ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵏⵟⴰⴳⵜ ⵏ ⵙⵓⵙⴰ: ⵄⴻⵇⵍⴻⵏ 17 ⵙⴻⴳ 38-ⵏⵏⵉ ⴰⵢ ⵢⴻⵎⵎⵓⵜⴻⵏ (ⵍⴻⵃⵙⴰⴱ ⴰⵎⴰⵢⵏⵓⵜ)

ⵜⵓⵏⴻⵙ – ⵜⵜⵡⴰⵄⴻⵇⵍⴻⵏ 17 ⵏ ⵢⵉⵎⴷⴰⵏⴻⵏ ⵙⴻⴳ 38-ⵏⵏⵉ ⴰⵢ ⵢⴻⵎⵎⵓⵜⴻⵏ ⴷⴻⴳ ⵜⴻⵏⵟⴰⴳⵜ ⵏ ⵡⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵜⴻⴼⵜⵉⵙⵜ ⴷⴻⴳ ⵜⵓⵏⴻⵙ, ⵢⴻⵔⵏⴰ ⵍⵍⴰⵏ ⴳⴰⵔ-ⴰⵙⴻⵏ ⵍⴰⴷⵖⴰ ⵢⵉⴱⵔⵉⵟⴰⵏⵉⵢⴻⵏ, ⵉⴱⵉⵍⵊⵉⴽⵉⵢⴻⵏ ⴷ ⵡⴰⵍⵎⴰⵏⵉⵢⴻⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵢⵉⴷⵓⴱⴰ, ⵡⴰⵔ ⵎⴰ ⴼⴽⴰⵏ-ⴷ ⴰⵛⵃⴰⵍ ⵏ ⵢⵉⵎⴷⴰⵏⴻⵏ ⴰⵢ ⵢⴻⵎⵎⵓⵜⴻⵏ ⵙⴻⴳ ⵢⴰⵍ ⵜⴰⵎⵓⵔⵜ.

«ⵜⵜⵡⴰⵄⴻⵇⵍⴻⵏ 17 ⵏ ⵢⵉⵎⴷⴰⵏⴻⵏ ⴰⵢ ⵢⴻⵎⵎⵓⵜⴻⵏ ⴷⴻⴳ ⵜⴻⵏⵟⴰⴳⵜ-ⵏⵏⵉ ⵜⴰⵔⴻⴱⵔⴰⴱⵜ », ⴰⵢ ⴷ-ⵢⴻⵏⵏⴰ ⵓⵖⵍⵉⴼ ⵏ ⵜⴷⴰⵡⵙⴰ ⴷⴻⴳ ⵢⵉⵡⴻⵏ ⵏ ⵓⵍⵖⵓ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷ ⴰⴽⴽⴻⵏ ⵉⵎⴷⴰⵏⴻⵏ-ⴰ ⵙⴻⴳ ⴱⵔⵉⵟⴰⵏⵢⴰ ⵜⴰⵎⴻⵇⵔⴰⵏⵜ, ⵍⴰⵍⵎⴰⵏ, ⵉⵔⵍⴰⵏⴷ, ⴱⵉⵍⵊⵉⴽ ⴷ ⵒⵓⵕⵜⵓⴳⴰⵍ.

ⵢⵉⵡⴻⵏ ⵏ ⵢⵉⵎⴹⴻⴱⴱⴻⵔ ⵏ ⵓⵖⵍⵉⴼ ⵢⴻⵏⵏⴰ-ⴷ ⴷ ⴰⴽⴽⴻⵏ 12 ⵏ ⵜⴼⴻⴽⴽⵉⵡⵉⵏ ⴰⵢ ⵢⴻⵜⵜⵡⴰⵄⴻⵇⵍⴻⵏ: 9 ⵏ ⵢⵉⴱⵔⵉⵟⴰⵏⵉⵢⴻⵏ, ⵢⵉⵡⴻⵜ ⵏ ⵜⴱⵉⵍⵊⵉⴽⵉⵜ, ⵢⵉⵡⴻⵏ ⵏ ⵡⴰⵍⵎⴰⵏⵉ ⴷ ⵢⵉⵡⴻⵜ ⵏ ⵜⵉⵔⵍⴰⵏⴷⵉⵜ.

ⵙⴻⴳ ⵢⵉⴷⵉⵙ ⵏⵉⴹⴻⵏ, 23 ⵙⴻⴳ 39-ⵏⵏⵉ ⵏ ⵢⵉⵎⴻⵊⵔⴰⵃ ⴰⵢ ⵢⴻⴼⴼⵖⴻⵏ ⵙⴻⴳ ⵓⵙⴱⵉⵟⴰⵔ, ⵖⴻⴼ ⵍⴻⵃⵙⴰⴱ ⵏ ⵓⵍⵖⵓ ⵏ ⵓⵖⵍⵉⴼ.

ⵉⴷⵓⴱⴰ ⵄⴻⵢⵢⵏⴻⵏ-ⴷ ⴷ ⴰⴽⴽⴻⵏ ⴰⵄⵇⴰⵍ ⵏ ⵡⵉⴷ ⵢⴻⵎⵎⵓⵜⴻⵏ ⴷ ⴰⵢⴻⵏ ⴰⵢ ⵉⵣⴻⵎⵔⴻⵏ ⴰⴷ ⵢⴻⴹⴹⴻⴼ ⴰⴽⵓⴷ, ⵉⵎⵉ ⴰⵟⴰⵙ ⵙⴻⴳ ⵡⵉⴷ ⵢⴻⵎⵎⵓⵜⴻⵏ ⴰⵢ ⵢⴻⵍⵍⴰⵏ ⵍⵙⴰⵏ ⴽⴰⵏ ⵉⵛⴻⴹⴹⵉⴹⴻⵏ ⵏ ⵓⵄⵓⵎⵓ ⵎⵉ ⴷ-ⵜⴻⵍⵍⴰ ⵜⴻⵏⵟⴰⴳⵜ-ⵏⵏⵉ, ⵢⴻⵔⵏⴰ ⵓⵔ ⵍⵍⵉⵏ ⴰⵔⴰ ⵙⵄⴰⵏ ⵍⴻⴽⵡⴰⵖⴻⴹ ⵖⴻⵔ-ⵙⴻⵏ.

38 ⵏ ⵎⴻⴷⴻⵏ ⴰⵢ ⵢⴻⵜⵜⵡⴻⵏⵖⴻⵏ, ⵖⴻⴼ ⵍⴻⵃⵙⴰⴱ ⵏ ⵢⵉⴷⵓⴱⴰ, ⵎⵉ ⵉⵇⴻⵔⵔⴻⵙ ⴼⴻⵍⵍ-ⴰⵙⴻⵏ ⵢⵉⵡⴻⵏ ⵏ ⵓⵏⴻⵍⵎⴰⴷ ⴰⵜⵓⵏⵙⵉ ⴰⵢ ⵢⴻⵔⵔⴰⵏ ⵉⵎⴰⵏ-ⵏⵏⴻⵙ ⴷ ⴰⵃⴻⵡⵡⴰⵙ. ⵜⴰⵏⵟⴰⴳⵜ-ⴰ ⵜⴻⵍⵍⴰ-ⴷ ⴷⴻⴳ ⵓⵙⴻⵏⵙⵓ ⵏ ⵔⵉⵓ ⵉⵎⵒⴻⵔⵉⴰⵍ ⵎⴰⵔⵀⴰⴱⴰ ⴷⴻⴳ ⵓⵙⴰⴳⴻⵏ ⵏ ⴽⴰⵏⵜⴰⵧⵓⵉ, ⵙⴷⴰⵜ ⵙⵓⵙⴰ, 140 ⵏ ⵢⵉⴽⵉⵍⵓⵎⵉⵜⵔⴻⵏ ⵖⴻⴼ ⵜⵓⵏⴻⵙ. ⴰⵏⴻⵍⵎⴰⴷ ⴰⵢ ⵉⴳⴰⵏ ⵜⴰⵅⴻⵚⵚⴰⵔⵜ-ⴰ ⵓⵍⴰ ⴷ ⵏⴻⵜⵜⴰ ⵢⴻⵜⵜⵡⴻⵏⵖ.