ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵄⴰⵡⴻⴷ ⵜⵡⴻⴽⴽⴻⴷ-ⴷ ⵜⴷⵓⴽⵍⵉ ⵜⵓⵕⵓⴼⵉⵜ ⴰⴱⴷⴰⴷ-ⵏⵏⴻⵙ ⵖⴻⵔ ⵢⵉⴷⵉⵙ ⵏ ⵓⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⴰⵍⵉⴱⵉ

ⴱⵔⵓⵅⴻⵍⵍⴻⵙ – ⵜⵄⴰⵡⴻⴷ ⵜⵡⴻⴽⴽⴻⴷ-ⴷ ⵜⴷⵓⴽⵍⵉ ⵜⵓⵕⵓⴼⵉⵜ, ⴰⵙⵙ ⵏ ⵍⴻⵜⵏⵉⵢⴻⵏ, ⴰⴱⴷⴰⴷ-ⵏⵏⴻⵙ ⵖⴻⵔ ⵓⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⴰⵢ ⴷ-ⵢⴻⵍⵀⴰⵏ ⵙ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ (ⵃⵓⴽⵓⵎⴰ) ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴷⴻⴳ ⵍⵉⴱⵢⴰ, ⴷⴻⴼⴼⵉⵔ ⵓⵙⵜⴻⵏⵢⵉ ⵏ ⵓⵎⵜⴰⵡⴰ (ⵉⵜⵜⵉⴼⴰⵇ) ⴰⵢⵢⵓⵔ ⵢⴻⵣⵔⵉⵏ ⴷⴷⴰⵡ ⵍⴻⵄⵏⴰⵢⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ. ⵏⵏⵉⴳ ⵡⴰⵢⴰ, ⵜⴻⵙⵎⴻⴽⵜⵉ-ⴷ ⵜⴷⵓⴽⵍⵉ ⵜⵓⵕⵓⴼⵉⵜ ⵉ ⵡⴰⴽⴽ ⵜⵉⵎⵓⵔⴰ ⵏ ⵜⵓⴷⴷⵙⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵃⴻⴱⵙⴻⵏⵜ ⴰⵅⴻⴷⴷⵉⵎ ⴷ ⵓⵏⴰⴱⴰⴹ ⴰⵢ ⵢⴻⴹⴹⴼⴻⵏ ⵟⵔⴰⴱⵍⴻⵙ (ⵡⴰⵔ ⵎⴰ ⵙⵜⴻⵄⵕⴼⴻⵏ ⵢⴻⵙ-ⵙ ⵍⴻⴵⵏⴰⵙ).

« ⵜⴰⴷⵓⴽⵍⵉ ⵜⵓⵕⵓⴼⵉⵜ ⴷ ⵜⵎⵓⵔⴰ ⴰⵢ ⵢⴻⵜⵜⴻⴽⴽⴰⵏ ⴷⴻⴳ-ⵙ ⴰⴷ ⴱⴻⴷⴷⴻⵏⵜ ⵖⴻⵔ ⵢⵉⴷⵉⵙ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⵙ ⵢⵉⵙⴻⵎ-ⵏⵏⴻⵙ ⴷ ⴰⵏⴰⴱⴰⴹ ⵓⵣⵔⵉⴼ (ⵛⴰⵔⵄⵉ) ⴰⵡⵃⵉⴷ ⵏ ⵍⵉⴱⵢⴰ ⵢⴻⵔⵏⴰ ⵜⴻⵙⵙⵓⵜⵓⵔ ⵉ ⵡⴰⴽⴽ ⵜⵉⵙⵓⴷⴰ (ⵎⵓ’ⴰⵙⵙⴰⵙⴰⵜ) ⵜⵉⵍⵉⴱⵉⵢⵉⵏ, ⵓⵍⴰ ⴷ ⵜⵉⴷ ⵏ ⵜⴻⴷⵔⵉⵎⵜ ⴷ ⵜⴷⴰⵎⵙⴰ, ⴰⴷ ⵇⴻⴱⵍⴻⵏⵜ, ⵡⴰⵔ ⵍⴻⵄⴹⵉⵍ, ⴰⴷⴰⴱⵓ ⵏ ⵓⵏⴰⴱⴰⴹ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⴷⵓⴽⵍⵉ ⵜⵓⵕⵓⴼⵉⵜ ⴷⴻⴳ ⵢⵉⵡⴻⵏ ⵏ ⵓⵍⵖⵓ.

« ⵜⴻⵙⵎⴻⴽⵜⵉ-ⴷ ⵜⴷⵓⴽⵍⵉ ⵜⵓⵕⵓⴼⵉⵜ ⴷⴰⴽⴽⴻⵏ ⵜⴰⵏⴻⵖⵜⵓⵙⵜ (ⵇⴰⵔⴰⵔ) ⵜⵉⵙ 2259 ⵜⴻⵙⵙⵓⵜⵓⵔ ⵙⴻⴳ ⵡⴰⴽⴽ ⵉⵎⴰⵙⵍⴰⴹⴻⵏ (ⴰⵄⴹⴰ’) ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⴷ ⵃⴻⴱⵙⴻⵏ ⴰⵄⴰⵡⴻⵏ ⴷ ⵢⵉⵏⴻⵔⵎⵉⵙⴻⵏ ⵓⵏⵚⵉⴱⴻⵏ ⴷ ⵜⵙⵓⴷⴰ ⵜⵉⵎⵙⴰⴷⴰⵖⵉⵏ » ⴰⵢ ⵢⴻⵔⵔⴰⵏ ⵉⵎⴰⵏ-ⵏⵙⴻⵏⵜ ⴷ ⴰⴷⴰⴱⵓ ⵓⵣⵔⵉⴼ , ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵜⵄⴰⵡⴻⴷ ⴷⴰⵖ ⵜⵡⴻⴽⴽⴻⴷ-ⴷ ⵜⴷⵓⴽⵍⵉ ⵜⵓⵕⵓⴼⵉⵜ « ⴰⴷⵀⴰⵍ-ⵏⵏⴻⵙ (ⴷⴰⵄⵎ) ⵓⵎⵎⵉⴷ » ⵉ ⵓⵎⵜⴰⵡⴰ ⴰⵙⴻⵔⵜⵉ ⴰⵍⵉⴱⵉ ⴰⵢ ⵢⴻⵜⵜⵡⴰⵙⵜⴻⵏⵢⴰⵏ ⴰⵙⵙ ⵏ 17 ⴷⵓⵊⴻⵎⴱⴻⵕ ⴷⴷⴰⵡ ⵍⴻⵄⵏⴰⵢⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵢⴻⵔⵏⴰ ⵜⵓⵎⴰⵔ (ⵜⴻⴼⵕⴻⵃ) ⵙ ⵓⵙⵙⴻⴱⴷⴻⴷ ⵏ ⵓⵙⴻⵇⵇⴰⵎⵓ ⵏ ⵜⵙⴻⵍⵡⵉⵜ ⵢⴻⵍⵍⴰⵏ ⴷⴷⴰⵡ ⵕⵕⴰⵢ ⵏ ⴼⴰⵢⴻⵣ ⴰⵍ-ⵙⴰⵔⵔⴰⵊ.

ⵜⴰⴷⵓⴽⵍⵉ ⵜⵓⵕⵓⴼⵉⵜ ⵜⴳⴻⵔ-ⴷ ⵜⵉⵖⵔⵉ ⵉ ⵡⴰⴽⴽ ⵉⵍⵉⴱⵉⵢⴻⵏ ⴰⴽⴽⴻⵏ ⴰⴷ ⴷⴷⵓⴽⴽⵍⴻⵏ ⵖⴻⵔ ⵢⵉⴷⵉⵙ ⵏ ⵓⵏⴰⴱⴰⴹ ⴰⵎⴰⵢⵏⵓ, ⵢⴻⵔⵏⴰ ⵜⵡⴻⴽⴽⴻⴷ-ⴷ ⴷⴰⴽⴽⴻⵏ « ⵉⵃⴰⵔ ⵍⵃⴰⵍ » ⵉ ⵓⵙⵙⴻⴼⵄⴻⵍ ⵏ ⵓⵎⵜⴰⵡⴰ ⴰⵙⴻⵔⵜⵉ ⴰⵍⵉⴱⵉ, ⵍⴰⴷⵖⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ, ⴰⵎ ⵡⴰⴽⴽⴻⵏ ⴰⵢ ⵜⵄⴰⵡⴻⴷ ⵜⵡⴻⴽⴽⴻⴷ-ⴷ « ⴰⵄⴻⵡⵡⴻⵍ-ⵏⵏⴻⵙ ⵓⵎⵎⵉⴷ » ⵉ ⵓⴱⴷⴰⴷ ⵖⴻⵔ ⵢⵉⴷⵉⵙ ⵏ ⵍⵉⴱⵢⴰ ⴷ ⵓⴹⴼⴰⵔ ⵏ ⵓⵙⵙⴻⴼⵄⴻⵍ ⵓⵎⵎⵉⴷ ⵏ ⵓⵎⵜⴰⵡⴰ-ⵏⵏⵉ, ⵙ ⵓⵅⴻⴷⴷⵉⵎ ⴷ ⵓⵎⵄⴰⵡⴻⵏ ⵓⵇⵔⵉⴱ ⴷ ⵓⵏⴰⴱⴰⴹ ⴰⵎⴰⵢⵏⵓ.

ⴰⵙⴻⵇⵇⴰⵎⵓ ⴰⵙⴻⵍⵡⴰⵢⴰⵏ ⵢⴻⵍⵀⴰ-ⴷ ⵙ ⵓⵙⴻⵎⵎⵉ ⵏ ⵡⵉⴷ ⴰⴷ ⵢⴻⵜⵜⴻⴽⴽⵉⵏ ⴷⴻⴳ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴷⴻⴳ ⵍⵉⴱⵢⴰ, ⵢⴻⵔⵏⴰ ⵉⵡⴻⵅⵅⴻⵔ ⵙ 48 ⵏ ⵜⵙⴰⵄⵜⵉⵏ ⴰⵙⵙⴻⵖⵔⴻⵜ (ⵉⵄⵍⴰⵏ) ⵏ ⵢⵉⵙⵎⴰⵡⴻⵏ ⵏ ⵡⵉⴷ ⴰⴷ ⵢⴻⵜⵜⴻⴽⴽⵉⵏ ⴷⴻⴳ ⵓⵏⴰⴱⴰⴹ-ⴰ.