ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵎⴻⵜⵜⵀⵓⵎ ⴰⵎⴻⵇⵔⴰⵏ ⵏ ⵜⵅⴰⵣⵣⴰⴱⵉⵜ ⵏ 2007 ⴰⴷ ⵉⵄⴻⴷⴷⵉ ⴷⴻⴳ ⵛⵛⵕⴻⵄ ⴷⴻⴳ ⵏⵡⴻⵎⴱⴻⵕ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴼⴰⵜⴻⵀ ⴱⵧⵓⴷⴻⵔⴱⴰⵍⴰ, ⴰⵎⴻⵜⵜⵀⵓⵎ ⴰⵎⴻⵇⵔⴰⵏ ⵏ ⵜⵅⴰⵣⵣⴰⴱⵉⵢⵉⵏ ⵏ 2007 ⴰⵢ ⵉⵃⵓⵣⴰⵏ ⵍⴻⵇⵚⴻⵔ ⵏ ⵓⵏⴰⴱⴰⴹ (ⵃⵓⴽⵓⵎⴰ) ⴷ ⵡⴰⵎⵎⴰⵙ ⵏ ⵜⴻⵎⵙⵓⵍⵜⴰ ⵏ ⴱⴰⴱ ⵣⵣⴻⵡⵡⴰⵕ, ⴰⴷ ⵉⵄⴻⴷⴷⵉ ⴷⴻⴳ ⵛⵛⵕⴻⵄ ⴰⵙⵙ ⵏ 16 ⵏⵡⴻⵎⴱⴻⵕ ⴷⴻⴳ ⵓⵅⵅⴰⵎ ⵏ ⵛⵛⵕⴻⵄ ⵏ ⵜⴻⵊⵔⵉⵎⵜ ⵏ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⴽⵛⴻⴼ ⵡⵓⵎⵓⵖ ⵏ ⵛⵛⵕⵓⵄⴰⵜ ⵏ ⵜⴻⵊⵔⵉⵎⵉⵏ ⵏ 2015.

Ɣⴻⴼ ⵍⴻⵃⵙⴰⴱ ⵏ ⵍⴰⵎⴻⵕ ⵏ ⵓⵡⴻⵅⵅⴻⵔ ⵏ ⵛⵛⵕⴻⵄ, ⴰⵎⴻⵜⵜⵀⵓⵎ-ⴰ ⴰⵢ ⵢⴻⵔⵔⴰⵏ ⵉⵎⴰⵏ-ⵏⵏⴻⵙ ⴷ « ⵍⴰⵎⵉⵔ » ⵏ ⵜⵓⴷⴷⵙⴰ ⵜⴰⵔⴻⴱⵔⴰⴱⵜ ⵏ « ⵍⵇⴰⵄⵉⴷⴰ ⴷⴻⴳ ⵍⵎⴻⵖⵔⴻⴱ ⵉⵙⵍⴰⵎⴰⵏ » ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵢⴻⵙⵜⴻⵄⵕⴻⴼ ⴷ ⴰⴽⴽⴻⵏ ⵢⴻⴹⴼⴻⵔ ⵙ ⵓⵙⴰⵡⴰⵍ ⵉⵔⴻⴱⵔⴰⴱⴻⵏ-ⵏⵏⵉ ⴰⵢ ⵉⵏⴻⵀⵕⴻⵏ ⵜⵉⴽⴻⵕⵕⵓⵙⵉⵏ ⵢⴻⵏⴷⵉⵏ ⴰⵔⵎⵉ ⴰⵢ ⵡⵡⴹⴻⵏ ⵖⴻⵔ ⵢⵉⵎⵓⴽⴰⵏ ⴰⵢⴷⴻⴳ ⵙⵟⴻⵔⴹⵇⴻⵏ ⵉⵎⴰⵏ-ⵏⵙⴻⵏ (ⵍⴻⵇⵚⴻⵔ ⵏ ⵓⵏⴰⴱⴰⴹ ⴷ ⵡⴰⵎⵎⴰⵙ ⵏ ⵜⴻⵎⵙⵓⵍⵜⴰ ⵏ ⴱⴰⴱ ⵣⵣⴻⵡⵡⴰⵕ), ⵢⴻⵔⵏⴰ ⴷ ⵏⴻⵜⵜⴰ ⴰⵢ ⴰⵙⴻⵏ-ⵢⴻⴼⴽⴰⵏ ⵍⴰⵎⴻⵕ ⴰⴷ ⵙⵟⴻⵔⴹⵇⴻⵏ ⵍⴱⵓⵎⴱⴰⵜ-ⵏⵙⴻⵏ.

ⵜⴰⵅⴰⵣⵣⴰⴱⵉⵜ ⵏ ⵍⴻⵇⵚⴻⵔ ⵏ ⵓⵏⴰⴱⴰⴹ ⵜⴻⵏⵖⴰ 20 ⵏ ⵢⵉⵎⴷⴰⵏⴻⵏ ⵢⴻⵔⵏⴰ ⵜⴻⵊⵔⴻⵃ 222 ⵏⵉⴹⴻⵏ, ⵎⴰ ⴷ ⵜⵉⵏ ⵏ ⴱⴰⴱ ⵣⵣⴻⵡⵡⴰⵕ ⵜⴻⵏⵖⴰ 11 ⵏ ⵢⵉⵎⴷⴰⵏⴻⵏ ⵢⴻⵔⵏⴰ ⵜⴻⵊⵔⴻⵃ ⴰⵣⴰⵍ ⵏ 100 ⵏⵉⴹⴻⵏ.

ⵉⵎⴻⵥⵍⴰ (ⵎⴰⵚⴰⵍⵉⵃ) ⵏ ⵜⵖⴻⵍⵍⵉⵙⵜ ⵙⵙⴰⵡⴹⴻⵏ, ⵙ ⵢⵉⵙⴰⵍⴰⵏ ⴰⵢ ⴰⵙⴻⵏ-ⴷ-ⵢⴻⴼⴽⴰ ⵓⵎⴻⵜⵜⵀⵓⵎ, ⴰⴷ ⴰⵡⴹⴻⵏ ⴰⵔⵎⵉ ⴷ ⵉⵎⵓⴽⴰⵏ ⴰⵏⴷⴰ ⴰⵢ ⵍⵍⴰⵏ ⵜⵜⴻⴼⴼⵔⴻⵏ ⵢⵉⵔⴻⴱⵔⴰⴱⴻⵏ-ⵏⵏⵉ ⵢⴻⵔⵏⴰ ⵓⴼⴰⵏ-ⴷ ⴷⵉⵏ ⵉⴼⴻⵅⵙⴰⵢⴻⵏ (ⵎⵓⵜⴰⴼⴰⴵⴵⵉⵔⴰⵜ) ⴷ ⴽⵔⴰ ⵏ ⵍⴻⵙⵍⴰⵃⴰⵜ ⵉⴼⴻⵙⵙⴰⵙⴻⵏ.

ⴷⴻⴳ ⵓⵎⴽⴰⵏ ⴰⵎⴻⵣⵡⴰⵔⵓ ⵏ ⵜⵓⴼⴼⵔⴰ ⴰⵢ ⴷ-ⵢⴻⵣⴳⴰⵏ ⴷⴻⴳ ⵓⵖⴰⵔⴰⵎ (ⵃⴰⵢⵢ) ⵏ ⴷⵊⴰⴰⴼⵔⵉ ⴷⴻⴳ ⵔⵔⵖⴰⵢⴰ (ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ), ⵓⴼⴰⵏ-ⴷ ⵢⵉⵎⵙⵓⵍⵜⴰ 92 ⵏ ⵢⵉⴽⵉⵍⵓⴳⵕⴰⵎⴻⵏ ⵏ ⵢⵉⴼⴻⵅⵙⴰⵢⴻⵏ, ⵎⴰ ⴷⴻⴳ ⵓⵎⴽⴰⵏ ⵡⵉⵙ ⵙⵉⵏ ⴰⵢ ⴷ-ⵢⴻⵣⴳⴰⵏ ⴷⴻⴳ ⴱⵏⵉ ⴷⴰⵡⴻⴷ, ⴷⴻⴳ ⴱⵓⵎⴻⵔⴷⴰⵙ, ⵓⴼⴰⵏ-ⴷ ⵉⵎⵣⴻⵍⵍⵉ ⵏ ⵜⵎⴻⵥⴷⵉⵢⵉⵏ, ⵙⵉⵏ ⵏ ⵢⵉⵇⵔⴰⴱⴻⵏ ⵢⴻⵞⵞⵓⵕⴻⵏ ⴷ ⵉⴼⴻⵅⵙⴰⵢⴻⵏ, 3 ⵏ ⵍⴱⵓⵎⴱⴰⵜ ⵢⴻⵜⵜⵡⴰⵅⴻⴷⵎⴻⵏ ⵙ ⵓⴼⵓⵙ ⴷ 21 ⵏ ⵢⵉⵙⵟⴻⵔⴹⴰⵇⴻⵏ.