ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵙⵓⵇ ⴰⵀⵕⴰⵙ: 3 ⵏ ⵢⵉⵙⵓⴷⴰ ⵏ ⵓⵙⵙⵉⵍⴻⵖ ⴰⵔⴰ ⴷ-ⵉⵡⴻⵊⴷⴻⵏ ⵓⵇⴱⴻⵍ ⵛⵜⴻⵎⴱⴻⵕ 2017
ⵙⵓⵇ ⴰⵀⵕⴰⵙ – 3 ⵏ ⵢⵉⵙⵓⴷⴰ ⵉⵖⴻⵍⵏⴰⵡⴻⵏ ⵢⴻⵎⵎⵓⵣⵣⴳⴻⵏ ⴷⴻⴳ ⵓⵙⵙⵉⵍⴻⵖ ⴰⵙⴰⴷⵓⵔⴰⵏ ⴰⵔⴰ ⴷ-ⵉⵡⴻⵊⴷⴻⵏ ⵙⴻⴳ-ⴰ ⵖⴻⵔ ⵛⵜⴻⵎⴱⴻⵕ 2017 ⴷⴻⴳ ⵙⵓⵇ ⴰⵀⵕⴰⵙ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵜⵅⴻⴱⴱⴻⵔ ⵜⵎⴻⵀⵍⴰ ⵏ ⵓⵙⵙⵉⵍⴻⵖ (ⵜⴰⴽⵡⵉⵏ) ⴷ ⵡⴻⵍⵎⵓⴷ ⴰⵙⴰⴷⵓⵔⴰⵏ.
ⴰⵙⵓⴷⵓ (ⵎⴰⵄⵀⴰⴷ) ⴰⵖⴻⵍⵏⴰⵡ ⵢⴻⵎⵎⵓⵣⵣⴳⴻⵏ ⴷⴻⴳ ⵓⵙⵙⵉⵍⴻⵖ ⴰⵙⴰⴷⵓⵔⴰⵏ ⵏ ⵎⴷⴰⵡⵕⵓⵛ ⴰⴷ ⵢⴻⵙⵄⵓ 300 ⵏ ⵢⵉⵎⵓⴽⴰⵏ ⴷ ⵓⵏⴰⴹⴹⴰⵙ ⵏ 120 ⵏ ⵡⵓⵙⵓⵜⴻⵏ. ⴰⵙⵓⴷⵓ-ⴰ ⴰⴷ ⵢⴻⵎⵎⵓⵣⵣⴻⴳ ⴷⴻⴳ ⵜⴽⴻⵔⵔⴰⵣⵜ, ⵍⴰⴷⵖⴰ ⴷⴻⴳ ⵜⴽⴻⵙⵙⴰⵡⵜ ⵏ ⵍⵎⴰⵍ ⴰⵎⴻⵥⵢⴰⵏ, ⵜⴰⴷⴰⵡⵙⴰ (ⵚⵉⵃⵃⴰ) ⵏ ⵢⵉⵖⴻⵔⵙⵉⵡⴻⵏ, ⴰⵙⴼⵓⵍⵍⴻⵃ ⵏ ⵢⴻⵎⵖⴰⵏ ⵏ ⵓⴷⴰⵡⵉ ⴷ ⵍⵖⴻⵍⵍⴰⵜ ⵜⵉⵎⴻⵇⵔⴰⵏⵉⵏ, ⵖⴻⴼ ⵍⴻⵃⵙⴰⴱ ⵏ ⵜⵎⴻⵀⵍⴰ ⵏ ⵓⵙⵙⵉⵍⴻⵖ.
ⴰⵙⵓⴷⵓ ⴰⵖⴻⵍⵏⴰⵡ ⵢⴻⵎⵎⵓⵣⵣⴳⴻⵏ ⴷⴻⴳ ⵓⵙⵙⵉⵍⴻⵖ ⴰⵙⴰⴷⵓⵔⴰⵏ (ⵎⵉⵀⴰⵏⵉ) ⵡⵉⵙ ⵙⵉⵏ ⴷ ⵡⵉⵏ ⴰⵢ ⵢⴻⵎⵎⵓⵣⵣⴳⴻⵏ ⴷⴻⴳ ⵜⵎⴻⵔⵔⵉⵜ (ⵙⵉⵢⴰⵃⴰ) ⴷ ⵢⵉⵙⴻⵏⵙⴰ, ⵢⴻⵔⵏⵓ ⵍⴰ ⵜ-ⴱⴻⵏⵏⵓⵏ ⴷⴻⴳ ⵜⴻⵎⴷⵉⵏⵜ ⵏ ⵙⵓⵇ ⴰⵀⵕⴰⵙ. ⵎⴰ ⴷ ⴰⵙⵓⴷⵓ ⵡⵉⵙ 3 ⴷ ⵡⵉⵏ ⵏ ⵓⵙⵙⵉⵍⴻⵖ ⴷⴻⴳ ⵚⵚⴻⵏⵄⴰⵜ ⵏ ⵜⴽⴻⵔⵔⴰⵣⵜ, ⵍⴻⴱⵏⵉ ⴷ ⵢⵉⵎⴰⵀⵉⵍⴻⵏ ⵉⵏⴰⴳⴷⵓⴷⴻⵏ, ⵢⴻⵔⵏⵓ ⵍⴰ ⵜ-ⴱⴻⵏⵏⵓⵏ ⴷⴻⴳ ⵜⵖⵉⵡⴰⵏⵜ ⵏ ⵙⴻⴷⵕⴰⵜⴰ. ⴰⵙⵓⴷⵓ-ⴰ ⴷⴰⵖ ⵢⴻⵙⵄⴰ 300 ⵏ ⵢⵉⵎⵓⴽⴰⵏ ⵢⴻⵔⵏⵓ ⴰⴷ ⵉⴼⴰⴽ ⵙ ⵍⴻⴱⵏⵉ ⵓⵇⴱⴻⵍ ⵜⴳⴰⵔⴰ ⵏ ⵓⵙⴻⴳⴳⴰⵙ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵎⴻⵀⵍⴰ ⵏ ⵓⵙⵙⵉⵍⴻⵖ.
ⴷⴰⵖ, ⵉ ⵍⵎⴻⵏⴷ ⵏ ⵡⵓⵖⴰⵍ ⵖⴻⵔ ⵓⵖⴻⵔⴱⴰⵣ ⴷⴻⴳ ⵡⴰⵢⵢⵓⵔ-ⴰ ⵏ ⵛⵜⴻⵎⴱⴻⵕ, ⵜⴻⵏⵏⴰ-ⴷ ⵜⵎⴻⵀⵍⴰ ⴷⴰⴽⴽⴻⵏ ⴼⵓⴽⴻⵏ ⵍⴻⴱⵏⵉ ⵏ ⵢⵉⴼⴻⵔ ⴰⴷⴻⴱⵍⴰⵏ, ⵉⴼⴻⵔ ⵏ ⵜⵙⴻⵏⵙⴻⵍⴽⵉⵎⵜ ⴷ ⵓⵏⴰⴹⴹⴰⵙ ⵏ 60 ⵏ ⵡⵓⵙⵓⵜⴻⵏ ⴷⴻⴳ ⵡⴰⵎⵎⴰⵙ ⵏ ⵓⵙⵙⵉⵍⴻⵖ ⴰⵙⴰⴷⵓⵔⴰⵏ ⴷ ⵓⵙⵙⴻⵍⵎⴻⴷ ⵏ ⵎⴷⴰⵡⵕⵓⵛ.
ⵍⴰ ⴷ-ⵢⴻⵜⵜⵉⵍⵉ ⴷⴰⵖ ⵓⵅⴻⴷⴷⵉⵎ ⵉ ⵍⴻⴱⵏⵉ ⵏ ⵡⴰⵎⵎⴰⵙ ⵏ ⵓⵙⵙⵉⵍⴻⵖ ⴰⵙⴰⴷⵓⵔⴰⵏ ⴷ ⵓⵙⵙⴻⵍⵎⴻⴷ ⵏ 250 ⵏ ⵢⵉⵎⵓⴽⴰⵏ ⴷⴻⴳ ⵜⵖⵉⵡⴰⵏⵜ ⵏ ⵣⵣⴻⵄⵕⵓⵕⴻⵢⵢⴰ ⴷ ⵍⴻⴱⵏⵉ ⵏ 4 ⵏ ⵜⵏⴻⵖⵔⵉⵢⵉⵏ (ⴰⵇⵙⴰⵎ) ⴷ 2 ⵏ ⵜⵏⴻⵎⵙⴰⵍ (ⵡⴰⵔⴰⵛⴰⵜ) ⵉ ⵓⵙⵙⴻⵎⵖⴻⵔ ⵏ ⵜⵣⴻⵎⵎⴰⵔ ⵏ ⵡⴰⵎⵎⴰⵙ ⵏ ⵓⵙⵙⵉⵍⴻⵖ ⴰⵙⴰⴷⵓⵔⴰⵏ ⴷ ⵓⵙⵙⴻⵍⵎⴻⴷ ⴷⴻⴳ ⵎⵕⴰⵀⵏⴰ.
