Asebter amenzawi

Laṛebɛa, 08 Yebrir 2015 16:06

Lgaz n wesgin (neɣ n weẓṛu): yessefk ad yettwassen wezrar alujisti akken ad tettwaḥrez twennaḍt

LEZZAYER – Tamguri n lgaz n wesgin ( n weẓṛu) teḥwaj tamussni n tidet deg wenrar n wezrar alujisti, ladɣa deg wayen yerzan assefrek n waman ara yettwasqedcen deg wesɣusu ( n yeẓra akk d ulebbes n lebyur s ssiman, ɣef wakken ay d-nnan ass n laṛebɛa tameddit deg Lezzayer Tamaneɣt, yimazzayen n lbiru akanadi yemmuzzgen deg twennaḍt d wafud, Golder Associés.

Deg yineskinen d-qeddmen i lmend n wass n tezrawt ɣef uḥuddu n twennaḍt d wesnerni n lgaz n wesgin d-tessuddes Tiddukla tadzayrit n temguri n lgaz (AIG), wekkden-d yimazzayen-a d akken tasarut n rrbeḥ n yal asenfar n lgaz n wesgin yessefk ad d-yili deg-s wesɣiwes n wezrar alujisti, d win deg yessefk ur tettwaqqan ara tiṭ ɣef tɣawsiwin yerzan aḥraz n twennaḍt.

Ɣef leḥsab n Gabriel Canahai, yiwen seg yineṣṣaḥen n Golder Associés, assexzen d uɛawed n usseqdec n waman yumsen a d-yeffɣen seg lebyur n lgaz n wesgin yessefk ad yili seg lecɣal « yezwaren » deg wayen yerzan asɣiwes n usenfar .

Deg wesɣiwes-a, takebbanit n lgaz yessefk ad textir yerna ad d-sbeyyen seg tazwara amek ara teg i waman yumsen, ɣef wakken d-yenna. Deg tidet, arma iban-d i wumi ara ttwasqedcen waman-a ara d-iban amek ara asen-gen, acku llan aṭas n yiberdan n usekker, ɣef wakken i d-tessefhem Massa Melinda Truskowsky yellan ula d nettat d tamazzayt deg lbiru-a n tezrawin, am wakken d-tenna belli taɣara n waman ur tettbeddil ara sdeffir usekker.

Aman ay sseqdacen deg wesɣusu imeswi zemren ad ten-id-rren yerna ad ɛawden asseqdec-nsen i wesɣusu deg lebyur niḍen, ɣef wakken d-tger tamawt, am wakken ay d-tenna daɣen belli llant tkebbaniyin timarikaniyin i la yettgen aya deg Yiwanaken Yeddukklen n Marikan d ayen ten-yettajjan ad ciḥḥen i waman.

Massa Truskowsky tenna-d dakken afares n wesgin maci d nettat ay d tamguri yettetten aṭas n waman akken ay d-nnan kra seg wid ay yugin aɣellet n lgaz-a imi ay ttwasseqdacen deg-s waman tikkelt kan deg wayen yerzan asɣusu, wanag deg tidet, gar 50 d 60% n waman ay ssekcamen ɣer ddaw tmurt ttarran-ten-id seg lebyur yerna mazal zemren ad ṣelḥen.

Afaris yettwasseqdacen i lmend n wesɣusu imeswi llan deg-s 99,5% n waman, ma d 0,5% ay d-yeqqimen d ifarisen ikruraren ur yettḍurrun ara tazmert, ɣef wakken ay d-tenna seg yidis-nnes Massa Anna Kaniewska.

« Ṣṣifat n yifarisen-a ttwassnent yerna amur ameqran seg-sen ur mgaraden ara ɣef yifarisen nesseqdac deg tudert-nneɣ n yal ass », ɣef wakken ay d-tger tamawt. Deg tidet, assefrek (gd wesɣiwes n wesɣusu akken ad ḥudden tawennaḍt ḍḍfen akud ameqran deg weskasi n wass-a n tezrawt.

Ɣef leḥsab n yimazzayen n Golder Associés, lemmer ad ttwajellelen lenyur akken iwata, ur d-yetteffeɣ ara lgaz ara yessimsen aman n ddaw tmurt.

Yessefk ad dn-nger tamawt dakken Tiddukla tadzayrit n temguri n lgaz tessuddes-d ass-a n tezrawt i lfayda n yesdawanen, n yimazzayen n weḥric n wafud ed yemttekkiyen yemgerraden deg wenrar-a.

Tiddukla tadzayrit n temguri n lgaz tessekcem axeddim-a deg uqaleb n uttekki-nnes deg weskasi ussnan ay yerzan tamsalt n twennaḍt ed lgaz n wesgin. Deg tezwara n wass-a n tezrawt, Mass Rachid Bessaoud, yellan d amaslaḍ deg useqqamu n Tiddukla n temguri n lgaz yerna d amnadi, d amazzay deg twennaḍt, iger-d tamawt dakken tiddukla-a « ur tezmir ara ad teqqen tiṭ ɣef weskasi ay la d-yettilin imir-a ɣef lgaz n wesgin, d tamsalt simal wuɣur d-terra lwelha-nnes akk tmurt, am wakken ur tezmir ara tiddukla-a ad terwel i temsal ay yerzan lateṛ ara d-yeglu waya ɣef twennaḍt ».

Dɣa ɣef waya, tiddukla teɣra-d i yimuzzag ikanadiyen n lbiru n tezrawin agraɣlan n Golder Associés ay yemmuzzgen deg tussniwin n Wakal, n twennaḍt ed wafud.

Isaragen d-yettwaxedmen deg wass-a llan-d akken ad ssnen yemtekkiyen isrusen d ttekniyin ay yeqqnen ɣer weḥraz n twennaḍt deg wesnerni n lgaz n wesgin.

Imazzayen n Golder Associés ay ixeddmen deg lbiruwat n tkebbanit-a n Kanada, n Tefriqt n Wenẓul, n Yiwanaken Yeddukklen ed Pulunya, qeddmen-d titekniyin timxeyyrin deg wenrar n uɣellet n lgaz n wesgin deg umaḍal.

Ti d liḥalat n tidet n temsirin ay d-lemden ed tifratin ay sqedcen akken ad sneqsen lateṛ n wesnerni n lgaz n wesgin ed uɣellet-nnes deg twennaḍt.

Ahil n wemyager-a d win yerzan timsal yemgerraden, gar-asent tignatin n wesnerni n lgaz n wesgin, lateṛ ara d-yeglu waya ɣef twennaḍt, aḥuddu n teɣbula n waman, atḥekkem deg wesɣusu, titekniyin timlellayin n wesɣusu imeswi (am wesɣusu akiwan) akked ttejṛibat icuban aya deg wayen yerzan Lezzayer (timiwa tikiwanin).