ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴼⴰⵍⴻⵙⵟⵉⵏ: ⵜⵉⵎⴻⵔⵏⵉⵡⵜ ⵏ ⵛⵛⵡⴰⵍ ⴷⴻⴳ ⵡⴰⴽⵓⴷ ⴰⵢⴷⴻⴳ ⵉⵙⵕⴰⵢⵉⵍⵉⵢⴻⵏ ⵔⴻⵏⵏⵓⵏ ⵜⵜⴰⵟⵟⴰⴼⴻⵏ ⴰⴽⴰⵍ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴰⴽⵔⵉⴹⵜ (ⵄⵓⵏⴼ) ⵜⵉⵙⵕⴰⵢⵉⵍⵉⵜ ⵎⴳⴰⵍ ⵢⵉⴼⴰⵍⴻⵙⵟⵉⵏⵉⵢⴻⵏ ⵜⴻⵇⵇⵉⵎ ⴽⴰⵏ ⵜⵔⴻⵏⵏⵓ ⴷⴻⴳ ⵓⵙⴻⴳⴳⴰⵙ ⵏ 2015 ⴰⵢⴷⴻⴳ ⵎⵎⵓⵜⴻⵏ ⵓⴳⴰⵔ ⵏ 170 ⵏ ⵢⵉⵎⴷⴰⵏⴻⵏ, ⵢⴻⵔⵏⴰ ⵓⵔ ⵍⴰ ⴷ-ⵢⴻⵜⵜⴱⴰⵏ ⴰⵔⴰ ⴷ ⴰⴽⴽⴻⵏ ⵜⴰⴽⵔⵉⴹⵜ-ⴰ ⴰⴷ ⵜⴻⵏⵇⴻⵙ, ⵉⵎⵉ ⵉⵜⵄⴻⴷⴷⵉⵢⴻⵏ ⵖⴻⴼ ⵢⵉⴼⴰⵍⴻⵙⵟⵉⵏⵉⵢⴻⵏ ⵍⴰ ⵜⵜⴽⴻⵎⵎⵉⵍⴻⵏ ⵢⴰⵍ ⴰⵙⵙ ⵢⴻⵔⵏⴰ ⵉⵙⵕⴰⵢⵉⵍ ⵜⵓⴳⵉ ⴰⴷ ⵜⴻⴷⴷⴻⵎ ⵉⵃⴻⵣⵣⵉⴱⴻⵏ ⴰⴽⴽⴻⵏ ⴰⴷ ⴷ-ⵜⵓⵖⴰⵍ ⵖⴻⵔ ⵍⴻⵎⵛⴰⵡⵕⴰⵜ.

ⵖⴻⴼ ⵍⴻⵃⵙⴰⴱ ⵏ ⵜⴻⵛⵔⴰⵡⵜ (ⵃⴰⵚⵉⵍⴰ) ⴰⵢ ⴷ-ⵜⴻⴼⴽⴰ ⵜⵏⴰⵔⵉⵜ ⵏ ⵓⵙⵙⴻⵎⵢⵓⴷⴷⴻⵙ ⵏ ⵜⵖⴰⵡⵙⵉⵡⵉⵏ ⵜⴰⵍⵙⴰⵏⵉⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢ ⴷ-ⵢⴻⴼⴼⵖⴻⵏ ⴰⵙⵙ ⵏ ⵍⴻⵅⵎⵉⵙ, 141 ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⵢⴻⵎⵎⵓⵜⴻⵏ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⴱⴷⴰ ⵍⵎⵓⵊⴰ ⵏ ⵛⵛⵡⴰⵍ ⵜⴰⵏⴻⴳⴳⴰⵔⵓⵜ ⴰⵙⵙ ⵏ 1ⵓ ⵏ ⵜⵓⴱⴻⵕ 2015.

ⴰⵍⵖⵓ-ⴰ (ⴱⴰⵢⴰⵏ) ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵢⴻⵏⵏⴰ-ⴷ ⴷⴰⵖ ⴷ ⴰⴽⴽⴻⵏ 15.377 ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⵢⴻⵜⵜⵡⴰⵊⴻⵔⵃⴻⵏ ⴷⴻⴳ 2015, ⴳⴰⵔ-ⴰⵙⴻⵏ 90% ⴷ ⵉⵎⴷⴰⵏⴻⵏ ⴰⵢ ⵢⴻⵜⵜⵡⴰⵊⴻⵔⵃⴻⵏ ⴷⴻⴳ ⵜⵎⴻⵙⴱⴰⵏⵉⵢⵉⵏ ⵏⴻⵖ ⵉⵎⵎⴻⵛⵞⵉⵡⴻⵏ ⴰⵢ ⴷ-ⵢⴻⵍⵍⴰⵏ ⴳⴰⵔ ⵢⵉⴼⴰⵍⴻⵙⵟⵉⵏⵉⵢⴻⵏ ⴷ ⵢⵉⵖⴰⵍⵍⴻⵏ ⵉⵙⵕⴰⵢⵉⵍⵉⵢⴻⵏ ⴷⴻⴳ ⵓⴳⴻⵎⵎⴰⴹ ⵓⵜⵔⵉⵎ ⴷ ⵍⵇⵓⴷⵙ ⵢⴻⵜⵜⵡⴰⴹⴹⴼⴻⵏ.

ⵖⴻⴼ ⵍⴻⵃⵙⴰⴱ ⵏ ⵜⵏⴰⵔⵉⵜ ⵏ ⵓⵙⵙⴻⵎⵢⵓⴷⴷⴻⵙ (ⵎⴰⴽⵜⴰⴱ ⵜⴰⵏⵙⵉⵇ) ⵏ ⵜⵖⴰⵡⵙⵉⵡⵉⵏ ⵜⴰⵍⵙⴰⵏⵉⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵉⴷⵓⴱⴰ ⵉⵙⵕⴰⵢⵉⵍⵉⵢⴻⵏ ⵙⴷⴻⵔⵎⴻⵏ ⴷⴻⴳ 2015, 539 ⵏ ⵢⵉⵅⵅⴰⵎⴻⵏ ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴷⴻⴳ ⵡⴰⵟⴰⵙ ⵏ ⵢⵉⵎⵓⴽⴰⵏ ⴷⴻⴳ ⵓⴳⴻⵎⵎⴰⴹ ⵓⵜⵔⵉⵎ ⴷ ⵍⵇⵓⴷⵙ, ⵢⴻⵔⵏⴰ ⴷ ⴰⵢⴰ ⴰⵢ ⵢⴻⴵⴵⴰⵏ 742 ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴰⴷ ⴼⴼⵖⴻⵏ ⵙⴻⴳ ⵡⴰⴽⴰⵍ-ⵏⵙⴻⵏ.

ⵏⵏⵉⴳ ⵡⴰⵢⴰⵏ, ⵢⴻⵔⵏⴰ ⵓⵎⴹⴰⵏ ⵏ ⵜⵓⴹⴹⴼⴰ ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⵙ ⵡⴰⵟⴰⵙ, ⵢⴻⵔⵏⴰ 4000 ⵏ ⵢⵉⴼⴰⵍⴻⵙⵟⵉⵏⵉⵢⴻⵏ ⴰⵢ ⵢⴻⵜⵜⵡⴰⵃⴻⴱⵙⴻⵏ ⴷⴻⴳ ⵜⴻⴱⵏⵉⵇⵉⵏ (ⵣⴰⵏⴰⵣⵉⵏ) ⵜⵉⵎⴻⵄⴼⴰⵏ ⵙⴻⴳ ⵡⴰⵙⵎⵉ ⴰⵢ ⴷ-ⵢⴻⴱⴷⴰ ⵓⵜⵄⴻⴷⴷⵉ-ⴰ ⵉⵙⵕⴰⵢⵉⵍⵉ.