜ ⵜⴻⵎⵥⵉⴷⵉⵏ ⵢⴻⴹⴹⴻⴼ ⵜⴰⵊⵓⵎⵎⴰ ⵏ 6.310 ⵏ ⵢⵉⵎⵉⵜⵔⴻⵏ ⵉⵎⴽⵓⵥⴻⵏ (ⵎ2) ⵢⴻⵔⵏⴰ ⵢⴻⵙⵄⴰ ⵍⵎⴻⵅⵣⴻⵏ ⴷⴻⴳ ⵊⴻⵎⵄⴻⵏ ⵜⵉⵏⴻⴳⵡⴰ ⵜⵉⵎⴻⵣⵡⵓⵔⴰ. ⴰⵎⵓⵔ ⴰⵎⴻⵇⵔⴰⵏ ⵙⴻⴳ ⵜⵏⴻⴳⵡⴰ-ⴰ ⵜⵜⵡⴰⵅⴷⴰⵎⴻⵏⵜ-ⴷ ⴷⴻⴳ ⵍⴻⵣⵣⴰⵢⴻⵔ. ⵍⵍⵓⵣⵉⵏ-ⴰ ⵜⴻⵙⵄⴰ ⴷⴰⵖ ⴰⵃⵔⵉⵛ ⵉ ⵓⵀⴻⵢⵢⵉ ⵏ ⵙⵙⴻⵍⵄⴰ ⵉ ⵓⴼⵔⴰⵇ.

ⵜⴰⴽⴻⴱⴱⴰⵏⵉⵜ-ⴰ ⵜⴻⴱⵏⴰ ⴷⴰⵖ ⵜⴰⵖⵙⴻⵔⵜ ⵉ ⵓⵙⵙⵉⵣⴷⴻⴳ ⵏ ⵡⴰⵎⴰⵏ ⵢⵓⵎⵙⴻⵏ ⵢⴻⵙⵄⴰⵏ ⵜⴰⵣⵎⴻⵔⵜ ⵏ 100 ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⴷⴻⴳ ⵡⴰⵙⵙ.

ⵎⴰⵙⵙ ⵙⴻⵍⵍⴰⵍ ⵉⴼⵓⴽ ⵜⵉⵔⵣⵉ-ⵏⵏⴻⵙ ⵖⴻⴼ ⵎⵄⴻⵙⴽⴻⵕ ⵙ ⵓⵙⵙⴻⴼⵇⴻⴷ ⵏ ⵢⵉⵡⴻⵜ ⵏ ⵍⵍⵓⵣⵉⵏ ⴰⵢ ⴷ-ⵉⵅⴻⴷⴷⵎⴻⵏ ⵍⴽⴰⵖⴻⴹ ⵏ ⵓⵊⴻⵍⵍⴻⵍ ⵏ ⵜⴽⴻⴱⴱⴰⵏⵉⵜ ⵏ « ⴰⵍⴳⴻⵔⵉⴰⵏ ⴽⵔⴰⴼⵜ ⵒⴰⵒⴻⵔ », ⴷ ⵜⵉⵏ ⴰⵢ ⴷ-ⵢⴻⵣⴳⴰⵏ ⴷⴻⴳ ⵜⴻⵎⵏⴰⴹⵜ ⵜⴰⵎⴳⵓⵔⴰⵏⵜ ⵏ ⵣⴰⵀⴰⵏⴰ.

ⵜⴰⴽⴻⴱⴱⴰⵏⵉⵜ-ⴰ ⵜⵓⵙⵍⵉⴳⵜ ⵜⴻⵏⵏⵓⵍⴼⴰ-ⴷ ⴷⴻⴳ 1995 ⵙ ⵕⴰⵙⴻⵍⵎⴰⵍ ⵏ 80 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ, ⵢⴻⵔⵏⴰ ⵜⴻⵎⵎⵓⵣⵣⴻⴳ ⴷⴻⴳ ⵜⵛⵓⵍⵍⵉⴹⵉⵏ ⵏ ⵍⴽⴰⵖⴻⴹ ⵉ ⵢⵉⴼⴰⵔⵉⵙⴻⵏ ⵢⴻⵎⴳⴻⵔⵔⴰⴷⴻⵏ ⴰⵎ ⵓⵙⵉⵎⴰⵏ, ⴰⵎⴻⵔⵙ ⴷ ⵢⵉⵙⵓⴷⴷⵉⵎⴻⵏ-ⵏⵏⴻⵙ, ⵍⴼⴰⵕⵉⵏⴰ, ⴰⵡⵔⴻⵏ, ⵜⴰⵎⴰⵇⵇⵓⵙⵜ (ⵍⴻⵖⴱⴻⵔ), ⵓⵞⵞⵉ ⵏ ⵍⵎⴰⵍ ⴷ ⵢⵉⴼⴰⵔⵉⵙⴻⵏ ⵉⴽⵔⵓⵔⴰⵏⴻⵏ.

ⵍⵍⵓⵣⵉⵏ-ⴰ ⵜⴻⵍⵍⴰ ⵜⵅⴻⴷⴷⴻⵎ-ⴷ, ⴷⴻⴳ 1995, 5 ⵏ ⵢⵉⵎⴻⵍⵢⵓⵏⴻⵏ ⵏ ⵜⵛⵓⵍⵍⵉⴹⵉⵏ ⴷⴻⴳ ⵓⵙⴻⴳⴳⴰⵙ, ⵙⴰⴽⴽⵉⵏ ⵜⴻⵡⵡⴻⴹ ⵖⴻⵔ 20 ⵏ ⵢⵉⵎⴻⵍⵢⵓⵏⴻⵏ ⴷⴻⴳ 1996. ⵎⴰ ⴰⵙⴻⴳⴳⴰⵙ-ⴰ, ⵜⴻⵙⵙⴰⵡⴻⴹ ⵖⴻⵔ 170 ⵏ ⵢⵉⵎⴻⵍⵢⵓⵏⴻⵏ ⵏ ⵜⵛⵓⵍⵍⵉⴹⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵙⴼⴻⵀⵎⴻⵏ ⵉ ⵜⵎⴰⴳⵍⴰ ⵏ ⵓⵏⴻⵖⵍⴰⴼ ⴰⵎⴻⵏⵣⵓ.

ⴷⵖⴰ ⵉ ⵍⵎⴻⵏⴷ ⵏ ⵡⴰⵢⴰ, ⴰⵏⴻⵖⵍⴰⴼ ⴰⵎⴻⵏⵣⵓ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵡⴰⵏⴰⴽ ⵢⴻⵡⵊⴻⴷ ⴰⴷ ⵉⵄⴰⵡⴻⵏ ⵍⵍⵓⵣⵉⵏ-ⴰ ⴷ ⵢⵉⵙⴻⵏⴼⴰⵔⴻⵏ ⵉⵛⵓⴱⴰⵏ ⴰⵢⴰ ⵢⴻⵔⵏⴰ ⵜⵜⴻⴽⴽⴰⵢⴻⵏ ⴷⴻⴳ ⵜⵏⴻⴼⵍⵉⵜ ⵜⴰⵖⴻⵍⵏⴰⵡⵜ.

ⵉ ⵓⵙⵎⴻⴽⵜⵉ, ⵜⴰⴽⴻⴱⴱⴰⵏⵉⵜ-ⴰ ⵜⴻⵍⵍⴰ ⵜⴻⵙⵄⴰ ⵢⵉⵡⴻⵜ ⴽⴰⵏ ⵏ ⵍⵍⵓⵣⵉⵏ ⴷⴻⴳ 1995, ⵙⴰⴽⴽⵉⵏ ⵜⴻⵇⵇⴻⵍ ⵜⴻⵙⵄⴰ 3 ⴷⴻⴳ 1997, ⵎⴰ ⴰⵙⵙ-ⴰ, ⵜⴻⵙⵄⴰ 4, ⵢⴻⵔⵏⴰ ⵍⴰ ⵜⴻⵙⵙⴻⴼⵔⴰⵢ ⴰⴷ ⵜⴻⵔⵏⵓ ⴰⴷ ⵜⴻⵔⵥⴻⵎ ⵜⵉⵙ 5 ⴰⴽⴽⴻⵏ ⴰⴷ ⵜⴻⵙⵙⵉⵡⴻⴹ ⴰⴼⴰⵔⴻⵙ-ⵏⵏⴻⵙ ⵖⴻⵔ 270 ⵏ ⵢⵉⵎⴻⵍⵢⵓⵏⴻⵏ ⵏ ⵜⵛⵓⵍⵍⵉⴹⵉⵏ ⵉ ⵓⵙⴻⴳⴳⴰⵙ.

ⵜⴰⴽⴻⴱⴱⴰⵏⵉⵜ-ⴰ ⵍⴰ ⵜⴻⵙⵙⴻⵅⴷⴰⵎ, ⵉⵎⵉⵔ-ⴰ, 150 ⵏ ⵢⵉⵅⴻⴷⴷⴰⵎⴻⵏ, ⵢⴻⵔⵏⴰ ⵍⴰ ⵜⴻⵙⵙⴻⴼⵔⴰⵢ ⴰⴷ ⵜⴻⵔⵏⵓ ⴰⴷ ⴷ-ⵜⴻⵙⵙⵉⴷⴻⴼ 60 ⵏ ⵢⵉⵅⴻⴷⴷⴰⵎⴻⵏ ⵏⵉⴹⴻⵏ ⴰⵙⴻⴳⴳⴰⵙ ⴰⵢ ⴷ-ⵢⴻⵜⵜⴻⴷⴷⵓⵏ, ⴰⵙⵎⵉ ⴰⵔⴰ ⵜⴻⵔⵥⴻⵎ ⵍⵍⵓⵣⵉⵏ-ⵏⵏⴻⵙ ⵜⵉⵙ 5.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵜⴰⴽⴻⴱⴱⴰⵏⵉⵜ-ⴰ ⵜⴻⵙⵙⴻⵅⴷⴰⵎ 150 ⵏ ⵢⵉⵎⴷⴰⵏⴻⵏ ⵏⵉⴹⴻⵏ ⵙ ⵓⴱⵔⵉⴷ ⴰⵔⵓⵙⵔⵉⴷ.