ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⵙⴻⵜⵔⴻⵔ ⵏ ⵜⴻⴷⴱⴻⵍⵜ ⵓⵔ ⵢⴻⵙⵡⴰⵖⴰⵢ ⴰⵔⴰ ⵉⵎⵓⴽⴰⵏ ⵏ ⵓⵅⴻⴷⴷⵉⵎ

ⵜⵍⴻⵎⵙⴰⵏ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⴷⴰⵅⴻⵍ, ⵏⵧⵓⵔⴻⴷⵉⵏⴻ ⴱⴻⴷⵧⵓⵉ, ⴰⵙⵙ ⵏ ⵍⴻⵅⵎⵉⵙ ⴷⴻⴳ ⵜⵍⴻⵎⵙⴰⵏ, ⴷ ⴰⴽⴽⴻⵏ ⴰⵙⵙⴻⵜⵔⴻⵔ (ⵄⴰⵚⵔⴰⵏⴰ) ⵏ ⵜⴻⴷⴱⴻⵍⵜ ⵜⴰⴷⵣⴰⵢⵔⵉⵜ ⵓⵔ ⵢⴻⵙⵡⴰⵖⴰⵢ ⴰⵔⴰ ⵉⵎⵓⴽⴰⵏ ⵏ ⵓⵅⴻⴷⴷⵉⵎ ⴷⴻⴳ ⵜⴻⴷⴱⴻⵍⵜ.

« ⴰⵙⵙⴻⵜⵔⴻⵔ ⵏ ⵜⴻⴷⴱⴻⵍⵜ ⵜⴰⴷⵣⴰⵢⵔⵉⵜ ⵓⵔ ⵢⴻⵜⵜⵉⵍⵉ ⴰⵔⴰ ⴷ ⵜⵓⴳⴳⵣⴰ (ⵜⴰⵀⴷⵉⴷ) ⵉ ⵢⵉⵎⵓⴽⴰⵏ ⵏ ⵓⵅⴻⴷⴷⵉⵎ ⴷⴻⴳ ⵜⵎⴰⵣⴷⴰⵢⵉⵏ ⵜⵉⴷⵉⴳⴰⵏⵉⵏ (ⴵⴰⵎⴰⵄⴰⵜ ⵎⴰⵃⴰⵍⵍⵉⵢⵢⴰ). ⴰⵏⴰⴱⴰⴹ ⵍⴰ ⵉⵅⴻⴷⴷⴻⵎ ⴰⴽⴽⴻⵏ ⴰⴷ ⵢⴻⵙⵙⴻⴵⵀⴻⴷ ⵉⵖⴰⵡⴰⵙⴻⵏ ⵏ ⵜⴷⴰⵎⵙⴰ ⴷ ⵓⵙⵙⴻⴼⵜⵉ ⴰⴽⴽⴻⵏ ⴰⴷ ⴷ-ⵢⴻⵙⵏⵓⵍⴼⵓ ⵉⵎⵓⴽⴰⵏ ⵉⵎⴰⵢⵏⵓⵜⴻⵏ ⵏ ⵓⵅⴻⴷⴷⵉⵎ ⵢⴻⵔⵏⴰ ⴰⴷ ⵜⴻⵏ-ⵢⴻⵃⵔⴻⵣ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵓⵏⴻⵖⵍⴰⴼ ⵎⵉ ⵢⴻⵔⵥⴻⵎ ⴰⵅⵅⴰⵎ ⴰⵎⴰⵢⵏⵓ ⵏ ⵜⵖⵉⵡⴰⵏⵜ ⵏ ⵏⴻⴷⵕⵓⵎⴰ ⴷⴻⴳ ⵜⴻⵔⵣⵉ-ⵏⵏⴻⵙ ⵏ ⵓⵅⴻⴷⴷⵉⵎ ⵖⴻⴼ ⵜⵡⵉⵍⴰⵢⵜ ⵏ ⵜⵍⴻⵎⵙⴰⵏ.

« ⴰⵙⵎⵉ ⴰⴷ ⵉⴼⴰⴽ ⵓⵙⵙⴻⵜⵔⴻⵔ ⵏ ⵜⴻⴷⴱⴻⵍⵜ ⵜⴰⴷⵉⴳⴰⵏⵜ, ⵉⵅⴻⴷⴷⴰⵎⴻⵏ ⵏ ⵣⵣⵢⴰⴷⴰ ⴰⴷ ⵜⵜⵡⴰⵇⵇⵏⴻⵏ ⵖⴻⵔ ⵢⵉⵎⴻⵥⵍⴰ (ⵎⴰⵚⴰⵍⵉⵃ) ⵏⵉⴹⴻⵏ ⵏ ⵜⵎⴰⵣⴷⴰⵢⵉⵏ ⵜⵉⴷⵉⴳⴰⵏⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵙ ⵡⴰⵢⴰ, ⵢⴻⵏⴽⴻⵕ ⵓⵏⴻⵖⵍⴰⴼ ⴷⴷⵉⵄⴰⵢⴰⵜ-ⵏⵏⵉ ⴰⵢ ⴷ-ⵢⴻⵏⵏⴰⵏ ⴷ ⴰⴽⴽⴻⵏ ⵉⵅⴻⴷⴷⴰⵎⴻⵏ ⵏ ⵜⴻⴷⴱⴻⵍⵜ ⴰⴷ ⵙⵕⵓⵃⴻⵏ ⴰⵅⴻⴷⴷⵉⵎ-ⵏⵙⴻⵏ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⵉⵙⵡⵉ ⵏ ⴷⴷⵉⵄⴰⵢⴰⵜ-ⴰ ⵏⴻⵜⵜⴰⴷ « ⴷ ⴰⵛⴻⵡⵡⴻⵍ ⵏ ⵓⵔⴽⴰⴷ ⵏ ⵜⵎⵓⵔⵜ », ⵢⴻⵔⵏⴰ « ⵜⴰⵙⵡⵉⵄⵜ-ⴰ ⵜⴰⵡⴻⵄⵕⴰⵏⵜ ⴰⵢⵖⴻⴼ ⵍⴰ ⵜⴻⵜⵜⴻⴽⴽ ⵜⵎⵓⵔⵜ ⵜⴻⵃⵡⴰⴵ ⵓⴳⴰⵔ ⵏ ⵡⵓⵙⵙⵉⵙⴻⵏ (ⵎⴰⴵⵓⴷⴰⵜ) ⴷⴻⴳ ⵡⴰⴽⴽ ⵉⵃⵔⵉⵛⴻⵏ, ⴰⵎⵄⴰⵡⴻⵏ ⴳⴰⵔ ⵢⵉⵖⴰⵍⵍⴻⵏ ⴷ ⵜⴻⵎⵙⴻⵜⵍⴻⵍⵜ (ⵜⴰⴹⴰⵎⵓⵏ) ⵉ ⵓⵃⵓⴷⴷⵓ ⵏ ⵜⵎⵓⵔⵜ ⴷ ⵡⴰⵢⴻⵏ ⴷ-ⵜⴻⵔⴱⴻⵃ ».

ⵢⴻⵔⵣⴰ ⵎⴰⵙⵙ ⴱⴻⴷⵧⵓⵉ ⵖⴻⴼ ⵢⵉⵎⴻⵥⵍⴰ ⵢⴻⵎⴳⴻⵔⵔⴰⴷⴻⵏ ⵏ ⵜⵖⵉⵡⴰⵏⵜ-ⵏⵏⵉ, ⵢⴻⵔⵏⴰ ⵙⴼⴻⵀⵎⴻⵏ-ⴰⵙ-ⴷ ⴷⵉⵏ ⵉⵅⴻⴷⴷⵉⵎⴻⵏ ⵏ ⵓⵙⵙⴻⵡⵊⴻⴷ ⴰⴽⴽⴻⵏ ⴰⴷ ⵓⵖⴰⵍⴻⵏ ⴰⴷ ⴷ-ⵙⵙⵓⴼⴼⵓⵖⴻⵏ ⵜⵉⴽⴰⵔⴹⵉⵡⵉⵏ ⵏ ⵜⵎⴰⴳⵉⵜ (ⵀⵓⵡⵉⵢⵢⴰ), ⵜⵉⴽⴰⵔⴹⵉⵡⵉⵏ ⵜⵉⴷⴻⵎⴷⴰⵎⵉⵏ ⴷ ⵢⵉⵒⴰⵙⵒⵓⵕⴻⵏ ⵉⴱⵢⵓⵎⵉⵜⵔⵉⵢⴻⵏ. ⵖⴻⴼ ⵍⴻⵃⵙⴰⴱ ⵏ ⵢⵉⵙⴰⵍⴰⵏ ⴰⵢ ⴰⵙ-ⴷ-ⴼⴽⴰⵏ ⵉ ⵓⵏⴻⵖⵍⴰⴼ ⴷⵉⵏ, 50 ⵏ ⵜⵖⵉⵡⴰⵏⵉⵏ ⵙⴻⴳ 53 ⵢⴻⵍⵍⴰⵏ ⴷⴻⴳ ⵜⵡⵉⵍⴰⵢⵜ ⵏ ⵜⵍⴻⵎⵙⴰⵏ ⴱⴷⴰⵏⵜ ⵢⴰⴳⵉ ⵅⴻⴷⴷⵎⴻⵏⵜ-ⴷ ⵜⴰⴽⴰⵔⴹⴰ ⵜⴰⵖⴻⵍⵏⴰⵡⵜ ⵏ ⵜⵎⴰⴳⵉⵜ, ⵢⴻⵔⵏⴰ 47 ⵙⴻⴳ-ⵙⴻⵏⵜ ⵡⴻⵊⴷⴻⵏⵜ ⴰⴽⴽⴻⵏ ⴰⴷ ⴱⴷⵓⵏⵜ ⴰⴷ ⴷ-ⵅⴻⴷⴷⵎⴻⵏⵜ ⵉⵒⴰⵙⵒⵓⵕⴻⵏ ⵉⴱⵢⵓⵎⵉⵜⵔⵉⵢⴻⵏ.

ⵜⴰⵡⵉⵍⴰⵢⵜ ⵏ ⵜⵍⴻⵎⵙⴰⵏ ⵜⴻⵙⵄⴰ 109 ⵏ ⵜⵏⴰⵔⵉⵢⵉⵏ (ⵎⴰⴽⴰⵜⵉⴱ) ⵏ ⵜⵖⵉⵡⴰⵏⵜ ⴳⴰⵔ-ⴰⵙⴻⵏ 36 ⵇⵇⵏⴻⵏ ⵖⴻⵔ ⵓⵥⴻⴹⴹⴰ ⵏ ⵜⵏⴻⵍⵍⵉ ⵜⴰⵙⴻⴽⴷⴰⵏⵜ. ⵜⵉⵢⴰⴹ ⵍⴰ ⴷ-ⵢⴻⵜⵜⵉⵍⵉ ⴷⴻⴳ-ⵙⴻⵏ ⵓⵅⴻⴷⴷⵉⵎ ⴰⴽⴽⴻⵏ ⴰⴷ ⵙⵄⵓⵏⵜ ⵜⵉⵏⴻⵍⵍⵉ ⵜⴰⵙⴻⴽⴷⴰⵏⵜ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵅⴻⴱⴱⵔⴻⵏ.