ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵎⴰⵔⴰⵟⵓⵏ ⴰⴳⵔⴰⵖⵍⴰⵏ ⵏ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ: 3000 ⵏ ⵢⵉⵎⵜⵜⴻⴽⴽⵉⵢⴻⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⴰⵣⴰⵍ ⵏ 3000 ⵏ ⵢⵉⵏⴰⴷⴷⴰⵍⴻⵏ, ⴳⴰⵔ-ⴰⵙⴻⵏ 40 ⵏ ⵢⵉⴱⴻⵕⵕⴰⵏⵉⵢⴻⵏ, ⴰⴷ ⵢⴻⵜⵜⴻⴽⴽⵉⵏ ⴷⴻⴳ ⵜⴻⵥⵔⵉⴳⵜ (ⵟⴰⴱⵄⴰ) ⵜⵉⵙ ⵙⵏⴰⵜ ⵏ ⵓⵎⴰⵔⴰⵟⵓⵏ ⴰⴳⵔⴰⵖⵍⴰⵏ ⵏ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ⴰⴷ ⴷ-ⵢⵉⵍⵉⵏ ⴰⵙⵙ ⵏ ⵍⵊⴻⵎⵄⴰ 27 ⵏⵡⴻⵎⴱⴻⵕ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⴰⵙⵙ ⵏ ⵍⵃⴻⴷⴷ ⵜⴼⵉⴷⵉⵕⴰⵍⵉⵜ ⵜⴰⴷⵣⴰⵢⵔⵉⵜ ⵏ ⵜⴰⵜⵍⵉⵜⵉⵜ, ⵜⵉⵎⵙⵓⴷⴷⴻⵙⵜ (ⵎⵓⵏⴰⴹⴹⵉⵎⴰ) ⵏ ⵜⴻⴷⵢⴰⵏⵜ-ⴰ ⵙ ⵓⵎⵄⴰⵡⴻⵏ ⴷ ⵓⵖⵍⵉⴼ ⵏ ⵢⵉⵍⴻⵎⵥⵉⵢⴻⵏ ⴷ ⵡⴰⴷⴷⴰⵍ.

« ⵜⵉⵎⵚⵓⴽⵉⵡⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⴼⵉⴷⵉⵕⴰⵍⵉⵜ ⵍⴰ ⵅⴻⴷⴷⵎⴻⵏⵜ ⴰⴽⴽⴻⵏ ⴰⴷ ⴷ-ⵙⵡⴻⵊⴷⴻⵏⵜ ⵜⵜⴰⵡⵉⵍ ⴰⴷ ⵢⴻⴵⴵⴻⵏ ⵜⵉⵎⵙⵉⵣⵣⴻⵍⵜ-ⴰ ⵏ 2015 ⴰⴷ ⴷ-ⵜⵉⵍⵉ ⴷⴻⴳ ⵜⴻⴳⵏⵉⵜ ⵉⴳⴻⵔⵔⵣⴻⵏ ⴰⴽⴽ, ⵢⴻⵔⵏⴰ ⵜⴻⵙⵙⴰⵔⴰⵎ ⴰⴷ ⵜⴻⵜⵜⵡⴰⵎⵎⴻⵕⴽⵉ, ⴷⴻⴳ ⵢⵉⵙⴻⴳⴳⴰⵙⴻⵏ ⴰⵢ ⴷ-ⵢⴻⵜⵜⴻⴷⴷⵓⵏ, ⴷⴻⴳ ⵡⴰⵀⵉⵍ ⵏ ⵜⴽⵓⵏⴼⵉⴷⵉⵕⴰⵍⵉⵜ ⵜⴰⴼⵔⵉⵇⵉⵜ ⴷ ⵜⴼⵉⴷⵉⵕⴰⵍⵉⵜ ⵜⴰⴳⵔⴰⵖⵍⴰⵏⵜ ⵏ ⵜⴰⵜⵍⵉⵜⵉⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵙⴻⵍⵡⴰⵢ ⵏ ⵜⴼⵉⴷⵉⵕⴰⵍⵉⵜ ⵜⴰⴷⵣⴰⵢⵔⵉⵜ ⵏ ⵜⴰⵜⵍⵉⵜⵉⵜ, ⴰⵎⴰⵔ ⴱⵧⵓⵔⴰⵙ ⴷⴻⴳ ⵢⵉⵡⴻⵏ ⵏ ⵓⵙⴰⵔⴰⴳ ⵏ ⵜⵖⴻⵎⵙⴰ ⴰⵢ ⵉⴳⴰ ⴷⴻⴳ ⵓⵅⵅⴰⵎ ⵏ ⵓⵙⴻⵇⵇⴰⵎⵓ ⵓⵍⵉⵎⵒⵉ ⴷ ⵓⵏⴰⴷⴷⴰⵍ ⴰⴷⵣⴰⵢⵔⵉ.

ⵙⵙⴻⴼⵔⴰⵏ, ⵏⴰⵇⴰⵍ, ⴰⴷ ⴳⴻⵏ ⴰⵎⴰⵔⴰⵟⵓⵏ-ⴰ ⴷⴻⴳ 1ⵓ ⵏ ⵏⵡⴻⵎⴱⴻⵕ, ⵎⴰⵛⴰ ⵢⴻⵜⵜⵡⴰⵡⴻⵅⵅⴻⵔ ⵖⴻⴼ ⵍⴵⴰⵍ ⵏ ⵓⵙⴼⵓⴳⴻⵍ (ⵉⵃⵜⵉⴼⴰⵍ) ⵏ ⵜⵎⴻⵖⵔⴰ ⵏ ⴱⴻⴷⴷⵓ ⵏ ⵜⴻⴳⵔⴰⵡⵍⴰ ⵜⴰⴷⵣⴰⵢⵔⵉⵜ.

« ⴰⴷ ⵏⴻⵅⴷⴻⵎ ⴰⴽⴽⴻⵏ ⴰⴷ ⵢⵓⵖⴰⵍ ⵓⵎⴰⵔⴰⵟⵓⵏ ⴰⴳⵔⴰⵖⵍⴰⵏ ⵏ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ⴰⴷ ⴷ-ⵢⴻⵜⵜⵉⵍⵉ ⴷⴻⴳ 1ⵓⵜ ⵏ ⵏⵡⴻⵎⴱⴻⵕ ⵏ ⵢⴰⵍ ⴰⵙⴻⴳⴳⴰⵙ ⴰⴽⴽⴻⵏ ⴰⴷ ⵢⴻⵙⵄⵓ ⵚⵚⵉⴼⴰ ⵜⴰⴷⵓⵎⴰⵏⵜ ⴷ ⵡⴰⵣⴰⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴱⵧⵓⵔⴰⵙ.

ⵜⵉⵎⵙⵉⵣⵣⴻⵍⵜ-ⴰ ⴰⴷ ⵜⴻⵙⵄⵓ 42,195 ⵏ ⵢⵉⴽⵉⵍⵓⵎⵉⵜⵔⴻⵏ ⴷⴻⴳ ⵜⴻⵖⵣⴻⴼ ⵢⴻⵔⵏⴰ ⴰⵎⴻⵛⵛⴰⵇ-ⴰ ⵢⴻⵙⵙⴻⴼⵇⴻⴷ-ⵉⵜ ⵢⵉⵡⴻⵏ ⵏ ⵓⵎⴰⵣⵣⴰⵢ (ⵅⴰⴱⵉⵔ) ⵙⴻⴳ ⵜⴼⵉⴷⵉⵕⴰⵍⵉⵜ ⵜⴰⴳⵔⴰⵖⵍⴰⵏⵜ ⵏ ⵜⴰⵜⵍⵉⵜⵉⵜ. ⴰⵎⴰⵔⴰⵟⵓⵏ ⵏ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ ⴰⴷ ⵢⴻⴱⴷⵓ ⵖⴻⴼ 7ⵙ30 ⵏ ⵜⵚⴻⴱⵃⵉⵜ ⵙⴻⴳ ⵓⵅⵅⴰⵎ ⵏ ⵓⴳⵔⴰⵡ ⴰⵖⴻⵔⴼⴰⵏ ⴰⵖⴻⵍⵏⴰⵡ.