ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵔⴻⴹⴹⴰⵍ ⵙ ⴹⴹⵎⴰⵏⴰ: ⵓⴳⴰⵔ ⵏ 251 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ ⴰⵢ ⵢⴻⵜⵜⵡⴰⵎⵎⴻⵕⴽⴰⵏ ⵙⴻⴳ ⵢⴻⴱⵔⵉⵔ ⵢⴻⵣⵔⵉⵏ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ– ⵓⴳⴰⵔ ⵏ 251 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ ⴰⵢ ⵢⴻⵜⵜⵡⴰⵎⵎⴻⵕⴽⴰⵏ ⵙⴻⴳ ⵡⴰⵙⵎⵉ ⴰⵢ ⵢⴻⴱⴷⴰ ⵓⵕⴻⴹⴹⴰⵍ ⵙ ⴹⴹⵎⴰⵏⴰ ⴷⴻⴳ ⵢⴻⴱⵔⵉⵔ ⵢⴻⵣⵔⵉⵏ ⵉ ⵍⵎⴻⵏⴷ ⵏ ⵓⵏⵏⴻⵔⵏⵉ ⴰⴷⴰⵎⵙⴰⵏ ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⵅⴻⴱⴱⴻⵔ ⵢⵉⵡⴻⵜ ⵏ ⵜⴻⵖⴱⴰⵍⵓⵜ (ⵎⴰⵚⴷⴰⵔ) ⵜⴰⴷⵔⵉⵎⴰⵏⵜ.

ⴰⵎⵓⵔ ⴰⵎⴻⵇⵔⴰⵏ ⵙⴻⴳ ⵢⵉⵎⵎⴻⵕⴽⵉⵢⴻⵏ-ⴰ ⵢⴻⵍⵍⴰ-ⴷ ⴷⴻⴳ ⵜⴱⴰⵏⴽⵉⵡⵉⵏ ⴷ ⵜⴽⴻⴱⴱⴰⵏⵉⵢⵉⵏ ⵏ ⵓⵙⴻⵏⴽⵉⴷ (ⴹⴰⵎⴰⵏ), ⵢⴻⵔⵏⵓ ⴰⵍⴰ 1% ⴰⵢ ⴷ-ⵢⴻⵍⵍⴰⵏ ⴷⴻⴳ ⵍⵅⴻⵣⵏⴰⵜ ⵏ ⵜⵡⵉⵍⴰⵢⵉⵏ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⴻⵏⵏⴰ ⵜⴻⵖⴱⴰⵍⵓⵜ-ⴰ.

ⵢⴻⵏⵏⴰ-ⴷ ⵓⵎⴰⵙⴰⵢ-ⴰ (ⵎⴰⵙ’ⵓⵍ) ⴰⵢ ⴰⵖ-ⴷ-ⵉⵅⴻⴱⴱⵔⴻⵏ ⴷⴰⴽⴽⴻⵏ ⵢⴻⴱⴷⴰ ⵓⵎⵎⴻⵕⴽⵉ ⵙ ⵡⴻⵏⵢⴰ (ⵡⴰⵜⵉⵔⴰ) ⵢⴻⵍⵀⴰⵏ ⵢⴻⵔⵏⵓ, ⵍⴻⵎⵎⴻⵔ ⴷ ⵍⴻⴱⵖⵉ, ⴰⴷ ⵜⴻⵍⵀⵓ ⵜⴻⵛⵔⴰⵡⵜ ⵙⴻⴳ ⵡⴰⵢⵢⵓⵔⴻⵏ ⴰⵢ ⴷ-ⵢⴻⵜⵜⴻⴷⴷⵓⵏ.

ⵢⴻⴱⴷⴰ-ⴷ ⵓⵔⴻⴹⴹⴰⵍ ⴰⵖⴻⵍⵏⴰⵡ ⵉ ⵓⵏⵏⴻⵔⵏⵉ ⴰⴷⴰⵎⵙⴰⵏ ⴷⴻⴳ 17 ⵢⴻⴱⵔⵉⵔ ⵢⴻⵔⵏⵓ ⴰⴷ ⵜⴻⵇⵇⵉⵎ ⵜⴰⵍⵍⵉⵜ ⵏ ⵓⵎⵎⴻⵕⴽⵉ 6 ⵏ ⵡⴰⵢⵢⵓⵔⴻⵏ (ⴳⴰⵔ ⵢⴻⴱⵔⵉⵔ ⴷ ⵜⵓⴱⴻⵕ ⵏ 2016).

ⴹⴹⵎⴰⵏⴰⵜ-ⴰ ⵙⵄⴰⵏⵜ ⵙⵉⵏ ⵏ ⵢⴻⴼⵎⵉⴹⵉⵢⴻⵏ (ⵏⵉⵙⴱⴰ) ⵏ ⵍⴼⴰⵢⴷⴰ ⵖⴻⴼ ⵍⴻⵃⵙⴰⴱ ⵏ ⵜⴰⵍⵍⵉⵜ ⵏ ⵜⵔⵉⵔⵉⵜ ⵏ ⵓⵔⴻⴹⴹⴰⵍ: ⴹⴹⵎⴰⵏⴰⵜ ⵏ 3 ⵏ ⵢⵉⵙⴻⴳⴳⴰⵙⴻⵏ ⵙⵄⴰⵏⵜ ⵍⴼⴰⵢⴷⴰ ⵏ 5%, ⵎⴰ ⴷ ⵜⵉⴷ ⵏ 5 ⵏ ⵢⵉⵙⴻⴳⴳⴰⵙⴻⵏ ⵙⵄⴰⵏⵜ ⵍⴼⴰⵢⴷⴰ ⵏ 5,75%.

ⴹⴹⵎⴰⵏⴰⵜ-ⴰ ⵍⵍⴰⵏⵜ ⵙⵡⴰⵏⵜ 50.000 ⵏ ⵢⵉⴷⵉⵏⴰⵕⴻⵏ ⵎⵉ ⴱⴷⴰⵏⵜ ⵜⵜⵏⵓⵣⵓⵏⵜ ⴷⴻⴳ ⵡⴰⵢⵢⵓⵔ ⵏ ⵢⴻⴱⵔⵉⵔ, ⵙⴰⴽⴽⵉⵏ ⵔⵏⴰⵏ-ⴷ ⴹⴹⵎⴰⵏⴰⵜ ⵏ 10.000 ⵏ ⵢⵉⴷⵉⵏⴰⵕⴻⵏ ⵉ ⵡⵓⵙⵍⵉⴳⴻⵏ (ⵅⴰⵡⴰⵚⵚ) ⴷ ⴹⴹⵎⴰⵏⴰⵜ ⵏ ⵓⵎⴻⵍⵢⵓⵏ ⵏ ⵢⵉⴷⵉⵏⴰⵕⴻⵏ ⵉ ⵢⴻⵎⵙⴰⵖⴻⵏ ⵉⵎⴻⵇⵔⴰⵏⴻⵏ.