Asebter amenzawi

Letniyen, 06 Yebrir 2015 13:54

Lexlaṣ n lantrit ad d-yettili deg lbanka seg wayyur n Yulyu d-iteddun

LEZZAYER – Wid yesɛan lantrit ad zemren ad d-ssuffuɣen idrimen-nsen seg lbanka seg wayyur n Yulyu d-iteddun, ɣef leḥsab n yiwen n leɛqed yettwastenyan ass n letniyen deg Lezzayer Tamaneɣt gar Usenduq aɣelnaw n lantrit (CNR) d Lbanka n wesnerni adigan (BDL).

Wid yesɛan lantrit ad zemren ad xtiren ma yella ad qqimen ad ttwaxellaṣen ɣer leḥsab-nsen n CCP (lbusṭa) neɣ ad qqlen ad ttwaxellaṣen deg lbanka, ɣef wakken ay d-nnan yemɛellmen imuta n Usenduq n lantrit, Tidjani Hassan Haddam d win n BDL, Mohamed Arslane Bachetarzi, yestenyan deg sin leɛqud-a.

Leɛqed-a yekcem deg ussefɛel n lewṣaya n Uneɣlaf amezwaru i lmend n wesṭuqqet n yiberdan ed ttawilat n uxelleṣ n wid ay yettaɣen lantrit, akken ad sselhun ssrabes i lfayda n yemdanen-a yerna ad ssifessen tiɣawsiwin fell-asen deg lbankat, ɣef wakken ay d-sfehmen.

Dɣa deg temsalt-a, wid ay yettwammeṛkan deg Usenduq aɣelnaw n lantrit, ay yellan ass-a 2 653 171 n yemdanen, ad sɛun azref akken ad xtiren seg wansi ara d-ttwaxellaṣen akken ara teffeɣ fell-asen (ama seg lbanka, ama seg lbusṭa), am wakken ara yeqqim wass aydeg nnummen ttwaxellaṣen-d akken yella, ur yettwabeddal ara, meḥsub ass n 20, 22, 24 neɣ 26 n yal ayyur, akken ay d-nnan.

Ddaw leɛqed-a, lbanka n BDL ad teldey yiwen n leḥsab agejdan (compte principal) i Usenduq aɣelnaw n lantrit am wakken ara teldey leḥsabat imeẓyanen i lbiriwat n lantrit deg twilayin yemgerraden.

Lexlaṣ ad d-yettili, deg tazwara, deg 1500 n lbiruwat ay tesɛa BDL, sakkin ad yettili deg wakk lbankat niḍen, ama n udabu, ama d tusligin.