Asebter amenzawi

Laṛebɛa , 8 Yebrir 2015 14:17

Tabanka Tafriqit n Wesnerni (BAD): abdaɛ d yiwen seg yiberdan n usselhu n ufares deg Tefriqt n Ugafa

TUNES – Assejhed n webdaɛ deg tmura n Tefriqt n Ugafa d taɣawa ay yesɛan azal d ameqran deg usselhu n ufares, ɣef wakken d-twekked Tbanka tafriqit n wesnerni (BAD) deg yiwet n tesleḍt ɣef ufares deg tmura n tama-a.

Tazrawt n tbanka-a tawaẓit d tin ay yesbanen tiɣawsiwin yetturaren dduṛ deg webdaɛ ed lateṛ ay yesɛa waya ɣef wayen ay d-yettakfen tkebbaniyin, yerna tebder-d, deg waya, imedyaten n Lezzayer d Maṣer, am wakken d-tger tamawt d akken yessefk ad yettunefk wazal i yinagrawen iɣelnawen n webdaɛ.

I lmend n ussaki n webdaɛ, Tabanka tafriqit n wesnerni tefka azal i ussejhed n wenbaḍ n unagraw aɣelnaw n webdaɛ ed ussejhed n unadi ed weṛmas akken sin-a n yeḥricen ur ttɣimin ara wa yeɛzel ɣef wayeḍ, yerna ad d-yili gar-asen wugar n wemɛawen.

Yessefk daɣ ad yettwassejhed welmud imineg d ussileɣ amsadur i lmend n usselhu n tzemmar n yixeddamen akken ad d-ttekkayen xir deg ufares, ɣef wakken d-terna tbanka.

Tessumer-d daɣ tbanka ad d-ilin wahilen ara yettgen ifadden yerna ad d-jebden isseftiyen usriden ibeṛṛaniyen ay d-ibeddɛen ladɣa tid ay yesɛan lfayda d tameqrant yerna ḍḍfent amkan-nsent akken yessefk deg tdamsa tadigant.

Seg tama niḍen, a win yufan, timura n tama-a ad d-sbeddent yerna ad ɛawnent iberdan ara yejjen ad d-ilin leɛqudat deg yinurar n tussna ed teknussna gar wammasen n unadi, tisdawiyin, tikebbaniyin tidiganin ay izemren ad d-snulfunt akked tkebbaniyin tibeṛṛaniyin ay yebɣan ad sgijjent ixeddimen-nsent n unadi ed wesnerni ɣer tmura niḍen.

Aḥric-a aneggaru ur d-yegli ara s webdaɛ deg tmura n Tefriqt n Ugafa, ɣef wakken ay d-sḥassef Tbanka tafriqit n wesnerni, am wakken ay d-tger tamawt dakken aya yettili-d s tuddma ed ussezgi n teknussniwin ay d-yettnulfun anda niḍen s webrid n welmad ed ussebleɛ, yerna aya yeḥwaj assileɣ igerrzen ugar n yixeddamen ed uṣeggem n twennaḍt n ussefti.