Asebter amenzawi

Timiwa Tamsalt n Chouaib Oultache: yettwawexxer ccṛeɛ ɣer 4 Mayyu

BUMERDAS – Taxxamt tis snat n uɛaqeb deg wexxam n ccṛeɛ n Bumerdas tenna-d, ass n letniyen, d akken ccṛeɛ n temsalt n weknaner Chouaib Oultache, imḍebber aqbur n tigget tagenwant n Tmehla tamatut n tɣellist taɣelnawt (DGSN), ay yettwattehmen s « ussexṣer n yedrimen izuyaz », ad yettwawexxer ɣer 4 Mayyu ay d-yetteddun ɣef ljal n « uɣabi n waṭas n yinagan d yemetthumen deg temsalt-a ».

Taxxamt tis snat n uɛaqeb deg ccṛeɛ n Bumerdas twexxer ccṛeɛ-a yerzan yiwet n temsalt deg ttekkan 24 n yemdanen, gar-asen ametthum agejdan Oultache, yerna d wa ay d awexxer wis sin sdeffir uwexxer-nni ay iga Wexxam n Ccṛeɛ aɛlayan sdeffir ma terẓa temḥaddit lekḥam ay d-yeffɣen mgal yimetthumen deg wexxam n ccṛeɛ n Sidi Mḥemmed, d leḥkam aydeg ttwaḍḍfen gar 3 ed 7 n yiseggasen n lḥebs s ussefɛel akked lexḍeyyat.

Ɣef leḥsab n ṛṛay n uwexxer n wexxam n ccṛeɛ, imetthumen deg temsalt-a ttwattehmen s « ussebded n leɛqudat izuyaz war aqader n lqanun », « assexṣer n yedrimen izuyaz », « asseqdec n wemkan n uḍebber i tuffɣa i lqanun », « asseqdec n lekwaɣeḍ n tkellax », « attekki deg ussexṣer n yedrimen d berru n temsal yessawḍen ɣer lexṣara n yedrimen izuyaz ».

Tamsalt-a tebda-d deg 2007, ɣef leḥsab n ṛṛay n uwexxer, yerna terza leɛqed ur yeṣfin ara i lmend n tiɣin n ttawilat n uselkim, d win ay testenya Tmehla tamatut n tɣellist taɣelnawt akked tkebbanit n Algerian Business Multimedia (ABM), yerna yettwakcef-d sdeffir tmenɣiwt, deg wass n 25 Fuṛaṛ 2010, n Unemhal amatu n temsulta Ali Tounsi ɣef ufus n weknaner Oultache.

Tisestanin kecfent-d, ɣef leḥsab n teɣbalut-a, dakken Oultache « yesseqdec amkan-nnes n yemḍebber » akken ad d-iḥettem ṛṛay-nnes ɣef tseqqamut n uqeyyem atekni n yissumar akken ad tettwafren tkebbanit n ABM aydeg aḍewwal n Oultache yella d acrik yerna d amalal n unemhal amatu.