ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⵖⴻⵍⵍⴰ ⵏ ⵢⵉⵔⴷⴻⵏ ⴷ ⵜⴻⵎⵥⵉⵏ ⵜⴻⵔⵏⴰ ⵙ 20% ⴷⴻⴳ ⵍⴻⵣⵣⴰⵢⴻⵔ (ⴰⵏⴻⵖⵍⴰⴼ)

ⵇⵙⴻⵏⵟⵉⵏⴰ – ⴰⴼⴰⵔⴻⵙ ⵏ ⵢⵉⵎⴻⵏⴷⵉ (ⵉⵔⴷⴻⵏ ⴷ ⵜⴻⵎⵥⵉⵏ) ⴰⴷ ⵢⴻⵔⵏⵓ ⴰⵙⴻⴳⴳⴰⵙ-ⴰ ⵙ 20% ⵖⴻⴼ ⵍⴻⵃⵙⴰⴱ ⵏ ⵓⵙⴻⴳⴳⴰⵙ ⴰⵢ ⵢⴻⵣⵔⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵙⵙⴻⴱⵜ ⴷⴻⴳ ⵇⵙⴻⵏⵟⵉⵏⴰ ⵓⵏⴻⵖⵍⴰⴼ ⵏ ⵜⴼⴻⵍⵍⴰⵃⵜ ⴷ ⵓⴼⴰⵔⴻⵙ ⵏ ⵜⵎⵓⵔⵜ, ⴰⴱⴷⴻⵍⴽⴰⴷⴻⵔ ⴽⴰⴷⵉ.

ⴰⵏⴻⵖⵍⴰⴼ ⴰⵢ ⵢⴻⴼⴽⴰⵏ ⵍⵓⵎⵉⵕⴰ ⴰⴽⴽⴻⵏ ⴰⴷ ⵜⴻⴱⴷⵓ ⵜⵃⴻⵎⵍⴰ ⵏ ⵜⵎⴻⵔⴳⴰ ⴷ ⵓⵙⵙⴻⵔⵡⴻⵜ ⴷⴻⴳ ⵢⵉⵡⴻⵜ ⵏ ⵍⴼⵉⵔⵎⴰ ⴷⴻⴳ ⵜⵖⵉⵡⴰⵏⵜ ⵏ ⵄⵉⵏ ⵄⴱⵉⴷ (40 ⵏ ⵢⵉⴽⵉⵍⵓⵎⵉⵜⵔⴻⵏ ⴷⴻⴳ ⵓⵏⵥⵓⵍ-ⴰⴳⵎⵓⴹⴰⵏ ⵏ ⵇⵙⴻⵏⵟⵉⵏⴰ), ⵢⴻⵏⵏⴰ-ⴷ ⴷ ⴰⴽⴽⴻⵏ ⵓⵍⴰ ⵎⴰ ⵜⴰⴳⵏⵉⵜ ⵏ ⵜⴻⴳⵏⴻⵡⵜ ⵜⴻⵅⵚⴻⵔ ⴰⵙⴻⴳⴳⴰⵙ-ⴰ, ⵍⵖⴻⵍⵍⴰ ⵏ ⵢⵉⵎⴻⵏⴷⵉ ⴰⴷ ⵜⴰⵡⴻⴹ ⵖⴻⵔ 43 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵇⴻⵏⵟⴰⵔⴻⵏ, ⵢⵉⵍⵉ ⴰⵙⴻⴳⴳⴰⵙ ⵢⴻⵣⵔⵉⵏ ⵍⵖⴻⵍⵍⴰ ⵜⴻⴼⴽⴰ-ⴷ 35 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵇⴻⵏⵟⴰⵔⴻⵏ.

ⵎⴰⵙⵙ ⴽⴰⴷⵉ ⵢⴻⵙⵎⴻⴽⵜⵉ-ⴷ ⴷ ⴰⴽⴽⴻⵏ ⴰⵙⵏⴻⴼⵍⵉ ⵏ ⵍⵖⴻⵍⵍⴰⵜ ⵏ ⵜⴼⴻⵍⵍⴰⵃⵜ ⵏ ⵍⵍⵙⴰⵙ ⴷ « ⵜⵓⵣⵡⵉⵔⵜ ⵏ ⵓⵏⴰⴱⴰⴹ », ⵢⴻⵔⵏⴰ ⵉⵃⴻⵜⵜⴻⵜ-ⴷ ⴷ ⴰⴽⴽⴻⵏ « ⴰⵙⵙⴻⵍⵀⵓ ⵏ ⵜⵓⴷⴷⵙⴰ ⴷ ⵓⵙⵙⴻⵎⵢⵓⴷⴷⴻⵙ ⴳⴰⵔ ⵢⵉⵛⵔⵉⴽⴻⵏ ⵢⴻⵎⴳⴻⵔⵔⴰⴷⴻⵏ ⵏ ⵓⵃⵔⵉⵛ-ⴰ ⴰⴷ ⵢⴻⵔⵏⵓ ⴰⴷ ⵢⴻⵙⵙⴻⵎⵖⴻⵔ » ⵍⵖⴻⵍⵍⴰⵜ.

ⵜⴰⵃⴻⵎⵍⴰ ⵏ ⵜⵎⴻⴳⵔⴰ ⴷ ⵓⵙⵙⴻⵔⵡⴻⵜ ⵏ ⵓⵙⴻⴳⴳⴰⵙ-ⴰ ⴰⴷ ⴷ-ⵜⵃⴰⵣ 3,3 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵇⴻⵟⵟⴰⵔⴻⵏ ⴳⴰⵔ-ⴰⵙⴻⵏ 1,5 ⴷ ⴰⵎⴻⵍⵢⵓⵏ ⵏ ⵢⵉⵇⴻⵟⵟⴰⵔⴻⵏ ⵉ ⵢⵉⵔⴷⴻⵏ ⵉⵇⵓⵔⴰⵏⴻⵏ, ⴰⵎⴻⵍⵢⵓⵏ ⵏ ⵢⵉⵇⴻⵟⵟⴰⵔⴻⵏ ⵏ ⵜⴻⵎⵥⵉⵏ, 600.000 ⵏ ⵢⵉⵇⴻⵟⵟⴰⵔⴻⵏ ⵏ ⵢⵉⵔⴷⴻⵏ ⵉⵍⴻⵇⵇⴰⵇⴻⵏ ⴷ 100.000 ⵏ ⵢⵉⵇⴻⵟⵟⴰⵔⴻⵏ ⵏ ⵓⵥⴻⴽⴽⵓⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵙⴻⴳ ⵢⵉⴷⵉⵙ-ⵏⵏⴻⵙ ⵢⵉⵎⴹⴻⴱⴱⴻⵔ ⵏ ⵜⴻⵖⵡⴰⵍⵜ ⴷⴻⴳ ⵓⵖⵍⵉⴼ ⵏ ⵜⴼⴻⵍⵍⴰⵃⵜ, ⴷⵊⴰⵎⴻⵍ ⴱⴻⵔⵛⵀⵉⵛⵀⴻ, ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⵡⵉⵍⴰⵜ ⵏ ⵇⵙⴻⵏⵟⵉⵏⴰ, ⴰⴼⴰⵔⴻⵙ ⵏ ⵢⵉⵎⴻⵏⴷⵉ ⵉ ⵓⵙⴻⴳⴳⴰⵙ-ⴰ « ⵓⵔ ⴷ-ⵢⴻⵜⵜⵉⵍⵉ ⴰⵔⴰ ⴷⴷⴰⵡ ⵏ ⵡⴰⵏⴻⵛⵜ ⴰⵢ ⴰⵙ-ⵙⵙⴻⴼⵔⴰⵏ ⵢⴻⵔⵏⴰ ⴰⴷ ⵜⴰⵡⴻⴹ ⵍⵖⴻⵍⵍⴰ ⵖⴻⵔ 1,5 ⴷ ⴰⵎⴻⵍⵢⵓⵏ ⵏ ⵢⵉⵇⴻⵏⵟⴰⵔⴻⵏ, ⵓⵍⴰ ⵎⴰ ⵅⵓⵚⵚⴻⵏ ⵡⴰⵎⴰⵏ ⵉⵎⵉ ⵓⵔ ⴷ-ⵉⵡⵉⵜ ⴰⵔⴰ ⴰⵟⴰⵙ ⵏ ⵓⵏⵥⴰⵔ ⴳⴰⵔ ⵡⴰⵢⵢⵓⵔⴻⵏ ⵏ ⵢⴻⴱⵔⵉⵔ ⴷ ⵎⴰⵢⵓ ⵢⴻⵣⵔⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ ⴰⴷⵉⴳⴰⵏ ⵏ ⵓⵃⵔⵉⵛ-ⴰ, ⵢⴰⵛⵉⵏⴻ ⴳⵀⴻⴷⵉⵔⵉ, ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷ ⴰⴽⴽⴻⵏ ⴰⴽⴰⵍ ⴷⴻⴳ ⵜⴻⵎⵏⴰⴹⵜ ⵏ ⵓⴳⴰⴼⴰⵏ ⵏ ⵜⵡⵉⵍⴰⵢⵜ ⵉⵊⴻⵎⵎⴻⵄ ⴰⵎⴰⵏ ⵢⴻⵔⵏⴰ ⵢⴻⵜⵜⴰⴵⴵⴰ ⵉⵎⵖⴰⵏ ⴰⴷ ⴷ-ⵎⵖⵉⵏ ⴰⴽⴽⴻⵏ ⵉⵡⴰⵜⴰ.