ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵎⴻⵙⵜⵖⴰⵏⴻⵎ: ⵜⵓⵣⵡⵉⵔⵜ ⵉ ⵓⵀⴻⵢⵢⵉ ⵏ 553 ⵏ ⵢⵉⵖⴻⵔⵎⴰⵏ ⴷⴻⴳ 4 ⵏ ⵡⴰⵢⵢⵓⵔⴻⵏ ⵉⵏⴻⴳⴳⵓⵔⴰ ⵏ 2016 (ⴰⵎⴰⵙⴰⵢ)
ⵎⴻⵙⵜⵖⴰⵏⴻⵎ – ⵜⴻⵜⵜⵓⵏⴻⴼⴽ ⵜⵓⵣⵡⵉⵔⵜ, ⴷⴻⴳ 4 ⵏ ⵡⴰⵢⵢⵓⵔⴻⵏ ⵉⵏⴻⴳⴳⵓⵔⴰ ⵏ ⵓⵙⴻⴳⴳⴰⵙ-ⴰ, ⵉ ⵓⵀⴻⵢⵢⵉ ⵏ 553 ⵏ ⵢⵉⵖⴻⵔⵎⴰⵏ ⵏ ⵜⵖⵉⵡⴰⵏⵉⵏ ⵏ ⵎⴻⵙⵜⵖⴰⵏⴻⵎ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵙⵙ ⵏ ⵍⴻⵅⵎⵉⵙ, ⵓⵡⴰⵍⵉ ⴰⴱⴷⴻⵍⵡⴰⵀⵉⴷ ⵜⴻⵎⵎⴰⵔ.
ⴷⴻⴳ ⵢⵉⵡⴻⵏ ⵏ ⵜⴻⵎⵍⵉⵍⵉⵜ ⵏ ⵡⴻⵙⵍⴻⴽⵎⴰⵏ ⴷ ⵢⵉⵖⴼⴰⵡⴻⵏ ⵏ ⵜⴷⴰⵢⵕⵉⵡⵉⵏ ⴷ ⵢⵉⵙⴻⵍⵡⴰⵢⴻⵏ ⵏ ⵜⵖⵉⵡⴰⵏⵉⵏ, ⵉⵡⴻⵚⵚⴰ-ⴷ ⵎⴰⵙⵙ ⵜⴻⵎⵎⴰⵔ ⵖⴻⴼ ⵓⵙⵙⴻⵡⵊⴻⴷ ⵏ ⵓⵖⴰⵡⴰⵙ (ⵎⵓⵅⴰⵟⵟⴰⵟ) ⵏ ⵓⵀⴻⵢⵢⵉ ⵏ ⵢⵉⵖⴻⵔⵎⴰⵏ-ⴰ ⴷⴻⴳ 10 ⵏ ⵡⵓⵙⵙⴰⵏ, ⴷ ⴰⵖⴰⵡⴰⵙ ⴰⵢⴷⴻⴳ ⴰⵔⴰ ⴷ-ⵢⴻⵜⵜⵡⴰⴱⴷⴻⵔ ⵡⴰⵢⴻⵏ ⴰⵢ ⵃⵡⴰⵊⴻⵏ ⴷ ⵡⴰⵢⴻⵏ ⴰⵢ ⵢⴻⵣⵡⴰⵔⴻⵏ ⴰⴷ ⵢⴻⵜⵜⵡⴰⵚⴻⴳⴳⴻⵎ ⴷⴻⴳ-ⵙⴻⵏ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵢⴻⵜⵜⵡⴰⴱⴷⴻⵔ ⵡⴰⵏⴻⵛⵜ ⴰⵢ ⵙⵄⴰⵏⵜ ⴷ ⵉⴷⵔⵉⵎⴻⵏ ⵜⵎⴰⵣⴷⴰⵢⵉⵏ-ⴰ ⴰⵢ ⵜⴻⵔⵣⴰ ⵜⴻⵎⵙⴰⵍⵜ.
ⵉⵅⴻⴷⴷⵉⵎⴻⵏ-ⴰ ⵏ ⵓⵀⴻⵢⵢⵉ ⵔⵣⴰⵏ ⴰⵖⵔⴰⵎ ⵏ ⵡⴰⵎⴰⵏ ⵢⵓⵎⵙⴻⵏ, ⵍⴻⴱⵏⵉ ⵏ ⵢⴻⴱⵔⵉⴷⴻⵏ, ⵍⴻⴱⵏⵉ ⵏ ⵜⴻⵎⵚⵓⴽⵉⵏ (ⵀⴰⵢⴰⴽⵉⵍ) ⵉ ⵢⵉⵍⴻⵍⵎⵥⵉⵢⴻⵏ ⴷ ⵢⵉⵙⴰⵔⵉⵔⴻⵏ (ⵎⴰⵍⴰⵄⵉⴱ) ⵓⵇⵔⵉⴱⴻⵏ, ⵜⴰⵍⵍⵓⵏⵉⵏ ⵜⵉⵣⴻⴳⵣⴰⵡⵉⵏ ⴷ ⵢⵉⵏⵓⵔⴰⵔ ⵏ ⵡⵓⵔⴰⵔ.
ⵉⵃⴻⵜⵜⴻⵜ-ⴷ ⴷⴰⵖ ⵓⵡⴰⵍⵉ ⵏ ⵎⴻⵙⵜⵖⴰⵏⴻⵎ ⵖⴻⴼ ⵓⵚⴻⵔⵔⴻⴼ ⵏ ⵜⵊⴻⵍⵍⴰⴱⵉⵏ ⵏ ⵢⴻⴷⵔⵉⵎⴻⵏ ⴰⵢ ⴷ-ⵢⴻⵜⵜⵓⵏⴻⴼⴽⴻⵏ ⴷ ⴰⵎⴰⵔⵓⴷ (ⵎⵉⵣⴰⵏⵉⵢⵢⴰ) ⵉ ⵜⵖⵉⵡⴰⵏⵉⵏ, ⴷ ⵜⵉⵊⴻⵍⵍⴰⴱⵉⵏ ⴰⵢ ⵢⴻⵡⵡⴹⴻⵏ ⵖⴻⵔ 1,5 ⴷ ⴰⵎⴻⵍⵢⴰⵕ ⵏ ⵢⵉⴷⵉⵏⴰⵕⴻⵏ ⵙ ⵓⵊⴻⵎⵎⴰⵍ, ⵢⴻⵔⵏⵓ ⵢⴻⵙⵙⴻⴼⴽ ⴰⴷ ⴷ-ⵢⵉⵍⵉ ⵓⵚⴻⵔⵔⴻⴼ-ⵏⵙⴻⵏ ⵖⴻⴼ ⵓⵀⴻⵢⵢⵉ ⴰⵎⴷⵉⵏⴰⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⵚⵚⴰ ⵖⴻⴼ ⵡⴻⴹⴼⴰⵔ ⵏ ⵢⵉⵙⴻⵏⴼⴰⵔⴻⵏ. ⵙⴻⴳ ⵢⵉⴷⵉⵙ ⵏⵉⴹⴻⵏ, ⵉⵡⴻⵚⵚⴰ ⵉⵙⴻⵍⵡⴰⵢⴻⵏ ⵏ ⵜⵖⵉⵡⴰⵏⵉⵏ ⴷ ⵢⵉⵖⴼⴰⵡⴻⵏ ⵏ ⵜⴷⴰⵢⵕⵉⵡⵉⵏ ⴰⴽⴽⴻⵏ ⴰⴷ ⴷ-ⴰⴳⵎⴻⵏ ⵉⴷⵔⵉⵎⴻⵏ ⵙⴻⴳ ⵢⵉⵎⴰⵔⵓⴷⴻⵏ ⴰⴽⴽⴻⵏ ⴰⴷ ⵅⴻⵍⵍⵚⴻⵏ ⴰⵢⴻⵏ ⴰⵢ ⵜⵜⵡⴰⵍⴰⵙⴻⵏ ⵉ ⵜⴻⵕⵎⵉⵙⵉⵏ ⵏ ⵙⵧⵏⴻⵍⴳⴰⵣ ⴷ ⵜⴷⵣⴰⵢⵔⵉⵜ ⵏ ⵡⴰⵎⴰⵏ.
ⵉⵡⴻⵚⵚⴰ ⴷⴰⵖ ⵎⴰⵙⵙ ⵜⴻⵎⵎⴰⵔ ⵉⵙⴻⵍⵡⴰⵢⴻⵏ ⵏ ⵜⵖⵉⵡⴰⵏⵉⵏ ⴰⴽⴽⴻⵏ ⴰⴷ ⵜⵜⴹⴰⴼⴰⵔⴻⵏ ⵍⴻⵛⵖⴰⵍ ⵏ ⵓⵙⵙⵉⵣⴷⴻⴳ ⴰⴽⴽⴻⵏ ⵢⴰⵍ ⵜⴰⵖⵉⵡⴰⵏⵜ ⴰⴷ ⵜⴻⵛⴱⴻⵃ, ⴰⵎ ⵡⴰⴽⴽⴻⵏ ⴰⵢ ⵢⴻⵙⵙⴻⴼⴽ ⴰⴷ ⵎⵄⴰⵡⴰⵏⴻⵏⵜ ⵜⵖⵉⵡⴰⵏⵉⵏ ⴷ ⵜⵉⴷⴷⵓⴽⵍⵉⵡⵉⵏ ⴷ ⵜⵎⴻⵜⵜⵉ ⵜⴰⵖⴰⵔⵉⵎⵜ ⴷⴻⴳ ⵍⴻⵛⵖⴰⵍ ⵏ ⵡⴻⵃⵔⴰⵣ ⵏ ⵜⵡⴻⵏⵏⴰⴹⵜ.
