ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⴳⴻⵏ ⵍⴰ ⵢⴻⵜⵜⴽⴻⵎⵎⵉⵍ ⵜⵉⴽⵍⵉ-ⵏⵏⴻⵙ ⵏ ⵓⵙⵏⴻⵔⵏⵉ ⴰⴽⴽⴻⵏ ⴰⴷ ⵢⴻⴹⵎⴻⵏ ⵍⴰⵎⴰⵏ ⵏ ⵜⵎⵓⵔⵜ

ⵍⴻⵣⵣⴰⵢⴻⵔ – ⵉⴳⴻⵏ ⵍⴰ ⵢⴻⵜⵜⴽⴻⵎⵎⵉⵍ ⵜⵉⴽⵍⵉ-ⵏⵏⴻⵙ ⵏ ⵜⵏⴻⴼⵍⵉⵜ ⴷ ⵓⵙⵙⴻⵜⵔⴻⵔ ⴰⴽⴽⴻⵏ ⴰⴷ ⵢⴰⵡⴻⴹ ⵖⴻⵔ ⵓⵙⵡⵉⵔ ⴰⵎⴻⵀⵍⴰⵏ ⵓⵏⵏⵉⴳ ⴷ ⵜⴻⵣⵎⴻⵔⵜ ⵏ ⵢⵉⵎⴻⵏⵖⵉ ⴰⵔⴰ ⵉⴹⴻⵎⵏⴻⵏ ⵜⴰⵖⴻⵍⵍⵉⵙⵜ (ⵍⴰⵎⴰⵏ) ⵉ ⵍⴻⵣⵣⴰⵢⴻⵔ ⴷ ⵜⴻⵎⵃⴰⴷⴷⵉⵜ-ⵏⵏⴻⵙ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴰⵕⴻⴱⵄⴰ ⵓⵊⵉⵏⵉⵕⴰⵍ ⵏ ⵜⴼⴻⴽⴽⴰ ⵏ ⵢⵉⴳⴻⵏ, ⴰⵀⵎⴻⴷ ⴳⴰⵉⴷ ⵙⴰⵍⴰⵀ, ⴰⵏⵎⴰⵣⵓⵍ ⵏ ⵓⵏⴻⵖⵍⴰⴼ ⵏ ⵜⴻⵎⵃⴰⴷⴷⵉⵜ, ⵉⵖⴻⴼ ⵏ ⵢⵉⵖⴰⵍⵍⴻⵏ ⵉⵎⵙⴻⵍⵍⵃⴻⵏ ⵏ ⵢⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ.

« ⴰⵊⵉⵏⵉⵕⴰⵍ ⵏ ⵜⴼⴻⴽⴽⴰ ⵏ ⵢⵉⴳⴻⵏ, ⴰⵀⵎⴻⴷ ⴳⴰⵉⴷ ⵙⴰⵍⴰⵀ, ⴰⵏⵎⴰⵣⵓⵍ ⵏ ⵓⵏⴻⵖⵍⴰⴼ ⵏ ⵜⴻⵎⵃⴰⴷⴷⵉⵜ ⵜⴰⵖⴻⵍⵏⴰⵡⵜ, ⵉⵖⴻⴼ ⵏ ⵢⵉⵖⴰⵍⵍⴻⵏ ⵉⵎⵙⴻⵍⵍⵃⴻⵏ ⵏ ⵢⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ, ⵍⴰ ⵢⴻⵜⵜⴽⴻⵎⵎⵉⵍ ⵜⵉⵔⵣⴰ-ⵏⵏⴻⵙ ⵏ ⵓⵏⵔⴰⵔ ⵖⴻⴼ ⵢⵉⵏⵣⴰⴹⴻⵏ ⵏ ⵜⴻⵎⵏⴰⴹⵉⵏ ⵜⵉⵙⴻⵔⴷⴰⵙⵉⵢⵉⵏ ⴷⴻⴳ ⵓⴽⴰⵜⴰⵔ ⵏ ⵓⵏⴻⵔⵎⵉⵙ ⵓⵙⵔⵉⴷ ⴷ ⵢⵉⵅⴻⴷⴷⴰⵎⴻⵏ ⴷ ⵓⴹⴼⴰⵔ ⵏ ⵜⴻⴳⵏⵉⵜ ⵏ ⵜⵉⴳⴳⵜⵉⵏ ⵜⵉⵙⴻⵔⴷⴰⵙⵉⵢⵉⵏ, ⵢⴻⵔⵏⴰ ⵢⴻⵔⵣⴰ ⴰⵙⵙ-ⴰ ⵏ ⵍⴰⵕⴻⴱⵄⴰ 24 ⵢⵓⵏⵢⵓ 2015, ⵖⴻⴼ ⵜⴻⵎⵏⴰⴹⵜ ⵜⴰⵙⴻⵔⴷⴰⵙⵉⵜ ⵜⵉⵙ 5 ⴷⴻⴳ ⵇⵙⴻⵏⵟⵉⵏⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵓⵍⵖⵓ ⵏ ⵓⵖⵍⵉⴼ ⵏ ⵜⴻⵎⵃⴰⴷⴷⵉⵜ ⵜⴰⵖⴻⵍⵏⴰⵡⵜ.

ⵙⴷⴻⴼⴼⵉⵔ ⵜⴼⵓⴳⵍⴰ ⵏ ⵓⵎⵎⴰⴳⴻⵔ, ⴰⵊⵉⵏⵉⵕⴰⵍ ⵏ ⵜⴼⴻⴽⴽⴰ ⵏ ⵢⵉⴳⴻⵏ ⵢⴻⵙⵙⴻⵍⵡⵉ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵙ ⵓⵃⴷⴰⵕ ⵏ ⵢⵉⴽⴰⵜⴰⵔⴻⵏ ⵉⵙⴻⵔⴷⴰⵙⵉⵢⴻⵏ ⵏ ⵜⴻⵎⵏⴰⴹⵜ, ⵉⵎⴻⵏⵣⴰⴹⴻⵏ ⵏ ⵢⵉⴱⴹⵉⵢⴻⵏ ⵉⵎⴻⵀⵍⴰⵏⴻⵏ, ⵏ ⵜⵉⴳⴳⵜⵉⵏ ⴷ ⵜⴻⵎⵚⵉⴽⵉⵡⵉⵏ ⵏ ⵓⵙⵙⵉⵍⴻⵖ.

ⴷⴻⴳ ⵜⵉⵏⴰⵡⵜ-ⵏⵏⴻⵙ ⵏ ⵓⵡⴻⵀⵀⵉ, ⵜⵉⵏ ⵓⵎⵉ ⴷ-ⵙⵍⴰⵏ ⵢⵉⵅⴻⴷⴷⴰⵎⴻⵏ ⵏ ⵜⴻⵎⵏⴰⴹⵜ ⵙ ⵜⵜⴻⴽⵏⵉⵜ ⵏ ⵓⵙⴰⵔⴰⴳ ⵙ ⵜⴻⵥⵔⴰⵡⵉⵜ, ⴰⵊⵉⵏⵉⵕⴰⵍ ⵏ ⵜⴼⴻⴽⴽⴰ ⵏ ⵢⵉⴳⴻⵏ ⵉⵃⴻⵜⵜⴻⵜ-ⴷ ⴷ ⴰⴽⴽⴻⵏ « ⵜⵉⵎⵍⵉⵍⵉⵜ-ⴰ ⵜⴻⵙⵄⴰ ⴰⵣⴰⵍ ⴷ ⴰⵎⴻⵇⵔⴰⵏ ⵢⴻⵔⵏⴰ ⵜⴻⵖⵍⵉ-ⴷ ⴷⴻⴳ ⵜⴰⵍⵍⵉⵜ ⴷⴻⴳ ⵍⴰ ⴷ-ⵢⴻⵜⵜⵉⵍⵉ ⵓⵙⵙⴻⵡⵊⴻⴷ ⵉ ⵓⵙⴼⵓⴳⴻⵍ ⵏ ⵓⵎⵓⵍⵍⵉ ⵡⵉⵙ 53 ⵏ ⵓⵣⴰⵔⵓⴳ ⵏ ⵜⵎⵓⵔⵜ ».

« ⵜⴰⵎⴻⵖⵔⴰ ⵏ ⵓⵣⴰⵔⵓⴳ ⴰⵔⴰ ⵜⴻⵙⴼⵓⴳⴻⵍ ⵍⴻⵣⵣⴰⵢⴻⵔ ⴰⵙⴻⴳⴳⴰⵙ-ⴰ ⵉ ⵜⵉⴽⴽⴻⵍⵜ ⵜⵉⵙ 53 ⴷ ⵜⵉⵏ ⴰⵢ ⴷ-ⵢⴻⴼⴽⴰⵏ ⵜⵜⴱⵓⵜ ⵏ ⵜⵉⴷⴻⵜ ⴷ ⴰⴽⴽⴻⵏ ⵜⴰⴳⵔⴰⵡⵍⴰ ⵏ 1ⵓ ⵏ ⵡⴰⵎⴱⴻⵕ ⴷ ⵜⵓⵔⴱⵉⵃⵜ, ⵎⴻⵖⵖⴻⵔ ⵡⴰⵣⴰⵍ-ⵏⵏⴻⵙ, ⵜⴻⵔⵔⴰ-ⴷ ⵜⵉⵍⴻⵍⵍⵉ ⵉ ⵜⵎⵓⵔⵜ ⵢⴻⵔⵏⴰ ⵜⴻⵙⵄⴰ ⵓⴷⴻⵎ ⴷ ⴰⵍⵙⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴳⴰⵉⴷ ⵙⴰⵍⴰⵀ.

« ⵚⵚⵉⴼⴰⵜ-ⴰ ⵜⵓⵛⴱⵉⵃⵉⵏ ⵜⵓⴽⵍⴰⵍ-ⵉⵜⴻⵏⵜ ⵜⴻⴳⵔⴰⵡⵍⴰ ⵢⴻⵔⵏⴰ ⵓⴷⴼⴻⵏⵜ ⴷⴻⴳ ⵓⵎⴻⵣⵔⵓⵢ. ⴷ ⵚⵚⵉⴼⴰⵜ-ⴰ ⴰⵢ ⵉⵔⴻⴼⴷⴻⵏ ⵜⴰⴳⵔⴰⵡⵍⴰ ⵖⴻⵔ ⵓⵙⵡⵉⵔ ⵏ ⵔⵔⴱⵓⵃⴰⵜ ⵉⵎⴻⵇⵔⴰⵏⴻⵏ ⴰⵢ ⴷ-ⵢⴻⵍⵍⴰⵏ ⴷⴻⴳ ⵓⵎⴰⴹⴰⵍ ⴷⴻⴳ ⵍⵇⴻⵔⵏ ⵡⵉⵙ 20, ⵉⵎⵉ ⴰⵢ ⵜⴻⵙⵙⴻⴷⴷⴰ ⴰⵣⴰⵍⴻⵏ ⵏ ⵢⵉⵙⴻⵖ, ⵢⴻⵔⵏⴰ ⵜⴻⵍⵍⴰ-ⴷ ⴷ ⴰⵣⴰⵎⵓⵍ ⵏ ⵡⴰⵢⴻⵏ ⵉⵛⴻⴱⵃⴻⵏ ⴰⴽⴽ ⵡⵓⵖⵓⵔ ⵜⴻⵣⵎⴻⵔ ⴰⴷ ⵜⴰⵡⴻⴹ ⵜⴻⵕⵡⵉⵃⵜ ⵏ ⵓⵎⴷⴰⵏ ⵙⴻⴳ ⵢⵉⴷⵉⵙ ⵏ ⵜⵓⴽⵛⵉ ⵏ ⵓⵙⴼⴻⵍ, ⵏ ⵜⴻⵣⴷⴻⴳ ⴷ ⵍⴻⵇⴷⴻⵔ, ⵏ ⵜⵖⴻⵍⵏⴰⵥⵔⵉ ⴷ ⵜⴰⴽⴷⵉⵜ, ⵢⴻⵔⵏⴰ ⵜⴻⵇⵇⵉⵎ-ⴷ ⵜⴻⴳⵔⴰⵡⵍⴰ-ⴰ ⴷ ⴰⵎⴻⴷⵢⴰ ⵉ ⵡⴰⴽⴽ ⵡⵉⴷ ⴰⵢ ⵉⵃⴻⵎⵎⵍⴻⵏ ⵜⴰⵎⵓⵔⵜ-ⵏⵏⴻⵖ ⵄⵣⵉⵣⴻⵏ ⵢⴻⵔⵏⴰ ⴱⵖⴰⵏ ⴰⴷ ⵅⴻⴷⵎⴻⵏ ⵉ ⵍⵎⴻⵏⴷⴰⴷ-ⵉⵙ ⵙⴻⴳ ⵡⵓⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴰⵊⵉⵏⵉⵕⴰⵍ ⵏ ⵜⴼⴻⴽⴽⴰ ⵏ ⵢⵉⴳⴻⵏ ⵢⴻⵙⵎⴻⴽⵜⵉ-ⴷ ⴷⴰⵖ ⵙ ⵜⵓⵖⴷⴰⴹⵉⵏ ⵜⵉⵎⴻⵏⴹⴰⵡⴰⵏⵉⵏ ⵏ ⵢⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ ⵢⴻⵍⵍⴰⵏ ⴷ ⴰⵡⵕⵉⵜ ⵏ ⵢⵉⴳⴻⵏ ⵏ ⵓⵙⵍⴻⵍⵍⵉ ⴰⵖⴻⵍⵏⴰⵡ.

« ⵙ ⵓⵄⴻⵡⵡⴻⴷ ⴷ ⵍⴻⴱⵖⵉ-ⵏⵏⴻⵙ ⵉⴵⴻⵀⴷⴻⵏ, ⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ, ⵢⴻⵍⵍⴰⵏ ⴷ ⴰⵡⵕⵉⵜ ⵏ ⵢⵉⴳⴻⵏ ⵏ ⵓⵙⵍⴻⵍⵍⵉ ⴰⵖⴻⵍⵏⴰⵡ, ⵢⴻⵜⵜⴽⴻⵎⵎⵉⵍ ⵜⵉⴽⵍⵉ-ⵏⵏⴻⵙ ⵏ ⵜⵏⴻⴼⵍⵉⵜ ⴷ ⵓⵙⵙⴻⵜⵔⴻⵔ, ⴰⴽⴽⴻⵏ ⴰⴷ ⵢⴰⵡⴻⴹ ⵖⴻⵔ ⵓⵙⵡⵉⵔ ⴰⵎⴻⵀⵍⴰⵏ ⵓⵏⵏⵉⴳ ⴷ ⵜⴻⵣⵎⴻⵔⵜ ⵏ ⵢⵉⵎⴻⵏⵖⵉ ⵖⴻⴼ ⵏⴻⵙⵙⴻⵃⴱⵉⴱⵉⵔ ⴰⴽⴽⴻⵏ ⴰⴷ ⵢⴻⵣⵎⴻⵔ ⴰⴷ ⵢⴻⴹⵎⴻⵏ ⵜⴰⵖⴻⵍⵍⵉⵙⵜ ⴷ ⵜⴻⵎⵃⴰⴷⴷⵉⵜ ⵜⴰⵖⴻⵍⵏⴰⵡⵜ ⵉ ⵍⴻⵣⵣⴰⵢⴻⵔ, ⵢⴻⵔⵏⴰ ⵢⴻⵙⵙⴻⴼⴽ ⵢⵉⴳⴻⵏ-ⴰ ⴰⴷ ⵢⴻⵙⵙⴻⵃⴱⵉⴱⴻⵔ ⵖⴻⴼ ⵓⵙⵙⴻⵍⴽⴻⵎ ⵏ ⵜⵓⵖⴷⴰⴹⵉⵏ-ⵏⵏⴻⵙ ⵜⵉⵎⴻⵏⴹⴰⵡⴰⵏⵉⵏ ⵍⴰⴷⵖⴰ ⴰⵃⵔⴰⵣ ⵏ ⵓⵣⴰⵔⵓⴳ ⵏ ⵍⴻⵣⵣⴰⵢⴻⵔ, ⴰⵃⵓⴷⴷⵓ ⵏ ⵜⵏⴰⵢⴰ ⴷ ⵜⵓⵎⵎⴷⴰ ⵏ ⵡⴰⴽⴰⵍ-ⵏⵏⴻⵙ ⴷ ⵓⴹⵎⴰⵏ ⵏ ⵜⴷⵓⴽⵍⵉ ⵏ ⵓⵖⵔⴻⴼ-ⵏⵏⴻⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ.

ⴰⵊⵉⵏⵉⵕⴰⵍ ⵏ ⵜⴼⴻⴽⴽⴰ ⵏ ⵢⵉⴳⴻⵏ ⵉⴳⴻⵔ-ⴷ ⵜⵉⵖⵔⵉ ⵉ ⵡⴰⴽⴽ ⵉⵅⴻⴷⴷⴰⵎⴻⵏ ⵏ ⵢⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ ⴰⴽⴽⴻⵏ « ⴰⴷ ⵜⵜⴳⴻⵏ ⵜⵓⵖⴷⴰⴹⵉⵏ ⴰⵢ ⴰⵙⴻⵏ-ⵢⴻⵜⵜⵓⵏⴻⴼⴽⴻⵏ ⴰⴽⴽⴻⵏ ⵉⴼⴰⵣ ⵢⴻⵔⵏⴰ ⴰⴷ ⵉⵍⵉⵏ ⴷ ⵉⵎⴻⴽⴷⵉⵢⴻⵏ ⵉ ⵢⵉⴳⴻⵏ ⴷ ⵍⴻⵣⵣⴰⵢⴻⵔ ».

« ⴷ ⵡⴰ ⴰⵢ ⴷ ⴰⴱⵔⵉⴷ ⵏ ⵜⵉⴽⵍⵉ ⴰⵢ ⵏⴻⴹⴼⴻⵔ ⴷⵉⵎⴰ ⵙ ⵓⵄⴻⵡⵡⴻⵍ ⴷⴻⴳ ⵢⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ, ⵢⴻⵍⵍⴰⵏ ⴷ ⴰⵡⵕⵉⵜ ⵏ ⵢⵉⴳⴻⵏ ⵏ ⵓⵙⵍⴻⵍⵍⵉ ⴰⵖⴻⵍⵏⴰⵡ, ⵢⴻⵔⵏⴰ ⵖⴻⵔ-ⵏⴻⵖ ⴰⵎⴻⵣⵔⵓⵢ ⵏ ⵍⴻⵣⵣⴰⵢⴻⵔ ⴷ ⵡⵉⵏ ⴰⵢⵙⴻⴳ ⴷ-ⵏⴻⵜⵜⴰⴳⴻⵎ ⴰⴼⵓⴷ ⵢⴻⵔⵏⴰ ⴼⴻⵍⵍ-ⴰⵙ ⴰⵢ ⵜⴻⴱⵏⴰ ⵜⵉⴽⵍⵉ-ⵏⵏⴻⵖ, ⵎⴰ ⴷ ⴰⵃⵔⴰⵣ ⵏ ⵡⴰⵙⵙ-ⴰ ⵏ ⵍⴻⵣⵣⴰⵢⴻⵔ ⴷ ⵓⴹⵎⴰⵏ ⵏ ⵓⵣⴻⴽⴽⴰ-ⵏⵏⴻⵙ ⴷ ⵜⴰⵣⵉⵜⵍⴰ ⵡⵓⵖⵓⵔ ⵏⴻⴱⵖⴰ ⴰⴷ ⵏⴰⵡⴻⴹ, ⵎⴰ ⴷ ⴰⵎⴰⵀⵉⵍ (ⴰⵅⴻⴷⴷⵉⵎ) ⵢⴻⵍⵍⴰ-ⴰⵖ ⴷ ⴰⵣⴰⵍ ⵢⴻⵣⴳⴰⵏ ⵢⴻⵔⵏⴰ ⴷ ⵜⵜⴰⵡⵉⵍ ⴰⵢⵢⴻⵙ ⴰⵔⴰ ⵏⴰⵡⴻⴹ ⵖⴻⵔ ⵢⵉⵙⵡⴰⵏ-ⵏⵏⴻⵖ, ⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵏⵏⴱⵉ (ⵜⴰⵥⴰⵍⵍⵉⵜ ⴷ ⵙⵙⵍⴰⵎ ⵏ ⵕⴻⴱⴱⵉ ⴼⴻⵍⵍ-ⴰⵙ) ⴷⴻⴳ ⵡⴰⵡⴰⵍ-ⵏⵏⴻⵙ: « ⵙⵏⴰⵜ ⵏ ⵜⵉⵟⵟⴰⵡⵉⵏ ⵓⵔ ⵜⴻⵜⵜⵏⴰⵍ ⴰⵔⴰ ⵜⵎⴻⵙ: ⵜⵉⵟ ⴰⵢ ⵉⵔⵓⵏ ⵙⴻⴳ ⵜⵓⴳⴷⵉ ⵏ ⵕⴻⴱⴱⵉ ⴷ ⵜⵉⵟ ⴰⵢ ⵉⵄⴰⵡⵣⴻⵏ ⴷⴻⴳ ⵢⵉⴹ ⴰⴽⴽⴻⵏ ⴰⴷ ⵜⵄⴰⵙⵙ ⵖⴻⴼ ⵓⴱⵔⵉⴷ ⵏ ⵕⴻⴱⴱⵉ ».

ⵙⴰⴽⴽⵉⵏ, ⵜⴻⵜⵜⵓⵏⴻⴼⴽ ⵜⴻⴳⵏⵉⵜ ⵉ ⵢⵉⵙⴻⵔⴷⴰⵙⴻⵏ ⴰⴽⴽⴻⵏ ⴰⴷ ⴷ-ⵙⵙⴻⴽⵏⴻⵏ ⵜⴰⴽⴷⵉⵜ-ⵏⵙⴻⵏ ⵉ ⵢⵉⴳⴻⵏ ⴷ ⵜⵎⵓⵔⵜ, ⴷ ⵓⵄⴰⵀⴻⴷ-ⵏⵙⴻⵏ ⴰⴽⴽⴻⵏ ⴰⴷ ⴼⴽⴻⵏ ⴰⵙⴼⴻⵍ ⵉ ⵜⵖⴻⵍⵍⵉⵙⵜ ⴷ ⵓⵔⴽⴰⴷ-ⵏⵏⴻⵙ.

ⴰⵊⵉⵏⵉⵕⴰⵍ ⵏ ⵜⴼⴻⴽⴽⴰ ⵏ ⵢⵉⴳⴻⵏ ⵉⴳⴰ ⵜⵉⵎⵍⵉⵍⵉⵜ ⵜⵉⵙ ⵙⵏⴰⵜ ⴷ ⵢⵉⵎⴻⵏⵣⴰⴹⴻⵏ ⵏ ⵢⵉⴱⴹⵉⵢⴻⵏ ⵉⵎⴻⵀⵍⴰⵏⴻⵏ ⴷ ⵢⵉⵎⴻⵏⵣⴰⴹⴻⵏ ⵏ ⵜⵉⴳⴳⵜⵉⵏ, ⵢⴻⵔⵏⴰ ⵢⴻⴼⴽⴰ-ⴰⵙⴻⵏ ⵍⴻⵡⵚⴰⵢⴰⵜ ⵖⴻⴼ ⵓⴽⴻⵎⵎⴻⵍ ⵏ ⵍⵎⴻⴵⵀⵓⴷ-ⵏⵙⴻⵏ ⴷⴻⴳ ⵢⵉⵎⴻⵏⵖⵉ ⵎⴳⴰⵍ ⵡⴰⵢⴻⵏ ⴰⵢ ⴷ-ⵢⴻⵇⵇⵉⵎⴻⵏ ⴷ ⵜⵉⴳⵔⴰⵡⵉⵏ ⵜⵉⵔⴻⴱⵔⴰⴱⵉⵏ ⴰⵔⵎⴰ ⴷ ⴰⵙⵎⵉ ⴰⵔⴰ ⵢⴻⵏⴳⴻⵔ ⴰⴽⴽ ⵓⵅⴻⵚⵚⴰⵔ ⵏ ⵔⵔⴻⴱⵔⴰⴱ ⵙⴻⴳ ⵜⵎⵓⵔⵜ.