ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

Ikayaden iɣelnawen llan-d « deg tegnatin yelhan »

ⵍⴻⵣⵣⴰⵢⴻⵔ – ⵜⴰⵏⴻⵖⵍⴰⴼⵜ ⵏ ⵓⵙⵙⴻⴳⵎⵉ ⴰⵖⴻⵍⵏⴰⵡ, ⵏⵧⵓⵔⵉⴰ ⴱⴻⵏⴳⵀⴻⴱⵔⵉⵜ, ⵜⴻⵏⵏⴰ-ⴷ ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⴷ ⴰⴽⴽⴻⵏ ⵉⴽⴰⵢⴰⴷⴻⵏ ⵉⵖⴻⵍⵏⴰⵡⴻⵏ ⵏ ⵓⵙⴻⴳⴳⴰⵙ-ⴰ ⵍⵍⴰⵏ-ⴷ « ⴷⴻⴳ ⵜⴻⴳⵏⴰⵜⵉⵏ ⵢⴻⵍⵀⴰⵏ », ⵓⵍⴰ ⵎⴰ ⵍⵍⴰⵏⵜ-ⴷ ⴽⵔⴰ ⵏ ⵍⵉⵃⴰⵍⴰⵜ « ⵜⵓⵄⵣⵉⵍⵉⵏ » ⵏ ⵍⴻⵅⴷⴻⵄ.

« ⵙ ⵓⵎⴰⵜⴰ, ⵉⴽⴰⵢⴰⴷⴻⵏ ⵍⵍⴰⵏ-ⴷ ⴷⴻⴳ ⵜⴻⴳⵏⴰⵜⵉⵏ ⵢⴻⵍⵀⴰⵏ, ⵓⵍⴰ ⵎⴰ ⵜⴻⵍⵍⴰ-ⴷ ⵜⵃⴻⵎⵍⴰ ⵓⵔ ⵢⴻⵙⵄⵉⵏ ⵜⴰⵎⵜⵉⵍⵜ ⴷⴻⴳ ⵢⵉⵥⴻⴹⵡⴰⵏ ⵉⵏⵎⴻⵜⵜⵉⵢⴻⵏ ⵢⴻⵔⵏⴰ ⵍⵍⴰⵏⵜ-ⴷ ⴽⵔⴰ ⵏ ⵍⵉⵃⴰⵍⴰⵜ ⵜⵓⵄⵣⵉⵍⵉⵏ ⵏ ⵍⴻⵅⴷⴻⵄ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵎⴰⵙⵙⴰ ⴱⴻⵏⴳⵀⴻⴱⵔⵉⵜ ⴷⴻⴳ ⵓⵙⴰⵔⴰⴳ ⴰⵖⴻⵍⵏⴰⵡ ⵏ ⵢⵉⵏⴻⵎⵀⴰⵍⴻⵏ ⵏ ⵓⵙⵙⴻⴳⵎⵉ ⴰⵢ ⴷ-ⵢⴻⵍⵍⴰⵏ ⵉ ⵍⵎⴻⵏⴷ ⵏ ⵓⵇⴻⵢⵢⴻⵎ ⵏ ⵢⵉⴽⴰⵢⴰⴷⴻⵏ ⵉⵖⴻⵍⵏⴰⵡⴻⵏ.

ⵜⴰⵏⴻⵖⵍⴰⴼⵜ ⵜⴻⴱⴷⴻⵔ-ⴷ « ⴽⵔⴰ ⵏ ⵍⴻⵅⵚⴰⵚⴰⵜ ⴷ ⵡⵓⴳⵓⵔⴻⵏ » ⵉⵙⵏⴻⴳⵎⴰⵏⴻⵏ ⴷ ⵡⵓⵙⵙⵏⴰⵏⴻⵏ ⵢⴻⵇⵇⵏⴻ ⵖⴻⵔ ⵢⵉⴽⴰⵢⴰⴷⴻⵏ-ⵏⵏⵉ.

ⵙⴻⴳ ⵢⵉⴷⵉⵙ ⵏ ⵍⴻⵃⵙⴰⴱⴰⵜ, ⴰⵎⴹⴰⵏ ⵏ ⵢⵉⵎⴰⵣⵡⴰⵔⴻⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵢⵉⴽⴰⵢⴰⴷⴻⵏ-ⴰ ⵢⴻⵔⵏⴰ ⵙ 200.000 ⵖⴻⴼ ⵍⴻⵃⵙⴰⴱ ⵏ ⵓⵙⴻⴳⴳⴰⵙ ⵢⴻⵣⵔⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴻⵖⵍⴰⴼⵜ, ⵢⴻⵔⵏⴰ ⵜⴳⴻⵔ-ⴷ ⵜⴰⵎⴰⵡⵜ ⴷ ⴰⴽⴽⴻⵏ ⴰⵙⴻⴳⴳⴰⵙ-ⴰ ⵜⵜⵡⴰⴽⴽⵙⴻⵏ ⵢⵉⴽⴰⵢⴰⴷⴻⵏ ⵏ ⵓⵇⴹⴰⵄ ⴷⴻⴳ ⵜⴳⴰⵔⴰ ⵏ ⵜⴻⵣⵔⴰⵡⵉⵏ ⵜⵉⵎⴻⵏⵣⴰ ⴷ ⵢⵉⴽⴰⵢⴰⴷⴻⵏ ⵏ ⵓⵎⵏⴰⵕ ⵉ ⵡⵉⴷ ⴰⵔⴰ ⵢⴻⵙⵄⴻⴷⴷⵉⵏ ⵍⴱⴰⴽ. ⵉⴽⴰⵢⴰⴷⴻⵏ-ⴰ ⵍⵍⴰⵏ ⵜⵜⵉⵍⵉⵏ-ⴷ ⵢⴰⵍ ⴰⵙⴻⴳⴳⴰⵙ ⴷⴻⴳ 8 ⵏ ⵢⵉⵙⴻⴳⴳⴰⵙⴻⵏ-ⴰ ⵉⵏⴻⴳⴳⵓⵔⴰ.

ⴰⵙⴻⴳⴳⴰⵙ-ⴰ ⵎⴰⵛⵉ ⴰⵎ ⵙⵉⵏ ⵏ ⵢⵉⵙⴻⴳⴳⴰⵙⴻⵏ ⵉⵏⴻⴳⴳⵓⵔⴰ ⴷⴻⴳ ⴰⵢ ⵙⵔⴻⵡⵍⴻⵏ ⵉⵙⴻⵏⵜⴰⵍ ⵖⴻⵔ ⴱⴻⵕⵕⴰ ⵢⴻⵔⵏⴰ ⵢⴻⵍⵍⴰ-ⴷ ⵍⴻⵅⴷⴻⵄ ⴷ ⴰⵎⴻⵇⵔⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵎⴰⵙⵙⴰ ⴱⴻⵏⴳⵀⴻⴱⵔⵉⵜ. ⴷ ⴰⵛⵓ ⴽⴰⵏ, ⵜⴰⵏⴻⵖⵍⴰⴼⵜ ⵜⴻⵏⵏⴰ-ⴷ ⴷ ⴰⴽⴽⴻⵏ ⴽⵔⴰ ⵏ ⵢⵉⵏⴻⵍⵎⴰⴷⴻⵏ ⵙⵇⴻⴷⵛⴻⵏ ⵜⵉⴽⵏⵓⵙⵙⵏⵉⵡⵉⵏ ⵜⵉⵎⴰⵢⵏⵓⵜⵉⵏ ⵉ ⵍⴻⵅⴷⴻⵄ (ⵍⴰⴷⵖⴰ ⵜⴰⴽⵏⵓⵙⵙⵏⴰ ⵜⴰⵎⴰⵢⵏⵓⵜ ⵏ 3ⴳ [ⵜⴰⵙⵓⵜⴰ ⵜⵉⵙ 3] ⴷⴻⴳ ⵍⴱⴰⴽ), ⵢⴻⵔⵏⴰ ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵜⵜⵡⴰⵇⴻⴷⵛⴻⵏⵜ ⵜⴻⴽⵏⵓⵙⵙⵏⵉⵡⵉⵏ-ⴰ « ⵉ ⵢⵉⵎⴻⵏⵖⵉ ⵎⴳⴰⵍ ⵍⴻⵅⴷⴻⵄ ⴰⵢ ⵉⵣⴻⵔⵄⴻⵏ ⴰⵙⵙ-ⴰ ⴷⴻⴳ ⵓⵎⴰⴹⴰⵍ ».

ⵜⴰⵏⴻⵖⵍⴰⴼⵜ ⵜⴳⴻⵔ-ⴷ ⵜⵉⵖⵔⵉ ⵉ ⵢⵉⵎⴹⴻⴱⴱⵔⴻⵏ ⵏ ⵓⵃⵔⵉⵛ ⵏ ⵓⵙⵙⴻⴳⵎⵉ ⴰⴽⴽⴻⵏ « ⴰⴷ ⴷⴷⵎⴻⵏ ⵉⵃⴻⵣⵣⵉⴱⴻⵏ ⵏ ⵍⵇⴰⵏⵓⵏ ⴷⴻⴳ ⵢⵉⵙⵡⵉⵔⴻⵏ ⵢⴻⵎⴳⴻⵔⵔⴰⴷⴻⵏ », ⵢⴻⵔⵏⴰ ⵜⴻⵏⵏⴰ-ⴷ ⴷ ⴰⴽⴽⴻⵏ ⵉⵎⴷⴰⵏⴻⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵍⴻⵅⴷⴻⵄ ⵢⴻⵙⵙⴻⴼⴽ ⴰⴷ ⵜⵜⵡⴰⵄⴰⵇⴱⴻⵏ ⴰⵎⴰ ⵙ ⵓⴱⵔⵉⴷ ⵓⵙⵔⵉⴷ, ⴰⵎⴰ ⵙ ⵓⴱⵔⵉⴷ ⴰⵔⵓⵙⵔⵉⴷ.

ⴷⵉⵎⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵍⴻⵅⴷⴻⵄ, ⵜⴰⵏⴻⵖⵍⴰⴼⵜ ⵜⴻⵏⵏⴰ-ⴷ ⴷ ⴰⴽⴽⴻⵏ ⵉⵙⵡⵉ-ⵏⵏⴻⵙ ⴰⵎⴻⵣⵡⴰⵔⵓ ⵏⴻⵜⵜⴰ ⴷ ⴰⵙⵙⴰⴽⵉ ⵏ ⵢⵉⵎⴻⵇⵔⴰⵏⴻⵏ ⵓⵔ ⴷ-ⵢⴻⵛⵍⵉⴳⴻⵏ ⴰⵔⴰ ⵏⴻⵖ ⴼⴽⴰⵏ ⴰⴼⵓⵙ ⵎⵉ ⴰⵔⴰ ⵜⵜⴻⴽⴽⵉⵏ ⵢⵉⴳⴻⵔⴷⴰⵏ ⴷⴻⴳ ⵍⴻⵅⴷⴻⵄ.

ⵜⴰⵏⴻⵖⵍⴰⴼⵜ ⵜⴻⵙⵎⴻⴽⵜⵉ-ⴷ ⴷ ⴰⴽⴽⴻⵏ ⵜⴻⴼⴽⴰ ⴰⵣⴰⵍ ⴷ ⴰⵎⴻⵇⵔⴰⵏ ⵉ ⵓⵙⵙⴻⴼⵄⴻⵍ ⵏ ⵓⵔⴽⴰⵡⴰⵍ ⵏ ⵜⴻⵣⴷⴻⴳ ⵏ ⵚⵚⴻⵏⵄⴰ ⴷ ⵓⵔⴽⴰⴷ ⵏ ⵓⵃⵔⵉⵛ ⵏ ⵓⵙⵙⴻⴳⵎⵉ « ⵡⴰⵔ ⵍⴻⵄⴹⵉⵍ ».

ⵜⴰⵏⴻⵖⵍⴰⴼⵜ ⵜⴳⴻⵔ-ⴷ ⴷⴰⵖ ⵜⵉⵖⵔⵉ ⵉ ⵓⵙⴽⴰⵙⵉ ⵖⴻⴼ ⵓⵖⴻⵔⴱⴰⵣ ⴰⴷⵣⴰⵢⵔⵉ ⵙ ⵓⵜⵜⴻⴽⴽⵉ ⵏ ⵡⴰⴽⴽ ⵡⵉⴷ ⴰⵢ ⵉⵅⴻⴷⴷⵎⴻⵏ ⴷⴻⴳ ⵓⵃⵔⵉⵛ ⵏ ⵜⴻⵙⵏⴻⴳⵎⵉⵜ, ⴰⵎ ⵡⴰⴽⴽⴻⵏ ⴰⵢ ⴷ-ⵜⵃⴻⵜⵜⴻⵜ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⴻⵜⵜⵉⵍⵉ « ⵓⵎⵛⵉⵡⴻⵕ ⵖⴻⴼ ⵡⴰⵎⴻⴽ ⴰⵔⴰ ⴷ-ⵜⵜⵡⴰⵀⴻⵢⵢⴰⵢⴻⵏ ⵢⵉⵙⴻⵏⵜⴰⵍ ⵏ ⵢⵉⴽⴰⵢⴰⴷⴻⵏ ».

« ⵜⴰ ⴷ ⵜⴰⵎⵙⴰⵍⵜ ⴰⵢⵖⴻⴼ ⵢⴻⵣⵎⴻⵔ ⴰⴷ ⴷ-ⵢⵉⵍⵉ ⵓⵙⴽⴰⵙⵉ ⴷⴻⴳ ⵜⵖⵉⵎⵉⵢⵉⵏ ⵏ ⵓⵙⵙⴻⴳⵎⵉ ⴰⵔⴰ ⴷ-ⵢⵉⵍⵉⵏ ⴰⵢⵢⵓⵔ ⴰⵢ ⴷ-ⵢⴻⵜⵜⴻⴷⴷⵓⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵎⴰⵙⵙⴰ ⴱⴻⵏⴳⵀⴻⴱⵔⵉⵜ.

ⵜⴰⵏⴻⵖⵍⴰⴼⵜ ⵜⴼⵓⵕⴻⵙ ⵜⴰⴳⵏⵉⵜ ⵏ ⵓⵎⵢⴰⴳⴻⵔ-ⴰ ⴰⴽⴽⴻⵏ ⴰⴷ ⴷ-ⵜⵃⴻⵜⵜⴻⵜ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵢⵉⵍⵉ ⵓⵎⵄⵉⵡⴻⵏ ⵉ ⵓⵙⵙⴻⵡⵊⴻⴷ ⵏ ⵜⵓⵇⵇⵍⴰ ⵜⴰⵖⵓⵔⴱⵉⵣⵜ ⴰⵢ ⴷ-ⵢⴻⵜⵜⴻⴷⴷⵓⵏ, ⵢⴻⵔⵏⴰ ⵛⵛⵖⴻⵍ-ⴰ ⴰⴷ ⴷ-ⵢⴻⴱⴷⵓ ⵙⴻⴳ ⵡⴰⵢⵢⵓⵔ ⵏ ⵢⵓⵍⵢⵓ ⴷ ⴰⵙⴰⵡⴻⵏ ⴰⴽⴽⴻⵏ ⴰⴷ ⴷ-ⴱⴷⵓⵏⵜ ⵜⴻⵣⵔⴰⵡⵉⵏ (ⵍⴻⵇⵔⴰⵢⴰ) ⴰⵙⵙ ⴰⵎⴻⵣⵡⴰⵔⵓ ⵏ ⵜⵓⵇⵇⵍⴰ.

ⴷⵖⴰ ⵉ ⵍⵎⴻⵏⴷ ⵏ ⵡⴰⵢⴰ, ⵜⴻⵏⵏⴰ-ⴷ ⴷ ⴰⴽⴽⴻⵏ ⴰⴷ ⴷ-ⵙⵙⵉⴷⴼⴻⵏ ⴰⵟⴰⵙ ⵏ ⵢⵉⵅⴻⴷⴷⴰⵎⴻⵏ ⵉⵎⴰⵢⵏⵓⵜⴻⵏ, ⵍⴰⴷⵖⴰ ⵉⵏⴻⵎⵀⴰⵍⴻⵏ ⵏ ⵢⵉⵖⴻⵔⴱⴰⵣⴻⵏ ⴷ ⵢⵉⵎⴰⵙⵡⴰⴹⴻⵏ ⴷⴻⴳ ⵡⴰⴽⴽ ⵉⵙⵡⵉⵔⴻⵏ ⵏ ⵓⵍⵎⵓⴷ.

ⵜⵉⵎⵍⵉⵍⵉⵜ-ⴰ ⵜⴻⵍⵍⴰ-ⴷ ⴷⴻⴼⴼⵉⵔ ⵜⴻⵡⵡⵓⵔⴰ ⵉⵎⴻⴷⵍⴻⵏ ⵉ ⵍⵎⴻⵏⴷ ⵏ ⵓⵇⴻⵢⵢⴻⵎ ⵏ ⵢⵉⴽⴰⵢⴰⴷⴻⵏ ⵉⵖⴻⵍⵏⴰⵡⴻⵏ ⴷ ⵜⴻⵎⵙⴰⵍ ⵢⴻⵇⵇⵏⴻⵏ ⵖⴻⵔ ⵜⵓⵇⵇⵍⴰ ⵖⴻⵔ ⵓⵖⴻⵔⴱⴰⵣ ⴷ ⵓⵙⵙⵉⴷⴻⴼ ⵏ ⵢⵉⵅⴻⴷⴷⴰⵎⴻⵏ ⵉⵎⴰⵢⵏⵓⵜⴻⵏ.