ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⵙⴻⵕⵛⴻⴷ ⵏ ⵓⵚⴻⵔⵔⴻⴼ ⵢⴻⵙⵙⴻⴵⵀⴻⴷ ⵜⵜⴰⵡⵉⵍⴰⵜ ⵉⵖⴻⵍⵏⴰⵡⴻⵏ ⵏ ⵓⴼⴰⵔⴻⵙ

ⵎⴻⵙⵜⵖⴰⵏⴻⵎ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵜⵏⴻⵣⴷⵓⵖⵜ, ⴰⴱⴷⴻⵍⵎⴰⴷⵊⵉⴷ ⵜⴻⴱⴱⵧⵓⵏⴻ, ⴰⵙⵙ ⵏ ⵍⵃⴻⴷⴷ, ⴷⴻⴳ ⵎⴻⵙⵜⵖⴰⵏⴻⵎ, ⴷ ⴰⴽⴽⴻⵏ ⴰⵙⵙⴻⵕⵛⴻⴷ ⵏ ⵓⵚⴻⵔⵔⴻⴼ ⴷⴻⴳ ⵓⵃⵔⵉⵛ ⵏ ⵍⴻⴱⵏⵉ ⴷ ⴰⵢⴻⵏ ⴰⵢ ⵢⴻⴵⴵⴰⵏ ⵍⴻⵣⵣⴰⵢⴻⵔ ⴰⴷ ⵜⴻⵙⵙⴻⴵⵀⴻⴷ ⵜⵜⴰⵡⵉⵍⴰⵜ-ⵏⵏⴻⵙ ⵉⵖⴻⵍⵏⴰⵡⴻⵏ ⵏ ⵓⴼⴰⵔⴻⵙ (ⵉⵏⵜⴰⴵ).

ⵎⵉ ⵢⴻⵔⵣⴰ ⵖⴻⴼ ⵜⵣⵉⴽⴽⴻⵏⵜ ⵏ ⵜⵏⴻⴳⵡⴰ (ⵎⴰⵡⴰⴷⴷ) ⵏ ⵍⴻⴱⵏⵉ ⴷⴻⴳ ⵍⵍⵓⵣⵉⵏ ⵏ ⵜⵙⵉⵕⴰⵎⵉⵜ ⵏ ⵜⵖⵉⵡⴰⵏⵜ ⵏ ⵙⵡⴰⴼⵍⴻⵢⵢⴰ, ⵢⴻⵏⵏⴰ-ⴷ ⵓⵏⴻⵖⵍⴰⴼ ⴷ ⴰⴽⴽⴻⵏ ⵜⴰⵙⴻⵔⵜⵉⵜ ⵏ ⵓⵙⵙⴻⵕⵛⴻⴷ ⵏ ⵓⵚⴻⵔⵔⴻⴼ ⵜⴻⴵⴵⴰ ⵜⵉⵕⵎⵉⵙⵉⵏ ⵜⵉⴷⵣⴰⵢⵔⵉⵢⵉⵏ ⴰⵢ ⴷ-ⵉⵅⴻⴷⴷⵎⴻⵏ ⵜⵉⵏⴻⴳⵡⴰ-ⴰ ⴰⴷ ⴷ-ⴷⴷⵓⵇⵇⵙⴻⵏⵜ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⴼⴰⵔⴻⵙ ⴰⵖⴻⵍⵏⴰⵡ ⵢⴻⵙⵙⴻⵕⵡⴰ ⴰⵙⵙⵓⵜⴻⵔ ⴰⵢ ⵜⴻⵃⵡⴰⴵ ⵜⵎⵓⵔⵜ ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵙⵏⵓⵍⴼⴰ ⴰⵟⴰⵙ ⵏ ⵢⵉⵎⵓⴽⴰⵏ ⵏ ⵓⵅⴻⴷⴷⵉⵎ.

ⵓⵍⴰ ⵎⴰ ⵜⴻⵖⵍⵉ ⵙⵙⵓⵎⴰ ⵏ ⵓⵒⵉⵜⵕⵓⵍ, ⴰⵃⵔⵉⵛ ⵏ ⵍⴻⴱⵏⵉ ⵢⴻⵏⵏⴻⵔⵏⴰ ⵙ 4%, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵜⴻⴱⴱⵧⵓⵏⴻ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⴷⴻⴳ 2016 ⴰⴷ ⵢⵉⵍⵉ ⴷ ⴰⵙⴻⴳⴳⴰⵙ ⵏ ⵜⵓⴽⵛⵉ ⵏ ⵜⵏⴻⵣⴷⵓⵖⵜ ⴷⴻⴳ ⵜⵡⵉⵍⴰⵢⵜ ⵏ ⵎⴻⵙⵜⵖⴰⵏⴻⵎ ⵙ ⵓⴼⵔⴰⵇ ⵏ 8.000 ⵏ ⵜⵏⴻⵣⴷⵓⵖⵉⵏ, ⴳⴰⵔ-ⴰⵙⴻⵏⵜ 6.000 ⵏ ⵜⵏⴻⵣⴷⵓⵖⵉⵏ ⵏ ⵡⴰⵀⵉⵍⴻⵏ ⵢⴻⵎⴳⴻⵔⵔⴰⴷⴻⵏ ⴷ 2.000 ⵏ ⵜⵏⴻⵣⴷⵓⵖⵉⵏ ⵏ ⵓⵙⵙⴻⵏⵣⵉ ⵙ ⵍⴻⴽⵔⴰ ⵏ ⴰⴰⴷⵍ.

ⵡⵉⴷ ⴰⵢ ⵢⴻⵎⵎⴻⵕⴽⴰⵏ ⴷⴻⴳ ⵡⴰⵀⵉⵍⴻⵏ ⵏ ⴰⴰⴷⵍ ⵏ 2001 ⴷ 2002 ⴷⴻⴳ ⵎⴻⵙⵜⵖⴰⵏⴻⵎ ⴰⴷ ⴰⵙⴻⵏ-ⴼⴻⵔⵇⴻⵏ ⵍⴻⴽⵡⴰⵖⴻⴹ ⵏ ⵓⵃⴰⵣⵉ ⵏ ⵜⵏⴻⵣⴷⵓⵖⵜ ⴷⴻⴳ ⵡⴰⵢⵢⵓⵔ ⵏ ⵎⴻⵖⵔⴻⵙ (410 ⵏ ⵜⵡⴰⵛⵓⵍⵉⵏ), ⴰⵎ ⵡⴰⴽⴽⴻⵏ ⴰⴷ ⵜⵜⵡⴰⴼⴻⵔⵇⴻⵏ ⵍⴻⴽⵡⴰⵖⴻⴹ-ⴰ ⴷⴰⵖ ⵉ 5.400 ⵙⴻⴳ ⵡⵉⴷ ⵢⴻⵎⵎⴻⵕⴽⴰⵏ ⴷⴻⴳ 2013, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ.