Asebter amenzawi
Tarwa n ugafa n tefriqt imuɣtarben di Al-yamen nemmren ddur n Dzayer ɣef usemneɛ-nnsen
Dzayer – Nemmren tarwa n ugafa n tefriqt yetteddren di Al-yamen ɣef usemneɛ-nnsen ɣer tmurt-nneɣ ass n Ssabt. Sdeffer n tmenɣiwin yessudrent lqalt n laman di « Sanɛa ». Mani staɛrfen yudan-ay yettufukken s tikli a tugur Dzayer di temsalt-aya, ɣef laḥsab-nnsen gi d-utlayen i « APS ». Mani ad naf Hiba Ferḥat si Tunes d taɛezrit lal n wis 21 n yiseggasen. D tanelmadt deg tussna d udawi tennad « Tanemmirt i safart n Dzayer di Al-yamen yellan s lajhud-nnes rgeɣ-d xater laman deg-s ur yelli », terni tennad « Twawteɣ ɣef ufus n tarbaɛt timselḥet di Sanɛa » Ma yella Mass Yeslam Ḥamud seg Muritanya ila-nnes wis 30 d yiseggasen. Yella ixeddem di tiddukla n usaɛef n yudan mani akk d netta inemmer Dzayer nezzeh ɣef usemneɛ n yudan iberraneyen yetteddren di Al-yamen. Arni yesstaɛref s wa yessgurayen di tmafagt n Dzayer ireffden imsebriden di laḥawl uɛrent. Ɣef uɣir yict Massa nissa seg Maṛṛuk ɣer-s sen n tarwa-nnes « Tnemmer ddult n Dzayer ɣef usurif-ay » Ma yella Muḥamed Xames seg Tunes d aɛezri bu ( 27 n yiseggasen ) yella ixeddem di ttijart di Al-yamen yennad « Ass-a gi nečč di Dzayer, yeɛni nečč di lahna d laman ». Ad nesmekti asurif-ay n usemneɛ deg-s wis 160 yidzireyen, d wis 40 yitunseyen, d wis 15 yimuritaneyen, d wis 8 yilibeyen, d wis 3 yimeṛṛukeyen, arn-as wict d Afalastini. Yudan-aya gi awḍen ɣer umafag n Hawari Bumedyen laqqan-hen uneɣlaf n lumur n berra Mass Ramḍan laɛmamra d tneɣlaft n taḍamen aɣelnaw d twacult d lumur n tmeṭṭut Massa Munya maslem. U di tmurgit-aya yennad Mass Laɛmamara di temlilit yid n tɣamsa : « S lajhud iɛerrmen n mennawt n yiḥricen n ddult newweḍ ɣer usemneɛ seg Al-yamen ama d yidzireyen d lak d iberraneyen ixeddmen dinni. Asurif-aya yewweḍ ɣer yiswi-nnes sdeffer n ssuɛubat uɛrent di tagrart n Al-yamen Sanɛa ». Aneɣlaf iwekked belli asurif-ay, yusid sdeffer n usenndah sɣer uselway n tugduda yellan - amek i d-yenna - « Yeḍfer tikli-aya amek tugur ussan ifaten ». Arni iweḍḍḥed Mass Laɛmamara belli tamahilt-aya nettat « Anthalli deg yudan, mani netqedd ad nessemneɛ idzireyen tqiman di Al-yamen d yimḍebbren n safart tadzayrit di Sanɛa arnas tarbaɛt seg yimuɣtarben hyiḍ d yimeɛcar seg Tunes d Muritanya d Maṛṛuk d Libya d Falastin ». Yerni yeqqar « Yudan-a a yellan nerfed faten ɣef Al-qahira al di awḍend ɣer Dzayer». Ma ɣef useqsi, awelli ad mmugent timhilin hyiḍa deg yimal, yuɛad uneɣlaf belli « Idzireyen yellan xsen ad d-wellan ɣer tmurt newwi-hend » . Arni iwekked belli « Dzayer ad d-tenɣer ad t-ḥama wad tili yid n tarwa-nnes ani llan ». Ma yella taneɣlaft n taḍamen aɣelnaw d twacult d lumur n tmeṭṭut tennad belli « Yettuwejjed di tmurt-nneɣ ḍuruf d laḥwal lḥlant i ayetmatneɣ Iɛraben yellan nessemneɛ-ihen bac ad wellan ɣer tmura-nnsen di lahna. U sdeffer n listiqbal n yudan ama d Idziyreyen niɣ d Iɛraben ad yusin seg Senɛa di tmafagt iḍeffren alxuṭuṭ n Dzayer. Yuli ɣer tmafagt Mass Laɛmamara d Massa Munya maslem, mani yettunemmer tarbaɛt ta yessgurayen di tmafagt ɣef yexf-nnsen Lɛamrawi Murad. Di timlilit-nnes Mass Laɛmamara yenna fell-as- i (APS) : « Iɣamer arni irafen s tizragt d ttameqqrant amek ad yessemneɛ s laman d lahna tarwa-nneɣ d yudan hyiḍa tarwa n tmura timddukalatin n tmurt »
