ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵎⵙⵉⵣⵡⴻⵔⵜ ⵏ ⵓⵙⵙⴻⵎⵔⴻⵙ ⵏ ⵢⵉⵙⴻⵍⵎⴰⴷⴻⵏ ⵜⴻⵔⵥⴻⵎ ⵉ ⵡⴰⴽⴽ ⵡⵉⴷ ⵢⴻⴱⵖⴰⵏ ⴰⴷ ⵜⵜⴻⴽⴽⵉⵏ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⵏ ⵓⵙⵙⴻⴳⵎⵉ ⴰⵖⴻⵍⵏⴰⵡ, ⵏⵧⵓⵔⵉⴰ ⴱⴻⵏⴳⵀⴻⴱⵔⵉⵜ, ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⴷ ⴰⴽⴽⴻⵏ « ⴰⵙⵏⵓⵎⵎⴻⴷ (ⵉⴷⵎⴰⴵ) ⵏ ⵢⵉⵙⴻⵍⵎⴰⴷⴻⵏ ⴰⵢ ⵍⴰ ⵉⵅⴻⴷⴷⵎⴻⵏ ⵙ ⵍⴻⵄⵇⴻⴷ ⵓⵔ ⴷ-ⵢⴻⵜⵜⵉⵍⵉ ⴰⵔⴰ ⵙⵔⵉⴷ, ⵢⴻⵔⵏⵓ ⵜⵉⵎⵙⵉⵣⵡⴻⵔⵜ ⵏ ⵓⵙⵙⴻⵎⵔⴻⵙ ⵏ ⵢⵉⵙⴻⵍⵎⴰⴷⴻⵏ ⵜⴻⵔⵥⴻⵎ ⵉ ⵎⴻⴷⴷⴻⵏ ⴰⴽⴽ ».
ⴷⴻⴳ ⵢⵉⵊⵉⴼⴻⵕ ⵏ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵏ ⵓⵇⴻⵢⵢⴻⵎ ⵏ ⵢⵉⵙⴻⵇⵇⵓⵎⴰ ⵏ ⵜⵙⵓⴷⴰ ⵏ ⵡⴻⵙⵡⴰⴹ (ⵜⴰⴼⵜⵉⵛ), ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ « ⵓⵔ ⴷ-ⵢⴻⵜⵜⵉⵍⵉ ⵓⵙⵏⵓⵎⵎⴻⴷ ⵡⴰⵍⴰ ⵜⵓⵣⵡⵉⵔⵜ ⵉ ⵢⵉⵙⴻⵍⵎⴰⴷⴻⵏ ⵍⴰ ⵉⵅⴻⴷⴷⵎⴻⵏ ⵙ ⵍⴻⵄⵇⴻⴷ ⴷⴻⴳ ⵓⵃⵔⵉⵛ ⵏ ⵓⵙⵙⴻⴳⵎⵉ, ⴰⵛⴽⵓ ⵜⵉⵎⵙⵉⵣⵡⴻⵔⵜ ⵜⴻⵔⵥⴻⵎ ⵉ ⵎⴻⴷⴷⴻⵏ ⴰⴽⴽ », ⵢⴻⵔⵏⵓ ⵜⵡⴻⴽⴽⴻⴷ-ⴷ ⴷ ⴰⴽⴽⴻⵏ « ⵜⵜⴻⵊⵕⵉⴱⴰ ⴰⵢ ⴷ-ⴽⴻⵙⴱⴻⵏ ⴰⴷ ⵜⴻⵏ-ⵜⴻⴵⴵ ⴰⴷ ⴷ-ⵔⵔⴻⵏ ⵖⴻⴼ ⵜⵓⵜⵜⵔⵉⵡⵉⵏ ⵏ ⵓⴽⴰⵢⴰⴷ ⵢⵓⵔⴰⵏ ⴰⵢ ⵢⴻⵃⵡⴰⴵⴻⵏ ⵜⴰⵎⵓⵙⵙⵏⵉ ⴷⴻⴳ ⵓⵏⵔⴰⵔ ⵏ ⵓⵎⵎⵓⵣⵣⴻⴳ (ⵜⴰⵅⴰⵚⵚⵓⵚ) ».
ⵜⵅⴻⴱⴱⴻⵔ-ⴷ ⴷⴰⵖ ⵜⵏⴻⵖⵍⴰⴼⵜ ⴷ ⴰⴽⴽⴻⵏ « ⴰⵣⴻⵎⵣ ⵏ ⵜⴻⵎⵙⵉⵣⵡⴻⵔⵜ ⴰⴷ ⴷ-ⵜⴻⵖⵍⵉ ⴷⴻⴳ ⵜⴳⴰⵔⴰ ⵏ ⵎⴻⵖⵔⴻⵙ, ⵎⴰⵛⴰ ⵡⴻⵔⵄⴰⴷ ⵓⵔ ⵜⵜ-ⵉⴷ-ⵙⵙⴻⴼⵔⴰⵏ ⴰⵔⴰ », ⴰⵎ ⵡⴰⴽⴽⴻⵏ ⴰⵢ ⴷ-ⵜⴻⵔⵏⴰ ⴷ ⴰⴽⴽⴻⵏ ⴰⵣⴻⵎⵣ-ⴰ ⴰⴷ ⴷ-ⵢⴻⵜⵜⵓⵏⴻⴼⴽ ⵙⴻⴳ-ⴰ ⵖⴻⴼ ⴷⴷⵓⵕⵜ.
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⵙⴻⵙⵜⴰⵏⵜ (ⵜⴰⵃⵇⵉⵇ) ⵏ ⵓⵙⵙⴻⵇⴷⴻⵛ ⵏ ⵜⴻⵀⵢⵓⴼⵉⵏ ⴷⴻⴳ ⵓⵖⴻⵔⴱⴰⵣ ⴰⵢ ⴷ-ⵢⴻⵜⵜⵡⴰⴱⴻⴷⵔⴻⵏ ⴷⴻⴳ ⴽⵔⴰ ⵏ ⵜⵜⴰⵡⵉⵍⴰⵜ ⵏ ⵢⵉⵙⴰⵍⴰⵏ, ⵜⴻⵏⴽⴻⵕ ⵎⴰⵙⵙⴰ ⴱⴻⵏⴳⵀⴻⴱⵔⵉⵜ ⴷ ⴰⴽⴽⴻⵏ ⴰⵖⵍⵉⴼ-ⵏⵏⴻⵙ « ⵉⵄⴻⵎⵎⴻⴷ ⴰⴷ ⴷ-ⵜⵉⵍⵉ ⵜⵙⴻⵙⵜⴰⵏⵜ-ⴰ, ⵢⴻⵔⵏⵓ ⵜⴻⵏⵏⴰ-ⴷ ⴷ ⴰⴽⴽⴻⵏ ⵓⵔ ⵜⵛⵉⴽⴽ ⴰⵔⴰ ⴰⴽⴽ ⵜⴻⵍⵍⴰ-ⴷ ⵜⵙⴻⵙⵜⴰⵏⵜ-ⴰ ⴷⴻⴳ ⵜⵉⴷⴻⵜ ».
ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷⴻⴳ ⵜⴻⵎⵙⴰⵍⵜ-ⴰ ⴷ ⴰⴽⴽⴻⵏ « ⵜⴰⵙⴻⵙⵜⴰⵏⵜ ⴷⴻⴳ ⵓⵏⵔⴰⵔ ⵜⴻⵃⵡⴰⴵ ⴰⵇⴰⴷⴻⵔ ⵏ ⵜⴻⵙⵏⴰⵔⵔⴰⵢⵜ (ⵎⴰⵏⵀⴰⴵⵉⵢⵢⴰ) ⵜⵓⵙⵙⵏⴰⵏⵜ ⴷ ⵓⵇⴱⴰⵍ ⵏ ⵓⵖⵍⵉⴼ ⵏ ⵓⵙⵙⴻⴳⵎⵉ ». ⴷ ⴰⵛⵓ ⴽⴰⵏ, ⵜⴼⵓⵕⴻⵙ ⵜⴰⴳⵏⵉⵜ-ⴰ ⴰⴽⴽⴻⵏ ⴰⴷ ⴷ-ⵜⵄⴻⵢⵢⴻⵏ ⵖⴻⴼ ⵓⵎⵉⵀⵉ (ⵅⴰⵟⴰⵔ) ⵏ ⵜⴻⵀⵢⵓⴼⵉⵏ ⴷⴻⴳ ⵓⵖⴻⵔⴱⴰⵣ, ⵓⵍⴰ ⵎⴰ ⵢⵉⵡⴻⵏ ⴽⴰⵏ ⵏ ⵓⴱⴰⵍⵎⵓⴷ ⴰⵢ ⵍⴰ ⵜⴻⵏⵜ-ⵢⴻⵙⵙⴻⵇⴷⴰⵛⴻⵏ.
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⴼⵔⴰⵇ ⵏ ⵜⴽⴰⵔⴹⴰ ⵏ ⵜⵎⴰⴳⵉⵜ (ⵀⵓⵡⵉⵢⵢⴰ) ⵜⴰⴱⵢⵓⵎⵉⵜⵔⵉⵜ ⵉ ⵡⵉⴷ ⴰⴷ ⵢⴻⵙⵄⴻⴷⴷⵉⵏ ⵍⴱⴰⴽ, ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ ⵎⴰⵣⴰⵍ ⵉⵅⵓⵚⵚ ⵛⵛⵖⴻⵍ-ⴰ ⴷⴻⴳ ⴽⵔⴰ ⵏ ⵜⵡⵉⵍⴰⵢⵉⵏ, ⵢⴻⵔⵏⵓ ⵜⴻⵏⵏⴰ-ⴷ ⴷ ⴰⴽⴽⴻⵏ ⴰⴷ ⴷ-ⵀⴻⵢⵢⵉⵏ ⴰⵀⵉⵍ ⵙ ⵓⵎⵄⴰⵡⴻⵏ ⴷ ⵜⵎⴻⵀⵍⵉⵡⵉⵏ (ⵎⵓⴷⵉⵔⵉⵢⵢⴰⵜ) ⵏ ⵓⵙⵙⴻⴳⵎⵉ ⴷ ⵜⴻⴷⴱⴻⵍⵜ ⴰⴽⴽⴻⵏ ⴰⴷ ⴼⵔⵓⵏ ⵓⴳⵓⵔⴻⵏ-ⴰ ⴷⴻⴳ ⵜⵡⵉⵍⴰⵢⵉⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ.
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⵙⴻⵍⵎⴻⴷ ⵏ ⵜⵎⴰⵣⵉⵖⵜ, ⵜⴻⵏⵏⴰ-ⴷ ⵜⵏⴻⵖⵍⴰⴼⵜ ⴷ ⴰⴽⴽⴻⵏ ⴰⵙⵙⴻⵍⵎⴻⴷ ⵏ ⵜⵓⵜⵍⴰⵢⵜ-ⴰ ⵓⵔ ⵉⵅⵓⵍⴻⴼ ⴰⵔⴰ ⵜⴰⵎⴻⵏⴹⴰⵡⵜ (ⴷⵓⵙⵜⵓⵔ), ⴰⵎ ⵡⴰⴽⴽⴻⵏ ⴰⵢ ⴷ-ⵜⴻⵙⵎⴻⴽⵜⵉ ⴷ ⴰⴽⴽⴻⵏ ⴰⵜⵜⴰⵏ ⵍⴰ ⵜⴻⵜⵜⵡⴰⵙⵙⴻⵍⵎⴰⴷ ⵢⴰⴳⵉ ⴷⴻⴳ 28 ⵏ ⵜⵡⵉⵍⴰⵢⵉⵏ.
ⵏⵏⵉⴳ ⵡⴰⵢⴰ, ⵜⴻⵏⵏⴰ-ⴷ ⴷ ⴰⴽⴽⴻⵏ ⵓⵍⴰⵛ ⴰⴽⴽ ⴽⵔⴰ ⵏ ⵓⵃⴻⵣⵣⵉⴱ ⴰⵢ ⵢⴻⵜⵜⵡⴰⴷⴷⵎⴻⵏ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⵔⴰⵡⵜ ⵏ ⵜⵎⴰⵣⵉⵖⵜ ⵙ ⵓⴳⴻⵎⵎⴰⵢ ⵏ ⵜⴼⵉⵏⴰⵖ, ⵙ ⵡⵉⵏ ⵏ ⵜⴰⵄⵕⴰⴱⵜ ⵏⴻⵖ ⵙ ⵓⵍⴰⵜⵉⵏⵉ ⵉ ⵓⵙⵙⴻⵍⵎⴻⴷ ⵏ ⵜⵓⵜⵍⴰⵢⵜ-ⴰ, ⵢⴻⵔⵏⵓ ⵜⴰⵎⵙⴰⵍⵜ-ⴰ ⴰⴷ ⵜⴻⴼⵔⵓ ⴰⵙⵎⵉ ⴰⴷ ⴷ-ⵜⴻⵏⵏⵓⵍⴼⵓ ⵜⴽⴰⴷⵉⵎⵉⵜ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ.
