Asebter amenzawi

Mass Bensalah yemdiwenni d uselway n Useqqamu aɣelnaw afalesṭini

06 Yebrir 2015

LEZZAYER – Aselway n Useqqamu n weɣlan, Abdelkader Bensalah, yemdiwenni ass n letniyen deg Lezzayer Tamaneɣt d uselway n Useqqamu aɣelnaw afalesṭini, Salim Zaanoun, ɣef wakken ay d-ixebber yiwen n welɣu n texxamt taɛlayant n wemni.

Awal gar-asen yella-d ɣef tedyanin tineggura tettedder temsalt n Falesṭin d wuguren ay d-tettmagar temsalt-a ama sdaxel tmurt n Falesṭin, ama deg tama d-yezzin fell-as neɣ deg umaḍal.

Sin-a n yemḍebbren bedren-d assaɣen igerrzen gar Lezzayer d Falesṭin d webdad idumen n Lezzayer ɣer yidis n waytmaten ifalesṭiniyen i usseḍru n yeswan-nsen iɣelnawen s ussebded n Uwanak (ddula) afalesṭini imzireg, ɣef wakken d-terna teɣbalut-a.

Ḥetteten-d daɣ ɣef wazal ay yesɛa wawal ed wemciweṛ yettkemmilen i lmend n wesnerni n wassaɣen igerrzen gar Lezzayer ed yimenɣi afalesṭini.