ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵉⵙⴻⵔⴷⴰⵙⴻⵏ ⵉⵙⵕⴰⵢⵉⵍⵉⵢⴻⵏ ⵃⴻⴱⵙⴻⵏ ⴰⵖⴻⵔⵔⴰⴱⵓ-ⵏⵏⵉ ⵏ ⵜⵍⴻⵍⵍⵉ ⴰⵢ ⵢⴻⵍⵍⴰⵏ ⵢⴻⵜⵜⴻⴷⴷⵓ ⵖⴻⵔ ⵖⴻⵣⵣⴰ
ⵍⵇⵓⴷⵙ ⵢⴻⵜⵜⵡⴰⵟⵟⴼⴻⵏ – ⵜⴰⴳⵔⵉⵡⴰ ⵜⵉⵙⵕⴰⵢⵉⵍⵉⵜ ⵜⴻⴹⴹⴻⴼ, ⴰⵙⵙ ⵏ ⵍⴻⵜⵏⵉⵢⴻⵏ ⵜⴰⵚⴻⴱⵃⵉⵜ, ⴰⵖⴻⵔⵔⴰⴱⵓ-ⵏⵏⵉ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⴰⵏⴰⵡⵜ ⵏ ⵜⵍⴻⵍⵍⵉ ⴰⵢ ⵍⴰ ⵢⴻⵜⵜⴻⴷⴷⵓⵏ ⵖⴻⵔ ⵜⴻⵙⴼⵉⴼⵜ ⵏ ⵖⴻⵣⵣⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ. ⵉⵙⴻⵔⴷⴰⵙⴻⵏ ⵏ ⵜⴻⴳⵔⵉⵡⴰ ⵜⵉⵙⵕⴰⵢⵉⵍⵉⵜ ⵓⵍⵢⴻⵏ ⵖⴻⵔ ⵓⵖⴻⵔⵔⴰⴱⵓ ⵏ ⵎⴰⵔⵉⴰⵏⵏⴻ ⴰⵢ ⵢⴻⵍⵍⴰⵏ ⵢⴻⴱⵄⴻⴷ ⵙ ⵡⴰⵣⴰⵍ ⵏ 100 ⵏ ⵢⵉⵎⵉⵍⴻⵏ ⵖⴻⴼ ⵢⵉⵔⵉ ⵏ ⵍⴻⴱⵃⴻⵕ ⵏ ⵖⴻⵣⵣⴰ, ⵢⴻⵔⵏⴰ ⴱⴻⴷⴷⵍⴻⵏ-ⴰⵙ ⵢⵉⵙⴻⵔⴷⴰⵙⴻⵏ-ⵏⵏⵉ ⴰⴱⵔⵉⴷ ⵉ ⵓⵖⴻⵔⵔⴰⴱⵓ-ⵏⵏⵉ ⴰⴽⴽⴻⵏ ⴰⴷ ⵜ-ⴰⵡⵢⴻⵏ ⵖⴻⵔ ⵜⴻⵎⴷⵉⵏⵜ ⵏ ⴰⵙⵀⴷⵧⴷ. ⵉⵙⴻⵔⴷⴰⵙⴻⵏ ⵏ ⵜⴻⴳⵔⵉⵡⴰ ⵜⵉⵙⵕⴰⵢⵓⵍⵉⵜ ⵓⵍⵢⴻⵏ ⵢⴻⵔⵏⴰ ⴼⴻⵜⵜⵛⴻⵏ ⴰⵖⴻⵔⵔⴰⴱⵓ-ⵏⵏⵉ ⴷⴻⴳ ⵡⴰⵎⴰⵏ ⵉⴳⵔⴰⵖⵍⴰⵏⴻⵏ ⴰⴽⴽⴻⵏ ⵓⵔ ⴷ-ⵢⴻⵜⵜⵉⵍⵉ ⴰⵔⴰ ⵓⵔⴽⴰⴹ ⵏ ⵜⴻⵔⴳⵓⵍⵜ-ⵏⵏⵉ ⵜⴰⵡⵍⴰⵍⵜ ⴰⵢ ⴷ-ⵢⴻⵜⵜⵡⴰⵃⴻⵜⵜⵎⴻⵏ ⵖⴻⴼ ⵜⴻⵙⴼⵉⴼⵜ ⵏ ⵖⴻⵣⵣⴰ. ⴰⵖⴻⵔⵔⴰⴱⵓ-ⴰ ⴷ ⵏⴻⵜⵜⴰ ⴰⵢ ⴷ ⴰⵎⴻⵣⵡⴰⵔⵓ ⵙⴻⴳ ⵢⵉⵡⴻⵜ ⵏ ⵜⴰⵏⴰⵡⵜ ⵓⵎⵉ ⵙⴻⵎⵎⴰⵏ « ⵜⴰⵏⴰⵡⵜ ⵏ ⵜⵍⴻⵍⵍⵉ ⵜⵉⵙ ⴽⵔⴰⴹⵜ (3) », ⵉ ⵍⵎⴻⵏⴷ ⵏ ⵡⴰⵡⵡⴰⴹ ⵖⴻⵔ ⵖⴻⵣⵣⴰ ⴷ ⵓⵔⴽⴰⴹ ⵏ ⵜⴻⵔⴳⵓⵍⵜ-ⵏⵏⵉ ⴰⵢ ⴷ-ⵜⵃⴻⵜⵜⴻⵎ ⵉⵙⵕⴰⵢⵉⵍ, ⵢⴻⵔⵏⴰ ⵉⵙⵡⵉ ⵏ ⵜⵃⴻⵎⵍⴰ-ⴰ ⵏⴻⵜⵜⴰ ⴷ ⴰⵊⴱⴰⴷ ⵏ ⵍⵡⴻⵍⵀⴰ ⵖⴻⴼ ⵜⴻⵔⴳⵓⵍⵜ-ⵏⵏⵉ ⴷ ⵓⵙⵙⵉⵡⴻⴹ ⵏ ⵍⴻⵎⵄⴰⵡⵏⴰ ⵉ ⵡⵉⴷ ⵢⴻⵏⴹⴻⵔⵔⴻⵏ ⴷⴻⴳ ⵖⴻⵣⵣⴰ. ⵉⵎⴻⵖⵏⴰⵙⴻⵏ ⴰⵢ ⵢⴻⴷⴷⴰⵏ ⴷⴻⴳ ⵓⵖⴻⵔⵔⴰⴱⵓ-ⵏⵏⵉ ⵏ ⵎⴰⵔⵉⴰⵏⵏⴻ ⵏⵏⴰⵏ-ⴷ ⵉ ⵜⴻⵔⴳⴰ ⵏ ⵢⵉⵙⴰⵍⴰⵏ ⵏ ⴰⵍ ⵊⴰⵣⴻⴻⵔⴰ ⴷ ⴰⴽⴽⴻⵏ ⵉⵙⴻⵔⴷⴰⵙⴻⵏ ⵉⵙⵕⴰⵢⵉⵍⵉⵢⴻⵏ « ⴳⴰⵏ ⵛⵛⵖⴻⵍ ⵏ ⵢⵉⵇⴻⵔⵚⴰⵏⴻⵏ ⵢⴻⵔⵏⴰ ⵎⵎⵖⴻⵏ-ⴷ ⵖⴻⴼ ⵓⵖⴻⵔⵔⴰⴱⵓ-ⵏⵏⴻⵖ ⴷⴻⴳ ⵡⴰⵎⴰⵏ ⵉⴳⵔⴰⵖⵍⴰⵏⴻⵏ ». ⵉⵙⵕⴰⵢⵉⵍ ⵜⵃⴻⵜⵜⴻⵎ-ⴷ ⵜⴰⵔⴳⵓⵍⵜ ⵖⴻⴼ ⵖⴻⵣⵣⴰ ⵙⴻⴳ ⵡⴰⵙⵎⵉ ⴰⵢ ⵢⴻⴹⴹⴻⴼ ⵓⵎⵓⵙⵙⵓ ⵏ ⵃⴰⵎⴰⵙ ⵜⴰⵎⵏⴰⴹⵜ-ⴰ ⴷⴻⴳ 2007. ⴷⴻⴳ 2010, ⵉⵙⴻⵔⴷⴰⵙⴻⵏ ⵏ ⵜⴻⴳⵔⵉⵡⴰ ⵜⵉⵙⵕⴰⵢⵉⵍⵉⵜ ⵃⴻⴱⵙⴻⵏ ⵢⵉⵡⴻⵜ ⵏ ⵜⴰⵏⴰⵡⵜ ⵏ ⵢⵉⵖⴻⵔⵔⵓⴱⴰ (ⴰⵎⵓⵔ ⴰⵎⴻⵇⵔⴰⵏ ⴷⴻⴳ-ⵙⴻⵏ ⴷ ⵉⵟⴻⵔⴽⵉⵢⴻⵏ) ⴰⵢ ⵢⴻⴷⴷⴰⵏ ⴰⴽⴽⴻⵏ ⴰⴷ ⵜⵄⴰⵡⴻⵏ ⵉⴼⴰⵍⴻⵙⵟⵉⵏⵉⵢⴻⵏ ⴷⴻⴳ ⵜⴻⵙⴼⵉⴼⵜ ⵏ ⵖⴻⵣⵣⴰ, ⵢⴻⵔⵏⴰ ⵉⵙⴻⵔⴷⴰⵙⴻⵏ ⴰⵢ ⵉⵥⴻⴷⵎⴻⵏ ⵖⴻⴼ ⵢⵉⵖⴻⵔⵔⵓⴱⴰ-ⴰ ⵏⵖⴰⵏ 9 ⵏ ⵢⵉⵎⴷⴰⵏⴻⵏ.
