ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵓⵏⴻⵙ: ⵜⴻⴱⴷⴰ ⵜⴻⴷⵡⵉⵍⵜ ⵜⵉⵙ 34 ⵏ ⵓⵙⴻⵇⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ ⵏ ⵍⵎⴻⵖⵔⴻⴱ ⴰⵄⵕⴰⴱ
ⵜⵓⵏⴻⵙ - ⵜⴻⴱⴷⴰ ⵜⴻⴷⵡⵉⵍⵜ ⵜⵉⵙ 34 ⵏ ⵓⵙⴻⵇⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ ⵏ ⵜⴷⵓⴽⵍⵉ ⵏ ⵍⵎⴻⵖⵔⴻⴱ ⴰⵄⵕⴰⴱ ⴰⵙⵙ ⵏ ⵍⴻⵅⵎⵉⵙ ⴷⴻⴳ ⵜⵓⵏⴻⵙ, ⴷ ⵜⵉⵏ ⴰⵢⴷⴻⴳ ⴰⴷ ⵜⴻⵜⵜⴻⴽⴽⵉ ⵍⴻⵣⵣⴰⵢⴻⵔ ⵙ ⵓⵏⴻⵖⵍⴰⴼ-ⵏⵏⴻⵙ ⵏ ⵜⵖⴰⵡⵙⵉⵡⵉⵏ ⵏ ⵍⵎⴻⵖⵔⴻⴱ, ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ.
ⵉⵏⴻⵖⵍⴰⴼⴻⵏ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ ⵏ ⵜⴷⵓⴽⵍⵉ ⵏ ⵍⵎⴻⵖⵔⴻⴱ ⴰⵄⵕⴰⴱ ⴰⴷ ⵙⵙⵉⵡⵍⴻⵏ, ⴷⴻⴳ ⵜⴻⴷⵡⵉⵍⵜ-ⴰ, ⵖⴻⴼ ⵜⴻⵎⵙⴰⵍ ⵜⴰⵄⵕⴰⴱⵉⵏ, ⵜⵉⴳⵔⴰⵖⵍⴰⵏⵉⵏ ⴷ ⵜⴻⵎⵏⴰⴹⴰⵏⵉⵏ, ⴷ ⵡⴻⵎⵄⴰⵡⴻⵏ ⴳⴰⵔ ⵜⴷⵓⴽⵍⵉ ⴷ ⵜⵓⴷⴷⵉⵙⵉⵏ ⵜⵉⵎⵏⴰⴹⴰⵏⵉⵏ ⴷ ⵜⴻⴳⵔⴰⵖⵍⴰⵏⵉⵏ.
ⴰⴷ ⴷ-ⵙⵙⵓⴽⴽⴻⵏ ⵜⵉⵟ ⵢⴻⵎⵜⵜⴻⴽⴽⵉⵢⴻⵏ ⵖⴻⴼ ⵜⴻⴳⵏⵉⵜ ⴷⴻⴳ ⵜⵎⵓⵔⴰ ⵏ ⵙⵙⴰⵃⴻⵍ ⴷ ⵡⴻⵎⵄⴰⵡⴻⵏ ⴰⵖⴻⵍⵍⵉⵙⴰⵏ (ⴰⵎⵏⵉ) ⴳⴰⵔ ⵜⵎⵓⵔⴰ ⵏ ⵜⴷⵓⴽⵍⵉ. ⴰⴷ ⴷ-ⵙⴻⵎⵎⵉⵏ ⴷⴰⵖ ⴰⵎⴰⵔⵓ ⴰⵎⴰⵜⵓ ⴰⵎⴰⵢⵏⵓ ⵏ ⵜⴷⵓⴽⵍⵉ ⵏ ⵍⵎⴻⵖⵔⴻⴱ ⴰⵄⵕⴰⴱ ⴷⴻⴳ ⵡⴻⵎⴽⴰⵏ ⵏ ⵎⴰⵙⵙ ⵍⴰⵀⴱⵉⴱ ⴱⴻⵏⵢⴰⵀⵉⴰ.
ⵢⴻⵏⵏⴰ-ⴷ ⵎⴰⵙⵙ ⵎⴻⵙⵙⴰⵀⴻⵍ ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ (ⵜⴰⵚⵔⵉⵃ) ⵏ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ ⴷⴰⴽⴽⴻⵏ ⵜⵉⵎⵍⵉⵍⵉⵢⵉⵏ-ⴰ ⴷ ⵜⵉⴷ ⴰⵢⴷⴻⴳ ⴰⴷ ⴷ-ⵜⵜⵡⴰⵇⴻⴷⴷⵎⴻⵏ ⵢⴻⵔⵏⵓ ⴰⴷ ⵜⵜⵡⴰⵇⴻⵢⵢⵎⴻⵏ ⵍⴻⵛⵖⴰⵍ ⴰⵢ ⴷ-ⵢⴻⵍⵍⴰⵏ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⵏⵏⵓⵍⴼⴰ ⵜⴷⵓⴽⵍⵉ ⵏ ⵍⵎⴻⵖⵔⴻⴱ ⴰⵄⵕⴰⴱ (1989) ⴷ ⴷⴷⵓⵕ-ⵏⵏⴻⵙ ⴷⴻⴳ ⵜⴻⵎⵏⴰⴹⵜ.
ⴷⵖⴰ ⵉⵡⴻⴽⴽⴻⴷ-ⴷ, ⴷⴻⴳ ⵜⴻⵎⵙⴰⵍⵜ-ⴰ, ⴷⴰⴽⴽⴻⵏ ⵍⴻⵣⵣⴰⵢⴻⵔ ⵜⴻⵜⵜⵡⴰⵍⵉ ⵢⴻⵙⵙⴻⴼⴽ ⵓⵄⴰⵡⴻⴷ ⵏ ⵜⵎⵓⵖⵍⵉ ⴷⴻⴳ ⵓⵏⴰⴳⵔⴰⵡ ⴷ ⵜⴻⵎⵚⵓⴽⵉⵏ (ⵀⴰⵢⴰⴽⵉⵍ) ⵏ ⵜⴷⵓⴽⵍⵉ ⵏ ⵍⵎⴻⵖⵔⴻⴱ ⴰⵄⵕⴰⴱ ⴰⴽⴽⴻⵏ ⴰⴷ ⵜⴻⵣⵎⴻⵔ ⴰⴷ ⵜⵇⴰⴱⴻⵍ ⵉⵛⵇⵉⵔⵔⵡⴻⵏ ⵉⵎⵏⴰⴹⴰⵏⴻⵏ ⴷ ⵢⴻⴳⵔⴰⵖⵍⴰⵏⴻⵏ, ⵍⴰⴷⵖⴰ ⵜⴰⵔⴻⵎⵎⵉⵖⵜ (ⵉⵔⵀⴰⴱ), ⵉⵏⵉⴳ ⵢⴻⴼⴼⵖⴻⵏ ⵉ ⵍⵇⴰⵏⵓⵏ ⴷ ⵓⵙⵙⴻⵜⵜⵉ ⵏ ⵜⴻⵀⵢⵓⴼⵉⵏ.
ⵢⴻⵏⵏⴰ-ⴷ ⴷⴰⵖ ⵓⵏⴻⵖⵍⴰⴼ ⴷⴰⴽⴽⴻⵏ ⵉⵥⵓⵢⴰⵔ (ⵇⴰⵡⴰⵏⵉⵏ) ⴰⵢ ⵢⴻⵙⵙⴻⴷⴷⴰⵢⴻⵏ ⵜⴰⴷⵓⴽⵍⵉ ⵏ ⵍⵎⴻⵖⵔⴻⴱ ⴰⵄⵕⴰⴱ ⵜⵜⵡⴰⵅⴻⴷⵎⴻⵏ- 27 ⵏ ⵢⵉⵙⴻⴳⴳⴰⵙⴻⵏ ⴰⵢⴰ ⵢⴻⵔⵏⵓ ⵓⵔ ⵜⴻⵏ-ⵎⴰⵣⴰⵍ ⵎⵢⴻⵣⴷⴻⴳ ⴷ ⵓⵎⴰⴹⴰⵍ ⵏ ⵡⴰⵙⵙ-ⴰ, ⵢⴻⵔⵏⵓ ⵉⵡⴻⴽⴽⴻⴷ-ⴷ ⴷⴰⴽⴽⴻⵏ ⵍⴻⵣⵣⴰⵢⴻⵔ ⵍⴰ ⵜⴻⵙⵙⵓⵜⵓⵔ ⵙⴻⴳ 2012 ⴰⴽⴽⴻⵏ ⴰⴷ ⴷ-ⵢⵉⵍⵉ ⵡⴻⵙⵎⴻⵙⴽⴻⵍ (ⵉⵚⵍⴰⵃ) ⵏ ⵜⴷⵓⴽⵍⵉ-ⴰ ⴷ ⵓⵄⴰⵡⴻⴷ ⵏ ⵜⵎⵓⵖⵍⵉ ⴷⴻⴳ ⵢⵉⵥⵓⵢⴰⵔ ⴰⵢ ⵜⵜ-ⵉⴷ-ⵢⴻⵙⴱⴻⴷⴷⴻⵏ.
