ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵎⴰⵙⵙ ⵙⴻⵍⵍⴰⵍ ⵉⴳⴻⵔ-ⴷ ⵜⵉⵖⵔⵉ ⵉ ⵜⴽⴻⴱⴱⴰⵏⵉⵢⵉⵏ ⵜⵉⵛⵉⵏⵡⴰⵜⵉⵏ ⴷ ⵜⴻⴼⵔⵉⵇⵉⵢⵉⵏ ⴰⴷ ⴼⴰⵔⵚⴻⵏⵜ ⵜⵉⴳⵏⴰⵜⵉⵏ ⵏ ⵓⵙⵙⴻⴼⵜⵉ
ⵊⵧⵀⴰⵏⵏⴻⵙⴱⵓⵔⴳ (ⵜⴰⴼⵔⵉⵇⵜ ⵏ ⵓⵏⵥⵓⵍ)- ⵉⴳⴻⵔ-ⴷ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⴰⵙⵙ ⵏ ⵙⵙⴻⴱⵜ ⵜⵉⵖⵔⵉ ⴷⴻⴳ ⵊⵧⵀⴰⵏⵏⴻⵙⴱⵓⵔⴳ, ⵉ ⵜⴽⴻⴱⴱⴰⵏⵉⵢⵉⵏ ⵜⵉⵛⵉⵏⵡⴰⵜⵉⵏ ⴷ ⵜⴻⴼⵔⵉⵇⵉⵢⵉⵏ ⴰⴽⴽⴻⵏ ⴰⴷ ⴼⴰⵕⵙⴻⵏⵜ ⵜⴰⴳⵏⵉⵜ ⵏ ⵓⵙⵙⴻⴼⵜⵉ ⴰⵢ ⵜⴻⵏⵜ-ⵉⴷ-ⵉⵚⴰⵃⴻⵏ ⴷⴻⴳ ⵓⵏⵎⴰⴳⴻⵔ ⵏ ⵓⵎⵄⴰⵡⴻⵏ ⴰⵛⵉⵡⴰⵜ-ⴰⴼⵔⵉⵇⵉ, ⵢⴻⵔⵏⴰ ⵉⵡⴻⴽⴽⴻⴷ-ⴰⵙⴻⵏⵜ-ⴷ ⴷ ⴰⴽⴽⴻⵏ ⵍⴻⵣⵣⴰⵢⴻⵔ ⵜⴻⴱⴷⴻⴷ ⵖⴻⵔ ⵢⵉⴷⵉⵙ-ⵏⵙⴻⵏⵜ ⴷⴻⴳ ⵓⵎⵄⴰⵡⴻⵏ ⴳⴰⵔ ⵜⵎⵓⵔⴰ ⵏ ⵓⵏⵥⵓⵍ.
« ⵎⵉ ⵇⵔⵉⴱ ⴰⴷ ⴷ-ⵢⴻⴱⴷⵓ ⵓⵖⴰⵡⴰⵙ ⵏ ⵜⵉⴳⵔⴰⵡⵜ ⵏ ⵊⵧⵀⴰⵏⵏⴻⵙⴱⵓⵔⴳ, ⴱⵖⵉⵖ ⴰⴷ ⴷ-ⴳⵔⴻⵖ ⵜⵉⵖⵔⵉ ⵉ ⵜⴽⴻⴱⴱⴰⵏⵉⵢⵉⵏ ⵜⵉⵛⵉⵏⵡⴰⵜⵉⵏ ⴷ ⵜⴻⴼⵔⵉⵇⵉⵢⵉⵏ ⵏ ⵢⵉⵃⵔⵉⵛⴻⵏ ⵢⴻⵎⴳⴻⵔⵔⴰⴷⴻⵏ ⴰⴽⴽⴻⵏ ⴰⴷ ⴼⴰⵕⵙⴻⵏⵜ ⵜⴰⴳⵏⵉⵜ ⵏ ⵓⵙⵙⴻⴼⵜⵉ ⴰⵢ ⵜⴻⵏⵜ-ⵉⴷ-ⵉⵚⴰⵃⴻⵏ ⴷⴻⴳ ⵓⵏⵎⴰⴳⴻⵔ ⵏ ⵓⵎⵄⴰⵡⴻⵏ ⴰⵛⵉⵏⵡⴰⵜ-ⴰⴼⵔⵉⵇⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵙⴻⵍⵍⴰⵍ ⴷⴻⴳ ⵢⵉⵡⴻⵜ ⵏ ⵜⵉⵏⴰⵡⵜ ⵙⴷⴰⵜ ⵢⵉⵖⴼⴰⵡⴻⵏ ⵏ ⵓⵡⴰⵏⴰⴽ (ⴷⴰⵡⵍⴰ) ⴷ ⵓⵏⴰⴱⴰⴹ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵓⵏⵎⴰⴳⴻⵔ-ⴰ.
ⵎⴰⵙⵙ ⵙⴻⵍⵍⴰⵍ, ⴰⵢ ⵉⵃⴻⴷⵕⴻⵏ ⴷⴻⴳ ⵓⵏⵎⴰⴳⴻⵔ-ⴰ ⵙ ⵢⵉⵙⴻⵎ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⴰⴱⴷⴻⵍⴰⵣⵉⵣ ⴱⵧⵓⵜⴻⴼⵍⵉⴽⴰ, ⵉⵡⴻⴽⴽⴻⴷ-ⴷ ⴷ ⴰⴽⴽⴻⵏ ⴰⵏⴰⴱⴰⴹ ⴰⴷⵣⴰⵢⵔⵉ « ⵉⵄⴻⵡⵡⴻⵍ ⴰⴽⴽⴻⵏ ⴰⴷ ⵢⴻⵙⵙⴻⴼⵄⴻⵍ ⴰⵀⵉⵍ ⵏ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⵢⴻⵙⵄⴰⵏ ⴰⵣⴰⵍ ⴰⵢ ⴷ-ⵉⴳⴰ ⵓⵙⴻⵍⵡⴰⵢ ⵉ ⵜⴰⵍⵍⵉⵜ ⵏ 2014-2019 », ⵢⴻⵔⵏⴰ ⵉⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵜⵉⴽⴻⴱⴱⴰⵏⵉⵢⵉⵏ ⵜⵉⵛⵉⵏⵡⴰⵜⵉⵏ ⴷ ⵜⴻⴼⵔⵉⵇⵉⵢⵉⵏ « ⴰⴷ ⴷ-ⴰⴼⴻⵏⵜ ⵍⴻⵣⵣⴰⵢⴻⵔ ⵖⴻⵔ ⵢⵉⴷⵉⵙ-ⵏⵙⴻⵏⵜ ⵢⴻⵔⵏⴰ ⴰⴷ ⴰⵙⴻⵏ-ⵜⴻⵙⵙⵉⴼⵙⴻⵙ ⵜⵉⵖⴰⵡⵙⵉⵡⵉⵏ ⴷⴻⴳ ⵡⴰⵏⴻⵛⵜ-ⴰ ⵙ ⵢⵉⵙⴻⵎ-ⵏⵏⴻⵙ ⴷ ⵜⴰⵛⵔⵉⴽⵜ ⵉⵣⴰⴷⴻⵏ ⴷⴻⴳ ⵓⵎⵄⴰⵡⴻⵏ ⴳⴰⵔ ⵜⵎⵓⵔⴰ ⵏ ⵓⵏⵥⵓⵍ (ⴵⴰⵏⵓⴱ) ⵍⴰⴷⵖⴰ ⵉⵎⵉ ⴰⵢ ⵜⴻⵙⵄⴰ ⵜⵉⵣⴻⵎⵎⴰⵔ ⵉⴳⴻⵔⵔⵣⴻⵏ ⴷⴻⴳ ⵓⵏⵔⴰⵔ-ⴰ ».
ⵢⴻⵔⵏⴰ-ⴷ ⵎⴰⵙⵙ ⵙⴻⵍⵍⴰⵍ ⴷ ⴰⴽⴽⴻⵏ « ⴰⵙⵏⴻⵔⵏⵉ ⵏ ⵓⵎⴱⴰⴷⴷⴻⵍ ⵏ ⵜⵜⵊⴰⵕⴰ ⴳⴰⵔ ⵜⴻⵎⵏⴰⴹⵉⵏ-ⵏⵏⴻⵖ ⴷ ⵢⵉⵡⴻⵏ ⵙⴻⴳ ⵢⵉⵙⵡⴰⵏ ⴰⵢ ⵏⵃⵓⴽⴻⵕ ⴰⴷ ⵜⴻⵏ-ⵏⴰⵡⴻⴹ ⵙ ⵢⵉⵙⴻⵎ ⵏ ⵓⵎⵄⴰⵡⴻⵏ-ⵏⵏⴻⵖ, ⵢⴻⵔⵏⴰ ⴰⵇⵍ-ⴰⵖ ⴰⵙⵙ-ⴰ ⴷⴻⴳ ⵜⴻⴳⵏⵉⵜ ⵜⴰⵎⴰⵢⵏⵓⵜ ⵢⵉⴼⴻⵏ ⵜⵉⵏ ⵢⴻⵣⵔⵉⵏ, ⴷ ⵜⵉⵏ ⴰⴷ ⴰⵖ-ⵢⴻⴵⴵⴻⵏ ⴰⴷ ⵏⴻⵙⵙⴻⴼⵇⴻⴷ ⴷ ⴰⴽⴽⴻⵏ ⵜⵜⵊⴰⵕⴰ ⵜⴻⵣⵎⴻⵔ ⴰⴷ ⵜⵉⵍⵉ ⴷ ⵓⵍ ⵏ ⵓⵏⵏⴻⵔⵏⵉ ⵙ ⵓⵙⵙⴻⴱⵖⴻⵙ ⵏ ⵓⵙⵙⴻⴼⵜⵉ, ⴰⵙⵄⴻⴷⴷⵉ ⵏ ⵜⴻⵙⵏⴰⵜⵡⵉⵍⵜ (ⵜⵉⴽⵏⵓⵍⵓⴵⵢⴰ) ⴷ ⵓⵛⵔⴰⴽ ⵏ ⵜⵎⵓⵙⵙⵏⵉⵡⵉⵏ ⴷ ⵜⵜⴻⵊⵕⵉⴱⴰⵜ ».
ⴷⵖⴰ ⵢⴻⵏⵏⴰ-ⴷ, ⴷⴻⴳ ⵜⴻⵎⵙⴰⵍⵜ-ⴰ ⴷ ⴰⴽⴽⴻⵏ ⴰⵢⴰ « ⵢⴻⵃⵡⴰⴵ ⴰⵎⵄⴰⵡⴻⵏ ⵙ ⵓⵎⵙⴻⴼⵀⴰⵎ ⵉ ⵍⵎⴻⵏⴷ ⵏ ⵓⵙⴳⵉⴵⴵⵉ ⵏ ⵍⵍⵓⵣⵉⵏⴰⵜ ⵏⴻⵖ ⴰⵛⵔⴰⴽ-ⵏⵙⴻⵏⵜ, ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⵢⴻⵜⵜⵡⴰⴹⵎⴻⵏ ⵍⴰⵎⴰⵏ ⵙⴻⴳ ⵢⵉⴷⵉⵙ ⵏ ⵍⵇⴰⵏⵓⵏ ⵉ ⵜⴽⴻⴱⴱⴰⵏⵉⵢⵉⵏ-ⴰ ».
