Asebter amenzawi

Lḥedd, 05 Yebrir 2015 17:31

Aselway Abbas yeggez ad icaṛeɛ Isṛayil ma yella ur d-tefki ara idrimen n leɣrama

RAMALLAH (Agemmaḍ Utrim) – Aselway afalesṭini Mahmoud Abbas yeggez ass n lḥedd ad yeccetki i Ccṛeɛ n uɛaqeb agraɣlan, ma yella ur d-tefki ara Isṛayil idrimen n leɣrama ay d-tjemmeɛ i lfayda n Udabu afalesṭini.

Isṛayil, ay isebken tlata n wayyuren aya asɛeddi n yedrimen n leɣrama akken ad tɛaqeb Falesṭin ɣef unekcum-nnes ɣer Ccṛeɛ n uɛaqeb agraɣlan, tenna-d, deg tgara n Meɣres, dakken ad d-tserreḥ i tmeyyatin n yimelyunen n yidulaṛen ay as-yettalas Udabu afalesṭini.

Imir-nni kan, anabaḍ afalesṭini yenna-d dakken ad yagi aya ma yella ur d-yettaṭṭaf ara akk idrimen ay yettalas. « Nnan-d ad aɣ-d-aznen idrimen, mi aɣ-ten-id-uznen, txuṣṣ tis tlata, ayɣer? », ay d-yenna Mass Abbas deg yiwen n yinaw deg Ramallah, deg wexxam n Udabu afalesṭini deg Ugemmaḍ Utrim yettwaṭṭfen.

« Imir-a, aql-aɣ nerna-d akaram amaynu ara nefk i Ccṛeɛ n uɛaqeb agraɣlan. Tamezwarut, yella-d ṭṭrad-nni (n unebdu) deg Ɣezza akked ussehres , imir-a, tamehla tafalesṭinit la tzerrew akaram-a amaynu akken ad t-id-nqeddem deg lawan iwatan i Ccṛeɛ n uɛaqeb agraɣlan ».

Seg-a ar imir-nni, « ur nqebbel ara idrimen-nni arma rran-aɣ-ten-id mmden: ya ad aɣ-d-fken akk idrimen, ya ad neddu ɣer ccṛeɛ ».

Falesṭin teqqel s wudem unṣib d tamaslaḍt n Ccṛeɛ n uɛaqeb agraɣlan deg 1 Yebrir, yerna timwekkelt Fatou Bensouda teɣtes ad d-telhu s taluft tisṛayilit-tafalesṭinit.

Maca werɛad ur tettwaldey ula d yiwet n tsestant tunṣibt mgal yemḍebbren isṛayiliyen.