ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵉⵎⴹⴻⴱⴱⴻⵔ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉⵄⴰⵡⴻⴷ ⵉⴳⴻⵔ-ⴷ ⵜⵉⵖⵔⵉ ⵉ ⵓⵃⴱⴰⵙ ⵏ ⵢⵉⵎⴻⵏⵖⵉ ⴷⴻⴳ ⵙⵓⴷⴰⵏ ⵏ ⵓⵏⵥⵓⵍ

ⴰⴷⴷⵉⵙ-ⴰⴱⴻⴱⴰ – ⴰⵎⴰⵔⵓ ⴰⵎⴰⵜⵓ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⴱⴰⵏ ⴽⵉ-ⵎⵧⵧⵏ, ⵉⴳⴻⵔ-ⴷ ⵜⵉⵖⵔⵉ, ⵜⵉⴽⴽⴻⵍⵜ ⵏⵉⴹⴻⵏ ⴰⵙⵙ ⵏ ⵍⴻⵜⵏⵉⵢⴻⵏ ⴰⴽⴽⴻⵏ ⴰⴷ ⵉⴼⴰⴽ ⵢⵉⵎⴻⵏⵖⵉ ⴷⴻⴳ ⵙⵓⴷⴰⵏ ⵏ ⵓⵏⵥⵓⵍ.

ⵉⵎⴹⴻⴱⴱⴻⵔ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵢⴻⴷⴷⴰ ⵖⴻⵔ ⴰⴷⴷⵉⵙ-ⴰⴱⴻⴱⴰ, ⵜⴰⵎⴰⵏⴻⵖⵜ ⵏ ⵉⵜⵢⵓⵒⵢⴰ, ⴰⴽⴽⴻⵏ ⴰⴷ ⵢⴻⵜⵜⴻⴽⴽⵉ ⴷⴻⴳ ⵓⵙⴰⵔⴰⴳ ⵏ ⵓⵙⵙⵉⴷⵔⴻⵎ ⵏ ⵜⵏⴻⴼⵍⵉⵜ.

ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ ⴷⴻⴼⴼⵉⵔ ⵏ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵖⴻⴼ ⵙⵓⴷⴰⵏ ⵏ ⵓⵏⵥⵓⵍ ⴰⵢ ⴷ-ⵢⴻⵍⵍⴰⵏ ⴳⴰⵔ ⵓⵏⴻⵖⵍⴰⴼ ⴰⵎⴻⵏⵣⵓ ⵏ ⵉⵜⵢⵓⵒⵢⴰ, ⵀⴰⵉⵍⴻⵎⴰⵔⵉⴰⵎ ⴷⴻⵙⴰⵍⴻⴳⵏ ⴷ ⵜⵙⴻⵍⵡⴰⵢⵜ ⵏ ⵜⵙⴻⵇⵇⴰⵎⵓⵜ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ, ⵏⴽⵧⵙⴰⵣⴰⵏⴰ ⴷⵍⴰⵎⵉⵏⵉ ⵣⵓⵎⴰ, ⵎⴰⵙⵙ ⴱⴰⵏ ⵢⴻⵏⵏⴰ-ⴷ: « ⴰⵙⵙ-ⴰ, ⴰⴷ ⴷ-ⴳⵔⴻⵖ ⵜⵉⵖⵔⵉ ⵉ ⵓⵙⴻⵍⵡⴰⵢ ⴽⵉⵉⵔ ⴷ ⵓⵏⵎⴰⵣⵓⵍ ⵏ ⵓⵙⴻⵍⵡⴰⵢ ⴰⵇⴱⵓⵔ ⴰⴷⵓⴽⵜⵓⵔ ⵔⵉⴻⴽ ⵎⴰⵛⵀⴰⵔ ⴰⴽⴽⴻⵏ ⴰⴷ ⴵⴵⴻⵏ ⵟⵟⵔⴰⴷ ⴷⴻⴳ ⵍⴼⴰⵢⴷⴰ ⵏ ⵢⵉⵎⴻⵣⴷⴰⵖⴻⵏ ⵏ ⵜⵎⵓⵔⵜ ⴷ ⵓⵣⴻⴽⴽⴰ ⵏ ⵙⵓⴷⴰⵏ ⵏ ⵓⵏⵥⵓⵍ ».

« ⴳⵔⴻⵖ-ⴰⵙⴻⵏ-ⴷ ⵜⵉⵖⵔⵉ ⴰⴽⴽⴻⵏ ⴰⴷ ⵎⵙⴻⴼⵀⴰⵎⴻⵏ, ⴰⴷ ⴷ-ⵎⴻⵙⵍⴻⵏ ⴰⵎⵜⴰⵡⴰ ⵢⴻⵔⵏⴰ ⴰⴷ ⵇⴰⴷⵔⴻⵏ ⵉⵕⴻⴳⴳⵉⵎⴻⵏ-ⵏⵙⴻⵏ ⴰⴽⴽⴻⵏ ⴰⴷ ⵃⵓⴷⴷⴻⵏ ⵉⵎⴻⵣⴷⴰⵖⴻⵏ ⵏ ⵓⵏⵥⵓⵍ ⵏ ⵙⵓⴷⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵜⴰⴳⵏⵉⵜ ⵜⴰⵍⵙⴰⵏⵜ ⴷⴻⴳ ⵙⵓⴷⴰⵏ ⵏ ⵓⵏⵥⵓⵍ ⵜⵓⵡⴻⴹ ⵖⴻⵔ ⵜⵡⴰⵖⵉⵜ, ⴷⴻⴳ ⵡⴰⴽⵓⴷ ⴷⴻⴳ ⵓⴳⴰⵔ ⵏ 1,6 ⴷ ⴰⵎⴻⵍⵢⵓⵏ ⵏ ⵢⵉⵎⴷⴰⵏⴻⵏ ⴰⵢ ⵉⵔⴻⵡⵍⴻⵏ ⵙⴻⴳ ⵢⵉⵅⵅⴰⵎⴻⵏ-ⵏⵙⴻⵏ, ⵓⴳⴰⵔ ⵏ 600.000 ⵏⵉⴹⴻⵏ ⴰⵢ ⵉⵔⴻⵡⵍⴻⵏ ⵖⴻⵔ ⵜⵎⵓⵔⴰ ⵜⵉⵏⴰⵔⴰⴳⵉⵏ (ⵜⵉⵊⵉⵔⴰⵜⵉⵏ) ⵢⴻⵔⵏⴰ ⴰⵣⴰⵍ ⵏ 4,6 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵎⴷⴰⵏⴻⵏ ⴰⵢ ⵉⵅⵓⵚⵚⴻⵏ ⵓⵞⵞⵉ, ⵖⴻⴼ ⵡⴰⴽⴽⴻⵏ ⴰⵢ ⵢⴻⵙⵃⴰⵙⵙⴻⴼ ⵎⴰⵙⵙ ⴱⴰⵏ. « ⵎⴰⵣⴰⵍ ⵜⴻⵣⵎⴻⵔ ⵙⵓⴷⴰⵏ ⵏ ⵓⵏⵥⵓⵍ ⴰⴷ ⴷ-ⵜⴻⵜⵜⵡⴰⵙⵙⵓⴽⴽⴻⵙ ⵎⴰ ⵇⴻⴱⵍⴻⵏ ⵙⵉⵏ ⵏ ⵢⵉⴷⵉⵙⴰⵏ ⴰⵢ ⵢⴻⵎⵅⴰⵚⴰⵎⴻⵏ ⴰⴷ ⴷ-ⴽⴽⴻⵏ ⵏⵏⵉⴳ ⵏⵏⴼⴻⵄ-ⵏⵙⴻⵏ, ⵢⴻⵔⵏⴰ ⴰⴷ ⵙⵄⵓⵏ ⵜⴰⴱⵖⴻⵙⵜ ⴷ ⵜⵎⴻⵍⵡⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵎⴰⵔⵓ ⴰⵎⴰⵜⵓ. ⵖⴻⴼ ⵍⴻⵃⵙⴰⴱ-ⵏⵏⴻⵙ, ⵜⴰⵍⵡⵉⵜ ⴷⴻⴳ ⵙⵓⴷⴰⵏ ⵏ ⵓⵏⵥⵓⵍ ⵜⴻⵃⵡⴰⴵ ⴷⴰⵖ ⴰⵄⴰⵡⴻⵏ ⵏ ⵢⵉⵏⴰⵔⴰⴳⴻⵏ-ⵏⵏⴻⵙ (ⵍⵊⵉⵔⴰⵏ). « ⴰⴷ ⴷ-ⴳⵔⴻⵖ ⵜⵉⵖⵔⵉ ⵉ ⵓⵙⴻⵍⵡⴰⵢ (ⵏ ⵓⴳⴰⵏⴷⴰ) ⵎⵓⵙⴻⵠⴻⵏⵉ ⴷ ⵓⵙⴻⵍⵡⴰⵢ (ⵏ ⵙⵓⴷⴰⵏ) ⴱⴰⵛⵀⵉⵔ ⴰⴽⴽⴻⵏ ⴰⴷ ⵙⵇⴻⴷⵛⴻⵏ ⵜⴰⵣⵔⵉⵔⵜ-ⵏⵙⴻⵏ ⴰⴽⴽⴻⵏ ⴰⴷ ⵙⵙⵉⵡⴹⴻⵏ ⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴰⴷ ⴼⴰⴽⴻⵏ ⵉⵎⴻⵏⵖⵉ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ.

ⵜⵟⵔⴰⴷ ⴰⵖⴰⵔⵉⵎ ⴷ ⵜⴻⴽⵔⵉⴹⵜ ⴷⴻⴳ ⵙⵓⴷⴰⵏ ⵏ ⵓⵏⵥⵓⵍ ⴱⴷⴰⵏ-ⴷ ⴷⴻⴳ ⴷⵓⵊⴻⵎⴱⴻⵕ ⵏ 2013. ⵓⵍⴰ ⵎⴰ ⵢⴻⵍⵍⴰ-ⴷ ⵍⵎⴻⴵⵀⵓⴷ ⴰⵙⴻⵔⵜⵉ ⵉ ⵓⵃⴱⴰⵙ ⵏ ⵟⵟⵔⴰⴷ-ⴰ, ⵡⴻⵔⵄⴰⴷ ⵓⵔ ⴷ-ⵢⴻⴳⵍⵉ ⵙ ⵡⴰⵛⴻⵎⵎⴰ ⵏ ⵍⴼⴰⵢⴷⴰ.