Asebter amenzawi
LEZZAYER
TADAMSA
Laṛebɛa, 01 Yebrir 2015 18:14
Asnulfu n 50 n tmiwa n umerreḥ uqbel taggara n 2015
WEHṚAN – Xemsin n tmiwa n tmerrit ara d-yennulfun seg-a ɣer taggara n 2015 deg tmiwa yemgaraden n tmurt, ɣef wakken ay aɣ-d-ixebber unemhal amatu n Tnegga taɣelnawt n wesnerni n tmerrit (ANDT). Timiwa-a n tmerrit wejden yikaramen-nsent (dossiers) ɣer tmarit tamatut n Unabaḍ (lḥukuma), yerna amur ameqqran seg-sent yezga-d deg yegnan iɛlayanen, ɣef wakken ay d-yenna Mass Noureddine Nedri i NDƔ deg teẓrigt tis setta n Tmesrit tagraɣlant n tmerrit, aṣafer d umesni « SIAHA 2015 » ay yeldin ass n laṛebɛa deg Wammas n temliliyin Mohamed Benahmed n Wehṛan (CCO). « Timiwa-ya ad d-sbanent tiɣawsiwin yelhan deg weḥric-a n tmurt (Ignan iɛlayanen) deg wayen yerzan asnerni n tmerrit (tourisme) n twennaḍt d lḥemmamat », ɣef wakken ay d-yerna, am wakken ay d-iḥettet dakken seg ugar 205 n tmiwa n tmerrit ay d-snulfan deg tmiwa yemgaraden n tmurt, 70% seg-sent zgant-d ɣef yiri n lebḥeṛ.
Tanegga taɣelnawt n wesnerni n tmerrit telha-d s uɛawed n tmuɣli n tmiwa-a, d ccɣel ay d-tebda aseggas yezrin. Ccɣel-a ara ifaken deg Mayyu ay d-yetteddun d win aydeg ara ttwakksent kra n tmiwa seg leḥsab, am wakken ara d-sbanen tilisa n kra seg tid ay d-yezgan deg temdinin, ɣef wakken ay d-yenna unemhal amatu n ANDT.
Timiwa n tmerrit ttwaṣennfent deg yiseggasen n 1998, 2009 ed 2010, ɣef wakken ay d-yenna.
Seg tama niḍen, Mass Nedri yenna-d dakken 140 n tezrawin i usseqɛed n tmiwa n tmerrit ay d-yebdan, 15 n yizenziɣen n usseqɛed n tmerrit (SDAT) ay yettwaqeblen, yerna llan wiyaḍ la d-ttwaheyyayen ɣer tmarit tamatut n Unabaḍ (lḥukuma), am wakken ay d-yenna dakken bdan-d lecɣal n usseqɛed n waṭas n tmiwa deg twilayin n Ɛennaba, Mestɣanem, Bgayet d Jijel.
Tamesrit tagraɣlant n tmerrit, aṣafer d umesni « SIAHA » ad tejj medden d yemḍebbren n tkebbaniyin n weḥric-a ad ssnen lecɣal n Tnegga taɣelnawt n wesnerni n tmerrit ay ixeddmen i lmend n tririt n wazal n tmiwa n tmerrit d ussewjed n yizenziɣen ara yesnernin tamerrit.
Tadyant-a n ṛebɛa n wussan, ay d-tga tnegga n « ASTRA » ay yemmuzzgen (yetxeṣṣeṣen) deg tmesriyin d temzikkniyin, d tin aydeg ara d-mlilen 100 n yinemzikknen ay d-yusan seg Lezzayer, Tunes, Meṛṛuk, Ṭṭerk, Puṛtugal, Spenyul ed Malṭa.
