ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⵇⴱⵓⵛⵜ ⵏ ⵜⴻⴼⵔⵉⵇⵜ ⵏ ⵜⵛⵉⵔⵜ ⵏ ⵓⴼⵓⵙ: ⵍⴻⵣⵣⴰⵢⴻⵔ ⴰⴷ ⵜⵓⵔⴰⵔ ⴰⵣⴳⴻⵏ ⵏ ⵜⵏⴻⴳⴳⴰⵔⵓⵜ ⵎⴳⴰⵍ ⵜⵓⵏⴻⵙ

ⵍⵇⴰⵀⵉⵔⴰ – ⵜⵉⵖⵍⴰⵎⵉⵏ ⵏ ⵜⵛⵉⵔⵜ ⵏ ⵓⴼⵓⵙ ⵏ ⵍⴻⵣⵣⴰⵢⴻⵔ ⴷ ⵜⵓⵏⴻⵙ ⴰⴷ ⵓⵔⴰⵔⴻⵏⵜ ⴰⵣⴳⴻⵏ ⵏ ⵜⵏⴻⴳⴳⴰⵔⵓⵜ ⴰⵙⵙ ⵏ ⵍⵊⴻⵎⵄⴰ ⴷⴻⴳ ⵍⵇⴰⵀⵉⵔⴰ (ⵙ4:30 ⵙ ⵡⴰⴽⵓⴷ ⵏ ⵍⴻⵣⵣⴰⵢⴻⵔ) ⴰⴽⴽⴻⵏ ⴰⴷ ⵜⵄⴻⴷⴷⵉ ⵢⵉⵡⴻⵜ ⵙⴻⴳ-ⵙⴻⵏⵜ ⵖⴻⵔ ⵜⵏⴻⴳⴳⴰⵔⵓⵜ ⵏ ⵜⴻⵇⴱⵓⵛⵜ ⵏ ⵜⴻⴼⵔⵉⵇⵜ ⵏ ⵢⵉⵖⵍⴰⵏⴻⵏ ⵏ 2016, ⵢⴻⵔⵏⴰ ⵢⴻⵣⵎⴻⵔ ⵍⵃⴰⵍ ⴰⴷ ⵜⵉⵍⵉ ⵜⴻⵎⵍⵉⵍⵉⵜ-ⴰ ⴷ ⵜⴰⵡⴻⵄⵕⴰⵏⵜ ⵉⵎⵉ ⴰⴷ ⴷ-ⵜⵉⵍⵉ ⴳⴰⵔ ⵙⵏⴰⵜ ⵙⴻⴳ ⵜⴻⵖⵍⴰⵎⵉⵏ ⵜⵓⵥⵡⵉⵔⵉⵏ ⴰⴽⴽ ⴷⴻⴳ ⵜⴻⴼⵔⵉⵇⵜ.

ⵍⴻⵣⵣⴰⵢⴻⵔ ⴷ ⵜⵓⵏⴻⵙ ⵓⵔⴰⵔⴻⵏⵜ ⵢⴰⴳⵉ ⵙⵏⴰⵜ ⵏ ⵜⴻⵎⵍⵉⵍⵉⵢⵉⵏ ⵏ ⵜⵏⴻⴳⴳⴰⵔⵓⵜ ⴷⴻⴳ ⵜⴻⵇⴱⵓⵛⵜ ⵏ ⵜⴻⴼⵔⵉⵇⵜ ⴷⴻⴳ ⵜⴳⴰⵔⴰ-ⴰ. ⴷⴻⴳ ⵜⵉⵏ ⵏ 2012, ⴷ ⵉⵜⵓⵏⵙⵉⵢⴻⵏ ⴰⵢ ⵢⴻⵔⵏⴰⵏ ⵍⴻⵣⵣⴰⵢⴻⵔ ⴷⴻⴳ ⵎⴻⵕⵕⵓⴽ ⵙ 23 ⵖⴻⵔ 20. ⵙⴰⴽⴽⵉⵏ, ⵉⴷⵣⴰⵢⵔⵉⵢⴻⵏ ⵔⵔⴰⵏ-ⴷ ⵜⵜⴰⵕ-ⵏⵙⴻⵏ ⴷⴻⴳ 2014, ⴰⵙⵎⵉ ⴰⵢ ⴷ-ⵜⴻⵍⵍⴰ ⵜⴻⵇⴱⵓⵛⵜ-ⴰ ⴷⴻⴳ ⵍⴻⵣⵣⴰⵢⴻⵔ, ⵢⴻⵔⵏⴰ ⵔⵏⴰⵏ ⵜⵓⵏⴻⵙ ⵙ 25 ⵖⴻⵔ 21. ⵜⵉⴽⴽⴻⵍⵜ-ⴰ, ⵍⴻⵣⵣⴰⵢⴻⵔ ⴷ ⵜⵓⵏⴻⵙ ⵖⵍⵉⵏⵜ-ⴷ ⴷⴻⴳ ⵓⵣⴳⴻⵏ ⵏ ⵜⵏⴻⴳⴳⴰⵔⵓⵜ ⴷⴻⴳ ⵎⴰⵚⴻⵔ, ⵢⴻⵔⵏⴰ ⵜⵉⵏ ⴰⴷ ⵉⵔⴻⴱⵃⴻⵏ ⴰⴷ ⵜⵄⴻⴷⴷⵉ ⵖⴻⵔ ⵜⴻⵇⴱⵓⵛⵜ ⵏ ⵓⵎⴰⴹⴰⵍ ⵏ 2017 ⴰⴷ ⴷ-ⵢⵉⵍⵉⵏ ⴷⴻⴳ ⴼⵕⴰⵏⵙⴰ ⵢⴻⵔⵏⴰ, ⵎⴰ ⵜⴻⵔⵏⴰ ⵜⴻⵔⴱⴻⵃ ⵜⴰⵏⴻⴳⴳⴰⵔⵓⵜ, ⴰⴷ ⵜⴻⵜⵜⴻⴽⴽⵉ ⴷⴻⴳ ⵡⵓⵔⴰⵔⴻⵏ ⵓⵍⵉⵎⵒⵉⵢⴻⵏ ⵏ 2016.

ⵉⴷⵣⴰⵢⵔⵉⵢⴻⵏ, ⵢⴻⵍⵍⴰⵏ ⴷ ⵉⵍⵖⵓⵖⴻⵏ ⵏ ⵜⴻⴼⵔⵉⵇⵜ ⵙⴻⴳ ⵜⴻⵍⵖⵓⵖⴰ ⵢⴻⵣⵔⵉⵏ, ⵙⵙⴰⵡⴹⴻⵏ ⴰⴷ ⵇⵇⵉⵎⴻⵏ ⴷ ⵓⵙⵡⵉⵔ-ⵏⵙⴻⵏ ⵓⵥⵡⵉⵔ, ⵍⴰⴷⵖⴰ ⴷⴻⴳ ⵜⴻⵎⵍⵉⵍⵉⵜ-ⵏⵙⴻⵏ ⴷ ⵜⴻⴳⴷⵓⴷⴰ ⵜⴰⵎⴻⴳⴷⴰⵢⵜ ⵏ ⴽⵓⵏⴳⵓ ⴰⵢ ⵔⵏⴰⵏ ⵙ 34 ⵖⴻⵔ 25. ⵎⴰ ⴷ ⵉⵜⵓⵏⵙⵉⵢⴻⵏ, ⵓⵔ ⵅⵚⵉⵔⴻⵏ ⵓⵍⴰ ⴷ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵙⴻⴳ ⵡⴰⵙⵎⵉ ⴰⵢ ⵜⴻⴱⴷⴰ ⵜⴻⵍⵖⵓⵖⴰ, ⴷ ⴰⵛⵓ ⴽⴰⵏ, ⴰⵎⵣⵓⵏ ⵢⴻⵏⵇⴻⵙ ⵛⵡⵉⵟ ⵓⵙⵡⵉⵔ-ⵏⵙⴻⵏ ⴷⴻⴳ ⵙⵏⴰⵜ ⵏ ⵜⴻⵎⵍⵉⵍⵉⵢⵉⵏ-ⵏⵙⴻⵏ ⵜⵉⵏⴻⴳⴳⵓⵔⴰ ⴰⵢⴷⴻⴳ ⵔⵏⴰⵏ ⴽⴰⵎⵔⵓⵏ ⵙ 24 ⵖⴻⵔ 20, ⴷ ⴰⵏⴳⵓⵍⴰ ⵙ 23 ⵖⴻⵔ 21.