ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵍⴻⵣⵣⴰⵢⴻⵔ ⴷ ⵙⵓⴷⴰⵏ ⴱⵖⴰⵏⵜ ⴰⴷ ⴷ-ⴳⴻⵏⵜ ⵜⵉⵛⵛⵓⵔⴽⴰ ⵜⴰⴷⴰⵎⵙⴰⵏⵜ ⵉⴳⴻⵔⵔⵣⴻⵏ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵏⵏⴰⵏⵜ-ⴷ ⵍⴻⵣⵣⴰⵢⴻⵔ ⴷ ⵙⵓⴷⴰⵏ ⴰⵙⵙ ⵏ ⵍⴻⵜⵏⵉⵢⴻⵏ ⴷ ⴰⴽⴽⴻⵏ ⴱⵖⴰⵏⵜ ⴰⴷ ⵙⵏⴻⵔⵏⵉⵏⵜ ⴰⵙⵙⴰⵖⴻⵏ-ⵏⵙⴻⵏⵜ (ⵍⵄⴰⵍⴰⵇⴰⵜ) ⵉⴷⴰⵎⵙⴰⵏⴻⵏ ⵢⴻⵔⵏⴰ ⴰⴷ ⵜⴻⵏⵜ-ⵔⵔⴻⵏⵜ « ⴷ ⵜⵉⵛⵛⵓⵔⴽⴰ ⴰⵔⴰ ⴷ-ⵢⴻⵇⵇⵉⵎⴻⵏ ⴷ ⴰⵎⴻⴷⵢⴰ ⵙ ⵓⵙⵙⵓⴳⴳⴻⵜ ⵏ ⵢⵉⵙⴻⵏⴼⴰⵔⴻⵏ ⵏ ⵜⵉⵛⵛⵓⵔⴽⴰ ⴳⴰⵔ ⵢⵉⵎⵙⴻⴼⵜⵉⵢⴻⵏ ⴷ ⵢⵉⵔⴳⴰⵣⴻⵏ ⵏ ⵢⵉⵡⴻⵥⵍⴰ ⵏ ⵙⵏⴰⵜ-ⴰ ⵏ ⵜⵎⵓⵔⴰ ».
« ⵙⵓⴷⴰⵏ ⴷ ⵜⴰⵛⵔⵉⴽⵜ ⵜⴰⵎⴻⵇⵔⴰⵏⵜ ⵉ ⵍⴻⵣⵣⴰⵢⴻⵔ ⴷⴻⴳ ⵓⵎⴰⴹⴰⵍ ⴰⵄⵕⴰⴱ ⵢⴻⵔⵏⴰ ⵜⵉⵛⵛⵓⵔⴽⴰ-ⴰ ⴰⴷ ⵜⴻⵏⵏⴻⵔⵏⵉ ⵍⴰⴷⵖⴰ ⴷⴻⴳ ⵢⵉⵏⵓⵔⴰⵔ ⵏ ⵜⴻⵥⵡⴻⵔⵜ (ⵟⵟⴰⵇⴰ), ⵜⴰⴼⴻⵍⵍⴰⵃⵜ ⴷ ⵜⴻⵎⴳⵓⵔⵉ (ⵚⵚⵉⵏⴰⵄⴰ) », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⵎⴻⵏⵣⵓ ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ ⵎⵉ ⴷ-ⵢⴻⵙⵙⴰⵡⴻⵍ ⴷⴻⴳ ⵓⵏⵎⴰⴳⴻⵔ ⵏ ⵢⵉⵎⴹⴻⴱⴱⵔⴻⵏ ⵏ ⵜⴽⴻⴱⴱⴰⵏⵉⵢⵉⵏ ⵉⴷⵣⴰⵢⵔⵉⵢⴻⵏ ⴷ ⵢⵉⵙⵓⴷⴰⵏⵉⵢⴻⵏ ⴰⵢⴷⴻⴳ ⵢⴻⵃⴷⴻⵕ ⵓⵙⴻⵍⵡⴰⵢ ⴰⵙⵓⴷⴰⵏⵉ ⵧⵎⴰⵔ ⵀⴰⵙⵙⴰⵏ ⴻⵍ ⴱⴻⵛⵀⵉⵔ.
ⵎⴰⵙⵙ ⵙⴻⵍⵍⴰⵍ ⵢⴻⵙⵙⴰⵔⴰⵎ ⴰⴷ ⵢⵉⵏⵉ ⵓⵏⵎⴰⴳⴻⵔ-ⴰ (ⵎⵓⴱⵜⴰⴷⴰ) ⴷ « ⵜⴰⴳⵏⵉⵜ ⵉ ⵓⵙⵏⴻⵔⵏⵉ ⵏ ⵓⵎⵄⴰⵡⴻⵏ ⵖⴻⵔ ⵓⵙⵡⵉⵔ ⵏ ⵡⴰⵙⵙⴰⵖⴻⵏ ⵏ ⵜⴰⵎⵎⵉⴷⵡⴰ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ », ⵢⴻⵔⵏⴰ ⵢⴻⵜⵜⵎⴻⵏⵏⵉ ⴰⴷ ⴷ-ⵢⴰⵡⵉ ⵡⴰⵢⴰ « ⵍⴼⴰⵢⴷⴰ ⵏ ⵜⵉⴷⴻⵜ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵙⴻⵏⴼⴰⵔⴻⵏ ⵏ ⵜⵉⵛⵛⵓⵔⴽⴰ », ⵍⴰⴷⵖⴰ ⴷⴻⴳ ⵢⵉⵏⵓⵔⴰⵔ ⴰⵢⴷⴻⴳ ⵜⵜⵡⴰⵙⵜⴻⵏⵢⴰⵏ ⵢⵉⵎⵜⴰⵡⴰⵢⴻⵏ (ⵉⵜⵜⵉⴼⴰⵇⴰⵜ).
ⵎⴰ ⴷ ⴰⵙⴻⵍⵡⴰⵢ ⴰⵙⵓⴷⴰⵏⵉ ⵢⴻⵏⵏⴰ-ⴷ ⴷ ⴰⴽⴽⴻⵏ ⵉⵎⵙⴻⴼⵜⵉⵢⴻⵏ ⵉⴷⵣⴰⵢⵔⵉⵢⴻⵏ ⴰⵢ ⵢⴻⴱⵖⴰⵏ ⴰⴷ ⵙⵙⴻⴼⵜⵉⵏ ⴷⴻⴳ ⵜⵎⵓⵔⵜ-ⵏⵙⴻⵏ ⴰⴷ ⵜⵀⴻⵍⵍⴰⵏ ⴷⴻⴳ-ⵙⴻⵏ ⴰⴽⴽⴻⵏ ⵉⴳⴻⵔⵔⴻⵣ ⵢⴻⵔⵏⴰ ⴰⴷ ⴰⵙⴻⵏ-ⵙⵙⵉⴼⴻⵙⵙⴻⵏ ⵍⴻⵛⵖⴰⵍ-ⵏⵙⴻⵏ ⴷⴻⴳ ⵢⵉⵏⵓⵔⴰⵔ ⵏ ⵜⴻⴷⴱⴻⵍⵜ ⴷ ⵍⴻⵖⵔⴰⵎⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷ ⴰⴽⴽⴻⵏ ⵙⵓⴷⴰⵏ ⵍⵍⴰⵏⵜ ⴷⴻⴳ-ⵙ ⴰⵟⴰⵙ ⵏ ⵜⴻⴳⵏⴰⵜⵉⵏ ⵉⴳⴻⵔⵔⵣⴻⵏ ⵉ ⵓⵙⵙⴻⴼⵜⵉ ⴷⴻⴳ ⵢⵉⵏⵓⵔⴰⵔ ⵏ ⵜⴼⴻⵍⵍⴰⵃⵜ, ⵍⵎⵉⵏⴰⵜ ⴷ ⵢⵉⵏⵓⵔⴰⵔ ⵏⵉⴹⴻⵏ.
ⴰⵙⴻⵍⵡⴰⵢ ⴻⵍ ⴱⴻⵛⵀⵉⵔ ⵢⴻⵏⵏⴰ-ⴷ ⴷ ⴰⴽⴽⴻⵏ ⵍⴻⵣⵣⴰⵢⴻⵔ ⴷ ⵙⵓⴷⴰⵏ ⵙⵜⴻⵏⵢⴰⵏⵜ ⵢⵉⵡⴻⵏ ⵏ ⵓⵎⵜⴰⵡⴰ ⵉ ⵓⵔⵥⴰⵎ ⵏ ⵢⵉⵣⵉⵔⵉⴳ (ⵅⴰⵟⵟ) ⵏ ⵍⴻⴱⵃⴻⵕ ⴷ ⵢⵉⵣⵉⵔⵉⴳ ⵏ ⵢⵉⴳⴻⵏⵏⵉ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ ⵉ ⵓⵙⵙⵉⴼⵙⴻⵙ ⵏ ⵓⵚⴰⴼⴻⵔ ⵏ ⵢⵉⵎⴹⴻⴱⴱⵔⴻⵏ ⵏ ⵜⴽⴻⴱⴱⴰⵏⵉⵢⵉⵏ ⴷ ⵢⵉⵎⵙⴻⴼⵜⵉⵢⴻⵏ ⴷ ⵓⵎⴱⴰⴷⴷⴻⵍ ⵏ ⵙⵙⴻⵍⵄⴰ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ.
