ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⴳⴰⵔ ⵏ ⵍⵎⴻⴵⵀⵓⴷ ⵉ ⵓⵙⵙⵉⵡⴻⴹ ⵏ ⵡⴰⵎⴰⵏ ⵏ ⵜⵉⵙⵙⵉⵜ ⵉ ⵢⵉⵎⴻⵣⴷⴰⵖⴻⵏ

ⵍⴻⴱⵍⵉⴷⴰ – ⴰⵏⴻⵖⵍⴰⴼ ⵏ ⵜⴻⵖⴱⵓⵍⴰ ⵏ ⵡⴰⵎⴰⵏ ⴷ ⵜⵡⴻⵏⵏⴰⴹⵜ, ⴰⴱⴷⴻⵍⵧⵓⴰⵀⴰⵎ ⵏⵧⵓⵔⵉ, ⵉⵃⴻⵜⵜⴻⵜ-ⴷ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵍⴻⴱⵍⵉⴷⴰ ⴷ ⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵡⵓⴳⴰⵔ ⵏ ⵍⵎⴻⴵⵀⵓⴷ ⵉ ⵓⵙⵙⵉⵡⴻⴹ ⵏ ⵡⴰⵎⴰⵏ ⵏ ⵜⵉⵙⵙⵉⵜ ⵉ ⵢⵉⵎⴻⵣⴷⴰⵖⴻⵏ ⵏ ⵜⴻⵎⵏⴰⴹⵜ-ⴰ ⴰⵏⴷⴰ ⴰⵢ ⵜⵜⵅⴰⵚⵚⴰⵏ ⵡⴰⵎⴰⵏ ⵍⴰⴷⵖⴰ ⴷⴻⴳ ⵓⵏⴻⴱⴷⵓ.

ⵎⴰⵙⵙ ⵏⵧⵓⵔⵉ ⴰⵢ ⵉⴳⴰⵏ ⵜⵉⵔⵣⵉ ⵏ ⵓⵙⵙⴻⴼⵇⴻⴷ ⴷ ⵓⵎⴰⵀⵉⵍ (ⴰⵅⴻⴷⴷⵉⵎ) ⵖⴻⴼ ⵍⴻⴱⵍⵉⴷⴰ, ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵡⴰⵏⴰⴽ (ⴷⴷⵓⵍⴰ) ⵉⵃⴰⵣ-ⴷ ⵜⴰⵊⴻⵍⵍⴰⴱⵜ ⵏ 121 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ ⵉ ⵓⵙⵙⴻⴵⵀⴻⴷ ⵏ ⵓⵙⵙⵉⵡⴻⴹ ⵏ ⵡⴰⵎⴰⵏ ⵏ ⵜⵉⵙⵙⵉⵜ ⴷⴻⴳ ⵜⵡⵉⵍⴰⵢⵜ-ⴰ, ⵎⴰⵛⴰ ⵓⵔ ⵉⵣⴰⴷ ⵡⴰⵔⴰ ⵡⴰⵢⴻⵏ ⴰⵢ ⴷ-ⵢⴻⵍⵍⴰⵏ ⴷⴻⴳ ⵓⵏⵔⴰⵔ, ⵉⵎⵉ ⴰⵢ ⵍⴰ ⵉⵔⴻⵏⵏⵓ ⵓⵙⵙⵓⵜⴻⵔ ⵏ ⵡⴰⵎⴰⵏ ⴰⵎⴰ ⵖⴻⵔ ⵢⵉⵎⴻⵣⴷⴰⵖⴻⵏ, ⴰⵎⴰ ⴷⴻⴳ ⵓⵃⵔⵉⵛ ⵏ ⵜⴼⴻⵍⵍⴰⵃⵜ ⵏⴻⵖ ⴷⴻⴳ ⵡⵉⵏ ⵏ ⵜⴷⴰⵎⵙⴰ ⴷⴻⴳ ⵜⵡⵉⵍⴰⵢⵜ-ⴰ.

ⴰⵏⴻⵖⵍⴰⴼ ⵏ ⵜⴻⵖⴱⵓⵍⴰ ⵏ ⵡⴰⵎⴰⵏ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵖⵍⵉⴼ-ⵏⵏⴻⵙ ⵢⴻⵡⵊⴻⴷ ⴰⴷ ⵢⴻⵔⵏⵓ ⴰⴷ ⴷ-ⵢⴻⴳ ⵉⵙⴻⵏⴼⴰⵔⴻⵏ ⵉⵎⴰⵢⵏⵓⵜⴻⵏ ⵉ ⵍⴼⴰⵢⴷⴰ ⵏ ⵜⵡⵉⵍⴰⵢⵜ-ⴰ ⵙ ⵜⵖⵓⵣⵉ ⴷ ⵓⵊⴱⴰⴷ ⵏ ⵡⴰⵎⴰⵏ ⵙⴻⴳ ⴷⴷⴰⵡ ⵜⵎⵓⵔⵜ ⴰⴽⴽⴻⵏ « ⴰⴷ ⵢⴻⴼⵔⵓ ⵍⴻⵅⵚⴰⵚ-ⴰ ». ⵉⵙⴻⵏⴼⴰⵔⴻⵏ-ⴰ ⴰⴷ ⵔⵏⵓⵏ ⵖⴻⵔ ⵡⵉⴷ ⴰⵢ ⴷ-ⵢⴻⵍⵍⴰⵏ ⵢⴰ ⵏⴻⵖ ⵍⴰ ⴷ-ⵜⵜⵉⵍⵉⵏ, ⴰⵎ ⵓⵙⴻⵏⴼⴰⵔ ⵏ ⵓⵙⵙⵉⵡⴻⴹ ⵏ 80 000 ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⵏ ⵡⴰⵎⴰⵏ ⵙⴻⴳ ⵓⵏⴰⴳⵔⴰⵡ ⵏ « ⵙⵙⴰⵃⴻⵍ 3 ⵏ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ». ⴰⵙⵙ-ⴰ, ⴰⵏⴰⴳⵔⴰⵡ-ⴰ ⵍⴰ ⴷ-ⵢⴻⵙⵙⴰⵡⴰⴹ ⵢⴰⴳⵉ 20 000 ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⵏ ⵡⴰⵎⴰⵏ ⵉ ⵜⴻⵎⵏⴰⴹⵜ ⵏ ⵍⴻⴱⵍⵉⴷⴰ ⵜⴰⵎⴻⵇⵔⴰⵏⵜ ⵉ ⵍⴼⴰⵢⴷⴰ ⵏ 375 000 ⵏ ⵢⵉⵎⴻⵣⴷⴰⵖⴻⵏ (ⴷ ⵜⴰⵎⵏⴰⴹⵜ ⴷⴻⴳ ⵜⵜⴻⴽⴽⴰⵏⵜ ⵜⵖⵉⵡⴰⵏⵉⵏ ⵏ ⵡⵍⴰⴷ ⵉⵄⵉⵛ, ⴱⵏⵉ ⵎⵔⴰⴷ, ⵍⴻⴱⵍⵉⴷⴰ ⴷ ⴱⵓⵄⴻⵕⴼⴰ).

ⵉⵎⴰⵀⵉⵍⴻⵏ (ⵉⵅⴻⴷⴷⵉⵎⴻⵏ) ⵍⴰ ⵜⵜⴽⴻⵎⵎⵉⵍⴻⵏ ⵙ ⵓⵙⵙⴻⵔⵙⵉ ⵏ ⵢⵉⵇⵓⴷⴰⵙ ⴷ ⵍⴻⴱⵏⵉ ⵏ ⵍⵅⴻⵣⵏⴰⵜ ⵏ ⵡⴰⵎⴰⵏ ⵉ ⵓⵙⵙⵉⵡⴻⴹ ⵏ ⵡⵓⴳⴰⵔ ⵏ ⵡⴰⵎⴰⵏ ⵖⴻⵔ ⵜⵡⵉⵍⴰⵢⵜ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⵏⴻⵖⵍⴰⴼ ⵉⵃⴻⵜⵜⴻⵜ-ⴷ ⵖⴻⴼ ⵢⵉⵎⴹⴻⴱⴱⵔⴻⵏ ⵉⴷⵉⴳⴰⵏⴻⵏ ⴰⵢ ⴷ-ⵢⴻⵍⵀⴰⵏ ⵙ ⵡⴰⵎⴰⵏ ⴰⴽⴽⴻⵏ ⴰⴷ ⴳⴻⵏ ⵓⴳⴰⵔ ⵏ ⵍⵎⴻⴵⵀⵓⴷ ⴰⴽⴽⴻⵏ ⴰⴷ ⵙⵙⵉⵡⴹⴻⵏ ⴰⵎⴰⵏ ⴰⵔⴰ ⴷ-ⵉⴽⴰⴼⵉⵏ ⴰⵙⵙⵓⵜⴻⵔ, ⵢⴻⵔⵏⴰ ⴰⴷ ⵙⵃⵓⵍⴼⵓⵏ ⴷⴰⵖ ⵉⵎⴻⵣⴷⴰⵖⴻⵏ ⵖⴻⴼ ⵓⵛⵓⵃⵃⵓ, ⵉⵎⵉ ⴰⵎⴰⵏ ⵙⵄⴰⵏ ⴷⴰⵖ ⴰⵣⴰⵍ ⴷⴻⴳ ⵓⵙⵙⵡⴰⵢ ⵏ ⵜⴼⴻⵍⵍⴰⵃⵜ ⴷⴻⴳ ⵜⵡⵉⵍⴰⵢⵜ ⵏ ⵍⴻⴱⵍⵉⴷⴰ ⴰⵢ ⵢⴻⵙⵄⴰⵏ ⵜⴰⵊⵓⵎⵎⴰ ⵏ 300 000 ⵏ ⵢⵉⵇⴻⵟⵟⴰⵔⴻⵏ.