Asebter amenzawi

 07 Yebrir 2015 

Taqacuct n CEEAC/CEDEAO n Malabo ad d-tili sdeffir n unekcum n uselway Buhari ɣer leḥkem

YAOUNDE – Taqacuct n yemḍebbren n Tefriqt talemmast d tutrimt ɣef yimenɣi mgal Boko Haram ay ssefran, naqal, ad d-tili deg 8 Yebrir deg Malabo, deg Ginya Tasebgast, ad d-tili sdeffir ma yekcem uselway amaynu n Nijirya, Muhammadu Buhari, ɣer leḥkem deg wayyur n Mayyu, ɣef wakken ay d-twekked yiwet n teɣbalut iqerben ɣer tselwit n Ginya Tasebgast.

Tagrawt n CEEAC ttekkant deg-s Angula, Burundi, Kamrun, Kungu-Brazzaville, Gabun, Ginya Tasebgast, Tagduda n Tefriqt Talemmast, Tagduda tamegdayt n Kungu, Sao Tome ed Principe akked Tcad, yerna Aseqqamu-nnes n talwit ed laman (COPAX) iga deg wass n 16 Fuṛaṛ deg Yaoundé (Kamrun) yiwet timlilit tafeɣnamit .

Deg ttiɛad-nni, fran-tt-id ad d-fken 50 n yimelyunen n yefṛanken n CFA (100 n yidulaṛen) d lemɛawna tuɛjilt i Kamrun ed Tcad akken ad d-sbedden iɣil n 10.000 n yiserdasen ara yennaɣen mgal Boko Haram, am wakken ay walan yesɛa azal ma tella-d tqacuct tucrikt akked Wemɣiwan adamsan n Yiwunak n Tefriqt Tutrimt (CEDEAO) aydeg tettekkA Nijirya, akken ad sjehden tikli n yimenɣi mgal Boko Haram.

« Boko Haram ur telli d ugur deg Tefriqt Talemmast. Tafriqt Talemmast yusa-tt-id wugur seg Tefriqt Tutrimt », ɣef wakken ay d-yenna Daniel Elono, ay yellan d amazzay n Wemɣiwan adamsan n Yiwunak n Tefriqt Talemmst (CEEAC).