ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵍⴻⵣⵣⴰⵢⴻⵔ ⵜⴻⵙⵜⴻⵕⵃⴻⴱ ⵙ ⵓⵙⵙⴻⴼⵄⴻⵍ ⵏ ⵓⵎⵜⴰⵡⴰ ⵉⵎⵉⵖⴻⵙ ⵏ ⵉⵕⴰⵏ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⵙⵜⴻⵕⵃⴻⴱ ⵍⴻⵣⵣⴰⵢⴻⵔ ⴰⵙⵙ ⵏ ⵍⵃⴻⴷⴷ ⴰⵙⵙⴻⴼⵄⴻⵍ ⵏ ⵓⵎⵜⴰⵡⴰ ⵖⴻⴼ ⵡⴰⵀⵉⵍ ⵉⵎⵉⵖⴻⵙ (ⵏⴰⵡⴰⵡⵉ) ⵏ ⵉⵕⴰⵏ, ⵢⴻⵔⵏⴰ ⵜⴻⵏⵏⴰ-ⴷ ⴷ ⴰⴽⴽⴻⵏ ⴰⵢⴰ ⴷ « ⴰⵙⵓⵔⵉⴼ ⵙ ⵡⴰⵣⴰⵍ-ⵏⵏⴻⵙ » ⴷⴻⴳ ⵓⴽⴰⵍⴰ (ⵎⴰⵙⴰⵔ) ⵏ ⵓⵀⴻⴷⴷⴻⵏ ⵏ ⵛⵛⵡⴰⵍ ⴷ ⵓⵃⵔⴰⵣ ⵏ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ ⵜⵉⴳⵔⴰⵖⵍⴰⵏⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⵃⴻⴷⴷ ⵢⵉⵡⴻⵏ ⵏ ⵓⵍⵖⵓ ⵏ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ.
« ⵜⴻⵙⵜⴻⵕⵃⴻⴱ ⵍⴻⵣⵣⴰⵢⴻⵔ ⵙ ⵓⵙⵙⴻⴼⵄⴻⵍ, ⵉⴹⴻⵍⵍⵉ, ⵏ ⵓⵎⵜⴰⵡⴰ (ⵉⵜⵜⵉⴼⴰⵇ) ⵖⴻⴼ ⵡⴰⵀⵉⵍ ⵉⵎⵉⵖⴻⵏ ⵏ ⵉⵕⴰⵏ ⵢⴻⵔⵏⴰ ⵜⴻⵜⵜⵡⴰⵍⵉ-ⵜ ⴷ ⴰⵙⵓⵔⵉⴼ ⵙ ⵡⴰⵣⴰⵍ-ⵏⵏⴻⵙ ⴷⴻⴳ ⵓⴽⴰⵍⴰ ⴰⵎⴻⵣⵔⵓⵢⴰⵏ ⵏ ⵓⵀⴻⴷⴷⴻⵏ ⵏ ⵜⴰⵍⵓⴼⵜ ⵉ ⵍⵎⴻⵏⴷ ⵏ ⵓⵃⵔⴰⵣ ⵏ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ ⵜⵉⴳⵔⴰⵖⵍⴰⵏⵉⵏ ⴷ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⵉ ⵍⴼⴰⵢⴷⴰ ⵏ ⵡⴰⴽⴽ ⵉⵖⴻⵔⴼⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ-ⵏⵏⵉ.
ⵜⴻⵙⵜⴻⵕⵃⴻⴱ ⴷⴰⵖ ⵍⴻⵣⵣⴰⵢⴻⵔ ⵙ ⵡⵓⵙⵙⵉⵙⴻⵏ (ⵎⴰⴵⵀⵓⴷⴰⵜ) ⴷ ⵚⵚⴱⴻⵔ ⵏ ⵢⵉⴷⵉⵙⴰⵏ ⴰⵢ ⵢⴻⵎⵛⴰⵡⴰⵕⴻⵏ ⵢⴻⵔⵏⴰ ⵙⵜⴻⵏⵢⴰⵏ ⴰⵎⵜⴰⵡⴰ-ⵏⵏⵉ, ⵉⵎⵉ ⴷ ⴰⵢⴰ ⴰⵢ ⵢⴻⵙⵙⴰⵡⴹⴻⵏ ⵖⴻⵔ ⴷ-ⵢⴻⴳⵍⵓ ⵙ ⵡⴰⵢⴻⵏ ⵢⴻⵍⵀⴰⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵍⵖⵓ-ⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷ ⴰⴽⴽⴻⵏ ⵜⵓⴽⴽⵙⴰ, ⵛⵡⵉⵟ, ⵛⵡⵉⵟ, ⵏ ⵓⵄⴰⵇⴻⴱ ⵖⴻⴼ ⵉⵕⴰⵏ ⴷ ⵍⴼⴰⵢⴷⴰ ⵜⴰⵎⴻⵇⵔⴰⵏⵜ ⴰⵢⵢⴻⵙ ⴷ-ⵢⴻⴳⵍⴰ ⵓⵎⵜⴰⵡⴰ-ⴰ ⴰⵢ ⵢⴻⵙⵙⴻⴼⴽⴻⵏ ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⵙⴻⴳ ⵡⵓⵍ ⵣⴻⴷⴷⵉⴳⴻⵏ.
ⵍⴻⵣⵣⴰⵢⴻⵔ ⵜⴻⵏⵏⴰ-ⴷ ⴷ ⴰⴽⴽⴻⵏ ⵎⴰⵣⴰⵍ-ⵉⵜⵜ ⵜⴻⴹⴹⴻⴼ ⴷⴻⴳ ⵜⴰⴽⵜⵉ ⵏ ⵜⵓⴽⴽⵙⴰ ⵏ ⵍⴻⵙⵍⴰⵃ ⵉⵎⵉⵖⴻⵙ ⴷ ⵓⵃⴱⴰⵙ ⵏ ⵓⵣⵔⴰⵄ-ⵏⵏⴻⵙ ⴷⴻⴳ ⵓⵎⴰⴹⴰⵍ, ⵢⴻⵔⵏⴰ ⵜⴻⵏⵏⴰ-ⴷ ⴷ ⴰⴽⴽⴻⵏ ⵜⵓⵎⴰⵔ (ⵜⴻⴼⵕⴻⵃ) ⵉⵎⵉ ⴰⵎⵜⴰⵡⴰ-ⴰ ⵢⴻⵙⵜⴻⵄⵕⴻⴼ ⵙ ⵓⵣⵔⴻⴼ ⴰⵏⴰⵢⴰⵏ (ⵙⵉⵢⴰⴷⵉ) ⵏ ⵜⵎⵓⵔⴰ ⴰⴽⴽⴻⵏ ⴰⴷ ⵙⵇⴻⴷⵛⴻⵏⵜ ⵜⴰⵙⵏⴰⵜⵡⵉⵍⵜ ⵜⵉⵎⵉⵖⴻⵙⵜ ⵉ ⵜⵖⴰⵡⵙⵉⵡⵉⵏ ⵢⴻⵅⴹⴰⵏ ⵟⵟⵔⴰⴷ.
« ⵍⴻⵣⵣⴰⵢⴻⵔ ⵜⴻⵙⵙⴰⵔⴰⵎ ⴷ ⴰⴽⴽⴻⵏ ⴰⵙⵓⵔⵉⴼ-ⴰ ⴰⵎⴻⵣⵔⵓⵢⴰⵏ ⴰⴷ ⴷ-ⵢⴻⵙⴷⵓⵇⵇⴻⵙ ⴰⵅⴻⴷⴷⵉⵎ ⵉ ⵍⵎⴻⵏⴷ ⵏ ⵜⵓⴽⴽⵙⴰ ⵏ ⵍⴻⵙⵍⴰⵃ ⵏ ⵜⵔⵓⵥⵉ ⵙ ⵓⵊⴻⵎⵎⴰⵍ ⵙⴻⴳ ⵓⴳⵎⵓⴹ ⴰⵍⴻⵎⵎⴰⵙ ⵢⴻⵔⵏⴰ ⴰⴷ ⵢⴻⵜⵜⴻⴽⴽⵉ ⴷⴻⴳ ⵓⵙⵙⴻⴱⴷⴻⴷ ⵏ ⵜⴻⴳⵏⴻⵡⵜ ⵏ ⵍⴰⵎⴰⵏ ⴷ ⵜⵉⵏⵏⴰⵔⴻⴳⵜ (ⴵⵉⵡⴰⵔ) ⵢⴻⵍⵀⴰⵏ ⴰⴷ ⴷ-ⵉⴳⴻⵏ ⴰⴱⵔⵉⴷ ⵉ ⵜⴰⵍⵍⵉⵜ ⵏ ⵜⴰⵍⵡⵉⵜ, ⵏ ⵓⵔⴽⴰⴷ ⴷ ⵍⴻⵀⵏⴰ ⴷⴻⴳ ⵜⴻⵎⵏⴰⴹⵜ-ⴰ ⴷ ⵜⴻⵎⵏⴰⴹⵉⵏ ⵏⵉⴹⴻⵏ », ⵖⴻⴼ ⵡⴰⴽⴽⴻⵏ ⴰⵢ ⵜⵜ-ⵉⴷ-ⵢⴻⵅⵜⴻⵎ ⵓⵍⵖⵓ ⵏ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ.
