ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵙⴻⵍⵡⴰⵢ ⴱⵧⵓⵜⴻⴼⵍⵉⴽⴰ ⵢⴻⵙⵙⴻⵍⵡⵉ ⵜⵉⵎⵍⵉⵍⵉⵜ ⵖⴻⴼ ⵜⴻⴳⵏⵉⵜ ⴷⴻⴳ ⵜⵖⴻⵔⴷⴰⵢⵜ
ⵍⴻⵣⵣⴰⵢⴻⵔ –ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ, ⵢⴻⵙⵙⴻⵍⵡⵉ ⴰⵙⵙ ⵏ ⵍⴰⵕⴻⴱⵄⴰ ⵜⵉⵎⵍⵉⵍⵉⵜ ⵖⴻⴼ ⵜⴻⴳⵏⵉⵜ ⴰⵢⴷⴻⴳ ⵜⴻⵍⵍⴰ ⵜⵖⴻⵔⴷⴰⵢⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵓⵍⵖⵓ ⵏ ⵜⵙⴻⵍⵡⵉⵜ ⵏ ⵜⴻⴳⴷⵓⴷⴰ, ⵢⴻⵔⵏⴰ ⴷ ⵡⴰ ⴰⵢ ⴷ ⴰⴹⵔⵉⵙ-ⵏⵏⴻⵙ ⵓⵎⵎⵉⴷ:
« ⵎⴰⵙⵙ ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ, ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵉⴳⴰ ⴰⵙⵙ-ⴰ ⵜⵉⵎⵍⵉⵍⵉⵜ ⵖⴻⴼ ⵜⴻⴳⵏⵉⵜ ⴰⵢⴷⴻⴳ ⵜⴻⵍⵍⴰ ⵜⵖⴻⵔⴷⴰⵢⵜ, ⴷ ⵜⵉⵏ ⴰⵢⴷⴻⴳ ⴰⵢ ⵃⴻⴷⵕⴻⵏ ⵎⴰⵙⵙⴰⵡ ⴰⵏⴻⵖⵍⴰⴼ ⴰⵎⴻⵏⵣⵓ, ⴰⵏⴻⵖⵍⴰⴼ ⵏ ⵓⵡⴰⵏⴰⴽ ⴰⵏⴻⵎⵀⴰⵍ ⵏ ⵓⴷⵉⵡⴰⵏ ⵏ ⵜⵙⴻⵍⵡⵉⵜ ⵏ ⵜⴻⴳⴷⵓⴷⴰ, ⴰⵏⵎⴰⵣⵓⵍ ⵏ ⵓⵏⴻⵖⵍⴰⴼ ⵏ ⵜⴻⵎⵃⴰⴷⴷⵉⵜ ⵜⴰⵖⴻⵍⵏⴰⵡⵜ, ⵉⵖⴻⴼ ⵏ ⵢⵉⵖⴰⵍⵍⴻⵏ ⵉⵎⵙⴻⵍⵍⵃⴻⵏ ⵏ ⵢⵉⴳⴻⵏ ⴰⵖⴻⵍⵏⴰⵡ ⴰⵖⴻⵔⴼⴰⵏ.
ⵎⵉ ⵢⴻⵜⵜⵡⴰⵣⵔⴻⵡ ⵡⴰⵀⵉⵍ ⵏ ⵜⴻⵎⵍⵉⵍⵉⵜ ⴷ ⵓⵕⴰⴱⵓⵍ ⴰⵢ ⴷ-ⵢⴻⴼⴽⴰ ⵓⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⴷⴰⵅⴻⵍ ⴷ ⵜⵎⴻⵣⴷⴰⵢⵉⵏ ⵜⵉⴷⵉⴳⴰⵏⵉⵏ ⴰⵢ ⵢⵓⵣⴻⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵖⴻⵔ ⵓⵎⴽⴰⵏ, ⵢⴻⵖⵜⴻⵙ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴰⵢⴻⵏ ⴰⵔⴰ ⴷ-ⵉⴹⴻⴼⵔⴻⵏ:
1- ⴰⵎⴻⵏⵣⴰⴹ ⵏ ⵜⴻⵎⵏⴰⴹⵜ ⵜⴰⵙⴻⵔⴷⴰⵙⵉⵜ ⵜⵉⵙ 4 ⵢⴻⵜⵜⵡⴰⴽⴻⵍⵍⴻⴼ ⵙ ⵓⴹⴼⴰⵔ ⵓⵅⴻⴷⴷⵉⵎ ⵏ ⵢⵉⵎⴻⵥⵍⴰ (ⵙⵙⵔⴰⴱⴻⵙ) ⵏ ⵜⵖⴻⵍⵍⵉⵙⵜ ⴷ ⵢⵉⴷⵓⴱⴰ ⵉⴷⵉⴳⴰⵏⴻⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⵉ ⵍⵎⴻⵏⴷ ⵏ ⵢⵉⵔⵉⵔⵉ ⴷ ⵓⵃⵔⴰⵣ ⵏ ⵍⴻⵀⵏⴰ ⴷⴻⴳ ⵜⴻⵎⵏⴰⴹⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵡⵉⵍⴰⵢⵜ ⵏ ⵜⵖⴻⵔⴷⴰⵢⵜ.
2- ⴰⵏⴻⵖⵍⴰⴼ ⴰⵎⴻⵏⵣⵓ ⴰⴷ ⵢⴻⵙⵙⴻⵃⴱⵉⴱⴻⵔ ⵖⴻⵔ ⵢⵉⴷⵉⵙ ⵏ ⵓⵏⴻⵖⵍⴰⴼ ⵏ ⵜⴻⵖⴷⴻⵎⵜ ⴰⴽⴽⴻⵏ ⵛⵛⵕⴻⵄ ⴰⴷ ⴷ-ⵢⴻⵍⵀⵓ ⵙ ⵜⵉⴷⴻⵜ ⵢⴻⵔⵏⴰ ⵙ ⵍⴻⵡⵄⴰⵕⴰ ⵙ ⵡⴰⴽⴽ ⵜⵓⴼⴼⵖⵉⵡⵉⵏ ⵉ ⵍⵇⴰⵏⵓⵏ ⴷⴻⴳ ⵜⴻⵎⵏⴰⴹⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵖⴻⵔⴷⴰⵢⵜ, ⵍⴰⴷⵖⴰ ⵜⵉⴷ ⵢⴻⵔⵣⴰⵏ ⴰⵜⵄⴻⴷⴷⵉ ⵖⴻⴼ ⵜⵖⴻⵍⵍⵉⵙⵜ ⵏ ⵢⵉⵎⴷⴰⵏⴻⵏ ⴷ ⵡⴰⵢⵍⴰ-ⵏⵙⴻⵏ.
3- ⴷⴷⴰⵡ ⵓⴷⴰⴱⵓ ⵏ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⵏⴰⴱⴰⴹ ⴰⴷ ⵢⴻⵙⵙⴻⵃⴱⵉⴱⴻⵔ ⵖⴻⴼ ⵓⵙⵙⴻⴼⵄⴻⵍ ⵏ ⵡⴰⵀⵉⵍⴻⵏ ⴰⵢⵖⴻⴼ ⴷ-ⵢⴻⵍⵍⴰ ⵢⴰⴳⵉ ⵓⵎⵙⴻⴼⵀⴰⵎ ⵉ ⵍⵎⴻⵏⴷ ⵏ ⵓⵙⴷⵓⵇⵇⴻⵙ ⵏ ⵜⵏⴻⴼⵍⵉⵜ ⵜⴰⴷⴰⵎⵙⴰⵏⵜ ⴷ ⵜⴻⵏⵎⴻⵜⵜⵉⵜ ⴷ ⵜⵓⵇⵇⵍⴰ ⵖⴻⵔ ⵜⵎⴻⴷⴷⵓⵔⵜ ⵏ ⵎⴻⵏⵡⴰⵍⴰ ⴷⴻⴳ ⵜⴻⵎⵏⴰⴹⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵡⵉⵍⴰⵢⵜ ⵏ ⵜⵖⴻⵔⴷⴰⵢⵜ.
ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵉⴼⵓⵕⴻⵙ ⴷⴰⵖ ⵜⴰⴳⵏⵉⵜ-ⴰ ⴰⴽⴽⴻⵏ ⴰⴷ ⵉⵄⴻⵣⵣⵉ ⵜⵉⵡⴰⵛⵓⵍⵉⵏ ⵏ ⵢⵉⵎⴻⵕⵃⵓⵎⴻⵏ ⴰⵢ ⵢⴻⵎⵎⵓⵜⴻⵏ ⴷⴻⴳ ⵢⵉⵎⴻⵏⵖⵉ ⴰⵢ ⴷ-ⵢⴻⵍⵍⴰⵏ ⴳⴰⵔ ⵢⵉⵎⵖⵉⵡⴰⵏⴻⵏ.
ⴷⴻⴳ ⵡⴰⵢⵢⵓⵔ-ⴰ ⵏ ⵕⵕⴻⵃⵎⴰ, ⴰⵙⴻⵍⵡⴰⵢ ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ ⵉⴳⴻⵔ-ⴷ ⴷⴰⵖ ⵜⵉⵖⵔⵉ ⵉ ⵢⵉⵎⴻⵣⴷⴰⵖⴻⵏ ⵏ ⵜⴻⵎⵏⴰⴹⵜ-ⴰ, ⴰ ⵜⴰⴳⵔⴰⵡⵜ ⵢⴻⴱⵖⵓⵏ ⵉⵍⵉⵏ ⵙⴻⴳ-ⵙ, ⴰⴽⴽⴻⵏ ⴰⴷ ⴳⴻⵏ ⴰⵢⴻⵏ ⵓⵎⵉ ⵣⴻⵎⵔⴻⵏ ⴰⴽⴽⴻⵏ ⴰⴷ ⴷ-ⵔⵔⴻⵏ ⵍⵄⴰⴼⵢⴰ ⵢⴻⵔⵏⴰ ⴰⴷ ⵃⴻⵔⵣⴻⵏ ⴰⵙⵙⴰⵖⴻⵏ-ⵏⵙⴻⵏ ⵏ ⵜⴻⴳⵎⴰⵜ ⴰⵢ ⵢⴻⵍⵍⴰⵏ ⵙⴻⴳ ⵣⵉⴽ ⴳⴰⵔ-ⴰⵙⴻⵏ. »
