ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵢⴻⵇⴱⴻⵍ ⵓⵙⴻⵇⵇⴰⵎⵓ ⵏ ⵓⵖⵍⴰⵏ ⵍⵇⴰⵏⵓⵏ ⵏ ⵓⵙⵙⵎⴰⴷ ⵏ ⵜⴻⴷⵔⵉⵎⵜ ⵏ 2015

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵙⵄⴻⴷⴷⴰ ⵓⵙⴻⵇⵇⴰⵎⵓ ⵏ ⵓⵖⵍⴰⵏ, ⴰⵙⵙ ⵏ ⵍⵃⴻⴷⴷ, ⴰⵙⴻⵏⴼⴰⵔ ⵏ ⵍⵇⴰⵏⵓⵏ ⵏ ⵓⵙⵙⵎⴰⴷ ⵏ ⵜⴻⴷⵔⵉⵎⵜ ⵏ 2015 ⴷⴻⴳ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⴰⵢ ⵢⴻⵙⵙⴻⵍⵡⵉ ⴰⴱⴷⴻⵍⴽⴰⴷⴻⵔ ⴱⴻⵏⵙⴰⵍⴰⵀ, ⴰⵙⴻⵍⵡⴰⵢ ⵏ ⵓⵙⴻⵇⵇⴰⵎⵓ, ⵙ ⵓⵃⴷⴰⵕ ⵏ ⵓⵏⴻⵖⵍⴰⴼ ⵏ ⵜⴻⴷⵔⵉⵎⵜ, ⴰⴱⴷⴻⵔⵔⴰⵀⵎⴰⵏⴻ ⴱⴻⵏⴽⵀⴰⵍⴼⴰ.

ⵙⴻⴳ ⵢⵉⴷⵉⵙ ⴰⴷⴰⵎⵙⴰⵏ, ⵍⵇⴰⵏⵓⵏ-ⴰ ⵏ ⵜⴻⴷⵔⵉⵎⵜ ⵢⴻⵜⵜⵡⴰⴱⵏⴰ ⵖⴻⴼ ⵍⵍⵙⴰⵙ ⵏ ⵙⵙⵓⵎⴰ ⵏ ⵜⴱⴻⵜⵜⵉⵜ ⵏ ⵓⵒⵉⵜⵕⵓⵍ ⵏ 37 ⵏ ⵢⵉⴷⵓⵍⴰⵕⴻⵏ, ⵎⴰ ⴷ ⴰⴼⵎⵉⴹⵉ (ⵏⵉⵙⴱⴰ) ⵏ ⵓⴱⴻⴷⴷⴻⵍ ⵏ ⵓⴷⵉⵏⴰⵕ ⵢⴻⵜⵜⵡⴰⵃⵙⴻⴱ ⵙ ⵍⵍⵙⴰⵙ ⵏ 98 ⵏ ⵢⵉⴷⵉⵏⴰⵕⴻⵏ ⵉ ⵢⵉⵡⴻⵏ ⵏ ⵓⴷⵓⵍⴰⵕ ⴰⵎⴰⵔⵉⴽⴰⵏⵉ.

ⵍⵇⴰⵏⵓⵏ ⵏ ⵓⵙⵙⵎⴰⴷ ⵏ ⵜⴻⴷⵔⵉⵎⵜ ⵍⴰ ⵢⴻⵙⵙⴻⴼⵔⴰⵢ ⴰⴷ ⴷ-ⵜⵉⵍⵉ ⵜⵎⴻⵔⵏⵉⵡⵜ ⵏ 4% ⴷⴻⴳ ⵙⵙⵓⵎⴰⵜ (ⴷⴻⴳ ⵡⴰⴽⵓⴷ ⴰⵢⴷⴻⴳ ⴷⴻⴳ 2015, ⵜⵉⵎⴻⵔⵏⵉⵡⵜ ⴷⴻⴳ ⵙⵙⵓⵎⴰ ⵜⴻⵜⵜⵡⴰⵙⵙⴻⴼⵔⴰ ⴰⴷ ⴷ-ⵜⵉⵍⵉ ⵙ 3%), ⵎⴰ ⴷ ⴰⴼⵎⵉⴹⵉ ⵏ ⵓⵏⵏⴻⵔⵏⵉ ⵙⵙⴻⴼⵔⴰⵏ ⴰⴷ ⵢⵉⵍⵉ ⵙ 3,8% (ⴷⴻⴳ ⵡⴰⴽⵓⴷ ⴰⵢⴷⴻⴳ ⵉⵍⵉⵏⴷⵉ ⵙⵙⴻⴼⵔⴰⵏ ⴰⴷ ⵢⵉⵍⵉ 3,4%). ⴰⵏⵏⴻⵔⵏⵉ ⵏ ⵜⴷⴰⵎⵙⴰ ⵢⴻⵅⴹⴰⵏ ⴰⵒⵉⵜⵕⵓⵍ ⵜⴻⵜⵜⵡⴰⵇⴻⵢⵢⴻⵎ ⴰⴷ ⵜⵉⵍⵉ ⵙ 5,1% (ⴷⴻⴳ ⵡⴰⴽⵓⴷ ⴰⵢⴷⴻⴳ ⵉⵍⵉⵏⴷⵉ ⵙⵙⴻⴼⵔⴰⵏ ⴰⴷ ⵜⵉⵍⵉ 4,25%).

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵎⴰⵔⵓⴷ ⵏ ⵓⵡⴰⵏⴰⴽ (ⵎⵉⵣⴰⵏⵉⵢⵢⴰⵜ ⴰⴷ-ⴷⴰⵡⵍⴰ), ⵍⵇⴰⵏⵓⵏ-ⴰ ⵢⴻⵙⵙⴻⴼⵔⴰ ⴰⴷ ⵜⵜⵡⴰⵚⴻⵔⵔⴼⴻⵏ 7588 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ (ⴷⴻⴳ ⵡⴰⴽⵓⴷ ⴰⵢⴷⴻⴳ ⵍⵇⴰⵏⵓⵏ ⵏ ⵜⴻⴷⵔⵉⵎⵜ ⴰⵎⴻⵣⵡⴰⵔⵓ ⵏ 2015 ⵢⴻⵙⵙⴻⴼⵔⴰ ⴰⴷ ⵜⵜⵡⴰⵚⴻⵔⵔⴼⴻⵏ 7692 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ), ⵎⴰ ⴷ ⴰⵎⴻⴷⵅⵓⵍ ⴰⴷ ⵢⵉⵎⵖⵓⵔ ⵖⴻⵔ 4953 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ, ⴷⵖⴰ ⵙ ⵡⴰⵢⴰ, ⴰⴷ ⵢⴻⵔⵏⵓ ⵙ 242,4 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ ⵓⴳⴰⵔ ⵏ ⵡⴰⵏⴻⵛⵜ ⵢⴻⵙⵙⴻⴼⵔⴰ ⵍⵇⴰⵏⵓⵏ ⵏ ⵜⴻⴷⵔⵉⵎⵜ ⴰⵎⴻⵣⵡⴰⵔⵓ.

ⵎⴰ ⴷ ⴰⵎⴻⴷⵅⵓⵍ ⴰⴷ ⴷ-ⵢⴻⴽⴽⴻⵏ ⵙⴻⴳ ⵓⵙⵙⵉⴵⴻⵡ ⵏ ⵓⵒⵉⵜⵕⵓⵍ ⴷ ⵍⴳⴰⵣ, ⵢⴻⵙⵙⴻⴼⵔⴰ ⵍⵇⴰⵏⵓⵏ-ⴰ ⴰⴷ ⵢⴰⵡⴻⴹ ⵖⴻⵔ 34 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ 2015 (ⴷⴻⴳ ⵡⴰⴽⵓⴷ ⴰⵢⴷⴻⴳ ⴰⵎⴻⴷⵅⵓⵍ-ⴰ ⵢⴻⵡⵡⴻⴹ ⵖⴻⵔ 68 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⴷⴻⴳ 2014), ⵎⴰ ⴷ ⴰⴵⴰⵡ ⵏ ⵙⵙⴻⵍⵄⴰ ⴰⴷ ⵢⴰⵡⴻⴹ ⵖⴻⵔ 57,3 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ (ⴷⴻⴳ ⵡⴰⴽⵓⴷ ⴰⵢⴷⴻⴳ ⴷⴻⴳ ⵍⵇⴰⵏⵓⵏ ⴰⵎⴻⵣⵡⴰⵔⵓ ⵏ ⵜⴻⴷⵔⵉⵎⵜ ⵏ 2015, ⵙⵙⴻⴼⵔⴰⵏ ⴰⴵⴰⵡ ⵏ 65,44 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ, ⵎⴰ ⴷⴻⴳ 2014, ⵙⵙⴻⴼⵔⴰⵏ ⴰⴵⴰⵡ ⵏ 60 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ).

ⴰⵎⵓⵔ ⴰⵎⴻⵇⵔⴰⵏ ⵙⴻⴳ ⵢⵉⵃⴻⵣⵣⵉⴱⴻⵏ ⵏ ⵍⵇⴰⵏⵓⵏ-ⴰ ⵔⵣⴰⵏ ⵍⴰⴷⵖⴰ ⴰⵄⴰⵡⴻⴷ ⵏ ⵜⵎⵓⵖⵍⵉ ⴷⴻⴳ ⴽⵔⴰ ⵏ ⵍⴻⵖⵔⴰⵎⴰⵜ, ⴰⵙⵙⴻⵕⵛⴻⴷ ⵏ ⵓⵚⴻⵔⵔⴻⴼ ⵏ ⵢⵉⴷⵔⵉⵎⴻⵏ ⵏ ⵓⵡⴰⵏⴰⴽ (ⴷⴰⵡⵍⴰ) ⵉ ⵓⵙⵙⴻⵏⵇⴻⵙ ⵏ ⵍⴻⵅⵚⴰⵔⴰ ⴷ ⵓⵙⵙⵉⵣⴷⴻⴳ ⵏ ⵜⴷⴰⵎⵙⴰ ⵙ ⵓⵙⵙⴻⵏⵇⴻⵙ ⵏ ⵡⵉⴷ ⴰⵢ ⵢⴻⵜⵜⴳⴻⵏ ⵜⵜⵊⴰⵕⴰ ⵡⴰⵔ ⵍⴻⴽⵡⴰⵖⴻⴹ ⴷ ⵓⵃⴻⵜⵜⴻⵎ-ⵏⵙⴻⵏ ⴰⴽⴽⴻⵏ ⴰⴷ ⵜⵜⵅⴻⵍⵍⵉⵚⴻⵏ ⵍⴻⵖⵔⴰⵎⴰ ⴰⴽⴽⴻⵏ ⴰⴷ ⴰⴷⴼⴻⵏ ⵢⵉⴷⵔⵉⵎⴻⵏ-ⵏⵙⴻⵏ ⵖⴻⵔ ⵜⴱⴰⵏⴽⵉⵡⵉⵏ.