Asebter amenzawi

Ssebt, 18 Yebrir 2015 1821

30.000 n yibulisen i usseǧhed n yiɣallen n laman deg 5 n yiseggasen ineggura

LEZZAYER TAMANEƔT – Iɣallen n laman n tmurt rnan-d ɣer-sen 30.000 n yemsulta (ibulisen) deg semmus (5) n yiseggasen ineggura, yerna imsulta-a d wid ay d-yeffɣen seg yiɣerbazen yemgerraden n d wammasen n ussileɣ n temsulta deg tmiwa yemgerraden n tmurt, ɣef wakken ay d-yenna yiwen n ulɣu n Tmehla tamatut n laman aɣelnaw.

Ɣef leḥsab n ulɣu-a, 29.876 n yemsulta, gar-asen 5.004 n yigensas n temsulta (257 n tlawin), 4.048 n yimaswaḍen n temsulta (297 n tlawin), d 20.824 n yimeggiyen n temsulta (2.202 n tlawin) ay d-yettwassilɣen deg tallit gar 2010 d kraḍ n wayyuren imezwura n 2015.

Ajiniṛal-amajuṛ Abdelghani Hamel, anemhyal amatu n laman aɣelnaw, yesselwi 28 n tfagliwin n tuffɣa n yemsulta imaynuten, yerna yenna-d dakken « tamehla tamatut n laman aɣelnaw tettakf azal i ussileɣ imi tawennaḍt n tmurt d tin n tmura ay d-yezzin fell-as ttḥettiment-d ad yili laman ijehden deg yal aḥric n ssrabes n temsulta », ɣef wakken ay d-yettwabder ulɣu-nni.

Iswi « netta d abdad i lmend n wayen teḥwaj tmetti, d aḍman n talwit d lɛafya d uttekki deg wesnerni n tmurt », ɣef wakken ay d-terna teɣbalut-a.

Tannanin n ussileɣ ay ttḍafaren yemsulta imaynuten seg wakk igṛaden « d lɣella n leqraya talqayant aydeg yettunefk wazal i wayen ay teḥwaj tegnit, tarrayin, ttawilat n teɣwalt, assefqed d uqeyyem i lmend n usselhu d ussetrer n tzemmar n yemsulta-a ».

Ɣef leḥsab n ulɣu-a, Ajiniṛal-amajuṛ Abdelghani Hamel « yenna-d dakken tasertit n ussileɣ ay teḍfer Tmehla tamatut n laman aɣelnaw tebna ɣef usseqdec n ttawilat itraren n usselmed ».

Assileɣ n llsas « ur d-iḥuza ara wid ay d-yesfaydin seg ussileɣ yettkemmilen neɣ assileɣ yemmuzzgen [yetxeṣṣeṣen] aydeg llan yemsazwaren i tmerniwt deg wegṛad d usmal ɣer tmezzugin yemgerraden am yimenɣi mgal tejrimt n Internet, tamsulta tussnan d temsulta tateknit, assefqed n tdettit n lekwaɣeḍ (ipaspuṛen, …), imenɣi mgal tehyufin d usserwel n sselɛa, … ».

Ssebt, 18 Yebrir 2015 1934 El Ghazi yettwafren d anmazul n uselway n Usarag aɛṛab n uxeddim

LEZZAYER TAMANEƔT – Aneɣlaf n Uxeddim, n Ussemres d Tɣellist tanmettit, Mohamed El Ghazi, yettwafren d anmazul n uselway n tegrawt tanabḍant (taḥukumit) n weḍfar n yixeddimen n tɣimit tis 42 n Usarag aɛṛab n uxeddim ay ireẓmen ass n ssebt deg Lekwit.

Asarag aɛṛab n uxeddim d aḥric seg Tuddsa taɛṛabt n uxeddim, yerna timmazwert (aṛecceḥ) n Mass El Ghazi akken ad yili d anmazul n uselway deg usarag-a tebded ɣer yid-nnes Lekwit, Qaṭar d Tgelda Tasaɛudit, ɣef wakken ay aɣ-d-ixebber weɣlif n uxeddim.

Mass El Ghazi ad yili d agensas n Ldzayer deg umyager-a ara yeqqimen arma d 25 Yebrir, yerna ad ttekkin deg-s yigensasen n ufares (anabaḍ-imḍebbren n tkebbaniyin-ixeddamen) n 21 n tmura taɛṛabin, d uselway n Tuddsa tagraɣlant n uxeddim, Guy Rider, d waṭas n tugniwin (ccexṣeyyat) taɛṛabin d tegraɣlanin ay ixeddmen deg wenrar n wesnerni n tmetti d tdamsa.

Deg tɣimit-a, ad d-ssukken tiṭ ɣef uṛabul n unemhal amatu n Tuddsa taɛṛabt n uxeddim, Ahmed Lokmane. Azwel n uṛabul-a « Amciweṛ d tmetti: assefɛel n tdukli i lmend n wesnerni d ussemres », yerna d win ay d-yewwin awal ɣef « dduṛ ay tesɛa Tuddsa taɛṛabt n uxeddim deg ussebded n yedles n wemciweṛ d tmetti ama deg uswir adigan, ama deg uswir awaẓi ».

Wid ara yettekkin deg usarag-a ad d-lhun daɣ d tenqiḍin niḍen, ladɣa dduṛ n wemciweṛ d tmetti deg ussejhed n ammesten anmetti (ḍḍmana) d tsertiyin d ttawilat n ferru n wuguren ay sseqdacen deg umaḍal i lmend n usserked n wassaɣen n uxeddim, am wakken ara d-yili ussukku n tiṭ ɣef yiwen n uṛabul ɣef tsuddest (tastṛatijit) taɛṛabt n uxebber d teɣwalt deg wayen yerzan asnerni n tmetti d tdamsa, ɣef wakken ay d-yenna yiwen n ulɣu n weɣlif.

Deg temsalt-a, Mass El Ghazi ad d-iqeddem ttejṛiba n Ldzayer deg wayen yerzan amciweṛ d tmetti i lmend n ussebded n tsertit tanmettit-tadamsant i tmurt, « d ttejṛiba ayyes steɛṛfen lejnas yerna tettwali-tt Tuddsa tagraɣlant n uxeddim d yiwet seg ttejṛibat turbiḥin akk deg umaḍal », ɣef wakken ay d-tenna teɣbalut-a.

Deg tɣimit-a, daɣ, ad yettwafren unemhal amatu amaynu n Tuddsa taɛṛabt n uxeddim akken ad yeḍḍef amkan-a deg kuẓ (ṛebɛa) n yiseggasen ay d-yetteddun.

Ssebt, 18 Yebrir 2015 1855

Tipaza: 250 n yimazzalen deg wezgen n umaraṭun aɣelnaw amezwaru n tikli deg Ḥejṛet Nneṣ

TIPAZA – Ugar n 250 n yimazzalen, seg twilayin yemgerraden, ay yettekkan ass n ssebt, deg uzgen n umaraṭun aɣelnaw amezwaru n tikli, d win ay d-yellan deg temdint n Ḥejṛet Nneṣ, deg twilayt n Tipaza, ɣef wakken ay aɣ-d-xebbren yemsuddsen n tedyant-a.

Timsizzelt-a tella-d deg umeccaq n 15 n yikilumitren, tebda-d seg temdint n Cercal, tfuk deg usarir n tɣiwant n Ḥejṛet Nneṣ yerna tɛedda ɣef temdint n Sidi Ɣilas. D amazzal Ferane Mustapha ay irebḥen deg-s s wakud n 44 n tedqiqin d 51 n tsinin.

Amkan wis sin n temsizzelt-a n uḍar iṣaḥ-d Samar El Houari s 44 n tedqiqin d 53 n tsinin, ma d amkan wis kraḍ d win Merzouki Hamza s 45 n tedqiqin d 10 n tsinin.

D tikkelt tamezwarut aydeg ara d-tili temsizzelt am ta, yerna d Agraw aɣerfan n tɣiwant n Ḥejṛet Nneṣ ay tt-id-yessuddsen s wemɛawen d tiddukla n yilemẓiyen n temdint-a. Iswi n temsizzelt-a d « asnerni n yirmuden inaddalen deg tɣiwant-a n yiri n lebḥeṛ », ɣef wakken ay d-tenna teɣbalut-a.

Seg yidis-nnes, anemhal n tuddsa tanaddalt d wemsazwar n Tfidiṛalit tadzayrit n tatlitit, Chaouki Achouri, yeckeṛ-d tadyant-a « turbiḥt », ladɣa imi « ay ttekkan deg-s medden s waṭas » yerna abrid-nnes igerrez, ɣef wakken ay d-iger tamawt, yerna yenna-d dakken « 191 n yimazzalen ay yewwḍen arma d izirig n wawwaḍ ».

Lḥedd, 19 Yebrir 2015 1012 Lbumba deg Afɣanistan: Ban Ki-moon iwet-d deg « tenṭagt-a taweḥcit »

NEW YORK – Amaru amatu n Yiɣlanen Yeddukklen Ban Ki-moon yessaẓer (inedded) s « teqseḥ tameqrant » tanṭagt-nni tanɣimant ay d-yellan ass n ssebt deg temdint n Jalalabad deg wegmuḍ (ccerq) n Afɣanistan aydeg mmuten, ma ulac, 33 n yemdanen, yerna jerḥen azal n meyya, yerna isemma-as « tanṭagt taweḥcit ».

« Amaru amatu iwet-d s teqseḥ tameqrant deg tenṭagt-a taweḥcit ay d-yellan ass n ssebt deg Jalalabad, deg temnaḍt tafɣanit n Nangarhar », ɣef wakken ay d-yenna ulɣu ay d-yessuffeɣ uneṭṭaq n Mass Ban, am wakken ay d-yenna dakken Amaru amatu n Yeɣlanen Yeddukklen iger-d tiɣri akken imḍebbren n uxeddim-a « ad ɛeddin dindin deg ccṛeɛ ».

Mass Ban iɛezza « seg wul » tiwaculin n wid ay tḥuza tenṭagt-a d unabaḍ (lḥukuma) afɣani, am wakken ay d-iger tiɣri i wakk Afɣaniyen akken « ad qqimen ddukklen akken ad agin rrebrab d tiḍḍurfa yesseqdacen iɣil ».

Tella-d tenṭagt-a s usṭerḍeq n yiwet n lbumba sdat yiwet n tbanka deg Jalalabad, deg wakud aydeg ay d-usan yixeddamen akken ad d-jebden lexlaṣ-nsen, ɣef wakken ay d-yenna yemḍebber n temsulta deg temnaḍt-a, Fazal Ahmad Shirzad.

Lḥedd, 19 Yebrir 2015 0952

Algérie Télécom: Ixeddimen n uṭramway n Mestɣanem sqamen-d lexṣara n 9 n yimelyunen n yidinaṛen

MESTƔANEM – Takebbanit n Algérie Télécom texṣer, deg tezwara n 2015 deg Mestɣanem, azal n 9 n yimelyunen n yidinaṛen ɣef ljal n yixeddimen n uṭramway, ɣef wakken ay aɣ-d-nnan ass n ssebt sɣur tmehla n twilayt n tkebbanit-a.

Ixeddimen n uheyyi n ubrid ayseg ara iɛeddi uṭramway n Mestɣanem llan-d d ssebba i ugzam n lexyuḍ n Internet d wid n usawal ay iɛeddan ddaw tmurt deg waṭas n yigmamen n temdint-a am Salamandre, Xerruba, Cemmuma, Tijdit d Wad Lḥadayeq, ɣef wakken ay d-yenna yemkellef s teɣwalt n tmehla n twilayt n Algérie Télécom.

Ula ma llant-d acḥal n temliliyin d yimḍebbren n tkebbanit ay d-yelhan s lebni n uṭramway, ula ma fkan-as i tkebbanit-a iɣawasen (leblanat) n yiẓeḍwan n lexyuḍ n usawal d Internet, 11 n tikkal ay ttwagezmen lexyuḍ deg 4 n wayyuren imezwura n useggas n 2015, dɣa d aya ay igezmen asawal usbiḍ neɣ Internet i 8.250 n yimesqedcen, ɣef wakken ay d-tenna teɣbalut-a.

Ccetkan-d yimectura i Algérie Télécom ɣef yinegzumen-a, yerna iṣeggamen n tkebbanit lhan-d d uṣeggem-nsen deg ddaw n 48 n tsaɛtin, ɣef leḥsab n yimḍebber-a.

Testenya Algérie Télécom amtawa d tkebbanit-a n lebni akken, mi ara tṣeggem Algérie Télécom ayen ay ixeṣren, takebbanit-nni n lebni n uṭramway ad as-d-teɣrem lexṣara-nnes.

Lḥedd, 19 Yebrir 2015 1018

Qrib ad d-teffeɣ tmawalt deg s tutlayt n yezmulen i yiɛeẓẓugen d wid ixuṣṣen deg tmesliwt

WAD SUF – Ur tettɛeḍḍil ara ad d-teffeɣ tmawalt s tutlayt n yizmulen, ɣef wakken ay d-yenna uneɣlaf n temsetlelt taɣelnawt, n twacult d tegnit n tmeṭṭut, Mounia Meslem, ass n ssebt deg Wad Suf.

Deg yijifeṛ n tfagla n urẓam n yiwen n uɣerbaz i yigerdan iɛeẓẓugen deg uqaleb n wass amezwaru n terzi n uxeddim deg tama-a, Massa Meslem tenna-d dakken assuffeɣ n tmawalt-a ad tettekki deg wesdukkel n tutlayin n yezmulen deg wakk timiwa n tmurt ɣer yemdanen-a ay yeḥwajen lemɛawna ibanen.

« D tikkelt tamezwarut aydeg ara d-yettwaxdem waya deg Ldzayer, yerna axeddim-a ad yili d netta ay d llsas awḥid i usselmed deg wammasen yemmuzzgen [yetxeṣṣeṣen] deg waya », ɣef wakken ay d-tenna tneɣlaft.

Tenna-d daɣ dakken adlis-a n usselmed ad yerẓem abrid i uheyyi n yedlisen yemmuzzgen niḍen i lfayda n yemdanen-a, d idlisen ara yerzun imecwaṛen yemgerraden deg welmad-nsen, yerna aya ad asen-yeḍmen ad rebḥen deg tudert am yemdanen niḍen ay isellen.

Aɣerbaz-a n yigerdan iɛeẓẓugen terẓem-it tneɣlaft n temsetlelt deg uqaleb n useggas aɣurbiz 2014-2015 deg tɣiwant n Rgiba ay d-yezgan 30 n yikilumitren deg ugafa utrim n twilayt n Wad Suf, yerna yesɛa uɣerbaz-a 80 n yimukan, ɣef wakken ay d-sfehmen i tmagla ay d-yeddan d tneɣlaft.

Lebni n uɣerbaz-a yesqam-d 120 n yimelyunen n yidinaṛen, yerna ad ilin deg-s yinelmaden idaxliyen, inelmaden uffiɣen d wid ara yettetten imekli din. Aɣerbaz-a ad xedmen deg-s 37 n yixeddamen, gar-asen 15 n yixeddamen imezgiyen d 22 n yixeddamen ara ixeddmen s leɛqed n tguri.