ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵎⴰⵏ: ⴰⵎⵙⴻⴼⵀⴰⵎ ⴳⴰⵔ ⵢⵉⴷⵉⵙ ⴰⴷⵣⴰⵢⵔⵉ ⴷ ⴳⴻⵍⵙⵙⴻⵏⵡⴰⵙⵙⴻⵔ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴰⴷⵣⴰⵢⵔⵉⵜ ⵏ ⵡⴰⵎⴰⵏ (ⴰⴷⴻ) ⴷ ⵓⴷⵉⵡⴰⵏ ⴰⵖⴻⵍⵏⴰⵡ ⵏ ⵓⵙⵙⵉⵣⴷⴻⴳ (ⵧⵏⴰ) ⵙⵙⴰⵡⴹⴻⵏ ⴰⴷ ⵎⵙⴻⴼⵀⴰⵎⴻⵏ ⵖⴻⴼ ⵓⵎⵜⴰⵡⴰ (ⵉⵜⵜⵉⴼⴰⵇ) ⵏ ⵜⴽⴻⴱⴱⴰⵏⵉⵜ ⵜⴰⵍⵎⴰⵏⵉⵜ ⵏ ⴳⴻⵍⵙⵙⴻⵏⵡⴰⵙⵙⴻⵔ ⴰⴽⴽⴻⵏ ⴰⴷ ⴼⵔⵓⵏ ⵜⴰⵍⵓⴼⵜ ⴰⵢⵖⴻⴼ ⵓⵔ ⵎⵙⴻⴼⵀⴰⵎⴻⵏ ⴰⵔⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵍⴻⵄⵇⴻⴷ ⵏ ⵓⵙⵙⴻⴼⵔⴻⴽ ⴷ ⵓⵙⵙⵉⵣⴷⴻⴳ ⵏ ⵡⴰⵎⴰⵏ ⴷⴻⴳ ⵄⴻⵏⵏⴰⴱⴰ ⴷ ⵟⵟⴰⵔⴻⴼ.

ⵉⴷⵉⵙⴰⵏ ⴰⴷⵣⴰⵢⵔⵉ ⴷ ⵡⴰⵍⵎⴰⵏⵉ ⵙⵜⴻⵏⵢⴰⵏ, ⴰⵙⵙ ⵏ ⵍⴻⵅⵎⵉⵙ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵢⵉⵡⴻⵏ ⵏ ⵓⵏⴻⴳⴳⴰⴼ (ⵒⵔⵓⵟⵓⴽⵓⵍ) ⵏ ⵓⵎⵜⴰⵡⴰ ⴰⵢⴷⴻⴳ « ⵉⴷⵉⵙⴰⵏ-ⴰ ⴰⴷ ⴼⴰⴽⴻⵏ ⴰⵎⵄⴰⵡⴻⵏ-ⵏⵙⴻⵏ ⵡⴰⵔ ⵎⴰ ⵢⴻⵖⵔⴻⵎ ⵓⵍⴰ ⴷ ⵢⵉⵡⴻⵏ ⵏ ⵢⵉⴷⵉⵙ ⵉⴷⵔⵉⵎⴻⵏ ⵉ ⵡⴰⵢⴻⴹ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵎⴽⴻⵍⵍⴻⴼ ⵏ ⵜⴻⵖⵡⴰⵍⵜ ⴷⴻⴳ ⵜⴽⴻⴱⴱⴰⵏⵉⵜ ⵏ ⵜⴷⵣⴰⵢⵔⵉⵜ ⵏ ⵡⴰⵎⴰⵏ.

ⵖⴻⴼ ⵍⴻⵃⵙⴰⴱ ⵏ ⵓⵏⴻⴳⴳⴰⴼ-ⴰ ⵏ ⵓⵎⵜⴰⵡⴰ, ⵜⴰⴽⴻⴱⴱⴰⵏⵉⵜ-ⵏⵏⵉ ⵜⴰⵍⵎⴰⵏⵉⵜ ⴰⴷ ⵜⵙⴻⵎⵎⴻⵃ ⴷⴻⴳ ⴹⴹⵎⴰⵏⴰ-ⵏⵏⵉ ⵏ ⵓⴼⴰⴽⵉ ⵏ ⵓⵅⴻⴷⴷⵉⵎ (ⴰⵎⴻⵍⵢⵓⵏ ⵏ ⵡⵓⵕⵓⵜⴻⵏ) ⴷ ⵢⵉⴷⵔⵉⵎⴻⵏ ⴰⵢ ⵜⴻⵜⵜⴰⵍⴰⵙ ⴷⴻⴳ ⵍⴻⵅⵍⴰⵚ-ⵏⵏⴻⵙ (4,5 ⵏ ⵢⵉⵎⴻⵍⵢⵓⵏⴻⵏ ⵏ ⵡⵓⵕⵓⵜⴻⵏ) ⴷⴻⴳ ⵢⵉⵅⴻⴷⴷⵉⵎⴻⵏ-ⵏⵏⵉ ⴷ ⵙⵙⵔⴰⴱⴻⵙ ⴰⵢ ⵜⴳⴰ.

ⵙⴻⴳ ⵢⵉⴷⵉⵙ-ⵏⵏⴻⵙ, ⵉⴷⵉⵙ ⴰⴷⵣⴰⵢⵔⵉ ⵢⴻⵙⵙⵓⵜⴻⵔ ⵙⴻⴳ ⵜⴽⴻⴱⴱⴰⵏⵉⵜ-ⵏⵏⵉ ⵜⴰⵍⵎⴰⵏⵉⵜ ⴰⴷ ⴰⵙ-ⴷ-ⵜⴻⵖⵔⴻⵎ 4,5 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ.

ⵎⴰ ⴷ ⴹⴹⵎⴰⵏⴰ-ⵏⵏⵉ ⵏ ⵓⴼⴰⴽⵉ ⵏ ⵓⵅⴻⴷⴷⵉⵎ, ⵉⴷⵉⵙ ⴰⴷⵣⴰⵢⵔⵉ ⵢⴻⵏⵏⴰ-ⴷ ⴷ ⴰⴽⴽⴻⵏ ⵢⴻⴼⴽⴰ-ⴰⵙ-ⵜⵜ ⵛⵛⵕⴻⵄ ⵢⴻⵔⵏⴰ ⵓⵔ ⴷ-ⵢⴻⴳⴳⵔⵉ ⴰⵔⴰ ⵡⴰⵡⴰⵍ ⵖⴻⴼ ⵡⴰⵏⴻⵛⵜ-ⴰ.

« ⴷⴻⴼⴼⵉⵔ ⵍⴻⵎⵛⴰⵡⵕⴰⵜ ⴷ ⵜⵉⵖⴻⵣⴼⴰⵏⵉⵏ, ⵢⴻⵍⵍⴰ-ⴷ ⵓⵎⵙⴻⴼⵀⴰⵎ ⴰⴽⴽⴻⵏ ⴳⴻⵍⵙⵙⴻⵏⵡⴰⵙⵙⴻⵔ ⴰⴷ ⵜⵙⴻⵎⵎⴻⵃ ⴰⵎⴰ ⴷⴻⴳ ⴹⴹⵎⴰⵏⴰ-ⵏⵏⵉ, ⴰⵎⴰ ⴷⴻⴳ ⵍⴻⵅⵍⴰⵚ-ⵏⵏⴻⵙ. ⵙⴻⴳ ⵢⵉⴷⵉⵙ ⵏⵉⴹⴻⵏ, ⵉⴷⵉⵙ ⴰⴷⵣⴰⵢⵔⵉ ⴰⴷ ⵉⵙⴻⵎⵎⴻⵃ ⴷⴻⴳ ⵓⵙⵙⵓⵜⴻⵔ-ⵏⵏⵉ ⵏ ⵓⵖⵔⴰⵎ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴷⵣⴰⵢⵔⵉⵜ ⵏ ⵡⴰⵎⴰⵏ.