ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵒⴰⵣⴰ: ⴰⵙⴰⵔⴰⴳ ⴰⴳⵔⴰⵖⵍⴰⵏ ⴰⵎⴻⵣⵡⴰⵔⵓ ⵖⴻⴼ ⵓⵙⵙⵉⵙⵎⴻⴹ ⴰⵣⴻⴷⴳⴰⵏ ⴷⴻⴳ ⴱⵓⵙⵎⴰⵄⵉⵍ
ⵜⵉⵒⴰⵣⴰ – ⴰⵙⴰⵔⴰⴳ ⴰⴳⵔⴰⵖⵍⴰⵏ ⴰⵎⴻⵣⵡⴰⵔⵓ ⵏ ⵜⴻⵙⵏⴰⵜⵡⵉⵍⵉⵏ (ⵜⵜⵉⴽⵏⵓⵍⵓⵊⵉⵢⵢⴰⵜ) ⵜⵉⵣⴻⴷⴳⴰⵏⵉⵏ ⵏ ⵓⵙⵙⵉⵙⵎⴻⴹ ⵢⴻⴱⴷⴰ-ⴷ ⴰⵙⵙ ⵏ ⵜⵜⵍⴰⵜⴰ ⴷⴻⴳ ⴱⵓⵙⵎⴰⵄⵉⵍ ⵢⴻⵔⵏⴰ ⵜⴻⵙⵙⵓⴷⴷⴻⵙ-ⵉⵜ ⵜⴰⵢⵓⵏⵜ (ⵍⵡⵉⵃⴷⴰ) ⵏ ⵓⵙⵏⴻⴼⵍⵉ ⵏ ⵜⵜⴰⵡⵉⵍ ⵏ ⵜⴰⴼⵓⴽⵜ (ⵓⴷⴻⵙ). ⴰⵙⴰⵔⴰⴳ-ⴰ ⴰⴷ ⵜⵜⴻⴽⴽⵉⵏ ⴷⴻⴳ-ⵙ ⵢⵉⵎⴰⵣⵣⴰⵢⴻⵏ (ⵍⵅⵓⴱⴰⵔⴰ’) ⴷ ⵢⵉⵎⵏⴰⴷⵉⵢⴻⵏ ⴰⵎⴰ ⵏ ⵜⴻⴼⵔⵉⵇⵜ ⵏ ⵓⴳⴰⴼⴰ, ⴰⵎⴰ ⵏ ⵜⵓⵕⵓⴼⵜ.
ⴰⵎⵢⴰⴳⴻⵔ-ⴰ ⴰⴷ ⵎⵍⵉⵍⴻⵏⵜ ⴷⴻⴳ-ⵙ ⵜⴻⵙⴷⴰⵡⵉⵢⵉⵏ, ⴰⵎⵎⴰⵙⴻⵏ ⵉⴷⵣⴰⵢⵔⵉⵢⴻⵏ ⵏ ⵓⵏⴰⴷⵉ, ⵉⵎⴰⵣⵣⴰⵢⴻⵏ ⵉⴼⵕⴻⵏⵙⵉⵙⴻⵏ, ⵉⵙⵒⴻⵏⵢⵓⵍⵉⵢⴻⵏ ⴷ ⵢⵉⵙⵡⵉⵙⵉⵢⴻⵏ, ⵢⴻⵔⵏⴰ ⴰⴷ ⵏⴰⴷⵉⵏ ⴷⴻⴳ-ⵙ ⵖⴻⴼ ⵢⵉⵏⴰⴳⵔⴰⵡⴻⵏ (ⵍ’ⴰⵏⴹⵉⵎⴰ) ⵜⵉⵎⴰⵢⵏⵓⵜⵉⵏ ⵏ ⵓⵙⵙⵉⵙⵎⴻⴹ (ⵉⵎⵙⵉⵙⴻⵎⴹⴻⵏ, ⵉⵙⵏⴻⵣⵡⴰⵢⴻⵏ [ⵍⵎⵓⴽⴰⵢⵢⵉⴼⴰⵜ] ⴷ ⵜⴻⵙⴱⵓⵃⵔⵓⵜⵉⵏ) ⴷ ⵍⴰⵜⴻⵕ ⵓⵙⵔⵉⴷ ⴰⵢ ⵢⴻⵙⵄⴰ ⵜⵜⴰⵡⵉⵍ ⵏ ⵓⵙⵙⵉⵙⵎⴻⴹ ⵖⴻⴼ ⵜⵡⴻⵏⵏⴰⴹⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵍⵡⴰⵢ ⵏ ⵓⵙⴰⵔⴰⴳ-ⴰ, ⴰⵎⵏⴰⴷⵉ ⵎⵧⵀⴰⵎⴻⴷ ⴰⴱⴱⴰⵙ, ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.
ⵉⵎⵜⵜⴻⴽⴽⵉⵢⴻⵏ ⴰⴷ ⴷ-ⵙⵙⵉⵡⵍⴻⵏ ⴷⴰⵖ ⵖⴻⴼ « ⵜⴻⵙⵏⴰⵜⵡⵉⵍⵉⵏ ⵜⵉⵎⴰⵢⵏⵓⵜⵉⵏ ⵏ ⵓⵙⵙⵉⵙⵎⴻⴹ ⴰⵢ ⵙⵙⴻⵇⴷⴰⵛⴻⵏ ⴷⴻⴳ ⵍⴱⴻⵏⵢⴰⵏⴰⵜ » ⴷ « ⴷⴷⵓⵕ ⵏ ⵜⵥⴻⵡⵔⵉⵏ (ⵟⵟⴰⵇⴰⵜ) ⵜⵉⵣⴻⴷⴳⴰⵏⵉⵏ ⴷⴻⴳ ⵓⵙⵙⴻⵏⵇⴻⵙ ⵏ ⵜⴼⴰⵜⵓⵕⵜ ⵏ ⵜⴻⵥⵡⴻⵔⵜ, ⵍⴰⴷⵖⴰ ⵜⴰⴼⴰⵜⵓⵕⵜ ⵏ ⵜⵔⵉⵙⵉⵜⵉ ⴰⵢ ⵢⴻⵣⴳⴰⵏ ⵜⵔⴻⵏⵏⵓ ⴷⴻⴳ ⵓⵏⴻⴱⴷⵓ ⴷⴻⴳ ⵜⴻⵎⵏⴰⴹⵉⵏ ⵜⵉⵃⵎⴰⵢⴰⵏⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.
ⵎⴰⵙⵙ ⴰⴱⴱⴰⵙ ⵢⴻⴱⴷⴻⵔ-ⴷ ⵍⴻⵃⵙⴰⴱⴰⵜ ⵉⵏⴻⴳⴳⵓⵔⴰ ⴰⵢ ⴷ-ⵢⴻⵙⵙⵓⴼⴼⴻⵖ ⵓⵖⵍⵉⴼ ⵏ ⵜⴻⵥⵡⴻⵔⵜ, ⴷ ⵡⵉⴷ ⴰⵢⴷⴻⴳ ⴰⵢ ⴷ-ⵉⴱⴰⵏ ⴷ ⴰⴽⴽⴻⵏ ⴰⵙⵙⴻⵇⴷⴻⵛ ⵏ ⵜⵔⵉⵙⵉⵜⵉ ⵢⴻⵔⵏⴰ ⵙ 14% ⵖⴻⴼ ⵍⴻⵃⵙⴰⴱ ⵏ ⵢⵉⵙⴻⴳⴳⴰⵙⴻⵏ ⵢⴻⵣⵔⵉⵏ.
ⵙⴻⴳ ⵢⵉⴷⵉⵙ-ⵏⵏⴻⵙ, ⴰⵏⴻⵎⵀⴰⵍ ⵏ ⵓⴷⴻⵙ, ⴰⴷⵓⴽⵜⵓⵔ ⴱⵧⵓⵣⵉⴷⵉ, ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵙⴰⵔⴰⴳ-ⴰ ⴰⵎⴻⵣⵡⴰⵔⵓ ⵙⴻⴳ ⵚⵚⴻⵏⴼ-ⵏⵏⴻⵙ ⴷⴻⴳ ⵍⴻⵣⵣⴰⵢⴻⵔ ⵢⴻⵙⵄⴰ ⴰⵣⴰⵍ, ⵢⴻⵔⵏⴰ ⴰⴷ ⵢⵉⵍⵉ ⴷ « ⴰⵎⴽⴰⵏ ⴰⵢⴷⴻⴳ ⴰⵔⴰ ⴷ-ⵎⵍⵉⵍⴻⵏ ⵢⵉⵎⴰⵣⵣⴰⵢⴻⵏ ⵏ ⵜⴻⴼⵔⵉⵇⵜ ⵏ ⵓⴳⴰⴼⴰ ⴷ ⵢⵉⵍⴻⵍ ⴰⴳⵔⴰⴽⴰⵍ ⴰⴽⴽⴻⵏ ⴰⴷ ⵎⴱⴰⴷⴷⴰⵍⴻⵏ ⵜⵜⴻⵊⵕⵉⴱⴰⵜ-ⵏⵙⴻⵏ ⵢⴻⵔⵏⴰ ⴰⴷ ⴷ-ⵇⴻⴷⴷⵎⴻⵏ ⵉⵙⵏⵓⵍⴼⵓⵢⴻⵏ-ⵏⵙⴻⵏ ⵉⵎⴰⵢⵏⵓⵜⴻⵏ ⵉⵏⴻⴳⴳⵓⵔⴰ ⴷⴻⴳ ⵓⵏⵔⴰⵔ ⵏ ⵓⵙⵙⵉⵙⵎⴻⴹ ⴷ ⵜⵥⴻⵡⵔⵉⵏ ⵜⵉⵣⴻⴷⴳⴰⵏⵉⵏ ».
