ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⴻⴱⵏⵉ ⵏ ⵜⵏⴻⵣⴷⵓⵖⵜ ⵏ ⵍⵒⵒ ⵍⴰ ⵢⴻⵜⵜⴽⴻⵎⵎⵉⵍ « ⵙ ⵜⵖⴰⵡⵍⴰ » (ⴰⵖⵍⵉⴼ)

ⵍⴻⵣⵣⴰⵢⴻⵔ – ⴰⵖⵍⵉⴼ ⵏ ⵜⵏⴻⵣⴷⵓⵖⵜ ⴷ ⵓⵀⴻⵢⵢⵉ ⵏ ⵜⴻⵎⴷⵉⵏⵜ ⵢⴻⵏⵏⴰ-ⴷ ⴰⵙⵙ ⵏ ⵍⴰⵕⴻⴱⵄⴰ ⴷ ⴰⴽⴽⴻⵏ ⵉⵙⴻⵏⴼⴰⵔⴻⵏ ⵏ ⵜⵏⴻⵣⴷⵓⵖⵜ ⵜⴰⵙⵎⴰⵍⴰⵏⵜ ⵜⴰⵏⴰⴳⴷⵓⴷⵜ (ⵍⵒⵒ) ⵍⴰ ⵢⴻⵜⵜⴽⴻⵎⵎⵉⵍ ⵍⴻⴱⵏⵉ-ⵏⵙⴻⵏ « ⵙ ⵜⵖⴰⵡⵍⴰ » ⵢⴻⵔⵏⴰ « ⵓⵔ ⵜⵜⵡⴰⵙⴻⴱⴽⴻⵏ ⴰⵔⴰ ». « ⴰⴽⴽ ⵉⵙⴻⵏⴼⴰⵔⴻⵏ ⵏ ⵜⵏⴻⵣⴷⵓⵖⵜ ⵜⴰⵙⵎⴰⵍⴰⵏⵜ ⵜⴰⵏⴰⴳⴷⵓⴷⵜ (ⵍⵒⵒ) ⵍⴰ ⵜⵜⵡⴰⴱⵏⴰⵢⴻⵏ ⵙ ⵜⵖⴰⵡⵍⴰ ⵢⴻⵔⵏⴰ ⵓⵔ ⵜⵜⵡⴰⵙⴻⴱⴽⴻⵏ, ⵓⵔ ⵃⴱⵉⵙⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵖⵍⵉⴼ ⴷⴻⴳ ⵢⵉⵡⴻⵏ ⵏ ⵓⵍⵖⵓ. « ⵉⵅⴻⴱⴱⴻⵔ-ⴷ ⵢⵉⵡⴻⵏ ⵏ ⵓⵖⵎⵉⵙ ⴰⵖⴻⵍⵏⴰⵡ ⴷ ⴰⴽⴽⴻⵏ ⴰⵏⴻⵖⵍⴰⴼ ⴰⵎⴻⵏⵣⵓ ⵢⴻⴼⴽⴰ-ⴷ ⵍⴻⵡⵚⴰⵢⴰ ⵜⵓⵄⵊⵉⵍⵜ ⵉ ⵍⵎⴻⵏⴷ ⵏ ⵓⵃⴱⴰⵙ ⵏ ⵡⴰⴽⴽ ⵉⵙⴻⵏⴼⴰⵔⴻⵏ ⵏ ⵜⵏⴻⵣⴷⵓⵖⵜ ⵜⴰⵙⵎⴰⵍⴰⵏⵜ ⵜⴰⵏⴰⴳⴷⵓⵜ, ⵎⴰⵛⴰ ⴷⴷⵉⵄⴰⵢⴰ-ⴰ ⵢⴻⵏⴽⴻⵕ-ⵉⵜⵜ ⵓⵖⵍⵉⴼ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ. « ⴰⵢⴻⵏ ⴰⵢ ⴷ-ⵢⴻⵏⵏⴰ ⵓⵖⵎⵉⵙ-ⴰ ⴷ ⴰⵃⵔⵉⵛ ⵙⴻⴳ ⵢⵉⵡⴻⵜ ⵏ ⵜⵃⴻⵎⵍⴰ ⴷ ⵜⴰⵡⴻⵃⵛⵉⵜ ⴰⵢ ⵢⴻⴱⵖⴰⵏ ⴰⴷ ⵜⵛⴻⵎⵎⴻⵜ ⴰⵀⵉⵍ-ⴰ ⴰⵢ ⵢⴻⵙⵙⵓⵎⴰⵔⴻⵏ (ⵢⴻⵙⴼⴻⵕⵃⴻⵏ) ⴰⵟⴰⵙ ⵏ ⵎⴻⴷⴷⴻⵏ ⴷⴻⴳ ⵜⵎⴻⵜⵜⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵖⵍⵉⴼ ⴷⴻⴳ ⵓⵍⵖⵓ-ⵏⵏⴻⵙ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵙⵎⴻⴽⵜⵉ ⴷ ⴰⴽⴽⴻⵏ « ⵢⴻⵍⵍⴰ-ⴷ ⵢⴰⴳⵉ ⵛⵛⵖⴻⵍ ⵉⵛⵓⴱⴰⵏ ⵡⴰ ⴷⴻⴳ ⵢⵉⵥⴻⴹⴹⴰ ⵉⵏⵎⴻⵜⵜⵉⵢⴻⵏ ⴷⴻⴳ ⴰⵢ ⴷ-ⵙⵙⴻⵔⵙⴻⵏ ⵜⵓⴳⵏⵉⵡⵉⵏ ⵏ ⵜⵏⴻⵣⴷⵓⵖⵉⵏ ⵓⵔ ⵉⴼⵓⴽⴻⵏ ⴰⵔⴰ ⵎⵍⵉⵃ ⵢⴻⵔⵏⴰ ⵏⵏⴰⵏ-ⴷ ⴷ ⴰⴽⴽⴻⵏ ⵜⵉⴷ-ⵏⵏⵉ ⴷ ⵜⵉⵏⴻⵣⴷⵓⵖⵉⵏ ⵏ ⵓⵎⴻⴷⵢⴰ ⵙⴻⴳ ⵚⵚⴻⵏⴼ-ⴰ ⵏ ⵜⵏⴻⵣⴷⵓⵖⵜ (ⵏ ⵍⵒⵒ) ». « ⵜⵓⴳⵏⵉⵡⵉⵏ-ⵏⵏⵉ ⴰⵢ ⴷ-ⵙⵙⴻⵔⵙⴻⵏ ⵎⴰⵛⵉ ⴷ ⵜⵓⴳⵏⵉⵡⵉⵏ ⵏ ⵜⵉⴷⴻⵜ ⵏ ⵜⵏⴻⵣⴷⵓⵖⵉⵏ ⵏ ⵓⵎⴻⴷⵢⴰ, ⵢⴻⵔⵏⴰ ⵜⵉⵏⴻⴳⴳⵓⵔⴰ-ⴰ ⵢⴻⵥⵔⴰ-ⵜⴻⵏⵜ ⵓⵏⴻⵖⵍⴰⴼ ⴰⴱⴷⴻⵍⵎⴰⴷⵊⵉⴷ ⵜⴻⴱⴱⵧⵓⵏⴻ ⴷⴻⴳ ⵜⵡⵉⵍⴰⵢⵉⵏ ⵏ ⵍⴻⵣⵣⴰⵢⴻⵔ ⴷ ⵜⵉⵒⴰⵣⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵖⵍⵉⴼ. 37.949 ⵏ ⵜⵏⴻⵣⴷⵓⵖⵉⵏ ⴰⵢ ⵢⴻⵍⵍⴰⵏ ⴱⴷⴰⵏⵜ ⵢⴰⴳⵉ ⵙ ⵍⴻⴱⵏⵉ ⴷⴻⴳ ⵢⴻⴱⵔⵉⵔ ⵢⴻⵣⵔⵉⵏ, ⴳⴰⵔ-ⴰⵙⴻⵏⵜ 16.532 ⴷⴻⴳ ⵜⵡⵉⵍⴰⵢⵜ ⵏ ⵍⴻⵣⵣⴰⵢⴻⵔ, ⵖⴻⴼ ⵍⴻⵃⵙⴰⴱ ⵏ ⵜⴻⵛⵔⴰⵡⵜ ⵏ ⵓⵏⴻⵖⵍⴰⴼ ⵏ ⵜⵏⴻⵣⴷⵓⵖⵜ. ⵉⵙⴻⵏⴼⴰⵔⴻⵏ-ⴰ, ⵙ ⵓⵎⴰⵜⴰ, ⴰⴷ ⴷ-ⵇⴰⵎⴻⵏ ⵉ ⵡⴰⴽⴽ ⵡⵉⴷ ⴰⵢ ⵢⴻⵙⵙⵓⵜⵔⴻⵏ ⵜⴰⵏⴻⵣⴷⵓⵖⵜ, ⵢⴻⵔⵏⴰ ⵢⴻⵜⵜⵓⵏⴻⴼⴽ ⵍⴰⵎⴻⵕ ⵏ ⵓⵅⴻⵍⵍⴻⵚ ⵉ 48.361 ⵏ ⵢⵉⵎⵙⵓⵜⵔⴻⵏ, ⴳⴰⵔ-ⴰⵙⴻⵏ 32.242 ⵏ ⵢⵉⵎⵙⵓⵜⵔⴻⵏ ⵅⴻⵍⵍⵚⴻⵏ ⵢⴰⴳⵉ ⴰⵎⵓⵔ-ⵏⵙⴻⵏ. ⵜⴰⴽⴻⴱⴱⴰⵏⵉⵜ ⵜⴰⵖⴻⵍⵏⴰⵡⵜ ⵏ ⵓⵙⵎⴰⵍ ⴰⵚⵓⴽⴰⵏ (ⴻⵏⵒⵉ) ⴰⵢ ⴷ-ⵢⴻⵍⵀⴰⵏ ⵙ ⵓⵙⵙⴻⴼⵄⴻⵍ ⵏ ⵡⴰⵀⵉⵍ ⵏ ⵜⵏⴻⵣⴷⵓⵖⵜ ⵜⴰⵙⵎⴰⵍⴰⵏⵜ ⵜⴰⵏⴰⴳⴷⵓⴷⵜ (ⵍⵒⵒ) ⵢⴻⵔⵏⴰ ⵍⴰ ⵜⴻⵜⵜⵡⴰⵍⵉⵏ ⴷ ⴰⴽⴽⴻⵏ ⴰⴷ ⵜⴻⴱⴷⵓ ⴰⴼⵔⴰⵇ ⵏ ⵜⵏⴻⵣⴷⵓⵖⵉⵏ ⵜⵉⵎⴻⵣⵡⵓⵔⴰ ⵙⴻⴳ 2016 ⴷ ⴰⵙⴰⵡⴻⵏ.