ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴰⵎⴻⵏⵖⴻⵙⵜ: ⴰⵃⵓⴷⴷⵓ ⵏ ⵜⵡⴻⵏⵏⴰⴹⵜ ⵢⴻⵃⵡⴰⴵ ⴰⴱⴳⴰⵙ ⵏ ⵡⴰⴽⴽ ⵜⵉⵣⴻⵎⵎⴰⵔ ⵏ ⵜⵡⵉⵍⴰⵢⵜ (ⵜⵉⴷⴷⵓⴽⵍⵉⵡⵉⵏ)
ⵜⴰⵎⴻⵏƔⴻⵙⵜ - ⴳⵔⴻⵏⵜ-ⴷ ⵜⵉⵖⵔⵉ ⵜⵉⴷⴷⵓⴽⵍⵉⵡⵉⵏ ⴷ ⵢⵉⴳⴻⵎⵎⵉⴳⴻⵏ (ⴼⴰⵄⵉⵍⵉⵏ) ⵏ ⵜⵎⴻⵜⵜⵉ ⵜⴰⵖⴰⵔⵉⵎⵜ ⵏ ⵜⵡⵉⵍⴰⵢⵜ ⵏ ⵜⵎⴻⵏⵖⴻⵙⵜ ⴰⴽⴽⴻⵏ ⴰⴷ ⵎⵄⴰⵡⴰⵏⴻⵏ ⴰⴽⴽ ⵢⵉⴷⵉⵙⴰⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⵉ ⵡⴻⵃⴱⴰⵙ ⵏ ⵡⴻⵣⵔⴰⵄ ⵏ ⵜⵓⵔⵙⴰⴹ ⴷⴻⴳ ⵜⵎⴰⵏⴻⵖⵜ-ⴰ ⵏ ⵓⵀⴰⴳⴳⴰⵕ.
ⵜⴰⴳⵏⵉⵜ-ⴰ ⵜⴰⵎⴻⵛⵖⴰⴱⵜ ⵜⴻⵛⵛⵎⴻⵜ ⵜⵓⴳⵏⴰ ⵜⴰⵎⴻⵔⵔⴰⵢⴰⵏⵜ (ⵙⵉⵢⴰⵃⵉⵢⵢⴰ) ⵏ ⵜⴻⵎⴷⵉⵏⵜ ⵏ ⵜⵎⴻⵏⵖⴻⵙⵜ, ⵢⴻⵔⵏⵓ ⵜⴹⵓⵔⵔ ⵜⴰⵡⴻⵏⵏⴰⴹⵜ-ⵏⵏⴻⵙ. ⵙ ⵡⴰⵢⴰ, ⵢⴻⵙⵙⴻⴼⴽ ⴰⴽⴽ ⵜⵉⵣⴻⵎⵎⴰⵔ ⵜⵉⴷⵉⴳⴰⵏⵉⵏ (ⵎⴰⵃⴰⵍⵍⵉⵢⵢⴰ) ⴰⴷ ⵜⵜⴻⴽⴽⵉⵏⵜ ⴷⴻⴳ ⵓⵙⵙⵉⵣⴷⴻⴳ ⵏ ⵜⵡⴻⵏⵏⴰⴹⵜ, ⴰⵎ ⵡⴰⴽⴽⴻⵏ ⴰⵢ ⵢⴻⵙⵙⴻⴼⴽ ⴰⴷ ⵢⴻⴳⴳⴻⵜ ⵛⵛⵖⴻⵍ ⵏ ⵡⴻⵙⵃⵓⵍⴼⵓ ⵏ ⵎⴻⴷⴷⴻⵏ ⴷ ⵜⵓⵥⵓⵜ ⵏ ⵢⴻⴷⵍⴻⵙ ⵏ ⵡⴻⵃⵔⴰⵣ ⵏ ⵜⵡⴻⵏⵏⴰⴹⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵏⵏⴰⵏ ⵡⵉⴷ ⴰⵢ ⴷ-ⵢⴻⴳⵔⴻⵏ ⵜⵉⵖⵔⵉ.
ⵢⴻⵏⵏⴰ-ⴷ ⵓⵙⴻⵍⵡⴰⵢ ⵏ ⵜⵏⴰⵔⵉⵜ (ⵎⴰⴽⵜⴰⴱ) ⵏ ⵜⵡⵉⵍⴰⵢⵜ ⵏ ⵜⵉⴷⴷⵓⴽⵍⴰ ⵏ ⵢⵉⵍⴻⵎⵥⵉⵢⴻⵏ ⴰⴳⴳⴰⴳⴻⵏ (ⵎⵓⵜⴰⵇⵇⴰⴼⵉⵏ), ⴰⴱⴷⴻⵍⴳⵀⴰⵏⵉ ⵎⴻⴷⴻⴱ, ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⵢⴻⵜⵜⵓⵏⴻⴼⴽ ⵡⴰⵣⴰⵍ ⵉ ⵍⴻⵛⵖⴰⵍ ⵉⵇⴻⵔⴱⴻⵏ ⵖⴻⵔ ⵎⴻⴷⴷⴻⵏ ⵢⴻⵔⵏⵓ ⴷ ⵜⵉⴷⴷⵓⴽⵍⵉⵡⵉⵏ ⴰⵢ ⵢⴻⵙⵙⴻⴼⴽⴻⵏ ⴰⴷ ⴳⴻⵏⵜ ⴰⵢⴰ ⵙ ⵡⴻⵎⵄⴰⵡⴻⵏ ⴷ ⵡⵓⴷⵓⵙⴻⵏ ⴷ ⵜⴻⵕⵎⵙⵉⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⵉ ⵓⵙⵙⵉⵣⴷⴻⴳ ⵏ ⵜⵡⴻⵏⵏⴰⴹⵜ.
ⵉⵡⴻⴽⴽⴻⴷ-ⴷ ⴷⴰⵖ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵓⵙⵙⴻⵜⵔⴻⵔ (ⵄⴰⵚⵔⴰⵏⴰ) ⵏ ⵜⵜⴰⵡⵉⵍⴰⵜ ⵏ ⵓⵙⵙⵉⵣⴷⴻⴳ ⵏ ⵜⴻⵎⴷⵉⵏⵜ ⴰⴽⴽⴻⵏ ⴰⴷ ⴷ-ⵢⵉⵍⵉ ⵓⵙⵙⵉⵣⴷⴻⴳ ⴰⴽⴽⴻⵏ ⵉⵡⴰⵜⴰ ⵢⴻⵔⵏⵓ ⴰⴷ ⵏⴻⵇⵙⴻⵏ ⵡⴰⴹⴹⴰⵏⴻⵏ ⴰⵢ ⴷ-ⵢⴻⵜⵜⴻⴽⴽⴻⵏ ⵙⴻⴳ ⵡⴰⵎⵎⵓⵙ ⵏ ⵜⵡⴻⵏⵏⴰⴹⵜ.
ⵎⴰ ⴷ ⴰⵎⴰⵙⴰⵢ (ⵎⴰⵙ’ⵓⵍ) ⵏ ⵢⵉⵡⴻⵜ ⵏ ⵜⵏⴻⴳⴳⴰ ⵏ ⵜⵎⴻⵔⵔⵉⵜ ⵏ ⵜⵎⴻⵏⵖⴻⵙⵜ, ⴰⵀⵎⴻⴷ ⵀⴰⵎⴷⴰⵧⵓⵉ, ⵉⵡⴻⴽⴽⴻⴷ-ⴷ ⴷⴰⴽⴽⴻⵏ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵡⴻⵎⵄⴰⵡⴻⵏ ⵉ ⵡⴻⵃⵔⴰⵣ ⵏ ⵜⵓⴳⵏⴰ ⵜⵓⵛⴱⵉⵃⵜ ⵏ ⵜⵎⴰⵏⴻⵖⵜ ⵏ ⵓⵀⴰⴳⴳⴰⵕ ⵢⴻⵜⵜⵡⴰⵙⵙⵏⴻⵏ ⵙ ⵜⵎⴻⵔⵔⵉⵜ, ⵍⴰⴷⵖⴰ ⵉⵎⵉ ⴰⵎⵎⵓⵙ ⴷ ⵡⴻⵅⵚⴰⵔ ⵏ ⵜⵡⴻⵏⵏⴰⴹⵜ ⵢⴻⵣⵎⴻⵔ ⴰⴷ ⵉⴹⵓⵔⵔ ⵜⴰⵎⴻⵔⵔⵉⵜ ⵢⴻⵍⵍⴰⵏ ⴷ ⴰⵃⵔⵉⵛ ⴰⵢⵢⴻⵙ ⵜⴻⵜⵜⵣⵓⵅⵅⵓ ⵜⴻⵎⵏⴰⴹⵜ-ⴰ.
