ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵙⵓⴷⴰⵏ ⵏ ⵓⵏⵥⵓⵍ: ⵜⵉⵖⵔⵉ ⵜⴰⴳⵔⴰⵖⵍⴰⵏⵜ ⵉ ⵓⵙⵙⴻⴼⵄⴻⵍ ⵓⵄⵊⵉⵍ ⵏ ⵓⵎⵜⴰⵡⴰ ⵏ ⵜⴰⵍⵡⵉⵜ

ⵍⴷⵣⴰⵢⴻⵔ ⵜⴰⵎⴰⵏⴻⵖⵜ – ⴷⴻⴳ ⵜⴳⴰⵔⴰ, ⵢⴻⵙⵜⴻⵏⵢⴰ ⵓⵙⴻⵍⵡⴰⵢ ⵏ ⵙⵓⴷⴰⵏ ⵏ ⵓⵏⵥⵓⵍ, ⵙⴰⵍⵠⴰ ⴽⵉⵉⵔ, ⴰⵎⵜⴰⵡⴰ ⵏ ⵜⴰⵍⵡⵉⵜ ⴷⴻⴳ ⵊⵓⴱⴰ (ⵜⴰⵎⴰⵏⴻⵖⵜ ⵏ ⵜⵎⵓⵔⵜ), ⴷ ⴰⵛⵓ ⴽⴰⵏ, ⴰⵎⵖⵉⵡⴰⵏ ⴰⴳⵔⴰⵖⵍⴰⵏ ⵉⴳⴻⵔ-ⴷ ⵜⵉⵖⵔⵉ ⵉ ⵡⴰⴽⴽ ⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⴰⴽⴽⴻⵏ « ⴰⴷ ⵇⴰⴷⵔⴻⵏ ⴰⵎⵜⴰⵡⴰ-ⵏⵏⵉ ⵙ ⵍⴻⴽⵎⴰⵍ-ⵏⵏⴻⵙ » ⵢⴻⵔⵏⴰ ⴰⴷ ⵜ-ⵙⴼⴻⵄⵍⴻⵏ « ⵙ ⵜⵖⴰⵡⵍⴰ » ⴰⴽⴽⴻⵏ ⴰⴷ ⵉⴼⴰⴽ ⵛⵛⵡⴰⵍ ⴷ ⵜⴻⴽⵔⵉⴹⵜ ⴰⵢ ⵢⴻⵙⵖⴻⵏ ⵜⴰⵎⵓⵔⵜ-ⴰ 20 ⵏ ⵡⴰⵢⵢⵓⵔⴻⵏ.

ⵜⵥⴰ (9) ⵏ ⵡⵓⵙⵙⴰⵏ ⴷⴻⴼⴼⵉⵔ ⵎⴰ ⵡⴻⵎⵎⵕⴻⵏ ⵢⵉⵖⴻⵡⵡⴰⵖⴻⵏ ⴰⵎⵜⴰⵡⴰ-ⴰ, ⴰⵙⴻⵍⵡⴰⵢ ⴽⵉⵉⵔ ⵢⴻⵙⵜⴻⵏⵢⴰ-ⵜ ⵙ ⵓⵃⴷⴰⵕ ⵏ ⵢⵉⴱⴰⵎⵎⴰⵙⴻⵏ ⵏ ⵉⴳⴰⴷ (ⴰⴷⴰⴱⵓ ⴰⴳⴻⵔⵏⴰⴱⴰⴹ ⵏ ⵜⵏⴻⴼⵍⵉⵜ ⵏ ⵜⴻⴼⵔⵉⵇⵜ ⵏ ⵓⴳⵎⵓⴹ), ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⴽⴽⴻⵏ « ⵜⴰⵍⵡⵉⵜ ⴰⵢⵖⴻⴼ ⵏⴻⵙⵜⴻⵏⵢⴰ ⴰⵙⵙ-ⴰ ⵍⵍⴰⵏⵜ ⴷⴻⴳ-ⵙ ⴰⵟⴰⵙ ⵏ ⵜⵖⴰⵡⵙⵉⵡⵉⵏ ⴰⵢ ⵢⴻⵙⵙⴻⴼⴽ ⴰⴷ ⵜⴻⵏⵜ-ⵏⴰⴳⵉ (…) ⵜⵓⵇⵇⵏⴰ ⵏ ⵜⵉⵟ ⵖⴻⴼ ⵜⵖⴰⵡⵙⵉⵡⵉⵏ ⴰⵎ ⵜⵉ ⵓⵔ ⵜⴻⵍⵍⵉ ⴰⵔⴰ ⵉ ⵍⴼⴰⵢⴷⴰ ⵏ ⵜⴰⵍⵡⵉⵜ ⵜⵓⵖⴷⵉⵎⵜ ⴰⵔⴰ ⵉⴷⵓⵎⴻⵏ ».

ⵎⴰⵙⵙ ⴽⵉⵉⵔ ⵉⵡⴻⵜ-ⴷ ⴷⴻⴳ « ⵢⵉⵃⴻⵣⵣⵉⴱⴻⵏ ⵢⴻⵜⵜⴹⵓⵔⵔⵓⵏ » ⵏ ⵓⵎⵜⴰⵡⴰ-ⴰ, ⵢⴻⵔⵏⴰ ⵢⴻⴼⴽⴰ ⵉ ⵢⵉⴱⴷⴰⵎⵎⴰⵙⴻⵏ ⴷ ⵢⵉⵎⴹⴻⴱⴱⵔⴻⵏ ⵏ ⵜⵎⵓⵔⴰ ⵏ ⵜⴻⵎⵏⴰⴹⵜ ⵢⵉⵡⴻⵜ ⵏ ⵜⴻⴼⵜⴰⵔⵜ ⵏ 12 ⵏ ⵢⵉⵙⴻⴱⵜⴰⵔ ⴰⵢⴷⴻⴳ ⵍⵍⴰⵏ ⵢⵉⴽⵓⴽⵔⴰⵏ ⵏ ⵓⵏⴰⴱⴰⴹ-ⵏⵏⴻⵙ. ⴷ ⴰⵛⵓ ⴽⴰⵏ, ⵓⵔ ⴷ-ⵢⴻⵏⵏⵉ ⴰⵔⴰ ⵉ ⵜⵖⴻⵎⵙⴰ ⴷ ⴰⵛⵓ-ⵜⴻⵏⵜ ⵜⴻⵏⵇⵉⴹⵉⵏ ⴰⵢ ⵢⵓⴳⵉ, ⵓⵍⴰ ⵎⴰ ⵉⵡⴻⴽⴽⴻⴷ-ⴷ ⴷⴰⴽⴽⴻⵏ ⵓⵔ ⵜⵜⵄⴻⴹⴹⵉⵍⴻⵏ ⴰⵔⴰ ⴰⴷ ⴷ-ⴱⴰⵏⴻⵏ ⵜⵜⴼⴰⵚⵉⵍ ⵖⴻⴼ ⵡⴰⵢⴰ.

ⴰⵎⵜⴰⵡⴰ-ⴰ ⵓⵔ ⵢⴻⵍⵍⵉ « ⵍⴰ ⴷ ⵜⵉⴱⵉⴱⴻⵍⵜ, ⵡⴰⵍⴰ ⴷ ⵍⴻⵇⵔⴰⵏ, ⵎⴰⵖⴻⴼ ⵓⵔ ⵢⴻⵣⵎⵉⵔ ⴰⵔⴰ ⴰⴷ ⵉⵄⴰⵡⴻⴷ ⴰⴷ ⴰⵙⵙⵓⴽⴽⵓ ⵏ ⵜⵉⵟ ⴼⴻⵍⵍ-ⴰⵙ? », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴽⵉⵉⵔ. « ⴼⴽⴻⵜ-ⴰⵖ-ⴷ ⴰⴽⵓⴷ ⴰⴽⴽⴻⵏ ⴰⴷ ⵏⵥⴻⵔ ⴰⵎⴻⴽ ⴰⵢ ⵏⴻⵣⵎⴻⵔ ⴰⴷ ⵏⴻⵙⵙⴻⵖⵜⵓ ⵜⵉⵖⴰⵡⵙⵉⵡⵉⵏ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ, ⵓⵍⴰ ⵎⴰ ⵉⴱⴷⴰⵎⵎⴰⵙⴻⵏ ⵏⵏⴰⵏ-ⴷ ⴷⴰⴽⴽⴻⵏ ⵡⴰ ⴷ ⴰⵎⵜⴰⵡⴰ ⴰⵏⴻⴳⴳⴰⵔⵓ ⵢⴻⵔⵏⴰ ⵓⵔ ⵢⴻⵜⵜⴱⴻⴷⴷⵉⵍ ⴰⵔⴰ.

ⵖⴻⴼ ⵍⴻⵃⵙⴰⴱ ⵏ ⵢⵉⵎⴹⴻⴱⴱⵔⴻⵏ ⵏ ⵙⵓⴷⴰⵏ ⵏ ⵓⵏⵥⵓⵍ, ⵍⵍⴰⵏ ⵙⵉⵏ ⵏ ⵡⵓⴳⵓⵔⴻⵏ ⴷ ⵉⵎⴻⵇⵔⴰⵏⴻⵏ ⴷⴻⴳ ⵓⵎⵜⴰⵡⴰ-ⴰ. ⴰⵎⴻⵣⵡⴰⵔⵓ ⵏⴻⵜⵜⴰ ⴷ ⵜⵓⴽⴽⵙⴰ ⵏ ⵢⵉⵙⴻⵔⴷⴰⵙⴻⵏ ⵙⴻⴳ ⵜⴻⵎⵏⴰⴹⵜ ⵏ ⵊⵓⴱⴰ, ⵎⴰ ⴷ ⵡⵉⵙ ⵙⵉⵏ ⴷ ⴰⴳⴻⵏⵙⴻⵙ ⴰⵎⴻⵇⵔⴰⵏ ⴰⵢ ⵢⴻⵜⵜⵓⵏⴻⴼⴽⴻⵏ ⵉ ⵢⵉⵖⴻⵡⵡⴰⵖⴻⵏ ⴷⴻⴳ ⵓⴽⴰⵜⴰⵔ ⵏ ⵓⴼⵔⴰⵇ ⵏ ⵓⴷⴰⴱⵓ ⴰⵢ ⴷ-ⵢⴻⵍⵍⴰⵏ ⴷⴻⴳ ⵓⵡⴰⵏⴰⴽ ⵏ ⵏⵉⵍ ⵓⵏⵏⵉⴳ ⴰⵢⴷⴻⴳ ⵢⴻⵍⵍⴰ ⵓⵒⵉⵜⵕⵓⵍ.