ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵃⴱⴰⵙ ⴰⵎⴻⵙⴱⴰⵟⵍⵉ ⴷ ⵓⵄⴻⵜⵜⴻⴱ ⵏ ⵙⵉⵏ ⵏ ⵢⵉⵍⴻⵎⵥⵉⵢⴻⵏ ⵉⵚⴻⵃⵔⴰⵡⵉⵢⴻⵏ ⴷⴻⴳ ⵎⴻⵕⵕⵓⴽ
ⵒⴰⵔⵉⵙ – ⴽⵔⴰ ⵏ ⵜⵓⴷⴷⵙⵉⵡⵉⵏ ⵜⵉⵔⵏⴰⴱⴰⴹⵉⵏ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴰⵢ ⴷ-ⵉⵡⵜⴻⵏ, ⴰⵙⵙ ⵏ ⵍⴻⵜⵏⵉⵢⴻⵏ, ⴷⴻⴳ ⵡⴻⵃⴱⴰⵙ ⴰⵎⴻⵙⴱⴰⵟⵍⵉ ⴷ « ⵓⵄⴻⵜⵜⴻⴱ » ⴰⵢ ⵙⵄⴻⴷⴷⴰⵏ ⵢⵉⴷⵓⴱⴰ ⵉⵎⴻⵕⵕⵓⴽⵉⵢⴻⵏ ⵖⴻⴼ ⵙⵉⵏ ⵏ ⵢⵉⵍⴻⵎⵥⵉⵢⴻⵏ ⵉⵚⴻⵃⵔⴰⵡⵉⵢⴻⵏ ⵢⴻⵍⵍⴰⵏ ⴷ ⵉⵎⴻⵖⵏⴰⵙⴻⵏ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ.
ⴰⵙⴰⵏⴰⵢ ⵏ ⵓⵃⵓⴷⴷⵓ ⵏ ⵢⴻⵎⵃⵉⴷⴷⴰⵏ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ, ⵜⵉⵛⵛⵓⵔⴽⴰ ⵏ ⵜⵓⴷⴷⵙⴰ ⵜⴰⵏⵎⴰⴹⴰⵍⵜ ⵎⴳⴰⵍ ⵓⵄⴻⵜⵜⴻⴱ ⴷ ⵜⴼⵉⴷⵉⵕⴰⵍⵉⵜ ⵜⴰⴳⵔⴰⵖⵍⴰⵏⵜ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴳⵔⴻⵏⵜ-ⴷ ⵜⵉⵖⵔⵉ ⵜⵓⵄⵊⵉⵍⵜ ⵉ ⵡⴰⴽⴽ ⵉⵎⴻⵖⵏⴰⵙⴻⵏ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴷⴻⴳ ⵓⵎⴰⴹⴰⵍ ⴷⴰⴽⴽⴻⵏ « ⴰⴷ ⴷ-ⴳⵔⴻⵏ ⵉⵎⴰⵏ-ⵏⵙⴻⵏ ⵙ ⵍⵄⴻⵊⵍⴰⵏ » ⵖⴻⴼ ⵜⴰⵍⵓⴼⵜ-ⴰ ⴰⵢ ⴷ-ⵢⴻⵍⵍⴰⵏ ⴷⴻⴳ ⵎⴻⵕⵕⵓⴽ, ⴰⵎ ⵡⴰⴽⴽⴻⵏ ⴰⵢ ⵙⵙⵓⵜⵔⴻⵏ ⵙⴻⴳ-ⵙⴻⵏ ⴰⴷ ⴰⵔⵓⵏ ⵉ ⵢⵉⴷⵓⴱⴰ ⵉⵎⴻⵕⵕⵓⴽⵉⵢⴻⵏ ⵉ ⵡⴻⵃⴱⴰⵙ ⵏ ⵡⴰⴽⴽ ⵍⴻⵚⵏⴰⴼ ⵏ ⵡⴻⵃⵕⴰⵙ, ⵓⵍⴰ ⴷ ⴰⵃⵕⴰⵙ ⵙ ⵡⴻⴱⵔⵉⴷ ⵏ ⵍⵇⴰⵏⵓⵏ, ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⵖⴻⴼ ⵎⴰⵙⵙⴰⵡ ⴰⵎⵉⴷⴰⵏ ⵙⴰⵉⴷⵉ ⴷ ⴱⵔⴰⵀⵉⵎ ⵍⴰⴰⵊⴰⵉⵍ.
« ⴰⵙⴰⵏⴰⵢ ⵢⴻⴽⴽⴰ-ⴷ ⵙ ⵍⵊⴻⵀⴷ ⴷⴻⴳ ⵡⴻⵃⵕⴰⵙ ⵙ ⵡⴻⴱⵔⵉⴷ ⵏ ⵍⵇⴰⵏⵓⵏ ⴰⵢ ⴷ-ⵢⴻⵍⵍⴰⵏ ⵖⴻⴼ ⵎⴰⵙⵙⴰⵡ ⵙⴰⵉⴷ ⴷ ⵍⴰⴰⵊⴰⵉⵍ, ⴷ ⵢⵉⵔ ⵜⵉⴷⴷⵉⵜ ⴰⵢ ⵜⵜⴻⴷⴷⵓⵏ (ⵢⵉⴷⵓⴱⴰ ⵉⵎⴻⵕⵕⵓⴽⵉⵢⴻⵏ) ⴷ ⵡⴰⴽⴽ ⵉⵎⴻⵖⵏⴰⵙⴻⵏ ⵉ ⵓⵙⵙⵉⴳⴻⴷ-ⵏⵙⴻⵏ ⴷ ⵓⵙⵙⴻⵄⵡⴻⵇ ⵏ ⵓⵅⴻⴷⴷⵉⵎ ⴰⵢ ⵜⵜⴳⴻⵏ ⵉ ⵍⵎⴻⵏⴷ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ, ⵍⴰⴷⵖⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵖⵔⴻⴼ ⴰⵚⴻⵃⵔⴰⵡⵉ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵡⴻⵍⵖⵓ ⴰⵏⴰⴳⴷⵓⴷ ⴰⵙⵙ ⵏ ⵍⴻⵜⵏⵉⵢⴻⵏ.
ⵉ ⵍⵎⴻⵏⴷ ⵏ ⵡⴰⵢⴰ, ⵢⴻⵙⵙⵓⵜⴻⵔ ⵓⵙⴰⵏⴰⵢ ⵉ ⵢⵉⴷⵓⴱⴰ ⵉⵎⴻⵕⵕⵓⴽⵉⵢⴻⵏ « ⴰⴷ ⵃⴻⴱⵙⴻⵏ ⴰⴽⴽ ⵍⴻⵚⵏⴰⴼ ⵏ ⵡⴻⵃⵕⴰⵙ, ⵓⵍⴰ ⴷ ⴰⵃⵔⴰⵙ ⴰⵢ ⴷ-ⵢⴻⵜⵜⵉⵍⵉⵏ ⵙ ⵍⵇⴰⵏⵓⵏ, ⵎⴳⴰⵍ ⵎⴰⵙⵙⴰⵡ ⴰⵎⵉⴷⴰⵏ ⵙⴰⵉⴷ ⴷ ⴱⵔⴰⵀⵉⵎ ⵍⴰⴰⵊⴰⵉⵍ ⵙ ⵍⵅⵓⵚⵓⵚ, ⴷ ⵡⴰⴽⴽ ⵉⵎⵃⵉⴷⴷⴰⵏ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⴷⴻⴳ ⵎⴻⵕⵕⵓⴽ, ⴰⴽⴽⴻⵏ ⴰⴷ ⵣⴻⵎⵔⴻⵏ ⴰⴷ ⴽⴻⵎⵎⵍⴻⵏ ⵉⵔⵎⵓⴷⴻⵏ-ⵏⵙⴻⵏ (ⵏⴰⵛⴰⵟⴰⵜ) ⵉⵢⴰⵍⵍⴰⵙⴻⵏ ⴷ ⵡⵉⴷ ⵏ ⵢⵉⵣⴻⵔⴼⴰⵏ ⵏ ⵡⴻⵎⴷⴰⵏ ⵙ ⵜⵍⴻⵍⵍⵉ ⵢⴻⵔⵏⵓ ⵡⴰⵔ ⵉⵄⴻⵡⵡⵉⵇⴻⵏ », ⴰⵎ ⵡⴰⴽⴽⴻⵏ ⴰⵔⴰ ⴹⴻⵎⵏⴻⵏ ⴰⴽⴽ ⵜⵉⴳⵏⴰⵜⵉⵏ ⵉ ⵡⴻⵃⵔⴰⵣ ⵏ ⵜⵓⵎⵎⴷⴰ-ⵏⵙⴻⵏ ⵜⴰⴼⴻⴽⴽⴰⵏⵜ ⴷ ⵜⴻⵙⵏⴰⴼⵙⴰⵏⵜ.
