ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴼⴰⵍⴻⵙⵟⵉⵏ ⵜⴻⵜⵜⵀⴻⵎ ⵉⵙⵕⴰⵢⵉⵍ ⵙ « ⵓⵙⵙⴻⵏⴽⴻⵔ » ⵏ ⵍⵉⵏⵜⵉⴼⴰⴹⴰ ⵜⵉⵙ ⵜⵍⴰⵜⴰ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⵜⴻⵀⵎⴻⵏ ⴰⵙⵙ ⵏ ⵍⴻⵜⵏⵉⵢⴻⵏ ⵢⵉⴷⵓⴱⴰ (ⵙⵙⵓⵍⵓⵟⴰⵜ) ⵉⴼⴰⵍⴻⵙⵟⵉⵏⵉⵢⴻⵏ ⵉⵙⵕⴰⵢⵉⵍ ⵙ ⵓⵙⵎⴻⵏⴷⴻⴳ ⵏ ⵜⵎⴻⵙ ⵉ ⵓⵙⵙⴻⵏⴽⴻⵔ ⵏ ⵍⵉⵏⵜⵉⴼⴰⴹⴰ ⵜⵉⵙ 3, ⵉⵎⵉ ⴰⵢ ⵜⵄⴻⴷⴷⴰⵏ ⵢⵉⵖⴰⵍⵍⴻⵏ ⵉⵙⵕⴰⵢⵍⵉⵢⴻⵏ ⵖⴻⴼ Ɣⴻⵣⵣⴰ ⴷ ⵓⴳⴻⵎⵎⴰⴹ ⵓⵜⵔⵉⵎ ⴷⴻⴳ ⵡⵓⵙⵙⴰⵏ-ⴰ ⵉⵏⴻⴳⴳⵓⵔⴰ. ⴰⵜⵄⴻⴷⴷⵉ-ⴰ ⵡⵜⴻⵏⵜ-ⴷ ⴷⴻⴳ-ⵙ ⵜⵎⵓⵔⴰ ⵏ ⵍⴻⴵⵏⴰⵙ ⵢⴻⵔⵏⴰ ⴳⵔⴻⵏⵜ-ⴷ ⵜⵉⵖⵔⵉ ⵉ ⵓⵀⴻⴷⴷⴻⵏ ⴷ ⵓⴼⴰⴽⵉ ⵏ ⵛⵛⵡⴰⵍ ⴰⵢ ⵢⴻⴳⵍⴰⵏ ⵢⴰⴳⵉ ⵙ ⵡⴰⵟⴰⵙ ⵏ ⵜⵎⴻⴷⴷⵓⵔⵉⵏ ⵜⵉⴼⴰⵍⴻⵙⵟⵉⵏⵉⵢⵉⵏ.

« ⵏⴻⵜⴰⵏⵢⴰⵀⵓ ⵢⴻⴱⵖⴰ ⴰⴷ ⴷ-ⵢⴻⵙⵙⴻⵏⴽⴻⵔ ⵍⵉⵏⵜⵉⴼⴰⴹⴰ ⵜⵉⵙ 3 », ⴷⴻⴼⴼⵉⵔ ⵎⴰ ⵜⴻⵍⵍⴰ-ⴷ ⵜⵏⴻⴽⵔⴰ ⵜⴰⴼⴰⵍⴻⵙⵟⵉⵏⵉⵜ ⵏ 1987 ⴷ ⵜⵉⵏ ⵏ 2000, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⴼⴰⵍⴻⵙⵟⵉⵏⵉ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ, ⵔⵢⴰⴷ ⴰⵍ-ⵎⴰⵍⴽⵉ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷ ⴰⴽⴽⴻⵏ ⵉⵎⴹⴻⴱⴱⴻⵔ-ⴰ « ⵢⴻⴱⵖⴰ ⴰⴷ ⵢⴻⵙⵙⴻⴱⵄⴻⴷ ⵜⴰⵎⵓⵖⵍⵉ ⵏ ⵎⴻⴷⴷⴻⵏ ⵖⴻⴼ ⵡⵓⴳⵓⵔⴻⵏ ⴰⵢ ⵢⴻⵙⵄⴰ ⴷⴻⴳ ⵓⵏⵔⴰⵔ ⴰⵙⴻⵔⵜⵉ ⴷ ⵓⴷⵉⵒⵍⵓⵎⴰⵜⵉ ⴰⵢⴷⴻⴳ ⵓⵔ ⵢⴻⵙⵙⴰⵡⴻⴹ ⴰⴷ ⵢⴻⴳ ⴰⵛⴻⵎⵎⴰ ».

ⴷⵖⴰ, ⴷⴻⴳ ⵜⴻⵎⵙⴰⵍⵜ-ⴰ, ⴰⵍ-ⵎⴰⵍⴽⵉ ⵢⴻⵏⵏⴰ-ⴷ ⴷ ⴰⴽⴽⴻⵏ ⵏⴻⵜⴰⵏⵢⴰⵀⵓ ⵉⴳⴰ « ⵜⵓⵛⵛⴹⴰ ⴷ ⵜⴰⵎⴻⵇⵔⴰⵏⵜ » ⵉⵎⵉ ⴰⵢ ⴷ-ⵢⴻⵙⵙⴻⵏⴽⴻⵔ ⵛⵛⵡⴰⵍ ⵖⴻⴼ ⵓⵎⵕⴰⵃ ⵏ ⵜⵎⴻⵙⴳⵉⴷⴰ ⵏ ⵍⴰⵇⵚⴰ, ⴰⵎⴽⴰⵏ ⵉⵎⵇⴻⴷⴷⴻⵙ ⵡⵉⵙ 3 ⵏ ⵍⵉⵙⵍⴰⵎ. « ⵎⴰⵙⵙ ⵏⴻⵜⴰⵏⵢⴰⵀⵓ ⵢⴻⵙⵙⴻⵎⵖⴻⵔ ⵜⴰⵍⵓⴼⵜ ⵢⴻⵔⵏⴰ ⴰⵙⵙ-ⴰ ⵓⵔ ⴷ-ⵜⴻⵇⵇⵉⵎ ⴰⵔⴰ ⴽⴰⵏ ⴷ ⵜⴰⵍⵓⴼⵜ ⴽⴰⵏ ⵜⴰⵙⴻⵔⵜⵉⵜ ⵢⴻⵔⵣⴰⵏ ⵉⴼⴰⵍⴻⵙⵟⵉⵏⵉⵢⴻⵏ ⴽⴰⵏ, ⵢⴻⵔⵏⴰ ⴷ ⵜⵉⵏ ⴰⵢ ⵉⵣⴻⵎⵔⴻⵏ ⴰⴷ ⵜⴻⴼⵔⵓ ⵙ ⵓⴱⵔⵉⴷ ⴰⵙⴻⵔⵜⵉ, ⵡⴰⵏⴰⴳ ⵢⴻⵔⵔⴰ-ⵜⵜ ⴷ ⵟⵟⵔⴰⴷ ⵓⵔ ⵢⴻⵙⵄⵉⵏ ⵜⴰⴳⴰⵔⴰ ⵢⴻⵔⵏⴰ ⵢⴻⵔⵣⴰ ⵉⵏⵙⴻⵍⵎⴻⵏ ⵏ ⵓⵎⴰⴹⴰⵍ ⴰⴽⴽⴻⵏ ⵎⴰ ⵢⴻⵍⵍⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ ⴷⴻⴳ ⵠⵉⴻⵏⵏⴰ.

ⵉⵎⴹⴻⴱⴱⴻⵔ-ⴰ ⵉⵙⵕⴰⵢⵉⵍⵉ ⴰⴷ ⵢⴻⵃⴱⴻⵙ ⴰⵛⴻⵡⵡⴻⵍ ⵏ ⵜⴻⵎⵙⴰⵍⵜ ⵏ ⵜⵎⴻⵙⴳⵉⴷⴰ ⵏ ⵍⴰⵇⵚⴰ, ⵢⴻⵔⵏⴰ ⴰⴷ ⵢⴻⴵⴵ ⵜⴰⴳⵏⵉⵜ ⴰⴽⴽⴻⵏ ⵜⴻⵍⵍⴰ ⵙ ⵓⵇⴰⴷⴻⵔ ⵏ ⵍⵇⴰⵏⵓⵏ ⴰⴳⵔⴰⵖⵍⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⴼⴰⵍⴻⵙⵟⵉⵏⵉ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ.

ⵍⴻⵎⵎⴻⵔ ⴰⴷ ⴷ-ⵢⴰⵙ ⵙⴻⴳ ⵢⵉⴷⵉⵙ ⵉⵙⵕⴰⵢⵉⵍⵉ ⵢⵉⵣⴻⵏ ⴷ ⴰⴽⴽⴻⵏ ⴱⵖⴰⵏ ⴰⴷ ⵀⴻⴷⴷⵏⴻⵏ ⵜⴰⴳⵏⵉⵜ, ⵓⵍⴰ ⴷ ⵉⴷⵉⵙ ⴰⴼⴰⵍⴻⵙⵟⵉⵏⵉ ⵢⴻⵡⵊⴻⴷ ⵉ ⵡⴰⵢⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵓⵏⴻⵖⵍⴰⴼ. ⵎⴰⵛⴰ, ⵎⴰ ⵓⵔ ⴷ-ⵢⴻⵍⵍⵉ ⴰⵔⴰ ⵡⴰⵢⴰ, « ⵓⵔ ⵏⴻⵣⵎⵉⵔ ⴰⴷ ⵏⴻⴳ ⴰⵛⴻⵎⵎⴰ, ⵎⴰ ⵓⵍⴰⵛ ⴰⴷ ⵏⵓⵖⴰⵍ ⴷ ⵉⵅⴰⴱⵉⵜⴻⵏ ⵖⴻⵔ ⵓⵖⵔⴻⴼ-ⵏⵏⴻⵖ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ.