ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵎⴰⵙⵙ ⴱⴻⵙⵙⴰⵉⴻⵀ ⴷ ⴰⴷⵉⵒⵍⵓⵎⴰⵜⵉ ⵓⵥⵡⵉⵔ ⴰⵢ ⵢⴻⴹⴹⴼⴻⵏ ⴰⵛⵃⴰⵍ ⴷ ⴰⵎⴽⴰⵏ ⵓⵏⵏⵉⴳ ⴷⴻⴳ ⵓⵡⴰⵏⴰⴽ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵎⴰⵙⵙ ⴱⵧⵓⴰⵍⴻⵎ ⴱⴻⵙⵙⴰⵉⴻⵀ, ⴰⵢ ⴷ-ⵢⴻⵜⵜⵡⴰⵙⴻⵎⵎⴰⵏ, ⴰⵙⵙ ⵏ ⵙⵙⴻⴱⵜ, ⴷ ⴰⵏⴻⵖⵍⴰⴼ ⵏ ⵓⵡⴰⵏⴰⴽ (ⴷⴰⵡⵍⴰ), ⴷ ⴰⵏⴻⵚⵚⴰⵃ ⵓⵣⵣⵉⴳ ⵢⴻⵔⵏⵓ ⴷ ⴰⴳⴻⵏⵙⴰⵙ ⵓⴷⵎⴰⵡⴰⵏ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵢⴻⵅⴷⴻⵎ ⴰⵛⵃⴰⵍ ⵏ ⵢⵉⵙⴻⴳⴳⴰⵙⴻⵏ ⴷ ⴰⴷⵉⵒⵍⵓⵎⴰⵜⵉ ⵢⴻⵔⵏⵓ ⵢⴻⴹⴹⴻⴼ ⴰⵛⵃⴰⵍ ⴷ ⵜⵉⴽⴽⴻⵍⵜ ⵉⵎⵓⴽⴰⵏ ⵓⵏⵏⵉⴳⴻⵏ ⴷⴻⴳ ⵓⵡⴰⵏⴰⴽ.

ⵉⵍⵓⵍ ⵎⴰⵙⵙ ⴱⴻⵙⵙⴰⵉⴻⵀ ⴷⴻⴳ 1939 ⴷⴻⴳ ⵍⴱⴻⵢⵢⴻⴹ, ⵢⴻⵔⵏⵓ ⵢⵓⵖⴰⵍ ⴷ ⴰⵔⴳⴰⵣ ⵢⴻⵜⵜⵡⴰⵙⵙⵏⴻⵏ ⴰⵎⴰ ⴷⴻⴳ ⵜⵙⴻⵔⵜⵉⵜ, ⴰⵎⴰ ⴷⴻⴳ ⵜⵙⴻⴽⵍⴰ.

ⴰⵎⵊⴰⵀⴻⴷ-ⴰ ⴰⵇⴱⵓⵔ ⵢⴻⵍⵍⴰ ⴷ ⴰⵎⴰⵙⵍⴰⴹ (ⵄⵓⴹⵡ) ⴷⴻⴳ ⵜⵎⴰⵔⵉⵜ ⵜⴰⵎⴰⵜⵓⵜ ⵏ ⵓⵙⴻⵇⵇⴰⵎⵓ ⴰⵖⴻⵍⵏⴰⵡ ⵏ ⵜⴻⴳⵔⴰⵡⵍⴰ ⵜⴰⴷⵣⴰⵢⵔⵉⵜ ⴳⴰⵔ 1959 ⴷ 1962.

ⴰⵙⵎⵉ ⴰⵢ ⵜⴻⵡⵡⵉ ⵜⵎⵓⵔⵜ ⴰⵣⴰⵔⵓⴳ (ⵉⵙⵜⵉⵇⵍⴰⵍ), ⵢⵓⵖⴰⵍ ⴷ ⴰⵏⵎⴰⵀⴰⵍ (ⵙⴰⴼⵉⵔ) ⴰⴷⵣⴰⵢⵔⵉ ⴷⴻⴳ ⵡⴰⵛⵃⴰⵍ ⵏ ⵜⵎⵓⵔⴰ (ⵙⵙⵡⵉⵙ, ⵠⴰⵜⵉⵛⴰⵏ, ⵎⴰⵚⴻⵔ, ⵍⴻⴽⵡⵉⵜ, ⵎⴻⵕⵕⵓⴽ), ⵙⴰⴽⴽⵉⵏ ⵢⵓⵖⴰⵍ ⴷ ⴰⵎⴰⵔⵓ ⴰⵎⴰⵜⵓ ⵏ ⵡⴻⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ ⴷⴻⴳ 1971.

ⴷⴻⴳ 1979, ⵢⵓⴷⴻⴼ ⵖⴻⵔ ⵓⵏⴰⴱⴰⴹ (ⵃⵓⴽⵓⵎⴰ) ⵢⴻⵔⵏⵓ ⵢⵓⵖⴰⵍ ⴷ ⴰⵏⴻⵖⵍⴰⴼ ⴷⴻⴳ ⵡⴰⵛⵃⴰⵍ ⵏ ⵢⴻⵖⵍⵉⴼⴻⵏ. ⵢⴻⵜⵜⵡⴰⵙⴻⵎⵎⴰ-ⴷ, ⵏⴰⵇⴰⵍ, ⴷ ⴰⵏⴻⵖⵍⴰⴼ ⵏ ⵓⵙⵙⴻⵍⵖⵓ (ⵉⵄⵍⴰⵎ), ⵙⴰⴽⴽⵉⵏ ⴷ ⴰⵏⴻⵖⵍⴰⴼ ⵏ ⵜⵏⴰⵣⴻⵏⵜ, ⵙⴰⴽⴽⵉⵏ ⴷ ⴰⵏⴻⵖⵍⴰⴼ ⵏ ⵢⴻⴷⵍⴻⵙ, ⵓⵇⴱⴻⵍ ⵎⴰ ⵢⵓⵖⴰⵍ, ⴷⴻⴳ 1988, ⴷ ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ.

ⵎⵉ ⵢⴻⴹⴹⴻⴼ ⴰⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ, ⵢⴻⵜⵜⴻⴽⴽⴰ ⴷⴻⴳ ⵓⵙⴻⵇⵇⴰⵎⵓ ⵏ ⴽⵔⴰⴹ ⵏ ⵢⵉⴷⵉⵙⴰⵏ ⴳⴰⵔ ⵍⴻⵣⵣⴰⵢⴻⵔ, ⵎⴻⵕⵕⵓⴽ ⴷ ⵜⴳⴻⵍⴷⴰ ⵜⴰⵙⴰⵄⵓⴷⵉⵜ ⴰⵢ ⴷ-ⵢⴻⴽⴽⴰⵏ ⵙⴻⴳ ⵢⵉⵡⴻⵏ ⵏ ⵕⵕⴰⵢ ⴰⵢ ⴷ-ⵢⴻⴼⴼⵖⴻⵏ ⴷⴻⴳ ⵜⵇⴰⵛⵓⵛⵜ ⵜⴰⵄⵕⴰⴱⵜ ⵏ ⵜⴳⴻⵎⵎⵉ ⵜⴰⵎⴻⵍⵍⴰⵍⵜ (ⵎⴻⵕⵕⵓⴽ), ⵢⴻⵔⵏⵓ ⵢⴻⵜⵜⵡⴰⵙⵙⴻⴱⴷⴻⴷ-ⴷ ⵓⵙⴻⵇⵇⴰⵎⵓ-ⴰ ⵉ ⵍⴻⵎⵛⴰⵡⵕⴰⵜ ⴰⵢ ⵢⴻⵙⵙⴰⵡⴹⴻⵏ ⵖⴻⵔ ⵡⴻⵎⵜⴰⵡⴰ (ⵉⵜⵜⵉⴼⴰⵇ) ⵏ ⵜⴰⵉⴻⴼ ⴰⵢ ⵉⴼⵓⴽⴻⵏ ⴰⵎⴳⴰⵔⵓ (ⵃⴰⵔⴱ) ⴰⵖⴰⵔⵉⵎ ⵏ ⵍⵓⴱⵏⴰⵏ.

ⴷⴻⴳ 1997, ⵢⴻⵜⵜⵡⴰⵙⴻⵎⵎⴰ-ⴷ ⴷ ⴰⵎⴰⵙⵍⴰⴹ ⵏ ⵓⵙⴻⵇⵇⴰⵎⵓ ⵏ ⵡⴻⵖⵍⴰⵏ ⵢⴻⵔⵏⵓ ⵢⴻⵜⵜⴻⴽⴽⴰ ⴷⴻⴳ ⵜⵉⵙ-ⴽⵔⴰⴹⵜ ⵜⴰⵙⴻⵍⵡⴰⵢⴰⵏⵜ, ⵙⴰⴽⴽⵉⵏ ⵢⴻⵜⵜⵡⴰⴼⵔⴻⵏ ⴷ ⴰⵙⴻⵍⵡⴰⵢ ⵏ ⵜⴻⵙⵎⵉⵍⵜ ⵏ ⵜⵖⴰⵡⵙⵉⵡⵉⵏ ⵏ ⵡⴻⵣⵖⴰⵔ ⴷⴻⴳ ⵜⴻⵅⵅⴰⵎⵜ ⵜⵉⵙ ⵙⵏⴰⵜ ⵏ ⵡⴻⵎⵏⵉ (ⴱⴰⵔⵍⴰⵎⴰⵏ).

ⴷⴻⴳ ⵛⵜⴻⵎⴱⴻⵒⵔ ⵏ 2005, ⵉⵙⴻⵎⵎⴰ-ⵜ-ⵉⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴷ ⴰⵙⴻⵍⵡⴰⵢ ⵏ ⵓⵙⴻⵇⵇⴰⵎⵓ ⴰⵎⴻⵏⴹⴰⵡⴰⵏ.

ⵢⵓⵔⴰ-ⴷ ⵎⴰⵙⵙ ⴱⴻⵙⵙⴰⵉⴻⵀ ⴰⵟⴰⵙ ⵏ ⵢⴻⴷⵍⵉⵙⴻⵏ ⵏ ⵜⵙⴻⴽⵍⴰ ⴷ ⵓⵎⴻⵣⵔⵓⵢ, ⴳⴰⵔ-ⴰⵙⴻⵏ ⵢⵉⵡⴻⵏ ⵏ ⵡⴻⴷⵍⵉⵙ ⵖⴻⴼ ⵍⴰⵎⵉⵔ ⵄⴻⴱⴷⴻⵍⵇⴰⴷⴻⵔ.