ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵉⵅⴰⵣⵣⴰⴱⵉⵢⵉⵏ ⵏ ⵞⴰⴷ: ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⵎⴳⴰⵍ ⵔⵔⴻⴱⵔⴰⴱ

ⴰⴷⴷⵉⵙ ⴰⴱⴻⴱⴰ – ⵜⵡⴻⵜ-ⴷ ⵜⴷⵓⴽⵍⵉ ⵜⴰⴼⵔⵉⵇⵉⵜ ⵙ ⵜⴻⵇⵙⴻⵃ ⴷⴻⴳ 3-ⵏⵏⵉ ⵏ ⵜⵅⴰⵣⵣⴰⴱⵉⵢⵉⵏ ⴰⵢ ⴷ-ⵢⴻⵍⵍⴰⵏ ⴷⴻⴳ ⵙⵙⵓⵇ ⵏ ⵍⵧⵓⵍⵧⵓ ⴼⵧⵓ, ⴷⴻⴳ ⵢⵉⵡⴻⵜ ⵏ ⵜⴻⴳⵣⵉⵔⵜ ⵏ ⵓⴳⴻⵍⵎⵉⵎ ⵏ ⵞⴰⴷ, ⵢⴻⵔⵏⴰ ⵜⵄⴰⵡⴻⴷ ⵜⵡⴻⴽⴽⴻⴷ-ⴷ ⴷ ⴰⴽⴽⴻⵏ « ⵓⵔ ⵜⴻⵙⵜⴻⵄⵕⵉⴼ ⴰⵔⴰ ⴰⴽⴽ ⵙ ⵔⵔⴻⴱⵔⴰⴱ ⴷ ⵜⵉⴹⴹⵓⵔⴼⴰ ⵜⵓⴽⵔⵉⴹⵜ (ⵄⴰⵏⵉⴼⴰ) ».

« ⵜⴰⵙⴻⵍⵡⴰⵢⵜ ⵏ ⵜⵙⴻⵇⵇⴰⵎⵓⵜ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ, ⵜⴰⴷⵓⴽⵜⵓⵔⵜ ⵏⴽⵧⵙⴰⵣⴰⵏⴰ ⴷⵍⴰⵎⵉⵏⵉ-ⵣⵓⵎⴰ, ⵜⴻⵙⵃⴰⵙⵙⴻⴼ ⵖⴻⴼ ⵜⵅⴰⵣⵣⴰⴱⵉⵢⵉⵏ-ⵏⵏⵉ ⵜⵉⵔⴻⴱⵔⴰⴱⵉⵏ ⴰⵢ ⴷ-ⵢⴻⵍⵍⴰⵏ … ⴷⴻⴳ ⵜⴻⴳⵣⵉⵔⵜ ⵏ ⴽⵧⵓⵍⴼⵧⵓⴰ, ⴷ ⵜⵉⴷ ⵢⴻⴳⴰⵍ ⵙ 27 ⵏ ⵜⵎⴻⴷⴷⵓⵔⵉⵏ ⵢⴻⵔⵏⴰ ⵊⴻⵔⵃⴻⵏⵜ ⵓⴳⴰⵔ ⵏ 80 ⵏ ⵢⵉⵎⴷⴰⵏⴻⵏ ⵏⵉⴹⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ (ⴱⴰⵢⴰⵏ) ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ.

« ⵜⵡⴻⵜ-ⴷ ⵙ ⵍⴵⴻⵀⴷ ⴷⴻⴳ ⵜⵅⴰⵣⵣⴰⴱⵉⵢⵉⵏ-ⴰ ⵜⵓⵃⵇⵉⵔⵉⵏ ⵢⴻⵔⵏⴰ ⵜⵄⴰⵡⴻⴷ ⵜⵡⴻⴽⴽⴻⴷ-ⴷ ⴰⵖⴰⵏⴼⵓ ⵓⵎⵎⵉⴷ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ ⵉ ⵔⵔⴻⴱⵔⴰⴱ ⴷ ⵜⵉⴹⴹⵓⵔⴼⴰ ⵜⵓⴽⵔⵉⴹⵜ ⵓⵔ ⵢⴻⵙⵙⴻⴼⴽⴻⵏ ⴰⵔⴰ ⴰⴷ ⵜⵜⵡⴰⵇⴻⴱⵍⴻⵏ ⴰⴽⴽⴻⵏ ⵜⴻⴱⵖⵓ ⵜⵉⵍⵉ ⵜⴻⴳⵏⵉⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ-ⴰ.

ⵙ ⵡⴰⵢⴰ, ⵜⴻⵙⵙⴻⵏⴼⴰⵍⵉ-ⴷ (ⵄⴰⴱⴱⴰⵔⴰⵜ) ⵎⴰⵙⵙⴰ ⴷⵍⴰⵎⵉⵏⵉ-ⵣⵓⵎⴰ ⵜⴰⵎⵙⴻⵜⵍⴻⵍⵜ (ⵜⴰⴹⴰⵎⵓⵏ) ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ ⵖⴻⵔ ⵢⵉⴷⵉⵙ ⵏ ⵓⵏⴰⴱⴰⴹ ⴷ ⵓⵖⵔⴻⴼ ⵏ ⵞⴰⴷ, ⵢⴻⵔⵏⴰ ⵜⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵜⵓⵎⵎⵖⵉⵡⵉⵏ-ⴰ ⴷ « ⵜⵉⵖⵔⵉ ⵉⴵⴻⵀⴷⴻⵏ ⴰⵢ ⴷ-ⵢⴻⵙⵎⴻⴽⵜⴰⵢⴻⵏ ⴷ ⴰⴽⴽⴻⵏ ⵎⴰⵣⴰⵍ ⵜⵓⴳⴳⵣⴰ (ⵜⴰⵀⴷⵉⴷ) ⵏ ⵔⵔⴻⴱⵔⴰⴱ ⴷ ⵜⵉⴹⴹⵓⵔⴼⴰ ⵜⵓⴽⵔⵉⴹⵜ ⵜⴻⵍⵍⴰ ⴷⴻⴳ ⵜⴻⴼⵔⵉⵇⵜ ».

ⵜⴳⴻⵔ-ⴷ ⵜⵉⵖⵔⵉ ⵜⵙⴻⵍⵡⴰⵢⵜ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ ⵉ ⵓⵙⵙⴻⴵⵀⴻⴷ ⵏ ⵓⵎⵄⴰⵡⴻⵏ ⴳⴰⵔ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ ⵉ ⵢⵉⵎⴻⵏⵖⵉ ⵎⴳⴰⵍ ⵓⵅⴻⵚⵚⴰⵔ-ⴰ, ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵡⴰⵢⴰ ⵙ ⵓⵙⵙⴻⵇⴷⴻⵛ ⵏ ⵜⵜⴰⵡⵉⵍⴰⵜ ⵉⴼⵔⵉⵇⵉⵢⴻⵏ ⴷ ⵢⵉⴳⵔⴰⵖⵍⴰⵏⴻⵏ ⴰⵢ ⵉⵡⴰⵜⴰⵏ.

« ⴰⴷ ⵜⴽⴻⵎⵎⴻⵍ ⵜⵙⴻⵇⵇⴰⵎⵓⵜ ⴰⵅⴻⴷⴷⵉⵎ ⴷ ⵜⵎⵓⵔⴰ ⴰⵢ ⵢⴻⵜⵜⴻⴽⴽⴰⵏ ⴰⴽⴽⴻⵏ ⴰⴷ ⵢⴻⵜⵜⵡⴰⵙⵙⴻⴵⵀⴻⴷ ⵡⵓⵙⵙⵉⵙ (ⵎⴰⴵⵀⵓⴷ), ⵍⴰⴷⵖⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵖⴰⵍⵍⴻⵏ ⵉⴳⵜⴰⵖⵍⴰⵏⴻⵏ ⵓⵅⵍⵉⴹⴻⵏ ⴰⵢ ⴷ-ⵙⵏⵓⵍⴼⴰⵏⵜ ⵜⵎⵓⵔⴰ ⵢⴻⵜⵜⴻⴽⴽⴰ ⴷⴻⴳ ⵜⵙⴻⵇⵇⴰⵎⵓⵜ ⵏ ⵜⴻⵎⴷⴰ ⵏ ⵓⴳⴻⵍⵎⵉⵎ ⵏ ⵞⴰⴷ ⴷ ⴱⴻⵏⵉⵏ ⴰⴽⴽⴻⵏ ⴰⴷ ⵏⵏⴰⵖⴻⵏⵜ ⵎⴳⴰⵍ ⵜⴻⴳⵔⴰⵡⵜ ⵜⴰⵔⴻⴱⵔⴰⴱⵜ ⵏ ⴱⵧⴽⵧ ⵀⴰⵔⴰⵎ », ⵖⴻⴼ ⵡⴰⴽⴽⴻⵏ ⴰⵢ ⵜⵜ-ⵉⴷ-ⵢⴻⵅⵜⴻⵎ ⵓⵍⵖⵓ-ⵏⵏⵉ.

ⵜⴰⵎⵏⴰⴹⵜ ⵏ ⵓⴳⴻⵍⵎⵉⵎ ⵏ ⵞⴰⴷ ⵣⴳⴰⵏⵜ ⵜⵜⵉⵍⵉⵏⵜ-ⴷ ⴷⴻⴳ-ⵙ ⵜⵓⵎⵎⵖⵉⵡⵉⵏ ⵜⵉⵔⴻⴱⵔⴰⴱⵉⵏ ⵏ ⵜⴻⴳⵔⴰⵡⵜ ⵏ ⴱⵧⴽⵧ ⵀⴰⵔⴰⵎ.

ⴰⵙⵙ ⵏ 10 ⵜⵓⴱⴻⵕ ⵢⴻⵣⵔⵉⵏ, 41 ⵏ ⵢⵉⵎⴷⴰⵏⴻⵏ ⴰⵢ ⵢⴻⵜⵜⵡⴻⵏⵖⴻⵏ ⵢⴻⵔⵏⴰ ⵊⴻⵔⵃⴻⵏ 48 ⵏ ⵡⵉⵢⴰⴹ ⴷⴻⴳ ⵢⵉⵡⴻⵏ ⵏ ⵙⵙⵓⵇ ⵏ ⴷⴷⵓⵕⵜ ⴷⴻⴳ ⴱⴰⴳⴰ ⵙⵧⵍⴰ, ⵜⴰⵎⴷⵉⵏⵜ ⵜⴰⵎⴻⵇⵔⴰⵏⵜ ⵜⵉⵙ ⵙⵏⴰⵜ ⴷⴻⴳ ⵜⴻⵎⵏⴰⴹⵜ ⵏ ⵓⴳⴻⵍⵎⵉⵎ-ⴰ ⴰⵏⴷⴰ ⴰⵢ ⴷⴷⵔⴻⵏ 6000 ⵏ ⵢⵉⵣⵔⴰⵣⴰⵖⴻⵏ (ⵍⴰⴵⵉ’ⵉⵏ) ⴰⵢ ⴷ-ⵢⵓⵙⴰⵏ ⵙⴻⴳ ⵏⵉⵊⵉⵔ ⴷ ⵏⵉⵊⵉⵔⵢⴰ.