ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⴱⵓⵛⵉⴹⴰⵏ ⵏ ⵡⵉⵏⵙⵜⵧⵏ ⵢⴻⵏⵖⴰ 42 ⵏ ⵢⴻⵎⴷⴰⵏⴻⵏ ⴷⴻⴳ ⵜⴻⴳⵣⵉⵔⵉⵏ ⵏ ⴼⵉⵊⵉ

ⵙⵓⵠⴰ (ⴼⵉⵊⵉ), – ⵏⵏⴰⵏ-ⴷ ⵢⵉⴷⵓⴱⴰ ⵏ ⵜⴻⴳⵣⵉⵔⵉⵏ ⵏ ⴼⵉⵊⵉ, ⴰⵙⵙ ⵏ ⵍⴰⵕⴻⴱⵄⴰ, ⴷ ⴰⴽⴽⴻⵏ ⴰⴱⵓⵛⵉⴹⴰⵏ ⵏ ⵡⵉⵏⵙⵜⵧⵏ, ⵢⴻⵍⵍⴰⵏ ⴷ ⴰⴱⵓⵛⵉⴹⴰⵏ ⴰⵎⴻⵇⵔⴰⵏ ⴰⴽⴽ ⴷⴻⴳ ⵓⵎⴻⵣⵔⵓⵢ ⵏ ⵜⵎⵓⵔⵜ-ⴰ, ⵢⴻⴳⵍⴰ ⵙ 42 ⵏ ⵜⵎⴻⴷⴷⵓⵔⵉⵏ.

« 42 ⵏ ⵢⵉⵎⴷⴰⵏⴻⵏ ⴰⵢ ⴷ-ⵢⴻⵜⵜⵡⴰⵡⴻⴽⴽⴷⴻⵏ ⵎⵎⵓⵜⴻⵏ, ⵢⴻⵔⵏⵓ ⵎⴰⵣⴰⵍ ⵉⵎⴻⵥⵍⴰ (ⵎⴰⵚⴰⵍⵉⵃ) ⵏ ⵓⵙⵙⵓⴽⴽⴻⵙ ⵍⴰ ⵜⵜⴰⵣⵏⴻⵏ ⵜⵉⵖⵍⴰⵎⵉⵏ ⴰⴽⴽⴻⵏ ⴰⴷ ⵄⴰⵡⵏⴻⵏ ⵉⵎⴷⴰⵏⴻⵏ ⴰⵢ ⵢⴻⵏⴹⴻⵔⵔⴻⵏ ⴷⴻⴳ ⵜⴻⵎⵏⴰⴹⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⴻⴳⵣⵉⵔⵉⵏ ⵏ ⴼⵉⵊⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴷⴰⵏ ⴳⴰⵠⵉⴷⵉ, ⴰⵎⵓⵜⵍⴰⵢ ⵏ ⵓⵏⴰⴱⴰⴹ (ⵃⵓⴽⵓⵎⴰ) ⴷⴻⴳ ⵜⵡⵉⵜⵜⴻⵔ.

ⵖⴻⴼ ⵍⴻⵃⵙⴰⴱ ⵏ ⵓⵎⴰⵙⴰⵢ (ⵎⴰⵙ’ⵓⵍ) ⵏ ⵓⵎⵉⴷⴰⴳ ⴰⵣⴻⵡⵡⴰⵖ ⵉ ⵓⴳⴰⵔⴰⵡ ⴰⵎⴻⵍⵡⵉ, ⴰⵀⵎⴰⴷ ⵙⴰⵎⵉ, ⵜⴰⵛⵔⴰⵡⵜ-ⴰ ⵍⴰ ⵜⴻⵜⵜⵉⵎⵖⵓⵔ ⵖⴻⴼ ⵍⴻⵃⵙⴰⴱ ⵏ ⵢⵉⵙⴰⵍⴰⵏ ⴰⵢ ⵍⴰ ⴷ-ⵢⴻⵜⵜⴰⵡⴹⴻⵏ ⵙⴻⴳ ⵢⵉⵎⵓⴽⴰⵏ ⵉⴱⴻⵄⴷⴻⵏ.

ⴰⴱⵓⵛⵉⴹⴰⵏ ⵏ ⵡⵉⵏⵙⵜⵧⵏ ⵉⵡⴻⵜ-ⴷ ⵜⵉⴳⵣⵉⵔⵉⵏ ⵏ ⴼⵉⵊⵉ ⴷⴻⴳ ⵢⵉⴹ ⵏ 20 ⵖⴻⵔ 21 ⴼⵓⵕⴰⵕ ⵙ ⵡⴰⴹⵓ ⴰⵢ ⵢⴻⵡⵡⴹⴻⵏ ⵖⴻⵔ 325 ⵏ ⵢⵉⴽⵉⵍⵓⵎⵉⵜⵔⴻⵏ ⴷⴻⴳ ⵜⵙⴰⵄⴻⵜ, ⵢⴻⵔⵏⵓ ⵢⴻⵙⵙⴻⴷⵔⴻⵎ ⴰⵟⴰⵙ ⵏ ⵍⴱⴻⵏⵢⴰⵏⴰⵜ ⴰⵎ ⵡⴰⴽⴽⴻⵏ ⴰⵢ ⵉⵃⴻⵜⵜⴻⵎ ⵉⵎⴻⵣⴷⴰⵖⴻⵏ ⴰⴷ ⵔⴻⵡⵍⴻⵏ ⵖⴻⵔ ⵡⴰⵎⵎⴰⵙⴻⵏ ⵏ ⵜⵓⵄⵊⵉⵍⵉⵏ.

ⴷ ⵡⴰ ⴰⵢ ⴷ ⴰⴱⵓⵛⵉⴹⴰⵏ ⵏ ⵜⴰⴳⴳⴰⵢⵜ ⵜⵉⵙ 5 ⴰⵡⵃⵉⴷ ⴰⵢ ⵉⵃⵓⵣⴰⵏ ⵜⵉⴳⵣⵉⵔⵉⵏ ⵏ ⴼⵉⵊⵉ ⴰⵢⴷⴻⴳ ⵣⴻⴷⵖⴻⵏ 900.000 ⵏ ⵢⵉⵎⴻⵣⴷⴰⵖⴻⵏ. ⵜⴰⴷⴰⵎⵙⴰ ⵏ ⵜⵎⵓⵔⵜ-ⴰ ⵜⴻⵜⵜⴽⴻⵍ ⵙ ⵡⴰⵟⴰⵙ ⵖⴻⴼ ⵜⵎⴻⵔⵔⵉⵜ (ⵙⵉⵢⴰⵃⴰ).

ⵍⴻⵎⵄⴰⵡⵏⴰ ⵉ ⵡⵉⴷ ⵢⴻⵏⴹⴻⵔⵔⴻⵏ ⵙⴻⴳ ⵓⴱⵓⵛⵉⴹⴰⵏ-ⴰ ⵍⴰ ⴷ-ⵜⴻⵜⵜⴰⵡⴻⴹ ⵖⴻⵔ ⵜⴻⴳⵣⵉⵔⵜ ⵜⴰⴳⴻⵊⴷⴰⵏⵜ ⵏ ⵠⵉⵜⵉ ⵍⴻⵠⵓ, ⴷ ⴰⵛⵓ ⴽⴰⵏ, ⴽⵔⴰ ⵙⴻⴳ ⵜⵓⴷⴷⴰⵔ ⴰⵢ ⵢⴻⵏⴹⴻⵔⵔⴻⵏ ⵓⴳⴰⵔ ⵣⴳⴰⵏⵜ-ⴷ ⴷⴻⴳ ⵜⴻⴳⵣⵉⵔⵉⵏ ⵜⵓⴱⵄⵉⴷⵉⵏ ⵡⵓⵖⵓⵔ ⵡⴻⵔⵄⴰⴷ ⵓⵔ ⴷⴷⵉⵏ ⴰⵔⴰ ⵢⴻⵎⵙⵓⴽⴽⵙⴻⵏ.

ⵎⴰ ⴷ ⴰⵏⴻⵖⵍⴰⴼ ⴰⵎⴻⵏⵣⵓ, ⵠⵧⵔⴻⵇⴻ ⴱⴰⵉⵏⵉⵎⴰⵔⴰⵎⴰ, ⵉⴳⴻⵔ-ⴷ ⵜⵉⵖⵔⵉ ⴰⵙⵙ ⵏ ⵜⵜⵍⴰⵜⴰ ⵉ ⵡⵉⴷ ⵢⴻⵏⴹⴻⵔⵔⴻⵏ ⴰⴽⴽⴻⵏ ⴰⴷ ⵚⴻⴱⵔⴻⵏ. « ⵏⴻⵥⵔⴰ ⵜⴰⴳⵏⵉⵜ-ⵏⵡⴻⵏ ⵢⴻⵙⵙⴻⵃⵣⴰⵏⴻⵏ ⴷ ⵍⵅⴻⵍⵄⴰ ⴰⵢⴷⴻⴳ ⵜⴻⵍⵍⴰⵎ ⴽⴻⵏⵡⵉ ⴷ ⵜⵡⴰⵛⵓⵍⵉⵏ-ⵏⵡⴻⵏ (…) ⵎⴰⵛⴰ ⵙ ⵢⵉⵙⴻⵎ-ⵉⵏⵓ ⴷ ⴰⵏⴻⵖⵍⴰⴼ ⴰⵎⴻⵏⵣⵓ, ⴱⵖⵉⵖ ⴰⴷ ⵜⴻⵥⵔⴻⵎ ⴷ ⴰⴽⴽⴻⵏ ⵓⵔ ⵏⴻⵜⵜⵀⴻⵏⵏⵉ ⴰⵔⴰ ⴰⵔⵎⴰ ⵏⴻⵡⵡⴻⴹ ⵖⴻⵔ-ⵡⴻⵏ ».