ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⴷ ⵜⴽⴻⵎⵎⴻⵍ ⵍⴻⵣⵣⴰⵢⴻⵔ ⴰⴷ ⵜⴻⴱⴷⴻⴷ ⵖⴻⵔ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⴼⴻⵔⵔⵓ ⵏ ⵜⴰⵍⵓⴼⵜ ⵜⴰⵍⵉⴱⵉⵜ
ⵕⵓⵎⴰ – ⵍⴻⵣⵣⴰⵢⴻⵔ ⴰⴷ ⵜⴽⴻⵎⵎⴻⵍ ⴰⴷ ⵜⴻⴱⴷⴻⴷ ⵖⴻⵔ ⵢⵉⴷⵉⵙ ⵏ ⵓⴽⴰⵍⴰ (ⵎⴰⵙⴰⵔ) ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵓⵙⵙⵓⴼⴼⴻⵖ ⵏ ⵍⵉⴱⵢⴰ ⵙⴻⴳ ⵜⴰⵍⵓⴼⵜ-ⵏⵏⴻⵙ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴰⵙⵙ ⵏ ⵙⵙⴻⴱⵜ ⴷⴻⴳ ⵕⵓⵎⴰ ⵓⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵍⵎⴻⵖⵔⴻⴱ, ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⵉⵃⴰⵔ ⵍⵃⴰⵍ ⴰⴽⴽⴻⵏ ⴰⴷ ⴷ-ⵢⴻⵜⵜⵡⴰⵙⵙⴻⴱⴷⴻⴷ ⵓⵏⴰⴱⴰⴹ ⴰⵍⵉⴱⵉ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ.
«ⵍⴻⵣⵣⴰⵢⴻⵔ ⵜⴻⴱⴷⴻⴷ ⵢⴻⵔⵏⴰ ⵎⴰⵣⴰⵍ ⴰⴷ ⵜⴽⴻⵎⵎⴻⵍ ⴰⴷ ⵜⴻⴱⴷⴻⴷ ⵖⴻⵔ ⵢⵉⴷⵉⵙ ⵏ ⵓⴽⴰⵍⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵓⵙⵙⵓⴼⴼⴻⵖ ⵏ ⵍⵉⴱⵢⴰ ⵙⴻⴳ ⵜⴰⵍⵓⴼⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵎⴻⵙⵙⴰⵀⴻⵍ ⴷⴻⴳ ⵢⵉⵡⴻⵜ ⵏ ⵜⵉⵏⴰⵡⵜ ⴰⵢ ⴷ-ⵢⴻⵖⵔⴰ ⴷⴻⴳ ⵓⵙⴰⵔⴰⴳ ⵏ ⵢⵉⴷⵉⵡⴻⵏⵏⵉⵢⴻⵏ (ⵃⵉⵡⴰⵔⴰⵜ) ⵉⴳⵔⴰⴽⴰⵍⴰⵏⴻⵏ ⴰⵢ ⴷ-ⵢⴻⵍⵍⴰⵏ ⴷⴻⴳ ⵕⵓⵎⴰ ⴳⴰⵔ 10 ⴷ 12 ⴷⵓⵊⴻⵎⴱⴻⵕ.
« ⵜⵉⴼⵔⴰⵜ-ⴰ ⵜⴰⵙⴻⵔⵜⵉⵜ ⴰⴷ ⴷ-ⵜⵉⵍⵉ ⵙ ⵓⵙⵙⴻⴱⴷⴻⴷ ⵓⵄⵊⵉⵍ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴰⴷ ⴷ-ⵉⴳⴻⵏⵙⴻⵙⴻⵏ (ⵢⵓⵎⴰⵜⵜⵉⵍ) ⴰⴽⴽ ⴰⵖⵔⴻⴼ ⴰⵍⵉⴱⵉ ⴷ ⵓⵙⵜⴻⵏⵢⵉ ⵓⵄⵊⵉⵍ ⵏ ⵓⵎⵜⴰⵡⴰ (ⵉⵜⵜⵉⴼⴰⵇ) ⴰⵙⴻⵔⵜⵉ ⴰⵢ ⵡⵓⴽⵓⴷ ⵢⴻⴱⴷⴻⴷ ⵓⵖⵔⴻⴼ ⴰⵍⵉⴱⵉ ⴷ ⵓⵜⵜⴻⴽⴽⵉ ⵏ ⵓⵎⵓⵔ ⴰⵎⴻⵇⵔⴰⵏ ⵙⴻⴳ ⵢⵉⵎⴻⴳⴳⵉⵢⴻⵏ (ⴼⴰⵄⵉⵍⵉⵏ) ⵉⵙⴻⵔⵜⵉⵢⴻⵏ ⵏ ⵜⵎⵓⵔⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.
ⴷⵖⴰ, ⴷⴻⴳ ⵜⴻⵎⵙⴰⵍⵜ-ⴰ, ⵢⴻⵏⵏⴰ-ⴷ ⵎⴰⵙⵙ ⵎⴻⵙⵙⴰⵀⴻⵍ ⴷ ⴰⴽⴽⴻⵏ « ⴷⴻⴳ ⵡⴰⴽⵓⴷ ⴰⵢⴷⴻⴳ ⴰⵎⵖⵉⵡⴰⵏ (ⵎⵓⴵⵜⴰⵎⴰⵄ) ⴰⴳⵔⴰⵖⵍⴰⵏ ⵢⴻⵔⵔⴰ-ⴷ ⵙ ⵜⴰⵎⴰⵡⵜ ⵉ ⵜⴻⵎⵖⴻⵔ ⵏ ⵓⵅⴻⵚⵚⴰⵔ ⴰⵢ ⵉⵃⵓⵣⴰⵏ ⵍⵉⴱⵢⴰ ⵢⴻⵔⵏⴰ ⵍⴰ ⵢⴻⵙⵙⴻⵄⵊⴰⵍ ⵓⵙⵙⵉⵙⴻⵏ (ⵎⴰⴵⵀⵓⴷⴰⵜ) ⵉ ⴼⴻⵔⵔⵓ ⴰⵏⴻⴳⴳⴰⵔⵓ ⴷ ⵓⴷⵓⵎⴰⵏ ⵏ ⵜⴰⵍⵓⴼⵜ-ⴰ, ⵢⴻⵙⵙⴻⴼⴽ ⴰⴷ ⴷ-ⵍⵀⵓⵏ ⵢⵉⵍⵉⴱⵉⵢⴻⵏ ⵙ ⵜⵉⵎⵎⴰⴷ-ⵏⵙⴻⵏ ⴷ ⵓⴽⴰⵍⴰ-ⴰ, ⴰⴷ ⴱⴻⴳⵙⴻⵏ ⵢⴻⵔⵏⴰ ⴰⴷ ⵙⵙⴻⵔⵙⴻⵏ ⵏⵏⴼⴻⵄ ⵓⵏⵏⵉⴳ ⵏ ⵜⵎⵓⵔⵜ ⵏⵏⵉⴳ ⴰⴽⴽ ⴰⵢⴻⵏ ⵏⵉⴹⴻⵏ, ⴰⵎⴰ ⵢⴻⵍⵍⴰ-ⴷ ⴷ ⵏⵏⴼⴻⵄ ⵓⴷⵎⴰⵡⴰⵏ ⵏⴻⵖ ⴷ ⵏⵏⴼⴻⵄ ⵏ ⵓⴽⴰⴱⴰⵔ, ⴰⵎ ⵡⴰⴽⴽⴻⵏ ⴰⵢ ⵢⴻⵙⵙⴻⴼⴽ ⴰⴷ ⵜⵜⴻⴽⴽⵉⵏ ⴷⴷⵓⴽⵍⵉ ⴷⴻⴳ ⵓⵙⵙⵓⴼⴼⴻⵖ ⵏ ⵓⵙⵙⵉⵔⴻⵎ ⵏ ⵓⵖⵔⴻⴼ-ⴰ ⵖⴻⵔ ⵜⵉⴷⴻⵜ ⴰⴽⴽⴻⵏ ⴰⴷ ⵢⴻⴷⴷⴻⵔ ⴷⴻⴳ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ, ⵢⴻⵔⵏⴰ ⴰⴷ ⵢⴻⵙⵙⴻⴱⵄⴻⴷ ⵖⴻⴼ ⵢⵉⵎⴰⵏ-ⵏⵏⴻⵙ ⴰⵅⴻⵚⵚⴰⵔ ⵏ ⴱⴻⴹⴹⵓ ⴷ ⵓⵔⵡⴰⵢ ⴰⵎⴰⵜⵓ ».
« ⵉⵍⵉⴱⵉⵢⴻⵏ, ⴷⴻⴳ ⵓⵎⴻⵣⵔⵓⵢ-ⵏⵙⴻⵏ ⴷ ⵡⵓⴳⵓⵔⴻⵏ ⴰⵢ ⵉⵄⴻⴷⴷⴰⵏ ⴼⴻⵍⵍ-ⴰⵙⴻⵏ, ⴷⵉⵎⴰ ⵙⵙⴻⴽⵏⴻⵏ-ⴷ ⵜⴰⵣⵎⴻⵔⵜ-ⵏⵙⴻⵏ ⴰⴽⴽⴻⵏ ⴰⴷ ⴽⴽⵙⴻⵏ ⴰⴽⴽ ⵉⵄⴻⵡⵡⵉⵇⴻⵏ ⵙⴻⴳ ⵓⴱⵔⵉⴷ-ⵏⵙⴻⵏ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴼⴻⵔⵔⵓ ⵏ ⵜⵍⵓⴼⴰ ⴰⵢ ⴷ-ⵢⴻⵖⵍⵉⵏ ⴼⴻⵍⵍ-ⴰⵙⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⵎⴰⵙⵙ ⵎⴻⵙⵙⴰⵀⴻⵍ.
