ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⴱⵔⵉⴷ ⴰⵎⴰⵣⵣⴰⵍ ⴰⴳⴰⴼⴰ-ⴰⵏⵥⵓⵍ: ⵢⴻⴱⴷⴰ ⵍⴻⴱⵏⵉ ⵏ 520 ⵏ ⵢⵉⴽⵉⵍⵓⵎⵉⵜⵔⴻⵏ
ⵄⴻⵏⵏⴰⴱⴰ – ⴰⴱⵔⵉⴷ ⴰⵎⴰⵣⵣⴰⵍ ⴰⴳⴰⴼⴰ-ⴰⵏⵥⵓⵍ (ⵛⴰⵎⴰⵍ-ⴵⴰⵏⵓⴱ) ⴰⴷ ⵢⴻⵇⵇⵏⴻⵏ ⵍⴻⴱⵍⵉⴷⴰ ⵖⴻⵔ ⵍⴻⵎⵏⵉⵄⴰ (ⵜⴰⵖⴻⵔⴷⴰⵢⵜ) ⴷ ⵡⵉⵏ ⴰⴷ ⵢⴻⵙⵄⵓⵏ 520 ⵏ ⵢⵉⴽⵉⵍⵓⵎⵉⵜⵔⴻⵏ ⴳⴰⵔ ⵜⵖⵉⵡⴰⵏⵜ ⵏ ⵛⴻⴼⴼⴰ ⴷ ⵜⴻⵎⴷⵉⵏⵜ ⵏ ⵜⵖⴻⵔⴷⴰⵢⵜ, ⵢⴻⵔⵏⴰ ⵢⴻⴱⴷⴰ ⵙ ⵍⴻⴱⵏⵉ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴰⵙⵙ ⵏ ⵍⵃⴻⴷⴷ ⴷⴻⴳ ⵄⴻⵏⵏⴰⴱⴰ ⵓⵏⴻⵖⵍⴰⴼ ⵏ ⵢⵉⵎⴰⵀⵉⵍⴻⵏ ⵉⵏⴰⴳⴷⵓⴷⴻⵏ, ⴰⴱⴷⴻⵍⴽⴰⴷⴻⵔ ⵧⵓⴰⵍⵉ.
ⴰⵃⵔⵉⵛ ⴰⵢ ⴷ-ⵢⴻⵇⵇⵉⵎⴻⵏ ⵙⴻⴳ ⵓⵙⴻⵏⴼⴰⵔ-ⴰ, 300 ⵏ ⵢⵉⴽⵉⵍⵓⵎⵉⵜⵔⴻⵏ ⴳⴰⵔ ⵜⵖⴻⵔⴷⴰⵢⵜ ⴷ ⵍⴻⵎⵏⵉⵄⴰ, ⴰⴷ ⴷ-ⵢⴻⴱⴷⵓ ⵍⴻⴱⵏⵉ-ⵏⵏⴻⵙ ⵙⴻⴳ-ⴰ ⵖⴻⵔ ⵙⴷⴰⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⵓⵏⴻⵖⵍⴰⴼ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷ ⴰⴽⴽⴻⵏ ⵉⵎⴰⵀⵉⵍⴻⵏ ⵏ ⵍⴻⴱⵏⵉ ⵍⴰ ⴷ-ⵜⵜⵉⵍⵉⵏ ⵙ ⵓⵇⴰⴷⴻⵔ ⵏ ⵢⵉⵍⵓⴳⴰⵏ ⵉⴳⵔⴰⵖⵍⴰⵏⴻⵏ.
ⵉⵅⴻⴱⴱⴻⵔ-ⴷ ⴷⴰⵖ ⵎⴰⵙⵙ ⵧⵓⴰⵍⵉ, ⴷⴻⴳ ⵢⵉⵡⴻⵏ ⵏ ⵓⵎⵢⴰⴳⴻⵔ ⴷ ⵜⵖⴻⵎⵙⴰ, ⴷ ⴰⴽⴽⴻⵏ ⴰⵀⵉⵍ ⵏ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⵏ ⵍⴱⴻⵏⵢⴰⵏⴰⵜ ⵏ ⵍⵍⵙⴰⵙ ⴷⴻⴳ ⵜⵎⵓⵔⵜ ⵜⵜⴻⴽⴽⴰⵏⵜ ⴷⴻⴳ-ⵙ 3400 ⵏ ⵜⴽⴻⴱⴱⴰⵏⵉⵢⵉⵏ. ⵍⴱⴻⵏⵢⴰⵏⴰⵜ-ⴰ ⵏ ⵍⵍⵙⴰⵙ ⵢⴻⵇⵇⵏⴻⵏ ⵖⴻⵔ ⵢⵉⴱⵔⵉⴷⴻⵏ ⵙⵄⴰⵏ ⵍⴼⴰⵢⴷⴰ ⵖⴻⴼ ⵜⵎⴻⵜⵜⵉ, ⵢⴻⵔⵏⴰ ⵜⵜⴻⴽⴽⴰⵢⴻⵏ ⵎⵍⵉⵃ ⴷⴻⴳ ⵓⵙⵙⴻⴵⵀⴻⴷ ⵏ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ.
ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷ ⴰⴽⴽⴻⵏ ⵜⴻⵜⵜⵡⴰⵙⵙⴻⴱⴷⴻⴷ-ⴷ ⵢⵉⵡⴻⵜ ⵏ ⵜⴻⴳⵔⴰⵡⵜ ⵏ ⵓⵎⴰⵀⵉⵍ ⵉ ⵓⴹⴼⴰⵔ ⴷ ⵓⵙⵙⴻⴼⵇⴻⴷ ⵏ ⵢⵉⵙⴻⵏⴼⴰⵔⴻⵏ, ⵍⴰⴷⵖⴰ ⵡⵉⴷ ⵢⴻⵔⵣⴰⵏ ⵍⴻⴱⵏⵉ ⵏ ⵢⵉⴱⵔⵉⴷⴻⵏ ⵉⵏⴻⴽⵛⴰⵎⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵙⵎⴻⴽⵜⵉ ⴷ ⴰⴽⴽⴻⵏ ⴰⴷ ⴷ-ⵢⵉⵍⵉ ⵓⴱⴻⴷⴷⴻⵍ ⴷⴻⴳ ⵓⵙⵙⴻⴷⴷⵓ ⵏ ⵢⵉⵙⴻⵏⴼⴰⵔⴻⵏ ⴰⴽⴽⴻⵏ ⵓⵔ ⴷ-ⵜⵜⵉⵍⵉⵏ ⴷⴻⴳ-ⵙⴻⵏ ⵡⵓⴳⵓⵔⴻⵏ.
ⵉⵡⴻⴽⴽⴻⴷ-ⴷ ⴷⴰⵖ ⵎⴰⵙⵙ ⵧⵓⴰⵍⵉ ⵖⴻⴼ « ⵡⴰⵣⴰⵍ ⴰⵎⴻⵇⵔⴰⵏ » ⵏ ⵓⵔⴻⵇⵇⴻⵄ ⵏ ⵓⵥⴻⴹⴹⴰ ⴰⵖⴻⵍⵏⴰⵡ ⵏ ⵢⵉⴱⵔⵉⴷⴻⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷ ⴰⴽⴽⴻⵏ ⴰⵔⴻⵇⵇⴻⵄ-ⵏⵙⴻⵏ ⵓⵔ ⴷ-ⵢⴻⵜⵜⵉⵍⵉ ⴰⵔⴰ ⵙⴻⴳ-ⴰ ⵖⴻⵔ ⴷⴰ ⴽⴰⵏ, ⵡⴰⵏⴰⴳ ⴰⴷ ⵢⵓⵖⴰⵍ ⵡⴰⵢⴰ ⵢⴻⵜⵜⵉⵍⵉ-ⴷ ⴷⵉⵎⴰ.
